Ro mnu Niniwe ro Asiria snonkaku ḇero diansya siḇarḇor kaku. Inja, Yahwe iwan Nabi Yunus fa rya ḇyuk swarapepen ḇe si insama sifadwer kenem sena. Ḇape, Yunus ifrar ibur ḇe moḇ ḇese. Dek kapal ḇeyayun ḇe Tarsyis.

Ro soren ya faduri, wamdoḇer ipok myun kapal ani, ma ḇefararur ro kapal sya simkak kaku. Senadi ḇe allah sedi ma sifuken, ’Rosai ḇefnai roi ḇeḇesya nane ndarirya?’ Ḇarpurya, Yunus ikofen ḇe si, ’Ayaiso ḇesasar ya. Yafrarbur fararur Yahwe ḇyuk ḇe ayanya. Mkosawen aya mura ḇe soren ya, ma nari wamdoḇer ine ibrin.’ Simewer sisawen i, ḇape Yunus idif ker si. Rofyor sisawen i ḇe soren ya do, wamdoḇer ani ibrin.

Yunus kyara na imar kwar. Fyor imbe imbrur, ḇyenadi faro Yahwe. Ramnai, Yahwe fyarem in ḇeba oso. In anya doren Yunus i, ḇape imar ḇa. Ro in anya sasop ḇyedi, Yunus ḇyenadi, ’Yaḇeasas nari yasouser ḇesya kwar faro Au.’ Yahwe kyadaunwarek Yunus fyor isya ro in sasop ḇyedi swaf ras rikyor. Mura, Yahwe iwan in ani fa iḇayorem Yunus i ḇe bonde.

Ramnai, Yahwe iwan Yunus i wer fa rya ḇe Niniwe, ma Yunus isouser. Rya ḇe diwa ma ikofenḇair snonkaku ḇeḇarḇor  ansya ḇo doḇo, ’Ro ras ri 40 wer, nari Niniwe ḇyeḇemkok.’ Mura, roi Yunus kyara ḇa na neḇejadi. Snonkaku Niniwe srower ma sifadwer kenem sena. Raja Niniwe ikofen ḇe kawasa ḇyesya, ’Mkofararyor faro Allah, ma mkombror. Imbude nari myun pres ko ḇa.’ Rofyor Yahwe myam marandor sena, imkok mnu Niniwe ani ḇa.

Yunus imsor snar mnu ani ḇyeḇemkok ḇa. Kwarapan: Yahwe ḇyekaḇaḇaḇ ma iswar Yunus i kwar, ḇape Yunus iswar snonkaku Niniwe sya ḇa. Rya ḇe mnu ani bandiya ma kyain ro rokaker bakdi ḇesur famfnom ḇaḇdi kuker mka ḇe papanuf. Mura rokaker ani imar, ma Yunus imsore. Inja Yahwe ikofen ḇe i, ’Waswar syadi rokaker anine ro snonkaku Niniwe sya. Yaswar si, inja sismai fasaspar.’ Rosai farkarkor ya? Snonkaku Niniwe sya sifandun syadi ro rokaker na.