FARKARKOR 06
Kankenem Ine Ryamuma ro?
Manseren Allah iso ḇebuk kankenem ine. (Mazmur 36:9) Wakyar roi ine ke? Sia skara ḇo soḇe kankenem ine ryamuma ro manggundi ḇaido ono ḇefrur kankenem ine ḇa. Roi ine kaku rarirya ido, na kopok kofawi ḇa rosai ḇefnai fa koisya kokenem ine. Fama Allah Yahwe iso ḇefrur kankenem ine ido, kokyar roi ḇepyum isya eḇedari ifrur snonggaku koine ḇae. a Nari kawos rosai Refo ikofen ḇekur kankenem ine moḇ ryamuma ya, ma nari kawos roi ḇefrur fa kokyar faro roi anine.
1. Farsyos ma supswan ine ndramuma ro?
Refo ya doḇe, ”Ro randak ya Allah ifrur farsyos ma supswan.” (Kejadian 1:1) Manfawawi ḇebor sya sna wos oser ḇo soḇe farsyos ḇeba ine nya randak. Inja moḇsa Allah ifrur farsyos ḇeba ine rai? Ḇye rur ḇesren Ḇyeja, isoine samambraḇ ḇeba Ḇyena fa ikfrur roi ḇebor kam ḇero farsyos ḇeba ine raris galaksi, mak sya, ma planet na.—Kejadian 1:2.
2. Rosai ḇefnai fa Allah ifrur supswan ineni?
Yahwe ’ifrur [supswan] fa ḇyebei monda ḇa, ḇape ifrur na fa koḇarek ro na’. (Yesaya 45:18) Yahwe ifrur supswan ine ḇe moḇ ḇepyum kaku fa snonggaku koine koḇarek ro na. Ma fyasos roi kofandun ro supswan ine kako insama kokenem isof fyoro-fyoro. (Kowasya Yesaya 40:28; 42:5.) Manfawawi sya soḇe supswan ine iḇese ro planet eḇesena kukro supswan ine monda snonggaku koine bisa kokenem ro ya.
3. Rosai ḇefrur fa snonggaku koine koḇese ro aiwan sya?
Yahwe ifrur supswan ine raposa, ifrur roi ḇekenem ḇebor na wer. Ḇepon ya, ifrur rokaker ma aiwan sya. Raimnai, ”Allah ifrur snonggaku ḇemnis raris I”. (Kowasya Kejadian 1:27.) Rosai monda ḇefrur fa snonggaku koine koḇese ro aiwan sya? Allah Yahwe ifrur ko imnis raris I, isoine byuk samambraḇ ḇe ko fa kakfasnai rari ḇepyum Ḇyena, raris saswar ma nanapes. Fafisu Yahwe ifrur ko, byuk samambraḇ ḇe ko fa kofawi kawose, komanen roi ḇepyum na, ma korower musik. Ipyum syadi wer, koma koḇese ro aiwan sya kukro kofawi koswar ma koḇesyowi Manseren Allah ḇefrur konya.
SWEWAR KAKU WER
Nari kofarkor roi ḇefasnai Manseren Allah iso ḇekara ma ḇefrur roi ḇekenem sya. Komam kako roi ḇefnai fa kokyar roi Refo ikofen ḇekur roi nane. Nari kofarkor fa komambir pyum Allah rari ḇepyum Ḇyena komam ro snonggaku sya sfasnai na.
4. Mansei ḇekara ma ḇefrur kankenem ine?
Snonggaku sya smanen si kukro roi sifrur sifarari ro roi ḇekenem na. Inja mansei ḇefrur kaku roi ḇekenem anna kam, rarirya iso ḇesrow syadi fa smanen i? Komam VIDIO, raimnai kawos fakfuken ine.
-
Rosai snonggaku sya sfarari ro roi ḇekenem smam ro supswan ine?
Rum nakam naisya kukro ono sisya ḇekara ma ḇeḇawes na. Ḇape mansei ḇekara ma ḇefrur roi nakam komam ro supswan ine bori? Kowasya Ibrani 3:4, raimnai kawos fakfuken suine:
-
Rosai wamarisen syadi ro roi ḇekenem mam ro supswan ine na?
-
Wakyar Manseren Allah iso ḇefrur supswan farsyos ine ma roi ḇebor kam ḇero dori na, nama nasrow ke? Kwarem rarirya kukro?
Wafawi ke?
Na wasrow fasfas ma vidio ḇekur awawos ine ro jw.org ro bar ”Inema Sifrur Na Ke?” ma ”Kakara ḇekur Randak Kankenem Ryamuma ya”.
”Snar snon oso ḇefawinananem ḇaḇawes rum ḇape snon ḇefawinananem ḇaḇawes roi ḇeborkam isoine Allah”
5. Fawar ro Refo ḇekur moḇsa supswan ine ryamuma ya nama roi ḇekaku nairi
Ro syap Kejadian fasal 1 ya, Refo ikofenḇair moḇsariso supswan ine ma roi ḇero dori na ndramuma rai. Nanema fawar sinan siwara monda ke, bisa kokyar na? Komam VIDIO, raimnai kawos fakfuken suine.
-
Refo ya doḇe supswan ine ma roi ḇekenem ḇero dori na neḇefrur ro swaf ras ri wonem monda ke?
-
Moḇsa kwara rai, fawar ro Refo ḇekur moḇsa supswan ine ḇyeḇefrur raya nama nkaku ke? Kwara rarirya kukro?
Kowasya Kejadian 1:1, raimnai kawos fakfuken ine:
-
Manfawawi sya soḇe farsyos ḇeba ine nya randak. Roi sikofen nane namnis kuker rosai wawasya ro Refo ya ke?
Sia skara Manseren Allah ifrur roi ḇekenem sya roro roi sor ḇe evolusi. Soḇe ifrur ḇepon sel kasun oso, fawawas mura fyadwer ḇe roi ḇekenem ḇebor na. Kowasya Kejadian 1:21, 25, 27, raimnai kawos fakfuken suine:
-
Refo doḇe Manseren Allah ifrur ḇepon sel kasun oso, fawawas mura fyadwer ḇe in, aiwan ḇesasus, ma snonggaku sya ke? Ḇaido Manseren Allah ifrur roi ḇekenem ḇebor anna kam ro randak kaku kwar?
6. Snonggaku sima roi ḇekenem ḇepyum syadi Manseren Allah ifrur sirya
Yahwe ifrur snonggaku koine ma aiwan sya. Imboi roi ono naisya nafrur fa koma koḇese ro aiwan sya. Kowasya Kejadian 1:26, raimnai kawos fakfuken ine:
-
Kona samambraḇ fa kakfasnai saswar ma sawarwar kukro Manseren Allah ifrur ko imnis raris I. Inja rosai Allah rari ḇepyum Ḇyena komam ro fararur Ḇyenane?
SIA SOḆE: ”Fawar ro Refo ḇekur moḇ kankenem ine ryamuma ya ima fawar sinan monda.”
-
Moḇsa kwara rai? Rosai ḇefnai fa kwara radiri?
FARKARKOR ḆYENA
Yahwe ifrur farsyos ḇeba ine ma roi ḇekenem syakam.
Waswarepen Kaḇer
-
Rosai Refo ikofen ḇekur moḇsa farsyos ḇeba ine ryamuma ya?
-
Manseren Allah ifrur ḇepon sel kasun oso ḇo fawawas mura fyadwer ḇe roi ḇekenem nakam ke? Ḇaido ro randak kaku ifrur roi ḇekenem ansya kam kwar ke?
-
Rosai ḇefrur fa snonggaku koine koḇese ro aiwan sya?
SWEWAR NABOR WER
Roi ḇekenem nakam nfasnai Manḇefrur ima isya kaku.
”Rosai Sfarkor ro Roi Ḇekenem ḇero Supswan?” (Syap Sedarlah! September 2006)
Mampan kma oso ikofenḇair ḇe roma mgun ḇyedi fawar ro Refo ḇekur moḇsa Allah Yahwe ifrur supswan ine rai.
Farkarkor sor ḇe evolusi anya nasrow kuker Refo ya ke?
”Manseren Allah Ḇye Evolusi fa Ikfrur Roi Ḇekenem Nakam Ke?” (Fasfas ro situs jw.org)
a Ro Farkarkor 25 iwama, insape nari kawos roi ḇepyum eḇedari Manseren Allah ifrur snonggaku koine.
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
