1, 2. (a) Mambir snonkaku oso sifawi kwar ido wafawi snonsnon ḇyedi monda ke? Fasnaḇair. (b) Rosai snonkaku sya sikyar kuker Yesus i?

SNONKAKU ḇena snonsnon ḇaido sifawi kwar sibor ro supswan ine. Imbude au kako wafawi oso ro snonkaku sifawi kwar ansi snonsnon ḇyedi. Imbape wafawi monda snonsnon ḇyedi kyurfasna ḇa snar mambir kaku i. Ine kako kyurfasna ḇa snar wafawi nabor kaku kuker kenem ḇyedi ma rosai imarisen kaku na.

² Yesus Kristus ikenem kwar ro supswan ine 2.000 taun naiwara, mboi na wafawi kwar kuker i. Ḇape snonkaku ḇebor sya smambir Yesus i ḇa. Ono sisya sikofen ima snonkaku ḇepyum, ono sikofen ima nabi rirya, snonkaku ḇeḇeso sikyar i ḇe Allah. Karkara bedi rariso?—Mam Fasfas Ḇepupes 12.

3. Rosai ḇefnai fandun fa mambir kaku Allah Yahwe ma Yesus Kristus su?

³ Fandun kaku ḇe au fa mambir kakaku kuker Yesus i. Rosai ḇefnai ya? Refoya ikofenḇair ḇeko snar, ”Kankenem ḇekain fyoroya isoine mboi ssmambaḇir au werer Allah ḇenapes, ma ssmambaḇir Yesus Kristus wawan kwar ani.” (Yohanes 17:3) Kaku ḇae, snar mambir kaku Yahwe ma Yesus su ido, na wasma kankenem fyoro ro firdaus ro supswan. (Yohanes 14:6) Mambir kaku Yesus i kako ido nari nesaramper au snaro iso farari ḇepyum kaku faro kankenem ma nyan rariso kofrur pyum snonkaku  sya rai. (Yohanes 13:34, 35) Ro Fasal ḇeḇe 1, kofarkor nabor kwar kakaku kuker Allah I. Ro kirine nari kofarkor rosai Refoya ḇyadir kuker Yesus i.

4. Rosai knam ro nasan ”Mesias” ma ”Kristus” ya?

⁴ Ro fafisu Yesus ḇyeḇeaḇen ḇaim ya, Yahwe ḇyeasas ro Refoya nari iwan Mesias, ḇaido Kristus fa ryama ḇe supswan. Wos ”Mesias” ine ido wos Ibrani, ma wos ”Kristus” ido wos Yunani. Wos nasan suine iso ḇefasnaḇair Allah nari kyinfir Mesias ḇyeasas kwar ma ḇyuk nasan ḇemnis kaku ḇe i. Mesias nari ifrur asas-asas Allah ḇyenakam fa ndarirya. Yesus nari isaramper au ro kirine kako. Ḇape rofyor Yesus ḇyeḇeaḇen ḇaim, snonkaku ḇebor sya sifuken kaker, ’Manseiso nari ḇeḇe Mesias ya?’

5. Yesus manfamyan ḇyesi sikyar kaku snar Yesus iso Mesias ya ke?

⁵ Manfamyan ḇerandak Yesus ḇyesi sikyar kaku snar Yesus iso Mesias sḇeasas kwar. (Yohanes 1:41) Raris, Simon Petrus kyarem ḇe Yesus ḇo doḇe, ”Au iso Kristus”. (Matius 16:16, NW) Rariso na kokyar snar Yesus iso Mesias rirya?

6. Rariso Yahwe ḇyuk farfnoḇek faro snonkaku ḇena sne ḇenapes sya fa smambir Mesias i?

⁶ Fyoro kwar rofyor Yesus ḇyeḇeaḇen ḇaim, nabi-nabi Allah ḇyesi sfas mnis kaku aḇyair-aḇyair kuker Mesias insama nafnoḇek snonkaku sya fa smambir i. Rariso ine nafnoḇek si rai? Rofyor sor au fa rwa ro pelabuhan fa wasrow snonkaku oso wafawi ḇaim, snonkaku bewan au ya na ḇyuk aḇyair kuker snonkaku ani, insama napyan fa mambir ma wasrow i. Imnis rarirya kako, Yahwe iwan nabi-nabi ḇyesi fa sfas ḇardadi kuker  Mesias rosai nari ifrurna ma rosai nari ḇekur i ya. Rofyor snonkaku sya smam kankenem Yesus ḇyedi imnis kuker ḇardadi-ḇardadi nane nafnoḇek si fa smambir Yesus iso Mesias.

7. Ḇardadi risuru rosai ḇefasnaḇair Yesus iso Mesias rirya?

⁷ Mam ḇardadi risuru ine. Ḇeḇeoser ya, 700 taun rofyor Yesus ḇyeḇeaḇen ḇaim, nabi Mikha ḇyeḇair snar Mesias nari ḇyeḇeaḇen ro mnu kasun ro Betlehem. (Mikha 5:2) Ma kaku rarirya Yesus ḇyeḇeaḇen ro moḇ ani! (Matius 2:1, 3-9) Ḇeḇesuru ya, nabi Daniel ḇyeḇair fafisu risai nari Mesias ḇyeḇemambir ya iso ro taun 29 M. (Daniel 9:25) Inema ḇardadi risuru monda ro ḇardadi ḇebor ḇefasnaḇadir snar Yesus iso Mesias sḇeasas kwar ani.—Mam Fasfas Ḇepupes 13.

8, 9. Rofyor Yesus ḇyebaptis rosai ḇeḇejadi fa ḇefasnaḇair snar Yesus iso Mesias rirya?

⁸ Yahwe fyasnabos kaku kwar Yesus iso Mesias. Allah ḇyeasas nari ḇyuk aḇyair faro Yohanes Ḇeḇebaptis insama myambir Mesias i. Rofyor Yesus rya ḇe Yohanes fa ḇyebaptis i ro Warḇeki Yordan ro taun 29 M, Yohanes myam aḇyair ani. Refoya ikofen ḇeko rosai ḇekur ya, ”Isma masi sren kwar, Yesus Isasyar fasau bur warya ma ro fafisu ani ḇeri nanki ḇyas ma myam rur Allah imnis manjawa dado faro I, ma simnaf mkaren ro boiyas ḇekofen, ’Inekada Romawa Yaswar kaku, faro I Ya ḇeḇare.’” (Matius 3:16, 17) Rofyor Yohanes myam aḇyair ma ryower mkaren ani, myambir kaku Yesus iso  Mesias i. (Yohanes 1:32-34) Ro ras ani, rofyor Yahwe ḇyuk rur ḇesren ḇyedi fa ryem i, Yesus ḇye Mesias. Yesus i monda Allah ḇyekinfir fa ḇeḇe Manfarkin ma Raja.—Yesaya 55:4.

⁹ Ḇardadi ḇero Refo ya, wos mankun Yahwe ikofen na, ma aḇyair Yahwe ḇyuk na rofyor Yesus ḇyebaptis ḇefasnaḇair Yesus iso Mesias. Ḇape Yesus ryamakero ma imnis rariso kenem ḇyedi rai? Mkorama komam rosai Refoya ikofen na.

10. Rosai Refo fyarkorna kuker kankenem Yesus ḇyedi rofyor ryama ḇe supswan ḇaim?

¹⁰ Refoya fyarkor snar Yesus ikenem ro nanki ro swaf kawan rofyor ryama ḇaim ḇe supswan ine. Nabi Mikha ikofen Mesias isya kwar ”ro awar madero”. (Mikha 5:2) Yesus mankundi ikofenḇadir ikenem ro nanki rofyor ryama fa ḇye snonkaku ḇaim. (Wasya Yohanes 3:13; 6:38, 62; 17:4, 5.) Rofyor ikenem ro nanki, Yesus fyanam kaku ma ḇyebati kuker Yahwe I.

11. Rosai ḇefnai fa Yahwe Iswar kaku Yesus i?

¹¹ Yahwe iswar kaku Yesus i. Rosai ḇefnai ya? Snaro Allah ifrur ḇepon i rofyor ifrur ḇaim roi ḇebor ma malaikat sya kako ḇaido mankun oso ḇese. Inja Yesus sap i ḇe ”rumkun rak, i ḇepon ro roi ḇeḇor ḇefrur kwarna.” * (Kolose 1:15) Yahwe iswar Yesus i kako snaro Yesus i monda Yahwe ifrur ḇeri kuker bramin mankun ḇyeja. Ine iso ḇefnai fa sap i ḇe ”Rumkun Mandos ḇyedi”. (Yohanes 3:16) Yahwe kyur Yesus i monda fa ifrur roi ḇebor nakam. (Kolose 1:16) Ma Yesus derer monda sap i ḇe ”Wosya”, snaro roro Yesus i Yahwe ḇyuk ananun ma farkankin ḇe malaikat ma snonkaku sya.—Yohanes 1:14.

12. Rariso na kofawi Yesus ma Allah suma mankun oser ḇa ma sumnis ḇa?

¹² Snonkaku ḇeḇeso sikyar snar Yesus ma Allah suma mankun oser ma sumnis. Ḇape inema farkarkor ḇeknam ro Refoya ḇa. Refo ya ikofenḇadir snar Yesus ḇyeḇefrur, ine kyurfasna snar Yesus nya awar ḇaido knam.  Ḇape Yahwe iso ḇeḇefrur roi ḇebor kam, nya awar ḇa. (Mazmur 90:2) Ḇe Rumkun Allah ḇyedi, Yesus kyara ḇaḇeri fa ḇye Allah ḇaido imnis kuker Allah. Refo fyasnaḇadir snar Kmaya iba syadi ro Rumkunya. (Wasya Yohanes 14:28; 1 Korintus 11:3) Yahwe I monda ”Allah Ḇepoik Syadi”. (Kejadian 17:1) Ima ibasyadi ma ḇyepoik syadi ro supswan ma farsyos ḇesiper ine.—Mam Fasfas Ḇepupes 14.

13. Rosai ḇefnai fa Refoya ikofen Yesus iso ”fanir ro Allah kopok komamba”?

¹³ Yahwe ma Rumkun ḇyedi, Yesus, sufanam ma sufararur kayam ro swaf taun milyar ḇe milyar rofyor farsyos ma supswan ine ḇyeḇefrur ḇaim. Suswaryae kaku su! (Yohanes 3:35; 14:31) Yesus fyarari pyum kaku rari-rari kma ḇyedi inja Refo ya dap i ḇe ”ikada fanir ro Allah kopok komamba”.—Kolose 1:15.

14. Rariso Rumkun Yahwe Iswar kaku ine ḇye snonkaku rai?

¹⁴ Rumkun Yahwe iswar kaku ine imarisen fa isabu ro nanki ma ḇyesnonkaku ro supswan. Rariso ḇyerarirya? Kuker mujisat Yahwe fyadwer kenem Rumkun ḇyedi ro nanki ro snekapar binkbor oso ḇenir ḇe Maria. Inja kuker nyan ine, Yesus fandunḇa fa nya kma ḇekaku ro snonkaku. Inja Maria ḇyeaḇen romawa ḇemnis kaku ma nyir i ḇe Yesus.—Lukas 1:30-35.

15. Rariso mambir pyum kaku Yahwe I?

¹⁵ Na wafarkor nabor wer kuker Yesus, kankenem ḇyedi, ma rari-rari ḇepyum ḇyedi kuker wawasya Refo ro syap Matius, Markus, Lukas, ma Yohanes. Syap-syap nane sap naḇe syap Injil. Snar Yesus rari ḇyedi imnis kuker Kmari, rosai wawasya kuker Yesus nari ifnoḇek au  fa mambir kaku Yahwe I. Ine ḇefnai fa Yesus ikofen, ”Mansei ḇemam aya kwar ido, myam Kmaya kwar kako”.—Yohanes 14:9.

16. Rosai Yesus fyarkor ya? Farkarkor Yesus ḇyuk na ndrama kero?

¹⁶ Snonkaku ḇebor sya sap Yesus iḇe ”Guru”. (Yohanes 1:38; 13:13) Farkarkor ḇefandun kaku oso Yesus fyarkor naiso ’ankankinem ḇeḇye ro Karajan’. Rosai Karajan ine? Ine iso ḇaḇesasoser Allah ḇyedi ro nanki na ḇyeḇepoik supswan ḇesiper ma ḇyuk barakas ḇe snonkaku ḇesouser Allah I sya. (Matius 4:23) Rosai Yesus fyarkor na ḇeramuma ro Yahwe. Yesus ikofen, ”Farkarkor yaḇuk nane neknam ro mankundaya ḇa, ḇape neknam ro Allah ḇewan aya kwarya.” (Yohanes 7:16) Yesus ifawi Yahwe imarisen insama snonkaku sya srower ankankinem ḇeḇye snar Karajan Allah nari ḇyeḇepoik ro supswan ḇesiper.

17. Ro moḇ risai Yesus ḇyuk farkakor ya? Rosai ḇefnai fa fyararur myaren fa fyarkor snonkaku ḇese sya?

¹⁷ Ro moḇ risai Yesus ḇyuk farkarkor ya? Ro moḇ sairiryakam na isrow snonkaku sya. Ḇyuk farkarkor ro bandi mnu ḇeba ya, mnu-mnu, pasar, rum nadi ma rum sena. Iwaf monda ḇa snonkaku sya srama ḇe i. Ḇape ryafa isrow si. (Markus 6:56; Lukas 19:5, 6) Yesus fyararur myaren ma ḇyuk oras nabor ma samambraḇ ḇyedi fa fyarkor snonkaku sya. Rosai ḇefnai ya? Snaro ifawi iso Allah imarisen fa ifrurna ma snaro isouser Kmari pdef. (Yohanes 8:28, 29) Yesus ikako ḇyeḇaryas ḇe snonkaku sya snar iswar kaku si. (Wasya Matius 9:35, 36.) Myam ḇoi manfarkin agama sya sfarkor napnapes kuker Allah ma Karajan ḇyedi ḇa. Inja imarisen kaku fa ifnoḇek snonkaku ḇebor sya fa srower ma sfawi ankankinem ḇeḇye ani.

18. Minsa ro rari-rari Yesus ḇyedi wamarisen kaku ya?

 ¹⁸ Yesus iso snon ḇena saswar ma ḇefrur pyum snonkaku sya. Ḇyeaḇaḇen ma napyan fa sawos kuker i. Romawa sya kako simarisen fa sfanam kuker i. (Markus 10:13-16) Yesus myam rarwas snonkakusya ḇa. Imewer kaku roi ḇeankarkar ma ḇaḇenanapes ḇa. (Matius 21:12, 13) Ikenem ro fafisu snonkaku sya sifrur pyum ma sesyowi bin syaḇa. Ḇape Yesus ifrur pyum ma ḇesyowi bin sya. (Yohanes 4:9, 27) Yesus fyasna ima snonkaku ḇena sne ḇerun. Imnis raris ro fafisu oso ḇyan manwawan ḇyesi wemin sena, inema fararur ro manfamyan ḇaido women oso ifrurna.—Yohanes 13:2-5, 12-17.

19. Fafisu rosai ḇefasnaḇair Yesus ifawi rosai snonkaku sya sfandun kaku na ma snar imarisen fa ifnoḇek si?

¹⁹ Yesus ifawi rosai snonkaku sya sifandun kaku na, ma imarisen fa ifnoḇek si. Ine fyasna kaku rofyor ḇyuk pararei mujisat faro snonkaku sya kuker papoik Allah ḇyedi. (Matius 14:14) Imnis raris, snon ḇeduf pado oso ryama ḇe Yesus ma doḇe, ”Wamarisen ido buk pararei ḇe aya!” Yesus sne ḇyedi ḇyesneso snar myam snon ani ḇye kandera ro dafdufya. Iswar kaku i ma imarisen fa ifnoḇek i. Inja Yesus ḇyuk bramin ḇyedi, isawar pyan snon ani, ma ikofen ḇe i, ”Yamarisen. Waprei ro dafduf bedi!” Rofyor ya ḇeri snon ḇeduf ani iprei ro dafdufya! (Markus 1:40-42) Wawasen kada na rariso sneḇaḇir ḇyedi?

20, 21. Rariso Yesus ḇyuk farari ḇepyum kaku ro sasoasuser faro Allah I?

²⁰ Yesus ḇyuk farari ḇepyum kaku kuker rariso ḇyesouser ḇe Allah I. Rosai ismana ma rosai ḇembroḇ i sya sifrur ḇe i, isouser pdef Kmari. Imnis raris, Yesus ifrur  sasar ḇa rofyor Setan ifrowes i. (Matius 4:1-11) Yesus naek ḇyesi sikyar ḇa snar ima Mesias rirya ma sikofen ḇo soḇe ”swaruser ḇyena namnis ḇa kwar”, ḇape Yesus ifrur pdef fararur Allah ḇyena. (Markus 3:21) Rofyor ḇembroḇ i sya sifrur mnis i ḇa, Yesus isouser pdef ḇe Allah ma pok fa ifrur roi ḇeḇyeḇa faro si.—1 Petrus 2:21-23.

²¹ Ibasyadi wer rofyor sewayam Yesus ma ḇyekandera isof ro imarya, isouser pdef faro Yahwe I. (Wasya Filipi 2:8.) Wawasen kada rariso Yesus ḇyefarmkuepen ro ras imbe imarya. Sfori, sawos fanfnom ḇo soḇe dawos anonef, sḇemankara i, sḇuk sasar ḇe i, simbrif ma skoryaye i, ma sordade sya swayam ma spai i ro ai fyor oso. Ḇape Yesus isouser pdef faro Yahwe I. Rofyor imbe imar  ikofen ḇo doḇe, ”Imnis kwar.” (Yohanes 19:30) Ras rikyor rofyor Yesus imar ramnai, Yahwe ḇyeḇawes i ma ḇyuk kenem rurya ḇe i. (1 Petrus 3:18) Minggu ḇeḇeso mura, Yesus kyaḇer wer ḇe nanki, ”kyain ro Allah ḇar raku ḇyedi” ma iwaf isof ro Allah ryemi fa ḇye Raja.—Ibrani 10:12, 13.

22. Saneraro rosai fafisu ine kosmana snaro Yesus isouser pdef faro Kmari?

²² Snaro Yesus isouser pdef faro Kmari, fafisu ine kosma saneraro fa kokenem fyoro ro firdaus ro supswan, imnis Yahwe marisen ḇyedi. Ro fasal ḇeḇeuser ya, na kowawos rariso marmar Yesus ḇyedi ḇewar fa kosma kankenem fyoro.