FARKARKOR 11
Nyan fa Wasmai Payamyum Rofyor Wawasya Refo
Ausya nwa fararur ḇeba mboi waḇor moḇsa wafrur randak fararur anya ke? Rarirya ido, na kwara fa warwas na ḇe fararur ḇekasun syadi insama napyan fa wafrur na. Wawasya Refo ima imnis ra nwa fararur ḇeba. Na wafuken radine, ’Moḇsa yawasya randak Refo ya rai?’ Ro farkarkor ine, nari kawos nyan ḇepyan fa wafrur na insama wamarisen wawasya ma wafarkor Refo ya.
1. Rosai ḇefnai kaku fa kowasya myaren Wos Refo ya?
Snonggaku ḇemyaren fa ḇewasya Refo, oroḇaido ”Yahwe sasoser Ḇyena”, nari ismai marasrisen ma payamyum. (Kowasya Mazmur 1:1-3.) Wabe wawasya randak ido, ras oser wawasya bar kermgun monda resari. Wafawi pyum fawar ḇero Wos Refo ya kwar ido, nari wamarisen syadi fa wawasya na wer.
2. Rosai na wafrur kaku insama wasmai payamyum rofyor wawasya Wos Refo ya?
Insama kosmai payamyum syadi rofyor kowasya Wos Refo ya, ipyum ya komnai koper fa kokara rosai kowasya na resanari. Inja na kowasya monda ḇa, mboi ”kokarauser na” kako. (Yosua 1:8) Imbe kofrur roi ine ido, fafisu kowasya, kofuken manggunko radine: Rosai mnuk ine ikofen ḇe aya ḇekur Yahwe I? Moḇsa yafrur na ro kenem yena rai? Moḇsa yabuk na fa yaksaramper snonggaku ḇesesya rai?
3. Fafisu risaiso ḇesrow kaku fa wawasya Wos Refo ya?
Wabe fasos swaf fa wawasya Wos Refo fama syamswen ke? Snonggaku ḇebor sya sakkara rarirya. Refo ya danun ko fa kofarfnak awer oras koḇena. (Efesus 5:16) Waso pyum anun ine kuker wap mnis fafisu risai wabe wawasya Refo ro ras ḇe ras na. Sia sisya sfasos swaf ro arwo prim kaku fa siwasya Wos Refo ya. Sia wer, siwasya Refo fafisu simnaisu ro fararur sena ro arkok ya, ḇesesya wer siwasya na ro fafisu senef ḇaim. Manggundaw ido, fafisu risai kwara isrow fa wakwasya Refo ya?
SWEWAR KAKU WER
Na kofarkor moḇsa ḇaḇewasya Refo Bena nafrur Au fa wamarisen syadi. Ma nari kofarkor moḇsa fasasos ḇepyum nasaramper Au fa waksmai payamyum nabor syadi ro farkarkor Refo Bena.
Rupa ra kosewar fa komarisen kan roḇean insape kan babo na, rarirya kako kosewar kaku kada na komarisen fa kowasya Refo ya
4. Nyan insama wamarisen syadi wawasya Refo ya
Snonggaku oso rya imarisen manggun ḇa faro roḇean insape dan babo, mboi fawas mura nari imarisen dan na. Imnis rarirya, kowasya randak Wos Refo rya nafrur papum kero, fama nari kona marasrisen fa kowasya na. Kowasya 1 Petrus 2:2, raimnai kawos fakfuken ine:
-
Manggundaw kwara wawasya Refo ro ras ḇe ras ido, nari wamarisen syadi fa wawasya na wer ke?
Komam VIDIO ḇefasnai roi ḇefrur fa roma inai babo sya simarisen siwasya Refo ya. Raimnai kawos fakfuken ri kyor skoine.
-
Samswen rosai roma inai babo ro vidio insanja sismai na?
-
Rosai ḇesaramper si fa simarisen siwasya Refo ya pdef?
-
Rosai sifrur kaku fa simarisen syadi siwasya Refo ya?
Roi nari ḇesaramper Au:
-
Kwinfir Refo sfarwei mnis na, ma wos ḇyena napyan fa wafawi na. Mampan Refo Terjemahan Dunia Baru ma Refo ine naisya kwar ro wos Bena ido, wawasya na.
-
Wawasya ḇepon syap minsai wamarisen syadi na. Mam sasyos ”Berandak fa Wawasya Refo ya”.
-
Bekopḇair rosai wawasya kwar na. Mam sasyos ”Swewar Ḇaḇewasya Refo Bena” ḇero syap ine.
-
Waser aplikasi JW Library®na. Ro moḇ sairirya kam bisa wawasya ma rwower ḇaḇewasya Refo serekam kwar ro wos ḇebor ḇero HP, tablet, ḇaido robebor ḇese Bena.
-
Mam lampiran ro Refo Terjemahan Dunia Baru. Roi nane naser peta, sasyos, sonin, ma apap ḇero Refo na. Nane naksaramper Au fa wamarisen syadi wawasya Refo ya.
5. Fasos pyum farkarkor Refo Bena
Kowasya Mazmur 119:34, raimnai kawos fakfuken ine:
-
Rosai ḇefnai fa wanadi ḇepon resari insape wawasya Refo ma wafrur fasasos faro farkarkor Refo Bena?
Rosai na wafrur kaku insama wasmai payamyum nabor syadi ro farkarkor Refo Bena oser-oser? Fafisu wafrur fasasos faro farkarkor oso, waso nyan ine pan:
-
Wawasya syos ḇerandak ro farkarkor ya.
-
Wawasya mnuk nakam, ma swewar fa wafawi moḇsa mnuk anya nya fasfes kuker farkarkor ya.
-
Bekopḇair wos ḇekarem fakfuken na. Nane nasaramper Au fa wawos pyum na kuker snonggaku ḇebuk farkarkor Refo ḇe Au ya.
Wafawi ke?
Saksi-Saksi Yahwe sfarkor kuker terjemahan Refo oso monda ḇa. Fama sesyowi syadi Refo Terjemahan Dunia Baru kukro wos ḇyena namnis, nasnai, ma sfas Manseren Allah snonsnon Ḇyedi.—Mam fasfas ro situs jw.org ”Saksi-Saksi Yahwe Sna Refo ro Manggunsi Ke?”
SIA SOḆE: ”Ayama yamarisen yafarkor Refo ya, mboi rya samswen kero.”
-
Manggundaw moḇsa wakmam farkarkor Refo ya rai?
FARKARKOR ḆYENA
Imbe wasmai payamyum nabor syadi rofyor wawasya Refo ido, fasos pyum swaf fa kwain wawasya na, benadi insama wafawi pyum rosai wawasya na, ma wafasos pyum farkarkor Bena oser-oser.
Waswarepen Kaḇer
-
Rosai na ḇesaramper Au fa wasmai payamyum nabor syadi rofyor wawasya Refo ya?
-
Swaf risai ḇesrow fa wakwasya Refo ma wafarkor na?
-
Rosai ḇefnai fa ipyum ya wafasos ḇepon farkarkor Refo Bena?
SWEWAR NABOR WER
Wawasya roi nakam na ḇesaramper Au fa wasmai payamyum nabor syadi rofyor wawasya Refo ya.
”Wasmai Payamyum Nabor Syadiwer ro Ḇaḇewasya Refo” (Syap Baryas No. 1 2017)
Mam nyan ri kyor moḇsa na wawasya Refo ya rai.
”Payamyum Rosai Na Yasmai ro Wos Refo ya?—Bar 1: Mambir Wos Refo ya” (Fasfas ro situs jw.org)
Mam nyan insama wamarisen wawasya Wos Refo ya.
Snonggaku ḇewasya Refo fyoro kwar sya sikofenḇair nyan ḇepyan fa kowasya Refo ya.
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
