1, 2. Fakfuken rosai fandun fa wafuken ro mankundaw, ma rosai ḇefnai fa inema roi ḇefandun kaku?

RO FARKARKOR Refo bedi, wafawi kwar snonkaku ḇeḇor sikofenḇadir sisyom ḇe Allah ḇape kakuya farkarkor ma rosai sifrurna ima roi Allah dayinna. (2 Korintus 6:17) Ine ḇefnai fa Yahwe iwan ko fa kosaebur ro agama ḇekakuḇa, iso ”Babel Ḇeba”. (Fasasna Faro Yohanes 18:2, 4) Rosai nari wafrurna? Mankunko oser-oser na kokinfir, ma kofuken ro mankunko, ’Yamarisen yasyom Allah kuker nyan Ḇyedi ke, ḇaido yamarisen yasyom ḇe I kuker nyan ayena monda ke?’

² Wasaebur kwar ro agama ḇekakuḇa ido, ipyum kaku. Ḇape imbude fararur ma rari ḇero agama ḇekakuḇa naisya kaker ro swaruser ḇena ma wamarisen kaker na. Mkorama kowawos kuker fararur ma rari ḇeḇeso ro agama ḇekakuḇa ma na kofarkor rosai ḇefnai fandun kaku fa komam roi nane roro mamam Yahwe ḇyedi.

3. (a) Rosai ḇefnai fa snonkaku ḇeḇeso sḇaḇir samswen fa simnai sḇuk samsyom kuker amfyainir? (b) Rosai Refo ikofen kuker ḇaḇesamsyom ḇe Allah kuker amfyainir?

³ Fyoro kwar snonkaku ḇebor sya sḇuk amfyainir ḇaido sfasos moḇ oso fa sikfarsyom ḇe Allah. Iso wafrurya ido, imbude rofyor wasyom Allah kuker roi naneḇa na waḇaḇir wafrur sasar kwar. Ḇape waswarepen, Yahwe fyarkor ko kuker nyan rariso kosyom ḇe I. Ma Refoya  fyasnaḇadir ḇeko kwar snar Yahwe imarisenḇa fa kosyom ḇe I kuker amfyainir.—Wasya Keluaran 20:4, 5; Mazmur 115:4-8; Yesaya 42:8; 1 Yohanes 5:21.

4. (a) Rosai ḇefnai fa kosyom awer ḇe snonkaku ḇemar kwar sya? (b) Rosai ḇefnai fa Yahwe ikofen ḇe kawasa ḇyesi pok fa sawos awer kuker snonkaku ḇemar kwar sya?

⁴ Snonkaku ḇeḇeso sḇuk oras nabor ma samambraḇ sena fa sifrur marisen snonkaku ḇemar kwar sya. Syadiwer na sisyom si. Ḇape kofarkor kwar snar snonkaku ḇemar kwar sya sifnoḇek koḇa ḇaido sifrur roi ḇeḇyeḇa ḇeko ḇa. Sikenem kaker ro moḇ ḇeseḇa. Kaku ya, ine na nafnai samswen ḇeko rofyor kawos kuker si snaro ananun ḇerama ro karyer ḇemar kwar sya ndrama ro hantu-hantu sya. Ine iso ḇefnai fa Yahwe iwan snonkaku Israel sya fa sawos awer kuker snonkaku ḇemar kwar sya ḇaido kuker nyan ḇese ḇefesepen kuker hantu-hantu sya.—Ulangan 18:10-12; mam Fasfas Ḇepupes 26 ma 31.

5. Rosai na ḇefnoḇek au fa wamnai buk samsyom ḇe Allah kuker amfyainirya ma wamnai wasyom snonkaku ḇemar kwar sya?

⁵ Rosai na ḇefnoḇek au fa buk samsyom ḇe Allah kuker amfyainir werḇa ḇaido wamnai buk samsyom snonkaku ḇemar kwar ḇansi? Fandun fa wawasya Refoya, ma kwara pyum kuker rariso Yahwe myam roi nane. Myam si ḇe ”roi dayin kaku” ḇaido imarisenḇa kaku. (Ulangan 27:15) Ḇenadi ḇe Yahwe ro ras ḇe ras fa ifnoḇek au fa mam roi nane mnis kuker mamam ḇyedi ma buksyom ḇe I ro nyan imarisenna. (Yesaya 55:9) Na wakyar kaku nari Yahwe ḇyuk ḇe au samambraḇ fa wapampum roi nakam ḇefesepen kuker ḇaḇesamsyom ḇekakuḇa.

6. Rosai ḇefnai fa ras ḇeḇe 25 paik Desember skinfir fa sifrur warek ras Yesus ḇyedi?

⁶ Natal iso oser ro ras ḇeba sifrurna ro supswan  ḇesiper, ma snonkaku sya skara inema ras Yesus ḇyeḇeaḇen ya. Ḇape kakuya ras Natal ḇefesepen kuker agama ḇekakuḇa. Syap ensiklopedia oso fyasnaḇadir snar snonkaku kafir ḇero Roma sya sifrur ras ulang taun ori ya ḇyeḇeaḇen ro ras ḇeḇe 25 paik Desember. Manfarkin agama sya simarisen fa snonkaku ḇekafir sya sakḇe Kristen, inja Yesus ḇyeḇeaḇenḇa ro ras ḇeḇe 25 ro paik Desember rariryano, sun snemuk oser fa sifrur ras Yesus ḇyedi ro paik ani. (Lukas 2:8-12) Yesus manfamyan ḇyesi sifrur ras Natal ḇa. Syap oser fyasnaḇadir snar rofyor 200 taun Yesus ḇeḇeaḇen kwar ramnai, ”snonkaku oso ḇaberi ḇefawi, ma snonkaku ḇeborḇa ḇemarisen ḇefawi, ras risai Yesus ḇeaḇen ya.” (Sacred Origins of Profound Things) Taun utin ḇyenande kwar rofyor Yesus ikenem ro supswan ramnai insape snonkaku sya sifrur ras Natal ya.

7. Rosai ḇefnai fa snonkaku Kristen sifur ras Natal ya ḇa?

⁷ Snonkaku sibor sifawi snar ras Natal ma tradisi ḇyena neknam ro farkarkor kafir, imnis raris festa ma sifaremyaye hadiah. Imnis raris, ro Inggris ma Amerika, ro fafisu ya sidwarek si fa sifrur ras Natal awer snaro ḇeknam ro farkarkor kafir nairi. Snonkaku oso ifrur ras ani pdef ido na isma samamyai. Ḇape ḇarpur wer snonkaku sya sifrur Natal kaḇer. Rosai ḇefnai fa snonkaku Kristen sya sifrur ras Natal ineḇa? Snaro simarisen fa sifrur Allah sne ḇyedi imarisen ro roi nakam sifrurna.

8, 9. Rosai ḇefnai fa snonkaku Kristen ro randak ya sifrur ras ulang taun ya ḇa?

⁸ Ras ḇeba ḇese snonkaku ḇebor sya sifrurna iso ras ulang taun sena. Fandun fa snonkaku Kristen sya sifrur ras ulang taun ke? Ras munara ulang taun sfas ro Refo ḇefrur ya iso snonkaku ḇesyom ḇe Yahwe I ḇa. (Kejadian  40:20; Markus 6:21) Snonkaku sya sifrur ras ulang taun fa sesyowi allah-allah ḇekakuḇa. Iso ḇefnai fa snonkaku Kristen ro awar randak ya ”skara snar ḇaḇefrur ras ulang taun ro snonkaku oso ima rari ro snonkaku kafir”.—The World Book Encyclopedia.

⁹ Snonkaku Roma ma Yunani ḇekwar sya sikyar snar mankun rur oso isya rofyor snonkaku oser ḇyeḇeaḇen ma mankun rur ani nari ḇyekadaun i ro ras-ras kankenem ḇyedi. ”Mankun rur ani ḇyefesepen kuker dewa ḇeḇeaḇen ro ras ḇemnis kuker snonkaku oso,” fasnaḇair ḇero syap The Lore of Birthdays (Kakakyar Kuker Ras Ḇaḇeaḇen).

10. Rosai ḇefnai fa snonkaku Kristen ro baboine sifrur ras ulang taun ḇa?

¹⁰ Karkara bedi rariso, Yahwe imarisen faro ras ḇeba ḇefesepen kuker agama ḇekakuḇa ke? (Yesaya 65:11, 12) Aroḇa, rariryaḇa. Iso ḇefnai fa kofrurḇa ras ulang taun ḇaido ras ḇeba ḇesena ḇefesepen kuker agama ḇekakuḇa.

11. Rosai ḇefnai fa snonkaku ḇebor sya sifrur ras-ras ḇebaya? Rosai na ḇe roi ḇefandun kaku ḇe au?

¹¹ Snonkaku ḇebor sya sifawi knam ro ras Natal ma ras ḇeba ḇesena, ḇape sifrur kaker ras ani. Skara snar ras ḇeba ḇyuk swaf ḇepyum fa sifanjur kayam kuker kina sesi. Karkara bedi rarirya kako ke? Sasar ḇa fa buk oras fa wafanjur kayam kuker kina ḇesi. Yahwe iso ḇeḇedaw kina ya, ma imarisen fa kokenem pyum kuker kina koḇesi. (Efesus 3:14, 15) Imbape, fandun syadi fa kofaduru ḇabebati koḇena kuker Yahwe iḇye syadibur kofrur karyer koḇesi simarisen kuker kofrur ras ḇeba ḇeknam ro agama ḇekakuḇa. Iso ḇefnai fa manwawan Paulus ikofen,  ”Mkoḇesewar fa mkomamḇaḇir rosai ḇefrur sneprei faro Allah.”—Efesus 5:10.

12. Rosai ḇefnai fa Yahwe imarisenḇa faro ras ḇeba oso?

¹² Snonkaku sibor skara snar ras ḇebaya ryama ro moḇ sairirya inema roi ḇefandun ḇa, ḇape Yahwe kyara rarirya ḇa. Imarisenḇa faro ras ḇeba ḇerama ro agama ḇekakuḇa ḇaido ḇesandik snonkaku ḇaido kapkop ro er-er na. Imnis raris, snonkaku Masir sya sna ras ḇeba nabor sifrurna faro allah-allah ḇekakuḇa sena. Rofyor er Israel sya sisasyar ro sup Masir, sfarari oser ro ras ḇeba kafir sena ma sapna ḇe ”munara oso ḇe Yahwe”. Ḇape Yahwe ḇyuk samamyai ḇesi faro rosai sifrurna. (Keluaran 32:2-10) Raris nabi Yesaya ikofenna, fandun fa ”mkopan awer roi ḇesrenḇa na!”—Wasya Yesaya 52:11.

13. Fakfuken rosai wasmana rofyor wun snemuk fa wamnai wafrur ras ḇeba na?

¹³ Rofyor wun snemuk fa wamnai wafrur ras ḇebaya, na wasma fakfuken nabor. Imnis raris: Rosai fandun fa yakofenna rofyor min fararur ayesi sifuken ḇe aya rosai ḇefnai fa yafrur ras Natal kuker si ḇa? Rosai na yafrur ya rofyor snonkaku oso ḇyuk hadiah Natal ḇe aya? Rosai fandun fa yafrur ya rofyor swa yedi dor ḇe aya fa yafrur ras ḇeba ya? Rariso yafnoḇek romawa ayesi insama sfafardun awer snaro sifrur ras ḇeba oso ḇaido sifrur ras ulang taun sena ḇa?

14, 15. Rosai na wafrur ya rofyor snonkaku oso ikofen aroo faro ras ḇeba oso ḇaido ḇyuk hadiah ḇe au?

¹⁴ Fandun fa kokara resari insama kofawi rosai na kokofenna ḇaido kofrurna ro fafisu oso. Imnis raris, rofyor snonkaku sya sikofen aroo faro ras ḇeba oso ḇe au, wabur awer si. Wakofen monda, ”Kasumasa”. Ḇape rofyor snonkaku ya imarisen fa ifawi nabor wer ido, fandun fa  wafasnaḇadir rosai ḇefnai fa wafrur ras ḇebana ḇa. Imbape, wawos pyum, kuker fawinanem, ma wafasna syowi ya. Refoya ikofen, ”Iḇye mkawawos kuker saswar, ma wos anna mbuar awer, isof mkofawi, rariso nari mkokarem faro snonkaku oser-oser.” (Kolose 4:6) Au kako na wafasnaḇadir snar wamarisen buk oras fa ḇekayamyam kuker snonkaku ḇese sya ma buk hadiah ḇesi ḇape na wakinfir monda ras ḇefespen kuker ras ḇebaya ḇa.

¹⁵ Rosai na wafrurna rofyor snonkaku oso ḇyuk hadiah ḇe au? Ro Refoya sfas sasoser oser-oserḇa kuker rosai na kofrur ya, ḇape ikofen monda fandun fa kofaduru sneuser ḇeḇye koḇena. (1 Timotius 1:18, 19) Imbude ono sisya sḇuk hadiah ḇe au ḇape sifawiḇa snar auma wafrur ras ḇebaya ḇa. Ḇaido ikofen, ”Yafawi wafrur ras ḇebaya ḇa, ḇape yamarisen yaḇuk monda hadiah ine ḇe au.” Ro fafisu suine, na wun snemuk fa imbe wun hadiah ya ke aroḇa. Ḇape rosai snemuk wunna, fandun fa wafaduru sneuser ḇeḇye bedi. Komarisenḇa fa kofrur rosai rirya monda na ḇenawyaye ḇaḇebati koḇena kuker Yahwe I.

16. Rosai na wafrurna rofyor kina ḇesi sifrur ras ḇeba ya?

¹⁶ Rosai na wafrurna rofyor kina ḇesi sifrur ras ḇebaya? Wawos sampampum awer si. Waswarepen, sisma hak fa sun snemuk kuker rosai simarisen fa sifrurna. Wafrur pyum si ma ḇesyowi rosai skinfir na imnis wamarisen sikako sesyowi au. (Wasya Matius 7:12.) Ḇape rofyor kina ḇesi sidif au fa buk swaf fa ḇekayamyam kuker si ro ras ḇeba ya, rosai na wafrur ya? Wun snemuk ḇaim, ḇenadi ḇe Yahwe wor fa ifnoḇek au fa wun snemuk ḇepyum. Kwara kuker fafisu ine, ma wafrur riset ḇepyum kuker roi ine. Waswarepen, fandun fa wafrur rosai Yahwe imarisenna.

17. Rosai na wafrur fa wafnoḇek romawa ḇesi rofyor smam snonkaku ḇesesya sifrur ras ḇebaya?

 ¹⁷ Rosai wafrurna fa wafnoḇek romawa ḇesi rofyor smam snonkaku ḇese sifrur ras ḇebaya? Ro fafisu ḇepyum, na wafasos fa buk roi ḇepyum oso ḇesi. Na buk roi ḇepyum ḇeyun raryaḇ ḇesi. Ma roi ḇepyum kaku oso na buk ḇe romawa ḇesi iso oras ma saswar ḇena faro si.

18. Rosai ḇefnai fa koso ro fananjur Kristen ya?

¹⁸ Infa kofrur Yahwe imarisen ido, fandun fa kopampum agama ḇekakuḇa ma roi ḇefesepen kuker i raris ras ḇeba ma rari sena. Ḇape ko kako fandun fa kombran ro agama ḇekaku. Rariso? Nyan oser ya iso koso ro fananjur Kristen ro ras ḇe ras. (Wasya Ibrani 10:24, 25.) Fananjur inema ḇar ḇefandun kaku ro agama ḇekakuya. (Mazmur 22:22; 122:1) Na kanun yayeko rofyor koso kayam ro fananjurya.—Roma 1:12.

19. Rosai ḇefnai fandun fa wakofenḇadir napnapes wafarkor kwar ro Refo ḇe snonkaku ḇesesya?

¹⁹ Ḇar ḇese ro ḇaḇesamsyom ḇekaku iso kawos rosai kofarkor kwarna ro Refo ḇe snonkaku ḇese sya. Snonkaku ḇebor sfafayaf snar roi ḇemaḇak ḇeḇejadi ro supswan ine. Imbude na wafawi snonkaku ḇeḇeso ḇeḇaḇir mnis radirya. Wakofen ḇesi kuker saneraro ḇepyum kaku ro fafisu naiwama. Rofyor waso ro fananjur Kristen ma ḇeḇaryas napnapes ḇero Refo ḇe snonkaku ḇese sya, na waḇaḇir wamarisen werḇa fa waso ro ḇar agama ḇekaku ḇa ma rari ḇyena. Wakyar kaku na wasma marasrisen ma Yahwe nari ḇyeḇarakas rosai wafrur kwarna snar wakinfir fa wasyom ḇe I ro nyan ḇekakuya.—Maleakhi 3:10.