FARKARKOR 19
Saksi-Saksi Yahwe Sima Snonggaku Kristen Ḇekaku Sirya Ke?
Saksi-Saksi Yahwe inggoine, nggokyar nggoso kaku Manseren Yesus Kristus i. Nggokofen radine kukro? Nari kawos fakfuken ri kyor nane: Roi nggokyar na neknam ro? Rosai ḇefnai fa sor inggo kuker apap Saksi-Saksi Yahwe? Ma moḇsa nggofasnai nggoswar snonggaku ḇesesya rai?
1. Saksi-Saksi Yahwe sya roi sikyar na neknam ro?
Yesus doḇe Allah Wos Ḇyena iso kakaku nairya. (Yohanes 17:17) Raris Yesus i, Saksi-Saksi Yahwe roi sikyar na neknam kaku ro Allah Wos Ḇyena Refo ya. Ro taun 1870 ḇe bo, snonggaku ḇena sne ḇenapes sya siryur ma sfarkor pyum Refo ya fa sikfawi roi ḇekaku na. Kakaku ḇero Refo nane naiso suf fa ḇye knam ro kakyar sena. Roi sikyar na iḇese ro gereja sya roi sakkofen na. Mura sikofenḇair kakaku ḇero Refo nane faro snonggaku ḇesesya. a
2. Rosai ḇefnai fa sor inggo kuker apap Saksi-Saksi Yahwe?
Yahwe dor snonggaku ḇesyom I sya ḇe saksi-saksi Ḇyesi kukro siso ḇekofenḇair kakaku ḇekur manggundi faro snonggaku ḇese. (Ibrani 11:4–12:1) Ro fafisu naiwara, Yahwe ikofen ḇe kawasa Ḇyesi radine, ”Mgoma saksi-saksi Ayesi mgo.” (Kowasya Yesaya 43:10.) Refo dap Yesus i ḇe ”Saksi ḇeḇeuser”. (Fasasna 1:5) Iso ḇefnai fa ro taun 1931, sor inggo kuker apap Saksi-Saksi Yahwe kako. Nggosmai syowi ḇeba kaku fa sor inggo kuker snonsnon ine.
3. Moḇsa Saksi-Saksi Yahwe sya sfasnai saswar raris Yesus i rai?
Yesus iswar kaku manfamyan ḇyesi. Myam si ḇe kina karyer ḇekaku ḇyesirya. (Kowasya Markus 3:35.) Raris moḇ Yesus iswar si raya, Saksi-Saksi Yahwe ro supswan ine ḇesiper sḇeoser ma siswar snonggaku ḇese raris kina ḇero rum sedi. Iso ḇefnai fa nggor min nggoḇesi ḇe naek ma srar. (Filemon 1, 2) Nggosouser parenta ine kako: ”Mkoswar naek srar mkoḇesi.” (1 Petrus 2:17) Nggofasnai nggoswar naek ma srar nggoḇesi ro nyan ḇebor. Nyan oser ya iso nggofnoḇek naek srar nggoḇesi ro supswan ine ḇesiper rofyor sfandun fafnoḇek.
SWEWAR KAKU WER
Nari kawos nabor syadi fa kofawi sarisa ro Saksi-Saksi Yahwe sya marandan sena, ma komam roi ḇefasnai kaku siso ḇeso kaku Manseren Yesus i.
Snonggaku Kristen ḇekaku sima roi sikyar na neknam ro Refo ya ma sikofenḇair kakaku ro Refo ya faro snonggaku ḇese
4. Roi nggokyar na neknam ro Refo ya
Yahwe ikofen ḇepon kwar kakaku ro Refo nari insape sifawi pyum na ro ras ḇarpur. Kowasya Daniel 12:4 ma fasfas kasun ḇyena, raimnai kawos fakfuken ine:
-
Allah kawasa Ḇyesi sfarkor pyum kaku Refo ya kada, roi nabor kaku rosai nari sismai na?
Nari komam moḇsa snon ono ma Naek Charles Russell sfarkor pyum kaku Wos Refo ya. Komam VIDIO, raimnai kawos fakfuken ine.
-
Ro vidio insanja, nyan risaiso Naek Charles Russell ma bati ḇyesya sbukifarkor Refo ya?
Wafawi ke?
Fafisu ono ido, na nggomam kaḇer fawawi nggoḇena faro rosai nggokyar ḇepon kwar na. Kukro? Raris moḇ ori ya isnai fawawas supswan ine, Manseren Allah fyasnai fawawas fawawi ro Refo na ḇe ko. (Kowasya Amsal 4:18.) Koswarepen, kakaku ro Refo ya nfadwer ḇaḇeri. Nggo iso ḇefadwer moḇ nggofawi kakaku ya rai. Inja, nggofawi pyum syadi kakaku ḇero Refo na wer ido, na nggomam kaḇer roi nggokyar na.
5. Nggokenem raris snonsnon sbukidor inggo
Rosai ḇefnai fa sor inggo ḇe Saksi-Saksi Yahwe? Komam VIDIO, raimnai kawos fakfuken na.
-
Rosai ḇefnai fa apap Saksi-Saksi Yahwe ima isrow kaku?
Rosai eḇewari Yahwe kyinfir snonggaku sya fa siso eḇe saksi faro I? Imarisen fa saksi Ḇyesine sikofenḇair roi ḇekaku ḇekur I faro snonggaku ḇesesya, kukro agama ḇekaku ḇa sfarkor roi ḇesasar ḇekur Manseren Allah. Komam farkarkor ḇesasar ri suru suine.
Agama ḇeḇeso sfarkor kawasa sesi bo soḇe Manseren Allah imarisen sun amfyanir ro samsyom sena fa siksyom I. Ḇape, komam rosai Refo ikofen na. Kowasya Imamat 26:1, raimnai kawos fakfuken suine:
-
Rosai Refo ikofen kaku na? Yahwe imarisen kun amfyanir ro samsyom koḇena fa koksyom I ke?
Pendeta sia sisya sikofen bo soḇe Yesus ima Manseren Allah manggun dirya. Ḇape, komam rosai Refo ikofen na. Kowasya Yohanes 20:17, raimnai kawos fakfuken nane:
-
Rosai Refo ikofen kaku na? Yesus ima Manseren Allah manggun dirya ke?
-
Moḇsa ḇaḇir rai snar wafawi Yahwe iwan saksi Ḇyesi fa sikofenḇair roi ḇekaku ḇekur I ma roma Ḇyedi?
6. Nggoswar naek srar nggoḇesi
Refo doḇe snonggaku oser-oser ḇero sidang Kristen sima simnis ra bar ḇesisye ro baken snonggaku. Kowasya 1 Korintus 12:25, 26, raimnai kawos fakfuken suine:
-
Snonggaku Kristen sima rosai na sifrur kaku fafisu smam min sesi sisya sekandera?
-
Rosai monda mam kwar ro Saksi-Saksi Yahwe fa wafawi sima siswar naek srar sesi?
Fafisu Saksi Yahwe ro sup oso sismai samswen, min sesi ḇero supswan ine ḇesiper sfasnai saswar bo sbuk fafnoḇek ḇeri. Imbe wakfawi fawar oso ido, komam VIDIO. Raimnai kawos fakfuken na.
-
Rariso Saksi-Saksi Yahwe sya sfasnai saswar fafisu wam doḇer ya myun?
Snonggaku Kristen ḇekaku sima sfasnai saswar kuker sbuk fafnoḇek faro min sesi ḇesmai samswen
SIA SOḆE: ”Saksi-Saksi Yahwe sima agama ḇebabo sirya.”
-
Fafisu risaiso Yahwe dap randak snonggaku ḇesyom I ḇe saksi-saksi Ḇyesi?
FARKARKOR ḆYENA
Saksi-Saksi Yahwe siso snonggaku Kristen ḇekaku sirya. Ro supswan ine ḇesiper, sḇeoser raris kina oser. Roi sikyar na neknam ro Refo ya, ma sikofenḇair roi ḇekaku ḇekur Yahwe I.
Waswarepen Kaḇer
-
Rosai ḇefnai fa sor inggo kuker apap Saksi-Saksi Yahwe?
-
Rariso nggofasnai nggoswar naek srar nggoḇesi rai?
-
Kwara ido, Saksi-Saksi Yahwe sima snonggaku Kristen ḇekaku sirya ke?
SWEWAR NABOR WER
Mam ine fa wafawi syadi sarisa ro Saksi-Saksi Yahwe sya marandan sena.
Saksi-Saksi Yahwe—Sfasnai Kakyar, Bar 1: Sisasyar ro Pampan ya (1:00:53)
Mam rariso Saksi-Saksi Yahwe sfasnai bos farkarkor ḇekaku ḇa na.
Sia sna fakfuken nabor kaker ḇekur Saksi-Saksi Yahwe sya, imbude Au kako. Wawasya kankarem ro fakfuken anna.
”Fakfuken ro Kawasa Kam Ḇekur Saksi-Saksi Yahwe Sya” (ram ro situs jw.org)
a Ro taun 1879, Yahwe kawasa Ḇyesi sisasyar syap Baryas. Syap ine ikofenḇair rosai Refo fyarkor kaku na.
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
