1. Manseiso ḇeḇuk kankenem ya ḇeko?

YAHWE ”iso Allah ḇekenem.” (Yeremia 10:10) Iso Manḇeḇedaw koḇedi, ma ḇyuk kankenem ḇeko kwar. Refoya ikofen, ”Snar aw ḇefrur roi ḇeḇor kam, ma snar marisen ḇedi kako roi ḇeḇor anna neḇefrur kwar ma nakenem.” (Fasasna Faro Yohanes 4:11) Kaku ḇae, Yahwe imarisen insama kosma kankenem ya. Kankenem ya iso roi ḇepyum Allah ḇyuk na ma kosyowi kakuna.—Wasya 1 Timotius 6:13.

2. Rariso na kosma payamyum ro kankenem koḇena?

² Yahwe ḇyuk ḇeko rosai kofandun na insama kokenem pdef, imnis raris roḇean ma aninem. (Farfyar Ro Manwawansya 17:28) Ḇape ibasyadi wer, imarisen kosma raryaḇ ro kenem koḇena. (Farfyar 14:15-17) Infa kona payamyum ro kenem koḇena, fandun fa kosouser Allah parenta ḇyena.—Yesaya 48:17, 18.

3. Rosai Yahwe ifrur ya rofyor Kain myun Habel i?

³ Refoya fyarkor ḇeko snar kankenem koḇena ma snonkaku ḇese sya neḇe syowi kaku ro mamam Yahwe I. Imnis raris, rofyor Kain—Adam ma Eva romawa suḇedi—irmomen kaku faro ḇedar kasun ḇyedi Habel, Yahwe ḇyuk swarapepen ḇe Kain insama imasasor fasawsaw awer. Ḇape Kain ryower ḇa, ma imsor fafayaḇa inja ”ryaḇbos Habel ḇeknik ḇyedi ma myunbos i fa imar”. (Kejadian 4:3-8) Yahwe ḇyuk samamyai ḇe Kain i snaro myun  Habel i. (Kejadian 4:9-11) Inja rarmomen ma ayayin ḇero sne ima roi ḇeḇyeḇa snaro roi nane na nafrurko fa korarmomen ḇaido koḇesnonmamun. Snonkaku oso ḇefrur rarirya nari isma kankenem fyoro ḇa. (Wasya 1 Yohanes 3:15.) Infa kofrur Yahwe sne ḇyedi imarisen, fandun fa kofarkor ma kofasna saswar faro snonkaku syakam.—1 Yohanes 3:11, 12.

4. Rosai oser ro sasoser Allah ḇyuk ḇe er Israel sya fyarkor ḇeko kuker kankenem ya?

⁴ Taun syaran ḇe syaran ḇyenande, Yahwe fyasna snar ro mamam ḇyedi kankenem iso roi ḇyesyowi kaku rofyor ḇyuk Sasoser Risamfur faro Moses i. Oser ro sasoser anna isoine, ”Mkofur mamun awer.” (Ulangan 5:17) Rofyor snonkaku oso myun snonkaku oso ḇese ido, ikako na smuni.

5. Rariso sneḇaḇir Allah ḇyedi faro aborsi ya?

⁵ Rariso sneḇaḇir Allah ḇyedi faro aborsi ya? Syadi wer kankenem ro romawa ḇero snekapar bin oso Yahwe ḇyesyowi kaku i. Ro Sasoser Yahwe ḇyuk faro er Israel sya, Yahwe ikofen rofyor snonkaku oso ifur fa bin oso ma romawa dores ya sumar ido, snonkaku ani na smuni kako. (Wasya Keluaran 21:22, 23; Mazmur 127:3.) Ine ḇyuk farkarkor ḇeko snar aborsi ima roi ḇesasar rirya.—Mam Fasfas Ḇepupes 28.

6, 7. Rariso kofasna ḇe Yahwe I snar kosyowi kaku kankenem ḇyuk ḇeko?

⁶ Rariso na kofasna ḇe Yahwe I snar kosyowi kaku kankenem koḇena ma snonkaku ḇese sya? Kofrur roi oso ḇaberi ḇefrur samswen kankenem koḇena ma snonkaku ḇese sya. Inja na kokun tabaku ḇa ḇaido kan ropum ḇaido kan narkoba ḇa, snaro roi nanekam na nafrur fa kodafduf ma komar.

⁷ Allah ḇyuk kankenem ma baken ḇeko, ma fandun fa koḇukna imnis rosai Allah imarisenna. Inja fandun fa  kofaduru baken koḇedi. Kofrur rariryaḇa ido, na kosrenḇa ro mamam Allah ḇyedi. (Roma 6:19; 12:1; 2 Korintus 7:1) Kosyowi kankenem ya ḇa ido, na kosyom ḇe Yahwe I ḇa, ḇeḇuk kankenem ḇeko kwar. Ibasyadiwer rofyor koḇaḇir samswen fa komnai ro fararur ḇeḇyeḇa ido, nari Yahwe ifnoḇek ko snar koḇensewar kaku kwar fa kofrurna snaro kosyowi kankenem ya.

8. Rosai na kofrur ya snar komarisen ḇa fa koḇuk samswen faro kankenem koḇena ma snonkaku ḇese sya?

⁸ Kofarkor kwar snar kankenem ya iso roi ḇepyum Allah ḇyukna ma kosyowi kaku. Yahwe ikyar kaku snar nari pok fa kofrur roi ḇeḇyeḇa ḇeyun samswen faro kankenem mankun ko ḇaido snonkaku ḇese syaḇa. Kofrur roi nane kuker kosasor pyum ko rofyor kun oto, motor ḇaido ḇesena. Kosampum farfnak olah raga ḇefasna pakpikya ḇaido ḇeyun marmar imnis raris farfnak tinju ḇaido karate. (Mazmur 11:5) Kokako fandun fa kofaduru rum koḇena insama nafnai awer roi ḇesamswen. Yahwe iwan faro er Israel sya, ”Rofyor waḇawes rum ḇebabo oso ido, fandun fa wafrur ayar karui [ḇaido, padwar] ro rum bedi bori, insama nafnai awer nyaki rik ro rum bedi snaro snonkaku oso isapi ro boiya.”—Ulangan 22:8.

9. Rariso nyan kofasnai snar kosyowi kankenem ro aiwan sya?

⁹ Syadiwer nyan fa kofaduru aiwan sya iso roi ḇefandun kaku ro mamam Yahwe I. Iwan ko fa komun aiwan sya fa kan ma kofrur sansun, ma rofyor aiwan sya sifrur roi ḇesamswen ḇeko bisa fa komunsi. (Kejadian 3:21; 9:3; Keluaran 21:28) Ḇape koḇewayam awer si ḇaido komunsi ḇe farfnak monda.—Amsal 12:10.

10. Rariso kofawi snar rik ya fyasnaḇadir kankenem ya?

¹⁰ Rik ya isren ḇe Yahwe snaro rik yama fyasnaḇadiro kankenem ya. Rofyor Kain myun Habel i ramnai, Yahwe  dawos ḇe Kain i, ”Rik ḇeknik bedi dor ḇe aya ro saprop ya.” (Kejadian 4:10) Habel rik ḇyedi fyasnaḇair kankenem ḇyedi, ma Yahwe ḇyuk samamyai ḇe Kain i snar myun Habel kwar. Rofyor Faḇruḇ ro awar Nuh ramnai, Yahwe fyasna kaḇer snar rik ya fyasnaḇairo kankenem ya. Yahwe ḇyuk ḇe Nuh ma kina ḇyesi parenta fa san kraf ro aiwan sya. Ikofen, ”Aiwan ḇembran ma ḇekenem syakam na nḇe roḇean ḇe mko. Imnis raris rokaker ḇerumek, yaḇuk nakam ḇe mko.” Imbape, roi oso Yahwe iwan fa sanna awer, ”Kraf ḇesma kankenem ya monda—rik ḇyena—mkan awer na.”—Kejadian 1:29; 9:3, 4.

11. Parenta rosai kuker rik ya Allah ḇyuk ḇe er Israel sya?

¹¹ Fafisu ri 800 taun rofyor Yahwe ikofen ḇe Nuh i fa san awer rik ya ramnai, Ḇyuk parenta ḇe kawasa ḇyesi wer, ”Snonkaku Israel oso ḇaido snonkaku ro er ḇese ḇebarek ro fandu mko, ḇesewar ma ḇefor aiwan oso ḇaido man sya fa san na ido, fandun kaku fa sisbawer rik sena ma skuḇayekna ro saprop.” Ramnai ikofen, ”Pok fa mkan awer rik ya.” (Imamat 17:13, 14) Yahwe imarisen kaker kawasa ḇyesi smam rik ine ḇe roi ḇesren. Na san kraf ya ḇape rik yama roḇa. Rofyor smun aiwan fa sanna ḇe roḇean, fandun fa sisbawer rik ya ḇe saprop.

12. Rariso mamam snonkaku Kristen kuker rik ya?

¹² Taun ḇeḇeso rofyor Yesus imar ramnai, manwawan ma penatua sya ro sidang Kristen ḇero Yerusalem siryur fa sun wos oser kuker ḇar risai ro Sasoser Alah ḇyuk kwar ḇe er Israel sya, fandun fa snonkaku Kristen sisouser pdef na. (Wasya Farfyar Ro Manwawansya 15:28, 29; 21:25.) Yahwe ifnoḇek si fa sifawi snar rik yama roi ḇesyowi kaker ḇe I ma si kako fandun fa smam kakerna ḇe roi ḇesren. Snonkaku Kristen ḇerandak sya san ḇaido sinem rik ya ḇa ma san kraf ḇesma kaker rik ya ḇa. Inja sifrur rarirya ido, ima roi ḇeḇyeḇa kaku imnis sisyom amfyainir  ḇaido sifrur farḇakbuk ḇemnis ḇa. Ro fafisu ya, snonkaku Kristen spampum fa san ḇaido sinem rik ya. Rariso kuker baboine? Yahwe imarisen kaker insama komam rik ya ḇe roi ḇesren.

13. Rosai ḇefnai fa snonkaku Kristen sya spampum transfusi rik ya?

¹³ Ine kyurfasna snonkaku Kristen sya sikako spampum transfusi rik ya ke? Imbo, kaku. Yahwe iwan ko fa kan ḇaido kinem awer rik ya. Rofyor dokter oso ikofen ḇe au fa winem awer alkohol, na wasun ḇaido kwus naro baken bedi ke? Oroḇa ḇeri! Rarirya kako, parenta fa kan ma kinem awer rik ya ine kyurfasna snar fandun kako fa kopampum transfusi rik ya.—Mam Fasfas Ḇepupes 29.

14, 15. Rosai ḇefnai fandun kaku fa snonkaku Kristen sya sesyowi kankenem ma sisouser Yahwe I?

¹⁴ Rariso rofyor dokter oso ikofen ḇeko na komar snar kosma transfusi rik ya ḇa? Mankun ko oser-oser na kun snemuk fa kosouser parenta Allah kuker rik ya ke oroḇa. Snonkaku Kristen sya sesyowi kaku kankenem Allah ḇyuk ḇesi, ma kosewar nyan ḇese fa kofaduru kenem ya; ḇape na kopampum transfusi rik ya.

¹⁵ Kokame koḇensewar kaku fa kofaduru baken koḇena naprei pdef, ḇape snaro kosyowi kankenem Allah ḇyuk ḇeko, na komarisen ḇa fa kosma transfusi rikya. Kosouser ḇe Yahwe iso roi ḇefandun kaku syadibur kosouser I ḇa snaro kosewar nyan fa kokenem pdef. Yesus ikofen, ”Mansei ḇeḇesewar ḇemyof kenem ḇyedi, nari kenem ḇyedi ryoburi. Mboi mansei kenem ḇyedi ryoburi, ikada nari isma aski.” (Lukas 17:33) Komarisen fa kosouser Yahwe I snaro koswar I. Ifawi rosai ḇepyum kaku ḇeko, ma komam kankenem iso roi ḇesyowi kaku ma ḇesren, imnis raris Yahwe mamam ḇyedi.—Ibrani 11:6.

16. Rosai ḇefnai fa manfamyan Allah ḇyesya sisouser ḇe I?

 ¹⁶ Manfamyan Allah ḇesouser sya sna wos oser fa sisouser parenta Allah ḇyedi kuker rik ya. Na san ma sinem rik yaḇa, ma sisampum rik ya faro pararei sena. * Imbape, na simarisen sisma nyan ḇese fa sifaduru kenem sena. Sikyar kaku snar Manḇeḇedaw kankenem ma rik ifawi roi ḇepyum ḇesi. Au kako wakyar snar Allah ifawi rosai ḇepyum kaku ḇe au ke?

17. Ro Israel, nyan rosai Yahwe imarisen fa snonkaku Israel sya sḇuk rik ya?

¹⁷ Ro Sasoser Allah ḇyuk ḇe Moses i, Yahwe ikofen faro er Israel sya, ”Kankenem ro mankun ḇekenem naisya ro rik ya, ma yarirna kwar ro rofek farsarser faro ḇaḇepayasyos [ḇaido, ḇeyor ampun] ḇe mankun mko, snaro iso rik ḇeyun ḇaḇepayasyos.” (Imamat 17:11) Rofyor er Israel sya sifrur sasar, fandun fa sor ḇaḇepayasyos ro Yahwe roro farsarser aiwan ma sor ḇe imam sya fa sisbawer rik kermkun ro rofek farsarser ro bait. Ine monda nyan Yahwe imarisen fa snonkaku Israel sya sḇuk rik ya ro ḇaḇesamsyom sena.

18. Farsarser rosai Yesus ḇyuk kwar insama kosma saneraro ya?

¹⁸ Rofyor Yesus ryama ḇe supswan, fyadwer farsarser aiwan kuker ḇyuk kankenem ḇyedi, ḇaido rik ḇyedi, fa ḇyepayasyos ḇe sasar koḇena. (Matius 20:28; Ibrani 10:1) Kankenem Yesus ḇyedi iso ḇaḇyak ḇekaki, inja rofyor Yahwe ḇyawes Yesus ḇe nanki raposa, na Yahwe ḇyuk faro snonkaku syakam saneraro fa sikenem fyoro-fyoro.—Yohanes 3:16; Ibrani 9:11, 12; 1 Petrus 1:18, 19.

19. Rosai fandun fa kofrurna insama ’kosren ro rik snonkaku syakam’?

 ¹⁹ Kokofen kasumasa faro Yahwe I snar ḇyuk ḇeko kankenem ḇepyum kaku kosyowi na! Ma komarisen kofawar ḇe snonkaku ḇese sya snar sikyar faro Yesus ido, na sisma kankenem ḇekain fyoro. Koswar snonkaku sya, ma na kofrur rosai riryakam fa kofarkor si rariso na sisma kankenem ya. (Yehezkiel 3:17-21) Inja, imnis manwawan Paulus, kokako na kokofen, ”Aya ine yasren [ro rik snonkaku syakam], yaḇe sasar ḇa faro mansei ryawer nari ḇero ya. Snar yamyaren kaku yaḇaryas Allah marisen ḇyena kam faro mko.” (Farfyar 20:26, 27) Imbo, kofasna kosyowi kaku kankenem ma rik ya rofyor koḇaryas ḇe snonkaku ḇese sya kuker Yahwe I ma rariso Ḇyesyowi kaku kankenem ya.