FARKARKOR 15
Yesus Ima Manseirya Kaku?
Komam ro supswan ine, snonggaku sifawi kaku sya sisya sibore. Oser ya iso Yesus i. Kawasa ḇebor sya sifawi snori, fama smambir kuf i ḇa ma sna kakara ḇesisye ḇekur manseirya kaku. Rosai Refo dakkofen kaku ḇekur Yesus i?
1. Yesus ima manseirya kaku?
Yesus ima malaikat ḇesambraḇ kaku ḇekenem ro nanggi. Allah Yahwe ifrur i ḇepon insape ifrur roi ḇebor ḇesena kam. Iso eḇedari Refo dap i ḇe ’rumgun rak, i ḇepon ro roi ḇebor ḇefrur kwar na’. (Kolose 1:15) Refo doḇe Yesus ima Allah ’Rumgun Mandos Ḇyedi’ kukro Yahwe manggundi iso ḇefrur Yesus i ḇeri. (Yohanes 3:16) Yesus fyararur kayam kuker Kmari Yahwe I, isoine ifnoḇek I fa sufrur roi ḇebor kam. (Kowasya Amsal 8:30.) Yesus ima fyanam kaku faro Yahwe I, inja na imarisen ḇesya kwar. Refo dap Yesus i kako ḇe ’Wos’ kukro ikofenḇair pyan Manseren Allah angginem ma parenta Ḇyena faro ḇesesya.—Yohanes 1:14.
2. Rosai ḇefrur fa Yesus ryamuma ḇe supswan ine?
Rya taun ri 2.000 naiwara, Yahwe ifrur mujisat. Ḇye rur ḇesren Ḇyeja fa ḇye Yesus kankenem rur ḇyeja ro nanggi fa ikren ḇe binkbor oso ḇenir ḇe Maria snekapar ḇyedi. Rarirya, Maria kyapar Yesus i ḇe snonggaku. (Kowasya Lukas 1:34, 35.) Yesus ryamuma ḇe supswan ine fa ḇye Mesias, ḇaido Kristus, ḇeḇeasas ḇepon kwar ani, ma insama fyaspar snonggaku syakam. a Ḇardadi nakam ḇero Refo ḇekur faro Mesias nejadi ro Yesus i. Nane nafnoḇek snonggaku sya fa smambir pyum Yesus i ḇe ’Kristus, Rumgun Allah ḇekenem’.—Matius 16:16.
3. Fafisu ine Yesus isya ryoyo?
Fafisu Yesus imar ro supswan ine raposa, Yahwe ḇyawes i fa ikenem wer ḇe rur ma kyaḇer ḇe nanggi. Refo doḇe ro diwa, ”Allah ikanowi fa ikaki syadi”. (Filipi 2:9) Fafisu ine Yesus ismai kankain ḇekaki kwar. Yahwe derer monda ḇesambraḇ syadi insape Yesus iso eḇe suru ya.
SWEWAR KAKU WER
Nari kawos nabor syadi wer fa kofawi Yesus ima manseirya kaku ma rosai ḇefnai fa fawawi ḇeradinema roi ḇefandun kaku nairi.
4. Yesus ima Manseren Allah Ḇepoik Syadi disya ḇa
Yesus ima malaikat ḇesambraḇ kaku ḇeḇarek ro nanggi. Ḇape, Refo doḇe kyunem faro Kmari, Allah Yahwe I. Kofawi na ro? Komam VIDIO ine resari fa kobukikara moḇ Refo dap Yesus kankain ḇyena. Refo doḇe Yesus ima iḇese ro Manseren Allah Ḇepoik Syadi.
Mnuk ḇero sop nane nafnoḇek ko fa kofawi pyum Yahwe ima iḇese ro Yesus i. Kowasya mnuk nane kam, raimnai kawos fakfuken na:
Kowasya Lukas 1:30-32.
-
Raris roi malaikat ani ikofen ya, rosai ḇefasnai Yesus ima iḇese ro Yahwe, Allah ’Ḇekaki Syadi’ ya?
Kowasya Matius 3:16, 17.
-
Fafisu sebaptis Yesus anya, mgarem rosai srower ḇerok ro nanggi mumfes ya?
-
Kwara ido, mansei ḇeyawos ya?
Kowasya Yohanes 14:28.
-
Mansei ḇesinan syadi ma ḇena papoik ḇeba syadi ya? Kma ya ke roma ya?
-
Yesus dor Yahwe I ḇe Mami. Rosai kofawi ro Yesus wos ḇyenane?
Kowasya Yohanes 12:49.
-
Yesus manggundi kyara Kmari suma sumnis ke? Manggundaw moḇsa wakkara rai?
5. Roi ḇefasnai kaku Yesus ima Mesias dirya
Refo fyas ḇardadi ḇebor ḇesaramper snonggaku sya fa smambir Mesias i. Mesias iso Manseren Allah kyinfir fa fyaspar snonggaku koine. Komam VIDIO ine fa kofawi ḇardadi ḇeḇeso nejadi kwar ro Yesus i fafisu ryamuma ḇe supswan ine.
Kowasya ḇardadi ro Refo ḇero sop ine, raimnai kawos fakfuken na:
Kowasya Mikha 5:2 fa kokfawi moḇ risaiso Mesias kaparpar ḇyeja. b
-
Yesus snari kyapar i ro moḇ sap ro ḇardadi ine ke?—Matius 2:1.
Kowasya Mazmur 34:20 ma Zakharia 12:10 fa kokfawi ḇardadi ḇekofenḇair Mesias moḇ imar raya.
-
Ḇardadi nane nejadi kaku kwar ke?—Yohanes 19:33-37.
-
Kwara ido, Yesus fyasos ḇepon kwar insama roi ḇardadi ikofen na nejadi rarirya ke?
-
Inja, rosai wafawi kaku ro Yesus i?
6. Kosmai payamyum kukro kofarkor fa kofawi pyum Yesus i
Refo doḇe kofarkor fa kofawi Yesus i ma fararur ḇyena ima roi ḇefandun kaku. Kowasya Yohanes 14:6 ma 17:3, raimnai kawos fakfuken ine:
-
Rosai ḇefnai fa kofarkor insama kofawi pyum Yesus i nanema roi ḇefandun kaku nairi?
Yesus fyasnai nyan fa Manseren Allah nya ko ḇe bati Ḇyedi. Fyarkor ko kakaku ḇekur Yahwe I ma iso nyan fa nari kosmai kankenem fyoro ya
SIA SOḆE: ”Saksi-Saksi Yahwe sima sikyar faro Yesus i ḇa.”
-
Moḇsa na kwarem rai?
FARKARKOR ḆYENA
Yesus ima malaikat ḇesambraḇ kaku. Ima Manseren Allah Roma Ḇyediri ma Mesias dirya.
Waswarepen Kaḇer
-
Rosai ḇefnai fa Refo dap Yesus i ḇe ’rumgun rak, i ḇepon ro roi ḇebor ḇefrur kwar na’?
-
Fafisu Yesus ryamuma ḇe supswan ine ḇaim, rosai ifrur ya?
-
Rosai ḇefasnai kaku Yesus ima Mesias dirya?
SWEWAR NABOR WER
Wawasya fa wafawi moḇsa na kofawi Yesus ima Mesias dirya.
”Kaku Yesus Iso Mesias Sikofen Ḇepon Ani Ke?” (Fasfas ro situs jw.org)
Refo doḇe Manseren Allah nya Yesus i ḇe romawa raris snonggaku sya moḇ sna romawa sesya ke?
”Rosai Ḇefnai fa Sor Yesus I ḇe Manseren Allah Roma Ḇyedi?” (Fasfas ro situs jw.org)
Wawasya roi ḇefasnai kaku farkarkor ḇeyoḇe allah ri kyor ḇaido Tritunggal nama neknam ro Refo ya ḇa.
”Yesus Ima Manseren Allah Dirya Ke?” (Syap Baryas 1 April 2009)
a Ro Farkarkor 26 ma 27 iwama, insape nari kawos rosai ḇefnai fa snonggaku koine kofandun fasaspar ma moḇsa Yesus fyaspar ko rai.
b Mam ro Fasfas Ḇewarpu 2 fa wafawi ḇardadi oso ḇekofenḇair pyum kaku fafisu risai Mesias ryamuma ḇe supswan ine.
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
