1. Rosai ḇefnai fa kofarkor kuker malaikat sya?

YAHWE imarisen fa komambir kina ḇyesi. Malaikat sya siso keret ro Allah kina ḇyesi. Ro Refo sap siḇe ”Allah romawa ḇyesi”. (Ayub 38:7) Rosai malaikat sya sifrur na? Rariso sifnoḇek snonkaku sya ro fafisu naiwara? Ma na sifnoḇek ko ro fafisu ine ke?—Mam Fasfas Ḇepupes 8.

2. Ro moḇ risai malaikat sya srama ya? Ḇarḇor seja sefis?

² Fandun fa kofawi ro moḇ risai malaikat sya srama ya. Kolose 1:16 ikofen ḇeko rofyor Yahwe ifrur Yesus i ra-mnai, ”Allah ifrur roi ḇeḇor kam, ro boiyaswa ma ro sup nane.” Malaikat sikako Allah ifrur si. Barbor seja sefis? Refoya ikofen snar barbor seja yuta ri utin.—Mazmur 103:20; Fasasna Faro Yohanes 5:11.

3. Rosai syap Ayub 38:4-7 ikofenḇadir ḇeko kuker malaikat sya?

³ Refoya kako fyarkor ko snar Yahwe ifrur malaikat sya rofyor ifrur supswan ine ḇaim. Rariso sneḇaḇir sena rofyor smam supswan ine? Syap Ayub ikofen ḇeko malaikat sya siryaḇ kaku. Sima sḇekina oser ma skayam fa sefarmyan ḇe Yahwe I.—Ayub 38:4-7.

4. Rariso kofawi snar malaikat sya simarisen fa sifnoḇek snonkaku sya?

⁴ Malaikat sya simarisen faro snonkaku sya ma faro Yahwe marisen ḇyedi faro supswan ma snonkaku sya. (Amsal 8:30, 31; 1 Petrus 1:11, 12) Ine iso ḇefrur fa sefafardun rofyor Adam ma Eva susampum Allah I. Syadiwer ro fafisu ine sefafardun snar smam snonkaku ḇebor  sya sisouser ḇe Yahwe I ḇa. Ḇape rofyor snonkaku oso imbror ma kyaḇer ḇe Allah, malaikat sya siryaḇ kaku. (Lukas 15:10) Malaikat sya simarisen kaku faro snonkaku ḇefarmyan ḇe Allah I. Yahwe iwan malaikat sya fa sifnoḇek ma sikadaun manfamyan ḇyesi ro supswan. (Ibrani 1:7, 14) Mkorama komam farfyar ḇeḇeso.

5. Rariso malaikat sya sifnoḇek manfamyan Allah ḇyesi ro fafisu naiwara?

 ⁵ Yahwe iwan malaikat risuru fa sufnoḇek Lot ma kina ḇyesi fa sifrarbur mnu ḇeba Sodom ma Gomora rofyor ḇyeḇemkok. (Kejadian 19:15, 16) Taun utin ma utin ḇyenande ramnai, nabi Daniel ḇyeḇesawen ḇe der ḇefo kuker singa, ḇape sorn i ḇa snar ”Allah iwan malaikat ḇyedi ma pyanoser singa sya sisḇasna.” (Daniel 6:22) Ḇarpur ya, rofyor manwawan Petrus ismai ro bui, Yahwe iwan malaikat oso fa ḇyuk fasaspar ḇe i. (Farfyar Ro Manwawansya 12:6-11) Malaikat sya kako sifnoḇek Yesus rofyor ikenem ro supswan. Raris, rofyor ḇyebaptis ramnai, ”malaikatsya suf farmyan i.” (Markus 1:13) Rofyor Yesus imbe smuni, malaikat oso ”ḇyuk samambraḇ faroi.”—Lukas 22:43.

6. (a) Rariso kofawi malaikat sya sifnoḇek kawasa Allah ḇyesi ro baboine? (b) Fakfuken rosai na kosma kankarem ya ro kirine?

⁶ Baboine, malaikat sya pok fa komam si werḇa. Ḇape Allah iwan si kaker fa sifnoḇek manfamyan ḇyesi. Refoya ikofen, ”Malaikat Yahwe ḇyesi sḇarek yaryar snonkaku ḇemkak faro I sya, ma fyaspar si.” (Mazmur 34:7) Rosai ḇefnai fa kofandun fadadiren ya? Snaro kosma mbroḇ ḇesambraḇ kaku ma ḇemarisen ḇemun ko. Mansei sirya? Ro moḇ risai sramuma ya? Rariso sisewar fa smun ko rai? Infa kosma kankarem faro fakfuken nane, mkorama komam rosai ḇeḇejadi rofyor Allah ifrur Adam ma Eva su kwar.

7. Rosai snonkaku sya sifrurna snar Setan ifrowes si?

⁷ Kofarkor kwar ro Fasal ḇeḇe 3 snar malaikat oso ḇyeḇembroḇ ḇe Allah I ma imarisen fa ḇyepoik faro ḇese sya. Refo dap i ḇe Setan roḇa Ibiris. (Fasasna 12:9) Setan i kako imarisen eḇese sya spampum ma sembroḇ Allah I.  Ifrowes Eva i kwar, ma ro fafisu ya ifrowes snonkaku ḇebor sya kako. Imbape, snonkaku ḇeḇeso, raris Habel, Henokh, ma Nuh, sisouser pdef ḇe Yahwe I.—Ibrani 11:4, 5, 7.

8. (a) Rariso malaikat ḇeḇeso sya sḇe hantu-hantu? (b) Rosai hantu-hantu sya sifrurna insama seḇefaspar buro Faḇruḇ ḇeba ya?

⁸ Ro awar Nuh, malaikat ḇeḇeso sḇembroḇ ma sibur rum sena ro nanki ma sado ḇe supswan ma sikenem ḇe snonkaku. Rosai ḇefnai ya? Refoya fyawar ḇeko snar simarisen fa sfarbuk kuker bin ḇero supswan. (Wasya Kejadian 6:2.) Ḇape inema sasar ḇeba malaikat sya sifrur rirya. (Yudas 6) Imnis raris malaikat ḇeḇarḇor sya, snonkaku ḇebor sya seankarkar ma sirarmomen. Yahwe myun snonkaku ḇeḇarḇor sya kuker faḇruḇ ḇeba ro supswan ḇesiper. Ḇape fyaspar manfamyan ḇyesi ḇesouser sya. (Kejadian 7:17, 23) Insa sfaspar ro faḇruḇ ani, malaikat ḇeḇarḇor sya skaḇer ḇe nanki. Refoya dap malaikat ḇeḇarḇor sine ḇe hantu-hantu. Skinfir fa siso Setan fa seḇemḇroḇ ḇe Allah I, ma Setan ḇyeḇebukor ḇesi.—Matius 9:34.

9. (a) Rosai ḇeḇejadi faro hantu-hantu sya rofyor skaḇer ḇe nanki? (b) Rosai na kofarkor wer?

⁹ Snaro sḇeḇembroḇ kwar, Yahwe imewer fa sikaḇer wer ma sfanjur ro kina ḇyedi. (2 Petrus 2:4) Hantu-hantu pok fa sifadwer si fa sḇesnonkaku werḇa, ḇape sifrur kaker ”ḇeḇeankarkar supswan ḇesiper.” (Fasasna 12:9; 1 Yohanes 5:19) Mkorama kofarkor rariso seankarkar, ḇaido sifrowes, snonkaku ḇebor sya.—Wasya 2 Korintus 2:11.

10. Rariso hantu-hantu sya sifrowes snonkaku sya?

¹⁰ Hantu-hantu sifrowes snonkaku kuker nyan ḇebor. Snonkaku ḇeḇeso sawos kaku kuker hantu-hantu ḇaido roro snonkaku ḇese, snonkaku ḇena mon ḇaido  manwen. Ine sapna ḇe spiritisme, ḇaido fawawi kuker hantu-hantu. Ḇape Refoya iwan ko fa kobinkwan buro roi nakam ḇefesepen kuker hantu-hantu. (Galatia 5:19-21) Rosai ḇefnai ya? Imnis raris snon oso ḇefor aiwan kuker denem, hantu-hantu sya sḇuk fafrowes fa sedenem ma sifrur fa snonkaku sro baḇ papoik sena.—Mam Fasfas Ḇepupes 26.

11. Rosai kinsasor ya, ma rosai ḇefnai fandun fa kosampum na?

¹¹ Fafrowes oso sapna ḇe kinsasor. Inema sasewar fa sfawi rosai na ḇeḇejadi ro ḇarpon ḇaido roi kofawi ḇaimna kuker farfnoḇek samambraḇ ro hantu-hantu sya. Imnis raris, smam ro war, sikyar aḇyair nefasna snonkaku oso imar, ma smawe. Snonkaku ḇebor sya skara roi nane na nun samswen ḇesi ḇa, ḇape inema sasar rirya. Hantu-hantu sine sifnai roi ḇesamswen kaku. Refoya fyasnaḇair hantu-hantu ma snonkaku ḇena mon sifararur kayam. Imnis raris, Farfyar Ro Manwawansya 16:16-18 fyawar ḇeko ”rur ḇemamkarkir” ifnoḇek bin oso fa ’myam karkir’. Rofyor manwawan Paulus iyawbur hantu ani, bin ani nya samambraḇ werḇa fa myam karkir rosai na ḇeḇejadi ro fafisu naiwama.

12. (a) Rosai ḇefnai fa kosewar fa kawos ḇe snonkaku ḇemar kwar sya na nun samswen ḇeko? (b) Rosai ḇefnai fa manfamyan Allah ḇyesi siso ma sifrur ḇa fararur ḇefesepen kuker hantu-hantu sya?

¹² Hantu-hantu sedenem snonkaku sya kuker nyan ḇese kako. Sifrur fa kokyar snar bisa fa kawos kuker snonkaku ḇemar kwar sya ma sikenem kaker ro moḇ oso ma sawos kuker ko ḇaido na sifrur roi ḇesamswen ḇeko. Imnis raris, snonkaku oso nya bati ḇaido karyer ḇemar kwar rya ḇe snonkaku ḇena mon oso, sikyar bisa fa dawos kuker snonkaku ḇemar kwar sya. Snonkaku ḇena mon ani ikofen kuker bati ḇaido karyer ḇemar kwar ani ma mkaren ḇyedi imnis raris snonkaku ḇemar  ani. (1 Samuel 28:3-19) Nyan sikram snonkaku ḇemar sya kako neknam ro kakakyar snar snonkaku ḇemar sya sikenem kaker ro moḇ oso. Ine kako imnis sifrur ras tiga malam, ro taun ḇe taun sifrur munara fa siswarapepen snonkaku ḇemar kwar sya, sikapnik sibrusna, spam padamara ḇaido siwaren snonkaku ḇemar sya. Rofyor snonkaku Kristen simewer sakso, kina sesya ḇaido snonkaku ḇero moḇya na sanonef si, ḇaido simewer sifararur kayam kuker si. Ḇape snonkaku Kristen sifawi kwar snar snonkaku ḇemar kwar sya sikenem ro moḇ oso ḇese werḇa. Pok fa kawos kuker si werḇa, ma sikako pok fa sifrur roi ḇesamswen ḇeko ḇa. (Mazmur 115:17) Fandun fa koḇesasor ko. Pok fa kosewar nyan awer fa kawos kuker snonkaku ḇemar kwar sya ḇaido hantu-hantu ma pok fa koso awer fararur ḇefesepen kuker si.—Wasya Ulangan 18:10, 11; Yesaya 8:19.

13. Snonkaku ro fafisu iwara ḇemkak faro hantu-hantu sya rosai sisma ma sifrurna ro baboine?

¹³ Hantu-hantu sya sifrowes snonkaku monda ḇa ḇape smun snonkaku sya kako. Fafisu ine, Setan ma hantu-hantu ḇyesi sifawi ”snar fafisu ḇyedi fyanam kwar” fa Allah myun pres si ro supswan ine, inja ine nafrur fa sirmomen kaku ma sifrur roi ḇeḇarḇor nabor syadi wer. (Fasasna 12:12, 17) Ḇape, snonkaku syaran ma syaran ro fafisu iwara ḇemkak faro hantu-hantu sya, baboine simkak faro si werḇa. Rariso seḇemkey buro makakak faro hantu-hantu sya?

14. Imnis snonkaku Kristen ro abad randak ya, na kokako koḇemkey buro hantu-hantu sya ke?

¹⁴ Refoya ikofen ḇeko nyan fa kosampum ma koḇemkey buro hantu-hantu sya. Imnis raris, snonkaku  ḇeḇeso ro mnu ḇeba Efesus ḇefesepen kuker hantu-hantu sya rofyor sifarkor ḇaim napnapes ya. Rariso sisma ḇaḇemkey ya? Refoya ikofen, ”Sibor kaku rofandu si, ḇeyakfrur mon kako, siryur syap-syap rawan sena fa sikun na ro ḇarpon kawasa ḇeḇor.” (Farfyar 19:19) Snar simarisen fa sḇe snonkaku Kristen, sisawen ma srap syap-syap kuker fawawi hantu-hantu. Fandun fa kofrur rarirya kako ro baboine. Snonkaku ḇemarisen ḇefarmyan ḇe Yahwe fandun fa sisawen roi ebor kam ḇena fesepen kuker hantu-hantu. Imnis raris syap, majalah, fasfas kuker kinsor, felem, rakrok musik ma doya, farfnak ma sonin ḇefasnaḇair hantu-hantu, ḇaido fararur skara na nafrur makakak ḇa ḇaido ḇeyun marisen. Ine kako robor snonkaku sya sikram na ḇaido suf fa nadwarek mankunsi ro roi ḇeḇarḇor.—1 Korintus 10:21.

15. Rosai wer fandun fa kofrurna fa kosampum Setan ma hantu-hantu sya?

¹⁵ Taun ḇeḇeso rofyor snonkaku Efesus sisawen syap-syap ḇefesepen kuker hantu-hantu ramnai, manwawan Paulus fyas fandun fa sores nako pdef fa ”kofaḇri” ma kosewar fa ”kosampum . . . rur ḇeḇarḇor ro farsyos sansoren.” (Efesus 6:12) Srap kwar syap-syap anna, ḇape hantu-hantu sisewar kaker fa sawyaye si. Inja, rosai wer fandun fa sifrurna? Paulus ikofen ḇesi, ”Mkun adai kakyar snar kuker adai ani nari mkofasye [ḇaido, frur mnai] ikoi ḇesak nakam ro Ibirisya.” (Efesus 6:16) Imnis raris adai na ḇedwarek sordade ro mamamun ya, kakyar koḇena ḇyekadaun ko. Kokyar Yahwe na ḇyekadaun ko ido, nari ifrur fa kosampum Setan ma hantu-hantu sya.—Matius 17:20.

16. Rariso kofrur kakakyar koḇena ḇe Yahwe nesambraḇ kaku?

¹⁶ Rariso kofrur kakakyar koḇena faro Yahwe nesambraḇ  kaku? Fandun fa kowasya Refo ras ḇe ras ma kokyar kaku I nari ḇyuk fadadiren ḇeko. Kakakyar koḇena ḇe Yahwe nesambraḇ kaku ido, nari Setan ma hantu-hantu sawyaye ko ḇa.—1 Yohanes 5:5.

17. Rosaiwer na ḇefadirenko ro hantu-hantu sya?

¹⁷ Rosai wer fandun fa snonkaku Kristen ro Efesus sya sifrurna? Sḇarek ro mnu ḇeba ḇefo kuker roi ḇebor ḇefesepen kuker hantu-hantu. Inja Paulus ikofen ḇesi, ”Mkonadi kada ro fafisu nakam”. (Efesus 6:18) Fandun fa sor ḇe Yahwe fa ḇyuk fadadiren ro oras nakam. Rariso kuker ko? Kokako kokenem ro dunya ḇefo kuker roi ḇefesepen kuker hantu-hantu. Inja fandun fa kor fadadiren ro Yahwe, ma kap snonsnon ḇyedi rofyor koḇenadi. (Wasya Amsal 18:10.) Kor pdef ḇe Yahwe fa ḇyekadaun ko ro Setan ido, nari kyarem nadi koḇena.—Mazmur 145:19; Matius 6:13.

18, 19. (a) Rariso na koḇemkey buro Setan ma hantu-hantu sya? (b) Fakfuken rosai na ḇeḇekarem ro fasal ḇeḇeuser ya?

¹⁸ Kosawen roi ḇefesepen kuker hantu-hantu ro kankenem koḇena ma kokyar kaku Yahwe na fyadiren ko ido, na kosampum Setan ma hantu-hantu sya. Fandun fa komkak awer si. (Wasya Yakobus 4:7, 8.) Yahwe syambraḇ syadi buro hantu-hantu sya. Ro awar Nuh, Yahwe ḇyuk samamyai ḇesi, ma ro fafisu naiwama na myun pres si. (Yudas 6) Koswarepen kaku, kemir ḇa snar Yahwe iwan malaikat ḇyesi fa sifnoḇek ma sikadaun ko. (2 Raja-Raja 6:15-17) Kokyar kaku snar kuker farfnoḇek Yahwe ḇyedi, na koḇemkey buro Setan ma hantu-hantu sya.—1 Petrus 5:6, 7; 2 Petrus 2:9.

¹⁹ Ḇape rofyor Setan ma hantu-hantu sifrur ḇaḇekandera nabor ido, rosai ḇefnai fa Allah myunsi ḇaim? Fakfuken ine na neḇekarem ro fasal ḇeḇeuser ya.