1, 2. Rosai marisen Yahwe ḇyedi faro kina sya?

YAHWE iso Allah ḇeḇedaw farḇakbuk ḇerandak. Refoya ikofen ḇeko ifrur bin ḇerandak ma ”duni ḇe snonkaku ani.” Adam iryaḇ kaku ma ikofen, ”Au iso dar ro dar ayedi ma baken ro baken ayedi.” (Kejadian 2:22, 23) Ine fyarkor ḇeko snar Yahwe imarisen snonkaku ḇefarbuk kwar sya sisma aski.

² Ḇape faḇye, snonkaku sibor sisma kina ḇeaskiḇa. Imbape, Refoya naser wos ḇefarkin nabor nari ḇefnoḇek keret ro kina syakam insama sisma aski ma mararen ro kina sesya.—Lukas 11:28.

3, 4. (a) Rariso na snonswa mkoya mkofur pyum binswa mkoḇesi rai? (b) Rosai ḇefnai fandun kaku fa snonswa ma binswa suḇuk ampunyae?

³ Refoya ikofen snar snonswa ḇepyum oso fandun fa ifrur pyum swa ḇyedi kuker saswar ma syowi. Wasya Efesus 5:25-29. Snonswa na ḇyefaduru swa ḇyedi kuker nyan saswar ya. Na ḇyekadauni, ḇyemanmini, ma ifrur roi oso ḇaḇeri ḇefrur fa ḇyesneso.

⁴ Ḇape rosai fandun fa snonswa oso ifrurna rofyor swa ḇyedi ifrur sasar? Refoya ikofen ḇe snonswa, ”Waswar [pdef] swambri ma bewayam aweri.” (Kolose 3:19) Faro snonswa, waswarepen au kako na wafrur sasar. Ma wamarisen Allah ḇyuk ampun ḇe au ido, fandun fa buk ampun ḇe swa bedi. (Matius 6:12, 14, 15) Rofyor snonswa ma binswa suḇeampunyae su kuker sne  ḇemarisen ido, na ḇeḇefnoḇek su fa susma farḇakbuk ḇeaski ya.

5. Rosai ḇefnai fa snonswa ḇyesyowi binswa ḇyedi?

⁵ Yahwe imarisen insama snonswa ḇyesyowi swa ḇyedi. Snonswa fandun fa kyara mnis fandandun swa ḇyedi. Inema roi ḇefandun kaku. Rofyor snonswa ifrur pyumḇa faro swa ḇyedi ido, Yahwe na imewer ryower nadi ḇyena. (1 Petrus 3:7) Roi ḇefrur fa snonkaku sya sesyowi ro mamam Yahwe iso snaro siswar I. Myam snon sya ibasyadi buro bin syaḇa.

6. Rosai knam kaku ya faro snonswa ma binswa fa ”suḇe oser”?

⁶ Yesus ikofenḇadir snar snonswa ma binswa ”suḇe suru werḇa ḇoi suḇe oser.” (Matius 19:6) Suswaryaye ma suḇesyowiyaye su ma sukyaryaye su ḇesya kwar. (Amsal 5:15-21; Ibrani 13:4) Snonswa ma binswa skara fandandun mankun sena ḇardi awer ḇape faro fandandun baken sumin ya. (1 Korintus 7:3-5) Snonswa fandun fa iswarepen snar ”snonkaku oso dayin baken mankundi ḇyedi ḇaim, mboi fyaduru ma ḇyemanmin i”. Inja fandun fa iswar ma ḇyemanmin swa ḇyedi. Ibasyadi ro roi nakam, binswa imarisen insama swa ḇyedi ifrur pyum ma iswar kaku i.—Efesus 5:29.

7. Rosai ḇefnai fa kina oser fyandun ḇebukor ro kina ya?

⁷ Ro kina syakam sifandun kaku ono isya ḇyebukor ro kina ya, snon oso ḇefarkin si insama sifararur kayam kuker payamyum. Refoya ikofen ro syap 1 Korintus 11:3, ”Ḇeḇeḇru rofandu snonsya oser-oser isoine Kristus; mboi ḇeḇeḇru faro binsya ḇefakawin isoine snonsya, ma ḇeḇeḇru ro Kristus isoine Allah.”

8. Rariso binswa fyasnaḇair syowi ḇe snonswa ḇyedi?

⁸ Snonswa syakam sifrur sasar. Ḇape rofyor binswa  isonem snemuk snonswa ḇyedi ifrur kwarna ma isouserna kuker sne ḇemarisen, na ḇero kina syakam sisma fainda ya. (1 Petrus 3:1-6) Refoya ikofen, ”Ma bin oser-oser iḇye kada ḇyesyowi swa ḇyedi.” (Efesus 5:33) Rariso rofyor snonswa ikyar ḇa faro kakakyar swa ḇyedi? Fandun fa fyasna pdef syowi ḇyena faro swa ḇyedi. Refoya ḇyedif binswa sya, ”Bin ḇefakawin kwar mkoya, mkokunem faro swa mkoḇesi, insa ono ro mko seuser Allah wos ḇyedi ḇa, mkokofen roi oso faro si awer mboi rari mkoḇena nafrur fa sikyar kako, rofyor smam, kankenem ḇekaku ma ḇesren ro swa sesi.” (1 Petrus 3:1, 2) Farari ḇepyum ro binswa na ifnoḇek swa ḇyedi fa ifawi ma ḇyesyowi kakyar ḇyedi.

9. (a) Rosai binswa ifrurna rofyor imarisenḇa faro rosai snonswa ḇyedi ikofenna? (b) Rosai wos ḇefarkin ḇero syap Titus 2:4, 5 faro binswa sya?

⁹ Rosai na binswa ifrurna rofyor nya wos oserḇa kuker swa ḇyedi? Fandun fa fyasna karkara ḇyedi kuker nyan ḇefasna ḇyesyowi i. Imnis raris, rofyor Sara ikofen roi oso ḇefrur fa Abraham imaris’n ḇa, ḇape Yahwe  ikofen ḇe i, ”Rwower i.” (Kejadian 21:9-12) Rofyor snonswa Kristen oso dun snemuk ḇeḇese buro Refoya ḇa ido, fandun fa binswa ḇyedi isonem i. (Farfyar Ro Manwawansya 5:29; Efesus 5:24) Binswa ḇepyum na myam faduru kina ḇyesya. (Wasya Titus 2:4, 5.) Rofyor swa ma romawa ḇyesi smam fararur marḇak ifrur kwar ḇesi, na siswar ma sesyowi kaku i syadi wer.—Amsal 31:10, 28.

10. Rosai Refo ya ikofen kuker ḇaḇesisye ma farḇakbuk ḇemuk ya?

¹⁰ Fafisu oso snon ma bin ḇefakawin sya sun snemuk fasaw fa suḇe sisye yaye mura ḇaido sufrur farḇakbuk suḇena imuk. Imbape, Refoya ikofen snar ”bin ḇefakawin kwar oso ibur awer swari” ma rarya kako ”snon ḇefakawin oso ipok fyaspar awer swari.” (1 Korintus 7:10, 11) Fafisu ḇesamswen ḇeḇeso naisya nafrur fa suḇe sisye yaye su, ḇape fandun fa sukara pyum kaku ḇepon rofyor suyun snemuk ḇaim. Rariso rofyor sukinfir fa sufrur farḇakbuk suḇena imuk? Refoya fyasnaḇadir nyan oser monda fa suḇe sisye ro farḇakbuk ya iso rofyor binswa ḇaido snonswa ifrur farḇakbuk wer kuker snonkaku ḇese ḇeḇe binswa ḇaido snonswa ḇyedi ḇa.—Matius 19:9.

11. Rosai romawa sya sifandun syadi ro roi ḇesena?

¹¹ Faro sinan sya, mkoḇuk oras nabor faro romawa mkoḇesi. Romawa sya sefandun mko, ma ibasyadi ro roi nakam, sifandun fa mkoḇuk farkarkor kuker Yahwe ḇesi.—Ulangan 6:4-9.

12. Rosai na sinan sya sifrurna insama skadaun warek romawa sesya?

¹² Dunya Setan ine ifo kuker roi ḇemaḇak kaku, ma ono sisya simarisen fa sifrur samswen ḇe romawa koḇesya, sembuk fa serarosi [seks]. Sinan ḇeḇeso sya simai sawos  kuker roi ine ḇe romawa sesi. Ḇape sinan sya fandun fa sḇuk swarapepen ḇe romawa sesi kuker snonkaku ḇefrur radiya ma sfarkor si nyan rariso insama spampum ma sebinkwanbur si. Sinan mkoya, fandun fa mkokadaun warek romawa mkoḇesi. *—1 Petrus 5:8.

13. Rariso sinan sya sfarkor romawa sya rai?

¹³ Sinan sya sisma fararur ḇefandun kaku fa sḇuk farkarkor nyan rariso sfasna rari ḇepyum. Rariso na mkofarkor romawa mkoḇesi? Romawa mkoḇesi sifandun  ḇaḇefari, sifandun kako mkoḇuk ananun ḇeḇedif si fa sfadwer kenem ḇeḇyeḇa sena, ḇape kuker rarmomen awer. (Yeremia 30:11) Inja mkoḇuk aprer faro romawa mkoḇesi rofyor mkomsor ḇa. Mkomarisen ḇa fa wos mkoḇena namnis kuker ”wawankir ro sumber ḇeba” ma nmun snemun sena. (Amsal 12:18) Mkofarkor romawa mkoḇesi fa sifawi rosai ḇefnai fa fandun kaku fa sisoasuser faro sinan sya.—Efesus 6:4; Ibrani 12:9-11; mam Fasfas Ḇepupes 30.

14, 15. Rosai ḇefnai fa romawa sya sisouser pdef faro sinan sesi?

¹⁴ Yesus isoasuser pdef Kmari, syadiwer rofyor isma fafisu ḇesamswen. (Lukas 22:42; Yohanes 8:28, 29) Yahwe ikako imarisen insama romawa sya sisoasuser sinan sesya.—Efesus 6:1-3.

¹⁵ Romawa mkoya, rofyor mkoḇaḇir samswen fa mkosoasuser sinan mkoḇesi, mkoswarepen snar rofyor mkosoasuser ido, Yahwe ma sinan mkoḇesi siryaḇ kaku ḇe mko. *—Amsal 1:8; 6:20; 23:22-25.

16. (a) Rariso Setan ḇyensewar kaku fa ifrowes romawa babo fa sifrur roi ḇeḇarḇor? (b) Rosai ḇefnai fandun kaku fa ḇekinfir bati ḇeswar Yahwe I?

¹⁶ Setan na ifrowes au fa wafrur roi ḇesasar roro bati ḇedi ma romawa babo ḇese sya. Ifawi farawrowes ine na samswen kaku fa spampumna. Imnis raris, Yakub inaikir ḇyedi Dina i ḇyebati kuker snonkaku ḇeswar Yahwe I ḇa. Ine nafnai samswen faro i ma kina ḇyesi. (Kejadian 34:1, 2) Ḇebati kuker snonkaku ḇeswar Yahwe I ḇa ido, na sifrowes au fa wafrur rosai Yahwe dayin na, iso  ḇeyun fafardun ḇe au, kina ḇesi ma Allah I kako. (Amsal 17:21, 25) Ine iso ḇefnai fandun kaku fa wasma bati ḇeswar Yahwe I.—1 Korintus 15:33.

17. Rosai fakamamar faro snonkaku oser-oser sisma ro kina ḇyedi?

¹⁷ Rofyor keret ro kina siso farkankin Allah ḇyena ido, na sebinkwan buro roi ḇeḇyeḇa ma roi ḇesamswenna. Snonswa au ido, waswar swa bedi ma wafrur pyum i kuker saswar. Binswa au ido, ḇesyowi ma kwunem ḇe swa bedi ma ḇefarari rari ḇepyum binswa ḇesyowi oso neḇefasnaḇair ro syap Amsal 31:10-31. Sinan mkoya ido, mkofarkor romawa mkoḇesi infa siswar Allah I. (Amsal 22:6) Ḇe kma au ido, wafarkin kina ḇesi ”kuker ḇaḇye.” (1 Timotius 3:4, 5; 5:8) Ma romawa mkoya, mkosoasuser sinan mkoḇesi. (Kolose 3:20) Mkoswarepen snar oser-oser ro kina na mkofrur sasar, inja fandun fa mkona sne ḇerun ma mkoḇuk maf yaye mko. Kaku ḇae, Refoya naser farkankin ḇerama ro Yahwe faro oser-oser ḇero kina ya.