FARKARKOR 01
Rariso Wos Refo Nbuk Payamyum faro Au Rai?
Kokam kona fakfuken ḇekur kankenem ine, kandera na, marmar ya, ma ras naiwama. Oso wer ido, kokara samswen koḇena ro ras ḇe ras, raris kosewar fandun koḇena ḇaido nyan fa kosmai payamyum ro kina koḇesya. Wos Refo byuk kankarem faro snonggaku ḇebor sya fakfuken sena monda ḇa, mboi byuk anun ḇepyum kako faro kenem sena ro ras ḇe ras. Manggundaw kwara ido, Wos Refo na nbuk payamyum faro Au ma snonggaku waswar sya kako ke?
1. Refo iser kankarem faro fakfuken ḇerariso?
Refo ya byuk kankarem faro fakfuken ḇefandun kaku raris: Kankenem ine ryamuma ro? Rosai imbe kosewar kaku ro kenem ine? Rosai ḇefnai fa koḇekandera? Snonggaku ḇemar sya na moḇsa sḇerai? Snonggaku syakam simarisen sikenem kuker payamyum fama, sai ḇefnai fa mamun na naisya nabor kaku? Supswan ine nari kyain isof fyoro-fyoro ke? Refo danun fa kosewar kankarem faro fakfuken-fakfuken nane. Snonggaku ḇebor sya sismai kankarem ḇyena kwar.
2. Rariso Wos Refo nbuk payamyum faro kenem koḇena ro ras ḇe ras rai?
Refo iser wos anun ḇepyum kaku. Raris, ikofenḇair moḇsa kina sya sismai kaku payamyum ya rai. Ikofenḇair ḇe ko rosai na kofrur kaku fafisu koḇoryae ma moḇsa kofrur fararur koḇena fa napyum rai. Kofarkor syap ine kayamyam kada, nari wafawi rosai Refo ikofen ḇekur roi nane. Rarirya, nari wakyar ”fasfas ḇeḇor [ro Refo] nbefainda kaku”.—2 Timotius 3:16.
Syap ine fyadwer Refo ya ḇa. Imbape, syap ine isaramper Au fa wafarkor pyum Refo ya ro manggundaw. Inja, ngganun fa wawasya mnuk ro Refo ḇero syap ine kam ma bukikara na kuker rosai wafarkor kwar na.
SWEWAR KAKU WER
Kwarapan rariso Refo nbuk payamyum faro snonggaku ḇebor sya kwar, moḇsa nwa marisen fafisu wawasya Refo ya, ma roi ḇefnai fa wafandun snonggaku ḇese insama sisaramper Au fa wafawi Wos Refo ya.
3. Wos Refo na nfarkin ko
Refo ima imnis ra senter ḇesnai pyum. Wos farkin ḇero Refo nafnoḇek ko fa kofrur snemuk ḇepyum ma nakofenḇair ḇe ko roi nari ḇejadi ro ras naiwama.
Kowasya Mazmur 119:105, raimnai kawos fakfuken suine:
-
Rariso manfasfas Mazmur myam Wos Refo ya rai?
-
Manggundaw moḇsa mam Refo ya rai?
4. Refo ya bisa kyarem fakfuken koḇena
Bin oso ifawi kankarem ro Refo faro fakfuken kyara kawan kwar. Komam VIDIO, raimnai kawos fakfuken suine.
-
Ro vidio insanja, fakfuken rosaiso bin ani kyara na?
-
Payamyum risai ismai kwar kukro fyarkor Refo ya?
Refo danun ḇe ko fa kofuken ker. Kowasya Matius 7:7, raimnai kawos fakfuken ine:
-
Fakfuken rosai kwara na ḇo imbude kankarem ḇyena naisya ro Refo ya?
5. Bisa komarisen fa kowasya Refo ya
Snonggaku ḇebor simarisen siwasya Refo ma sismai payamyum. Komam VIDIO, raimnai kawos fakfuken suine.
-
Ro vidio insanja, moḇsa roma inai babo sya smam ḇaḇewasya na rai?
-
Rya simyaren siwasya ḇa, fama rosai ḇefrur si fa simarisen siwasya Refo ya?
Rosai Refo ikofen na, nbuk sneprei ma saneraro ḇe ko. Kowasya Roma 15:4, raimnai kawos fakfuken ine:
-
Wamarisen fa wakfawi asas ḇebuk sneprei ma saneraro ḇero Refo ya ke?
6. Snonggaku ḇese bisa sisaramper ko fa kofawi Wos Refo ya
Sia siwasya Refo monda ḇa, imboi simarisen sawos na kuker snonggaku ḇese, inja sismai payamyum. Kowasya Farfyar (Kisah) 8:26-31, raimnai kawos fakfuken ine:
-
Rariso na kofawi pyum Wos Refo ya rai?—Mam mnuk ḇe 30 ma 31.
Snon Etiopia oso fyandun snonggaku ḇesaramper i insama ifawi Wos Refo ya. Snonggaku ḇebor ḇero baboine sifawi pyum kaku Wos Refo ya kukro sia sisaramper si
SIA SOḆE: ”Kofarkor Refo nama nafnak oras monda.”
-
Moḇsa na kwarem rai? Kwarem rarirya kukro?
FARKARKOR ḆYENA
Refo byuk wos anun ḇepyum faro kenem koḇena ro ras ḇe ras, kyarem fakfuken ḇefandun koḇena, ma wos ḇero Refo dori nbuk sneprei ma saneraro ḇe ko.
Waswarepen Kaḇer
-
Wos anun ḇerariso na kosmai ro Refo ya?
-
Fakfuken ḇerariso kankarem ḇyena naisya ro Refo ya?
-
Roi risai monda wamarisen wafawi ro Refo ya?
SWEWAR NABOR WER
Kokarapan moḇsa wos anun ḇero Refo nbuk payamyum ḇe ko ro baboine rai.
”Farkarkor ḇero Refo—Fawawi Ḇekain Fyoro” (Syap Baryas No. 1 2018)
Snon oso rofyor iba ḇa ya, ḇyaḇir sefandun i ḇa. Moḇsa Refo isaramper i fa syambraḇ kaḇer rai?
Snonggaku ḇebor sya sifawi ḇa mansei ḇepoik kaku supswan ine. Ḇape, Refo isya ikofenḇair na kwar.
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
