1, 2. (a) Rosai ḇefrur fa roi ḇepyum oso wasmana ḇyemaeja kaku? (b) Rosai ḇefnai fa fasaspar ya iso roi ḇefandun kaku ḇerama ro Allah?

RO FAFISU oso roi ḇepyum kaku rosai wasmana? Roi ḇepyum ḇeḇemaeja kaku fandunḇa fa skoḇesna kuker ḇaḇyak ḇekaki. Rofyor wasma roi ḇeyun marisen ḇaido roi wafandun kaku na, nari wakofen kasumasa faro roi ine.

² Ro roi nakam Allah ḇyuk kwar ḇeko, roi oso isya kofandun kaku syadibur roi eḇesena. Inema roi ḇefandun kaku faro snonkaku sya. Nari kofarkor ro fasal ine, Yahwe iwan Rumkun ḇyedi, Yesus Kristus insama kosma kankenem fyoro. (Wasya Matius 20:28.) Snaro iwan Yesus ḇe supswan ine, Yahwe fyasnaḇadir iswar kaku ko.

3. Rosai ḇefnai fa snonkaku sya simar?

³ Fasaspar ido nyan fa Yahwe ḇyuk ḇaḇemkey ḇe snonkaku sya ro sasar ma marmarya. (Efesus 1:7) Infa kofawi rosai ḇefnai fa kofandun ḇaḇefasaspar ya, fandun fa kofawi rosai ḇeḇejadi ro taun syaran ḇe syaran naiwara ro yaf Eden. Sinan ḇerandak koḇedi Adam ma Eva sufrur sasar. Snaro sufrur sasar inja sumar. Ko kako komar snaro kosma sasarya ro Adam ma Eva su.—Mam Fasfas Ḇepupes 9.

4. Manseiso Adam i, ma rosai ismana?

⁴ Rofyor Yahwe ifrur snonkaku ḇerandak Adam,  ḇyuk roi ḇepyum kaku ḇe i. Allah ḇyuk kankenem ḇemnis kaku ḇe Adam i. Adam nya swaruser ma ḇaken ḇemnis kaku. Na ipok idufḇa, nari ḇyemansar ḇa, ma nari imar ḇa. Snaro Yahwe ḇefrur Adam i, inja Allah ḇye kma ḇe i. (Lukas 3:38) Ro ras ḇe ras Yahwe dawos ḇe Adam. Allah ikofenḇadir faro Adam rosai imarisen faro i ma ḇyuk ḇe i fararur ḇepyum fa ifrurna.—Kejadian 1:28-30; 2:16, 17.

5. Rosai knam ya rofyor Refo ikofenḇadir snar Adam ḇyeḇefrur ”ro fanir Allah ḇyedi”?

⁵ Allah ifrur Adam imnis ”ro fanir Allah ḇyedi”. (Kejadian 1:27) Yahwe ḇyuk ḇe i rari-rari mankun Ḇyedi imnis raris saswar, fawawinanem, nanapes ma papoik. Allah ḇyuk ḇe Adam i marisen mankun fa kyinfir ro mankundi rosai imarisenna. Adam ima robot risyaḇa. Allah ifrur Adam insama bisa ikinfir ro mankundi rosai ḇenapes ma ḇenapesḇa. Rofyor Adam ikinfir fa isouser Allah pdef ido, na ikenem fyoro ro Firdaus.

6. Rofyor Adam isouser Allah i ḇa, rosai ifrur fa napromes ya? Rariso ine nawyaye ko?

⁶ Fafisu Adam isoasuser Allah i ḇa ma isapi ro samamyai marmar ya, Adam ḇyuk ḇaḇyak ḇekaki kaku. Ḇaḇebati ḇefanam kaku kuker Yahwe I napromes, kankenem ḇemnis kaku, ma rum Firdaus kyain rona napromes kako. (Kejadian 3:17-19) Adam ma Eva sukinfir fa susoasuser Allah i ḇa, inja susma saneraro werḇa. Snar rosai Adam ifrurna, ”sasarya ssyunḇe supswan ine snar snonkaku oser, ma snar sasar ani, ifnai marmarya. Eḇedari marmarya iduḇ faro snonkakusyakam, snar snonkakusyakam sifrur sasar kwar.” (Roma 5:12) Rofyor Adam ifrur sasar, ”byoḇ” mankundi ma ko fa koḇe  women faro sasarya ma marmarya. (Roma 7:14) Na kosma saneraro ya ke? Imbo, nasya.

7, 8. Fasaspar ya ido rosai rirya?

⁷ Rosai fasaspar ya? Fasaspar kyurfasna faro roi ri suru. Ḇeḇeoser ya, fasaspar iso ḇaḇyak fa ḇyuk ḇaḇemkey faro snonkaku oser ḇaido ḇekoḇes kaḇer roi oso. Ḇeḇesuruya, fasaspar iso sasuref warek ḇaido ḇaḇyak ro roi oso.

⁸ Snonkaku oso ḇaḇeri na ḇebak roi ḇesamswen Adam ifrurna rofyor ifrur sasar ma dun marmar ḇeko. Ḇape Yahwe fyasos nyan insama kona fasaspar ro sasar ma marmar ya. Mkorama kofarkor nyan rariso fasaspar fyararur rai ma rariso nun fainda ḇeko.

9. Rariso fasaspar ya neḇebak rai?

⁹ Snonkaku oso ḇaḇeri rofandu ko na ḇeḇuk fasaspar faro kankenem ḇemnis kaku Adam ifrur fa napromes ya. Rosai ḇefnai ya? Snaro kokam snonkaku ḇesasar. (Mazmur 49:7, 8) Fasaspar ya na neḇebak kuker kankenem ro snonkaku ḇemnis kaku oso ḇese. Ine ḇefnai fa sapna ḇe ”imnis sasuref warek sasar ro snonkakusya kam”. (1 Timotius 2:6) Fasaspar ya fandun fa namnis kuker kankenem Adam ifrur fa napromes kwar ani.

10. Rariso Yahwe fyasos fasaspar ya?

¹⁰ Rariso Yahwe fyasos fasaspar ya? Yahwe iwan Rumkun iswar kaku ḇe supswan. Rumkun ani, Yesus, iso braur bramin ḇerandak Yahwe ḇyedi. (1 Yohanes 4:9, 10) Yesus imarisen fa ibur Kmari ma rum ḇyedi ro nanki. (Filipi 2:7) Yahwe fyadwer kenem Rumkun ḇyedi ro nanki ḇe supswan, ma Yesus ḇyeḇeaḇen ḇe snonkaku ḇemnis kaku, nya sasar ḇaḇeri.—Lukas 1:35.

11. Rariso na snonkaku oso ḇyuk fasaspar faro snonkaku syakam?

 ¹¹ Snonkaku ḇerandak, Adam i, ifrur fa kankenem ḇemnis kaku faro snonkaku sya napromes rofyor isoasuser Yahwe I ḇa. Na snonkaku oso ipyos marmar ro Adam romawa ḇyesi ke? Imbo. (Wasya Roma 5:19.) Yesus, ifrur sasar ḇa, ḇyuk kankenem ḇemnis kaku ḇyedi fa ḇyefasaspar. (1 Korintus 15:45) Kankenem ḇemnis kaku ḇyedi na ḇeḇepyos marmar ro Adam romawa ḇyesi kam.—1 Korintus 15:21, 22.

12. Rosai ḇefnai kaku fa Yesus isma kandera ḇemarḇak kaku ya?

¹² Refoya fyasnaḇair rariso Yesus ḇyekandera rofyor imar ḇaim. Isma aprer kuker kaḇrai borek, spai i ro ai kandera, ma ḇyekandera kawan isof ro imar. (Yohanes 19:1, 16-18, 30) Rosai ḇefnai kaku fa Yesus isma kandera ḇemarḇak kaku? Snaro Setan ikofen na snonkaku osoḇa isouser pdef faro Allah rofyor isma fafrowes. Yesus fyasnaḇadir snar snonkaku ḇemnis kaku oso na isouser pdef faro Allah syadiwer rofyor isma kandera ḇemarḇak kaku. Wawasen kada rariso Yahwe imarisen kaku snaro Yesus ḇyuk kankarem ḇepyum kaku!—Amsal 27:11; mam Fasfas Ḇepupes 15.

13. Rariso nyan fa fasaspar ya neḇebak rai?

¹³ Rariso fasaspar ya neḇebak rai? Yesus ḇyuk faro Kmari kankenem ḇemnis kaku ḇyedi. Ro 14 Nisan 33 M, ro kalender Yahudi, Yahwe ryir wararu ḇembroḇ sya smun Yesus i. (Ibrani 10:10) Ras rikyor ramnai Yahwe ḇyebawes i fa ḇyesnonkaku ḇa, ḇape ḇyemankun rur oso. Ramnai, rofyor Yesus kyaḇer wer ḇe Kmari ro nanki, Yesus ḇyuk farsarser ro kankenem ḇemnis kaku ḇyedi faro Yahwe I fa ḇefasaspar. (Ibrani 9:24) Kirine fasaspar ya ḇyeḇebak kwar, kosma saneraro fa koḇemkey buro sasar ma marmar ya.—Wasya Roma 3:23, 24.

14, 15. Rosai fandun fa kofurna insama kosma ampun faro sasar koḇena?

¹⁴ Kosma fainda kwar ro roi ḇefandun kaku ḇerama ro Allah. Mkorama komam rariso kosma fainda ro kirine ma ro fafisu naiwama.

¹⁵ Kosma ampun faro sasar koḇena. Samswen kaku fa kofrur roi ḇenapes pdef ro ras nakam. Na kofrur sasar, ma fafisu oso kokofen ma kofrur roi ḇesasar. (Kolose 1:13, 14) Rariso na kosma ampun ya? Fandun fa kombror kaku ro roi ḇesasar kofrur kwar na ma kuker sne ḇerun kofararyor ḇe Yahwe fa ḇyuk ampun ḇeko. Na kona kakakyar snar Allah ḇyuk ampun kwar faro sasar koḇena.—1 Yohanes 1:8, 9.

16. Rosai fandun fa kofrurna insama kosma sneuser ḇeḇye?

¹⁶ Kosma sneuser ḇeḇye. Rofyor sneuser koḇena ḇeḇair ḇeko snar kofrur roi ḇesasar kwar, na sneḇaḇir koḇena naknon ḇa, syadiwer koḇe snekar ma kokara ro mankunko Allah imarisen ko wer ḇa. Ḇape fandun fa kosusu awer. Rofyor kor ḇe Yahwe fa ḇyuk ampun, na kokyar kaku ryower ma ḇyuk ampun ḇeko. (Ibrani 9:13, 14) Yahwe imarisen insama kokofen ḇe I roi ḇesamswen ma ḇaḇeraryarḇa koḇena. (Ibrani 4:14-16) Bon ya iso, kosma aski ro Allah.

17. Barakas rosai nari kosmana snaro Yesus imar warek kokam?

¹⁷ Kosma saneraro kankenem fyoro. ”Snar marmar irya sasuref ro sasarya; ḇape kankenem ḇekain fyoro-fyoro fnoḇek Yesus Kristus Manseren koḇedi irya fakamaman Allah ḇyuk waworek monda maḇeko.” (Roma 6:23) Snaro Yesus imar warek kokam, inja kosma kankenem fyoro ma kosma pararei ḇemnis kaku. (Fasasna 21:3, 4) Ḇape rosai kofrur kaku ya insama kosma barakas nane?

18. Rariso na kofawi Yahwe iswar ko?

¹⁸ Kwara rariso sneḇaḇir bedi rofyor snonkaku oso ḇyuk roi ḇepyum kaku ḇe au. Fasaspar iso roi ḇefandun kaku ro roi ḇepyum kam, ma komarisen kaku kokofen kasumasa faro Yahwe kuker roi ine. Ro Yohanes 3:16 ikofen ḇeko snar ”Allah saswar ḇyedi ibabos faro supswan ine, isof ḇyuk kwar Rumkun Mandos ḇyedi”. Kaku ḇae, Yahwe iswar kaku ko inja ḇyuk ḇeko Rumkun iswar kaku, Yesus i. Ma kofawi snar Yesus i kako iswar ko, inja imarisen imar faro ko. (Yohanes 15:13) Fasaspar ine ḇyuk kakakyar ḇe au snar Yahwe ma Yesus suswar kaku au.—Galatia 2:20.

19, 20. (a) Rariso na ḇebati kuker Yahwe I? (b) Rariso na wafasnaḇair snar waḇesyowi faro farsarser fasaspar ya?

¹⁹ Snar wafarkor kwar kuker saswar ḇeba Allah ḇyedi, rariso na ḇebati kuker I? Napyan ḇa fa koswar snonkaku oso komambir ḇaim. Yohanes 17:3 ikofen ḇeko snar na komambir kaku Yahwe I. Kofrur rarirya ido, saswar bedi faro I na syambraḇ kaku, na wamarisen fa wafrur fa imarisen ma ḇebati kuker I. Inja wafawi pyum Yahwe I kuker wafarkor pdef Refo ya.—1 Yohanes 5:3.

²⁰ Ḇesyowi farsarser fasaspar Yesus ḇyedi. Refoya ikofen snar ”Mansei ḇekyar faro Rumkunya, isma kankenem ḇekain fyoroya”. (Yohanes 3:36) Rosai knam ro wos ḇekyar faro Rumkun ya? Ine kyur ḇe kofrur rosai Yesus fyarkor fa kofrur na. (Yohanes 13:15) Na kokofen mondaḇa snar kokyar faro Yesus i. Infa koḇesyowi fasaspar ya, fandun fa kofrur kaku rosai kokyar na. Ro Yakobus 2:26, kowasya, ”Kakyar fnoḇek fararur ḇa irya kakyar ḇemar rirya kako.”

21, 22. (a) Rosai ḇefnai fandun fa koso Munara Swarapepen marmar Kristus ḇyedi ro taun ḇe taun? (b) Rosai nari kowawos ro Fasal 6 ma 7?

 ²¹ Koso Munara Swarapepen marmar Kristus ḇyedi. Ro roḇ Yesus imar ḇaim, fyarkor ḇeko fa kofrur munara swarapepen marmar ḇyedi. Kofrurna taun ḇe taun, ma sap iḇe Swarapepen ḇaido ’Anan Roḇ Tuan’. (1 Korintus 11:20; Matius 26:26-28) Yesus imarisen insama koswarepen snar ḇyuk kankenem ḇemnis ḇyedi kwar fa ḇefasaspar ḇeko. Ikofen, ”Mkofrur radine fa mkoswarepen aya.” (Wasya Lukas 22:19.) Rofyor waso ro munara Swarapepen ine, wafasnaḇair snar waswarepen fasaspar ya ma saswar ḇeba Yahwe ma Yesus suḇena faro ko.—Mam Fasfas Ḇepupes 16.

²² Fasaspar ya iso roi ḇefandun ma ḇeba kaku kosmana. (2 Korintus 9:14, 15) Syadiwer roi ḇefandun kaku ine na nun fainda kako faro snonkaku syaran ḇe syaran ḇemar kwar sya. Fasal 6 ma 7 na kowawos rariso roi ine ḇyerarirya.