1, 2. Rosai ḇefnai fa na kokofen nadi iso fakamaman ḇepyum kaku, ma rosai fandun fa kofawi rosai Refo fyarkor kuker nadiya?

KOMAM farsyos ḇeba ine kada, supswan ine ibaḇa kaku. Rofyor Yahwe myam ḇe supswan, snonkaku ro er syakam simnis raris war mismis ro kanarem. (Mazmur 115:15; Yesaya 40:15) Snonkaku koine kobaḇa kaku syadiburo farsyos ḇeba ine, imbape Mazmur 145:18, 19 ikofen, ”Yahwe fyanam faro snonkaku ḇeyor faro I, Faro mansei ḇeyor faro I ro napnapes. Ḇyuk sneprei faro marisen snonkaku ḇemkak faro I, ryower kankanes fararyor sena ma na ḇyuk fasaspar ḇesi.” Inema fakamaman ḇepyum kaku kosmana! Yahwe, Manḇeḇedaw ḇepoik syadi, imarisen fyanam ḇeko, ma imarisen ryower nadi koḇena. Kaku ḇae, nadi ima fakamaman rirya, ma roi oso ḇepyum kaku Yahwe ḇyuk maroko oser-oser.

² Ḇape Yahwe na ryower nadi koḇena rofyor konadi ḇe I kuker nyan imarisenna. Rariso na kofrurna rai? Mkorama komam rosai Refo ikofen kuker nadi ya.

3. Rosai ḇefnai fandun fa ḇenadi ḇe Yahwe I?

³ Yahwe imarisen ḇenadi, ḇaido wawos ḇe I. Rariso kofawina? Rwama wasya Filipi 4:6, 7. Kwarapan fararyor ḇepyum kaku ḇerama ro Yahwe ine. Manḇepoik ro supswan ma farsyos ine fyandun kaku au ma imarisen wakofen ḇe I rariso sneḇaḇir bedi ma roi ḇesamswen wasmana.

4. Rariso nadi ro ras ḇe ras ḇe Yahwe nasambraḇser ḇaḇebati bedi kuker I?

 ⁴ Nadi ifnoḇek ko fa koḇebati ḇefanam kaku kuker Yahwe I. Rofyor au ma bati bedi ro ras ḇe ras mufarfyar kuker karkara, ḇaḇeḇirḇar, ma sneḇaḇir muḇena oser-oser, ḇaḇebati muḇena nasambraḇ kaku. Ine imnis raris rofyor koḇenadi ḇe Yahwe I. Roro Refo ya, fyawar ḇeko karkara ma sneḇaḇir Ḇyedi, ma ikofen ḇeko rosai na ifrur ro ras-ras naiwama. Na ko kako kofawar rosai ḇero sneḇaḇir koḇena ḇe I roro nadi koḇena ro ras ḇe ras. Kofrur rarirya ido, ḇaḇebati koḇena kuker Yahwe I na nasambraḇ kaku.—Yakobus 4:8.

5. Rariso kofawi Yahwe ryower nadi nakamḇa?

⁵ Yahwe ryower nadi nakam ke? Aroḇa, rariryaḇa. Ro awar nabi Yesaya, Yahwe ikofen faro snonkaku Israel sya, ”Mkofarser nadi nabor rariryano, yarowerna ḇa; bramin  mkoḇena nafo kuker rik.” (Yesaya 1:15) Inja rofyor koḇesasor koḇa ido, na kofrur roi ḇefnai fa kobinkwanbur Yahwe I, ḇefnai fa imewer ryower nadi koḇena.

6. Rosai ḇefnai fa kakyar iso roi ḇefandun kaku? Rariso fasna kaku nwa kakakyar ya?

⁶ Komarisen insama Yahwe ryower nadi koḇena ido, fandun fa kokyar faro I. (Markus 11:24) Manwawan Paulus ikofenḇadir, ”Kakyar isyaḇa, snonkaku osoḇa kako ifrur Allah marisen ḇyedi. Snar snonkaku ḇerama faro Allah, ikyar Allah isya, ma Allah myunsu faro ḇesewar kaku isya.” (Ibrani 11:6) Ḇape na kokofen kosma kakyar mondaḇa. Fandun fa kofasnaḇos kakyar koḇena kuker kosouser faro Yahwe I ro ras ḇe ras.—Wasya Yakobus 2:26.

7. (a) Rosai ḇefnai fandun fa kofasna sne ḇerun ma ḇaḇesyowi rofyor koḇenadi ḇe Yahwe I? (b) Rariso na kofasna koḇenadi kuker sne ḇesiper?

⁷ Fandun fa kona sne ḇerun ma ḇaḇesyowi rofyor koḇenadi ḇe Yahwe I. Rosai ḇefnai ya? Rofyor imbe kowawos ḇe gubernur ḇaido presiden ido, fandun fa kofrurna kuker nyan ḇefo kuker ḇaḇesyowi. Snar Yahwe ima Allah Ḇepoik Syadi, inja fandun kaku fa kofasna ḇeri ḇaḇesyowi ma sne ḇerun koḇena rofyor kowawos faro I. (Kejadian 17:1; Mazmur 138:6) Fandun kako fa koḇenadi kuker sne ḇesiper ma nadi koḇena ndrama ro snemun koḇena, pok fa kap kaḇer awer rosai kokofen kwarna.—Matius 6:7, 8.

8. Rofyor koḇenadi kor roi oso, rosai fandun fa kofrurna wer?

⁸ Inja, rofyor koḇenadi kor roi oso, fandun fa kofrur rarirya imnis rosai kokofen kwar ro nadi koḇena. Imnis raris, rofyor koḇenadi ḇe Yahwe I faro fandandun koḇena ro ras-ras, komyarenḇa awer ma kowaf monda awer na Yahwe ḇyuk rosai kofandunna ḇape kosambraḇ fa  kofrurna. Fandun fa kofararur myaren ma komarisen kofrur fararur nakam nari kofrurna. (Matius 6:11; 2 Tesalonika 3:10) Ḇaido rofyor koḇenadi ḇe Yahwe fa kor farfnoḇek ḇyedi fa komnai ro kofrur roi ḇesasar ido, fandun fa kopampum fafisu ḇefrowes ko fa kofrur sasar. (Kolose 3:5) Kirine mkorama kokara fakfuken ḇeḇeso kuker nadi.

9. Faro mansei fandun fa koḇenadi ya? Rosai Yohanes 14:6 fyarkor faro ko kuker nadi ya?

⁹ Faro mansei fandun fa koḇenadi? Yesus fyarkor manfamyan ḇyesi fa senadi faro ’Kma kobedi ro boiyaswaʼ. (Matius 6:9) I kako ikofen, ”Aya ine kada nyanya ma napnapes ma kankenem. Snonkaku oso ḇaḇeri ḇerama faro Mami, rofyor imbranuk ro ayaḇa.” (Yohanes 14:6) Inja koḇenadi faro Yahwe I monda roro Yesus i. Rosai knam ya koḇenadi roro Yesus i? Insama Yahwe ryower nadi koḇena, fandun fa kofasna ḇaḇesyowi faro nasan Yahwe ḇyuk kwar faro Yesus i. Kofarkor kwar, Yesus ryama ḇe supswan fa fyaspar ko ro sasar ma marmar ya. (Yohanes 3:16; Roma 5:12) Yahwe inankow Yesus fa ḇye Imam Ḇeba ma Mankara.—Yohanes 5:22; Ibrani 6:20.

10. Fandun fa koḇenadi kuker nyan ḇaido posisi oser monda ke? Fasnaḇair.

¹⁰ Fandun fa koḇenadi kuker nyan oser monda ke? Aroḇa, Yahwe dor koḇa fa kokain wepur, kokain, ḇaido kores rofyor koḇenadi. Refo fyarkor ko snar na kowawos ḇe Yahwe kuker nyan risai monda ḇape kofasna ḇaḇesyowi. (1 Tawarikh 17:16; Nehemia 8:6; Daniel 6:10; Markus 11:25) Roi ḇefandun kaku faro Yahwe iso kawos ḇe I kuker karkara ma sne ḇenapes, kuker nyan ḇaido posisi baken koḇediḇa rofyor koḇenadi. Na koḇenadi kuker mkaren naba ḇaido ro sne monda ro moḇ sairiryakam ma ro  fafisu ras ma roḇ. Rofyor koḇenadi ḇe Yahwe, na kokyar snar ryower nadi koḇena fafisu snonkaku oso ḇaḇeri ḇefrur rarirya.—Nehemia 2:1-6.

11. Roi ḇeḇeso risai na kokofen ḇe Yahwe ro nadi koḇena?

¹¹ Rosai na kokofen ro nadi ya? Ro nadi koḇena nari kokofen roi nakam Yahwe imarisenna. Refoya ikofen, ”Snar kokyar imnaf fararyor koḇena, rofyor kor rosairya wer imnis kuker marisen ḇyedi.” (1 Yohanes 5:14) Na koḇenadi kuker fandandun mankun koḇena ke? Imbo. Koḇenadi ḇe Yahwe ido imnis raris kawos ḇe bati koḇedi. Kofawar ḇe Yahwe kuker rosai ḇero swaruser ma snemun koḇena. (Mazmur 62:8) Koḇenadi ḇe I insama ḇyuk samambraḇ ḇeko kuker rur ḇesren ḇyedi fa ifnoḇek ko fa kofrur roi ḇenapes. (Lukas 11:13) Ko kako na kor faro Yahwe fa ḇyuk fawawi nanem insama kofrur snemuk ḇepyum, ma na koḇenadi fa kor samambraḇ rofyor kosma roi ḇesamswen. (Yakobus 1:5) Fandun fa kor ḇe Yahwe insama ḇyuk ampun faro sasar koḇena. (Efesus 1:3, 7) Koḇenadi kako faro fandandun snonkaku ḇese sya, kina koḇesi ma naek srar ḇero sidang sya.—Farfyar Ro Manwawansya 12:5; Kolose 4:12.

12. Rosai na ḇe roi ḇefandun kaku ro nadi koḇena?

¹² Rosai na ḇe roi ḇefandun kaku ro nadi koḇena? Yahwe ma marisen ḇyena. Kokofen kasumasa kuker sne ḇesiper ḇe I faro rosai ifrur kwarna maroko. (1 Tawarikh 29:10-13) Kofawi kwar roi nane snar rofyor Yesus ikenem ro supswan ine, fyarkor ḇe manfamyan ḇyesi nyan rariso sḇenadi rai. (Wasya Matius 6:9-13.) Ikofen snar fandun fa sḇenadi faro saranden snonsnon Allah ḇyedi, smam naḇe roi ḇesren. Ramnai Yesus fyasnai fandun fa senadi kuker Karajan Allah insama ryama ma marisen Allah ḇyedi ndarirya ro supswan ḇesiper. Yesus ikofen koḇenadi  kuker roi ḇefandun kaku nane ramnai insape koḇenadi kuker fandandun mankun koḇena. Rofyor korir ro ḇarpon ro nadi koḇena Yahwe ma marisen ḇyena ido, kofasna rosai roi ḇefandun kaku faro ko.

13. Rariso kawanwan nadi koḇena?

¹³ Rariso kawanwan nadi koḇena? Refoya ikofenḇadirna ḇa. Fafisu ma fandandun ya iso na ḇefasna koḇenadi kawan ke oroḇa. Imnis raris, koḇenadi kawan ḇa  rofyor konan ḇaime ḇape na koḇenadi kawan kaku rofyor kokofen ḇe Yahwe kuker ḇaḇeḇirḇar koḇena ḇaido kokofen kasumasa ḇe I. (1 Samuel 1:12, 15) Na komarisenḇa fa koḇenadi kawan fa kofrur snonkaku ḇese sya simarisen, imnis nadi ro snonkaku ḇekenem ro fafisu Yesus. (Lukas 20:46, 47) Yahwe imarisenḇa faro nadi-nadi ḇerarirya. Rosai ḇefandun kaku faro Yahwe iso nadi berama ro snemun kobena.

14. Ro fafisu risai monda koḇenadi, ma farkarkor risai kosmana kuker Yahwe I?

¹⁴ Ro fafisu risai monda koḇenadi? Yahwe dor ko fa kawos ḇe I ro ras ḇe ras. Refo ikofen fandun fa ’koḇenadi [ḇesyakwar]ʼ, ʼkofarmku ro nadiyaʼ, ma ʼkoḇenadi faswef’. (Matius 26:41; Roma 12:12; 1 Tesalonika 5:17)  Yahwe imarisen ryower nadi koḇena ḇesyakwar. Kokofen kasumasa ḇe I ro ras ḇe ras faro saswar ma sne ḇenaḇye Ḇyedi. Ko kako kor faro Yahwe I fa ḇyuk fadadiren, samambraḇ ma sneprei ḇeko. Rofyor kosyowi kaku fakamaman fa koḇenadi ḇe Yahwe ido, na koḇuk swaf nakam fa kowawos ḇe I.

15. Rosai ḇefnai fa kokofen ”Amin” ro papupes nadi ya?

¹⁵ Rosai ḇefnai fa kokofen ”Amin” ro papupes nadi ya? Wos ”amin” knam ya iso ”kaku” ḇaido ”rarirya”. Iso nyan fa kofasna kakaku kuker roi kokofenna ro nadi koḇena, kuker sne ḇesiper. (Mazmur 41:13) Refoya kako fyarkor ko fandun fa kokofen ”Amin” ro sne ḇaido kuker mkaren naba, ro papupes nadi ro ḇarpon kawasa sya fa kofasna komarisen faro rosai sikofen ro nadi ya.—1 Tawarikh 16:36; 1 Korintus 14:16.

16. Yahwe ryower kaku nadi koḇena ke? Fasnaḇair.

¹⁶ Yahwe kyarem kaku nadi koḇena ke? Imbo, kaku ḇae. Refoya dap I ḇe ”Manḇerower nadi”. (Mazmur 65:2) Yahwe ryower ma kyarem nadi ḇeḇeyor kuker sne ḇesiper ro snonkaku ḇebor sya, ma kyaremna kuker nyan ḇeḇese faro si oser-oser.

17. Rariso Yahwe kyarem nadi koḇena roro malaikat ma manfamyan ḇyesi ro supswan?

¹⁷ Yahwe kyarem nadi koḇena roro malaikat ma manfamyan ḇyesi ḇero supswan. (Ibrani 1:13, 14) Contoh nabor naisya ro snonkaku ḇeyor farfnoḇek insama sifawi kaku Refoya ma fyoroḇa Saksi-Saksi Yahwe oser ryama ḇe i. Refoya fyasnaḇair malaikat sya kako sḇaryas ”ankankinem ḇeḇye” ro supswan ḇesiper. (Wasya Fasasna Faro Yohanes 14:6.) Sibor ro fandu ko, sḇenadi kwar  ḇe Yahwe kuker roi ḇesamswen oso ḇaido fandandun sena ma sisma farfnoḇek sifandun kakuna ro naek srar Kristen ḇese sya.—Amsal 12:25; Yakobus 2:16.

18. Rariso Yahwe ḇyuk rur ḇesren ḇyedi ma Refoya fa kyarem nadi koḇena?

¹⁸ Yahwe kyarem nadi koḇena kuker ḇyuk rur ḇesren ḇyedi. Rofyor koḇenadi kor farfnoḇek fa kofrur mnis roi ḇesamswen kosmana, na ḇyuk rur ḇesren ḇyedi ḇeko fa fyarkin ma nasambraḇser ko. (2 Korintus 4:7) Yahwe I kako ḇyuk Refoya fa kyarem nadi koḇena ma ifnoḇek ko fa kofrur snemuk ḇepyum. Rofyor kowasya Refoya, na kosrow mnuk-mnuk ḇefnoḇek ko. Yahwe I kako na idif naek ḇaido srar oso fa ḇyuk kankarem ro fananjur ya fa ikofen rosai fandun fa korowerna ḇaido penatua oser ro sidang fa ḇyuk anun ḇero Refo ḇeko.—Galatia 6:1.

19. Rosai ḇefnai fa na kokara Yahwe kyarem ḇaim nadi koḇena?

¹⁹ Fafisu oso, na kofuken, ’Rosai ḇefnai fa Yahwe kyarem ḇaim nadi ayena?’ Koswarepen, ifawi ras risai ma rariso na kyarem nadi koḇena. Ifawi kaku fandandun koḇena. Imbude na koḇenadi pdef kwar fa kofasna kakaku ro rosai kokofen ḇe I na ma kofasna snar kokyar kaku faro I. (Lukas 11:5-10) Fafisu oso Yahwe kyarem nadi koḇena kuker nyan kokara ḇaimna. Imnis raris, koḇenadi kwar kuker fafisu ḇesamswen kosmana, imbape ipyos roi ḇesamswen kosmana ḇa mboi ḇyuk samambraḇ ḇeko fa kofarmku ro fafisu ani.—Wasya Filipi 4:13.

20. Rosai ḇefnai fandun fa koḇenadi ḇe Yahwe ḇesya kwar?

²⁰ Inema roi ḇepyum kaku snar kosma fakamaman fa koḇenadi faro Yahwe I! Na kokyar kaku ryower nadi koḇena. (Mazmur 145:18) Ma rofyor koḇenadi kakuwer ḇe Yahwe ro sne koḇena ido, na ḇaḇeḇati koḇena kuker I nasambraḇ syadiwer.