Ben-hadad, raja Siria myamunmun ker Israel sya. Ḇape, Nabi Elisa ḇyuk swarapepen ker ḇe raja Israel, inja fyasparbur raja Siria. Ben-hadad imbe dun fasis Elisa i. Snar ifawi Elisa isya ro mnu Dotan, rarirya iwan sordade Siria sya fa sfor Elisa i.

Snonkaku Siria sra ḇe Dotan ro roḇ ya. Ro meser arwo ya, fafisu Elisa manfamyan ḇyedi syae mundi, myam mboi sordade Siria siyarwarek mnu ani kwar. Imkak kaku ma ikofen, ’Elisa e, na koḇe rariso?’ Elisa doḇe, ’Ḇefnoḇek konsya sibor syadi ro ḇefnoḇek si sya.’ Fyorya beri, Yahwe ḇye Elisa manfamyan ḇyedi fa myam kuda ma kereta mamun ḇesak ro bon ḇeyarwarek mnu ani.

Sordade Siria siḇe sfor Elisa. Inja, Elisa ḇyenadi ḇo doḇe, ’Yahwe yo, ḇe si fa smam nko ḇa.’ Fafisuya beri, sordade ansi jadi fa smam sko ḇa ma siḇoryae snar sifawi moḇ sroro ya ḇa. Elisa ikofen ḇe si, ’Mkombran sasar. Mkoso aya, na yun mko ḇe  snonkaku mkosewar i.’ Siso Elisa isof ro Samaria, moḇ raja Israel ḇyarek ro ya.

Insape sifawi moḇsai sisya ro ya, mboi siwarai kwar. Raja Israel ifuken Elisa, ’Fandun fa yamun si ke?’ Elisa ḇyuk swaf ine fa myunsu snonkaku ḇeyakḇefor i ke? Oroḇa. Elisa doḇe, ’Mun awer si. Fan si ma wawansi fa sibur.’ Inja, Raja ifrur munara ḇeba faro si ma iwan si fa sibur ḇe rum sena.