FARKARKOR 17
Rari Rosai Monda Yesus Ismai ya?
Kofarkor pyum kaḇer rosai Yesus dawos ma ifrur kwar ro fafisu ikenem ro supswan ine kada, nari kofawi pyum rari-rari ḇyena. Roi nane nari nafrur fa kofanam syadi yoḇ i ma Kmari, Yahwe I. Rari ḇepyum rosai monda Yesus ismai na? Ma moḇsariso kakfasnai na ro kenem koḇena rai?
1. Moḇsa Yesus imnis ra Kmari rai?
Ro fafisu Yesus ryamuma ḇe supswan ine ḇaim, ikenem ro nanggi ro swaf taun milyar kwar. Ro fafisu anya, Yesus myam Kmari fyasnai sawarwar ro roi ḇebor kam, inja fyarkor nabor ro Kmari. Naiso ḇefrur fa moḇ Yesus kyara raya, moḇ ḇyaḇir raya, ma roi ifrur nakam namnis ra Kmari. (Kowasya Yohanes 5:19.) Yesus fyasnai pyum kaku Kmari rari-rari Ḇyena. Iso eḇedari ikofen radine, ’Mansei ḇemam aya kwar ido, myam Kma ya kwar kako.’ (Yohanes 14:9) Inja, kofarkor fa kofawi pyum Yesus rari ḇyena kada, nari komambir pyum Yahwe I. Rupa ra, kwara moḇ Yesus iswar kaku snonggaku sya kada, nari wakyar kako Yahwe ima iswar Au kaku.
2. Moḇsa Yesus fyasnai kwar ima iswar Yahwe I?
Yesus ikofen bo doḇe, ”Insa supswan ine sifawi, mboi yaswar Mami ma yafrur roi ḇeḇor kam Mami syoser faro ayana kwar.” (Yohanes 14:31) Fafisu Yesus ikenem ro supswan ine, fyasnai iswar kaku Kmari kuker isouser parenta Ḇyena, ma ipyum syadi wer isouser pdef ro fafisu ḇesamswen na. Oso wer ido, Yesus imarisen ikofenḇair Kmari ḇe snonggaku ḇesesya ma isaramper si fa sfanam yoḇ Kmari.—Yohanes 14:23.
3. Moḇsa Yesus fyasnai kwar ima iswar snonggaku sya?
Refo ya doḇe Yesus ’imarisen syadi faro snonggaku sya’. (Amsal 8:31) Yesus fyasnai saswar faro snonggaku sya kuker syambraḇser si ma isaramper si. Yesus ifrur mujisat ḇebor na kako fa byukifasnai papoik ḇyeja monda ḇa, mboi saswar ḇyena kako. (Markus 1:40-42) Ifrur pyum snonggaku sya ma myamfarfir si ḇa. Wos ḇyena nbuk sneprei ma saneraro faro snonggaku ḇena sne ḇenapes ḇerower i sya. Yesus imarisen ḇyekandera isof ro imar kukro iswar fafaya snonggaku syakam. Ḇape, iswar syadi snonggaku ḇesouser farkarkor ḇyena.—Kowasya Yohanes 15:13, 14.
SWEWAR KAKU WER
Nari kofarkor fa kofawi syadi Yesus rari-rari ḇyena. Ma komam moḇsa kakfasnai saswar ma sne ḇesawarwar raris Yesus i.
4. Yesus iswar Kmari
Yesus fyasnai nyan ḇe ko moḇ kofasnai saswar koḇena faro Manseren Allah. Kowasya Lukas 6:12 ma Yohanes 15:10; 17:26. Kowasya mnuk-mnuk anna, raimnai kawos fakfuken ine:
-
Raris Yesus i, moḇsa kakfasnai saswar faro Yahwe I rai?
Yesus iswar Kmari ma dawos ker ḇe Kmari ro nadi ḇyena
5. Yesus kyara snonggaku ḇesesya fandun sena
Yesus myam ḇepon snonggaku ḇese fandun sena ro fandun ḇyena ḇardi. Fafisu imbrus yano, imarisen byuk swaf ma samambraḇ ḇyena fa isaramper kawasa sya. Kowasya Markus 6:30-44, raimnai kawos fakfuken nane:
-
Ro fawar ḇero mnuk nane, moḇsa Yesus kyara snonggaku ḇese fandun sena rai?—Mam mnuk ḇe 31, 34, 41, ma 42.
-
Rosai ḇedif Yesus i fa isaramper snonggaku ḇese?—Mam mnuk ḇe 34.
-
Snar Yesus fyasnai pyum Yahwe rari-rari Ḇyena, inja rosai kofarkor ro fawar ine ḇekur Yahwe I?
-
Yesus kyara snonggaku ḇese fandun sena, inja moḇsariso na kakfrur raris Yesus i rai?
6. Yesus fyasnai sne ḇesawarwar
Yesus ima dakḇe nana ḇa, mboi fyasnai sne ḇesawarwar. Danun kako ḇe ko fa kakfasnai sne ḇesawarwar ine. Kowasya Farfyar 20:35, raimnai kawos fakfuken ine:
-
Rosai na kofrur insama komarisen syadi?
Komam VIDIO, raimnai kawos fakfuken ine.
-
Kona pipi ma nana nabor ḇa yo, rosai bisa kobuk ḇe snonggaku ḇesesya?
Wafawi ke?
Refo fyarkor ko fa konadi kor ḇe Yahwe I kuker snonsnon Yesus. (Kowasya Yohanes 16:23, 24.) Koḇenadi bo kor kuker snonsnon Yesus ido, ima kofasnai kokofen kasumasa faro rosai Yesus ifrur kwar fa koḇebati kuker Yahwe I.
SIA SOḆE: ”Manseren Allah myam kandera koḇena ḇa.”
-
Yesus fyasnai pyum kaku Kmari rari-rari Ḇyena fa kofawi kwar, inja moḇsa roi ifrur kwar na nfasnai Yahwe myam kaku ko ro kandera koḇena rai?
FARKARKOR ḆYENA
Yesus iswar Yahwe I, ma iswar snonggaku koine. Yesus fyasnai pyum kaku Kmari rari-rari Ḇyena kwar. Inja mambir pyum kaku Yesus i kada, nari mambir pyum Yahwe I kako.
Waswarepen Kaḇer
-
Moḇsa na kofasnai koswar Yahwe I raris Yesus i?
-
Moḇsa na kofasnai koswar snonggaku sya raris Yesus i?
-
Ro Yesus rari ḇyena, rari minsai wamarisen kaku ya?
SWEWAR NABOR WER
Ro Yesus rari ḇyena, rari minsai bisa kakfasnai ro kenem koḇena?
”Koso Yesus I fa Kofasnai . . .” (Syap Yesus—Nyan, Kakaku, Kankenem, ram 317)
Mam roi ḇefnai kaku fa konadi ido, kor kuker snonsnon Yesus.
”Rosai Ḇefnai fa Konadi kuker Snonsnon Yesus?” (Syap Baryas 1 Februari 2008)
Refo isya ikofenḇair moḇ Yesus isnai raya ke?
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
