FARKARKOR 26
Rosai Ḇefnai fa Roi Ḇeḇye Ḇa ma Kandera Naisya?
Fafisu roi ḇeḇye ḇa myun snonggaku oso ido, na ikofen radine, ’Yasasar ke?’ Na komarisen kaku kukro Refo kyarem fakfuken ine!
1. Rariso Ibiris dun roi ḇeḇye ḇa fa syun ḇe dunya ine?
Setan ḇaido Ibiris ḇyembroḇ faro Manseren Allah. Imarisen ḇyepoik snonggaku koine, inja danggar sinan ḇepon koḇesu, Adam ma Eva su fa suwarpu i bo skombroḇ faro Manseren Allah. Ibiris ifrur roi ine kuker danggar Eva i. (Kejadian 3:1-5) Ifrur fa Eva kyara Yahwe ima imewer daksmai roi ḇepyum na. Rya Ibiris doḇe snonggaku koine kosouser awer faro Manseren I kada, na kosmai payamyum. Ibiris dawos anggarkar ḇerandak ine fyor ikofen ḇe Eva i bo doḇe na ipok imar ḇa. Iso ḇefnai fa Refo dap Ibiris ḇe ’ḇeanggarkar ma ḇye kma ro anggarkar nakam’.—Yohanes 8:44.
2. Rosai Adam ma Eva sukinfir fa sufrur ya?
Yahwe ifrur pyum kaku Adam ma Eva su. Ikofen ḇe su fa suyan bon ro ai knam nakam ro Yaf Eden. Ai knam oser monda iso Yahwe imewer suyan bon ḇyena. (Kejadian 2:15-17) Fama, sukinfir fa suyan bon ani. Eva ”dun ḇeri bon ani ma dan i”. Mura, Adam i kako dakkan na. (Kejadian 3:6) Susouser faro Yahwe I ḇa. Adam ma Eva suma snonggaku ḇenapes kaku suirya, inja susambraḇ fa sufrur roi ḇekaku ḇesya kwar. Ḇape, sukinfir fa susouser faro Manseren Allah ḇa. Inja, susapi ro sasar ma sumewer Yahwe myam kenem suḇena fa supyum. Roi sukinfir nane nafnai samswen ḇeba ḇe su.—Kejadian 3:16-19.
3. Rosai Adam ma Eva suyakbuk ḇe ko na?
Fafisu Adam ma Eva susapi ro sasar anya, kenem ḇenapes suḇena napromes bur su. Ma subuk kenem ḇenapes ḇa suḇenane ḇe romawa up suḇesya. Refo dap roi Adam ifrur nane radine, ”Sasarya ssyunḇe supswan ine snar snonkaku oser, ma snar sasar ani, ifnai marmarya. Eḇedari marmarya iduḇ faro snonkakusyakam.”—Roma 5:12.
Roi ḇefrur fa koḇekandera naisya nabore. Fafisu ono ido, koḇekandera kukro manggunko kokinfir sasar. Ono wer ido, koḇekandera kukro roi snonggaku ḇese sifrur yoḇ ko na. Oroḇa ido, koḇekandera kukro roi kokara ḇepon ḇa na ndrama nkur kanandor ko.—Kowasya Pengkhotbah 9:11.
SWEWAR KAKU WER
Nari kawos roi ḇeḇye ḇa ma kandera kosmai ro baboine ndramuma ro Manseren Allah ḇa. Ma komam moḇsa ḇyaḇir rai fafisu myam kosmai kandera.
4. Kandera kosmai nane ndramuma ro mansei?
Snonggaku ḇebor sikyar Manseren Allah iso ḇepoik kaku supswan ine ḇesiper. Roi ine kyaku ke? Komam VIDIO.
Kowasya Yakobus 1:13 ma 1 Yohanes 5:19, raimnai kawos fakfuken ine:
-
Roi ḇeḇye ḇa ma kandera kosmai na ndramuma ro Manseren Allah ke?
5. Komam roi ḇejadi rofyor Ibiris ḇyepoik supswan ine
Kowasya Kejadian 3:1-6, raimnai kawos fakfuken nane:
-
Anggarkar rosai Ibiris ikofen na?—Mam mnuk ḇe 4 ma 5.
-
Moḇsa kofawi rya Ibiris doḇe Yahwe imewer snonggaku koine kosmai roi ḇepyum na?
-
Raris Ibiris moḇ kyara raya, snonggaku koine kofandun Yahwe I ḇe Manḇepoik koḇedi insama kosmai marasrisen ke?
Kowasya Pengkhotbah 8:9, raimnai kawos fakfuken ine:
-
Snar Yahwe ima ḇyepoik supswan ine ḇa, inja rosai ḇejadi ya?
-
Adam ma Eva susmai kenem ḇemnis kaku ma sukenem ro Firdaus. Fama, surower Ibiris i ma supampum Yahwe I
-
Soasuser ḇa ro sinan ḇepon koḇesu ro randak anya nafnai fa snonggaku koine kosmai sasar, kandera, ma marmar
-
Yahwe nari ipyos sasar, kandera, ma marmar ya. Mura, nari snonggaku sya sikenem kuker payamyum kaḇer ma sḇarek ro Firdaus
6. Yahwe myam ko ro kandera koḇena
Manseren Allah myam ko ro kandera koḇena ke? Kokarapan Raja Daud ma Manwawan Petrus roi suyakfas na. Kowasya Mazmur 31:7 ma 1 Petrus 5:7, raimnai kawos fakfuken ine:
-
Fafisu wafawi Yahwe myam ko ro kandera koḇena, moḇsa ḇaḇir rai?
7. Manseren Allah nari ipyos kandera nakam
Kowasya Yesaya 65:17 ma Fasasna 21:3, 4, raimnai kawos fakfuken ine:
-
Kofawi Yahwe nari ipyos roi ḇefnai fa koḇekandera ya, inja rosai ḇefnai fa ine nbuk sneprei ḇe ko?
Wafawi ke?
Fafisu Ibiris dawos anggarkar ḇerandak anya, isya kyoryae Yahwe I. Ifrur fa snonggaku sya skara sasar Yahwe I bo soḇe ima Manḇepoik ḇena saswar ḇa. Yahwe na fyasren snonsnon Ḇyedi fafisu ipyos snonggaku sya kandera sena kam ro fafisu iyama. Oso wer ido, Yahwe nari fyasnai kaku ima Manḇepoik ḇepyum syadi. Ro supswan ma farsyos ḇeba ine, fasasren ro Yahwe snonsnon Ḇyedi ima roi ḇefandun syadi.—Matius 6:9, 10.
SIA SOḆE: ”Manseren Allah byuk kandera ḇe ko samande byukimam kakyar koḇena.”
-
Moḇsa na kwarem rai?
FARKARKOR ḆYENA
Ibiris warpu Adam ma Eva, skoiso ḇefnai kaku fa kandera ma roi ḇeḇarḇor naisya ro supswan ine. Fafisu koḇekandera, Yahwe myam kaku ko, kero wer nari ipyos kandera nakam.
Waswarepen Kaḇer
-
Anggarkar rosaiso Ibiris ikofen ḇe Eva i?
-
Snar Adam ma Eva susouser Yahwe I ḇa, inja rosai kosmai ya?
-
Rariso kofawi Yahwe ima myam kaku ko ro kandera koḇena?
SWEWAR NABOR WER
Wawasya rosai Refo ikofen ḇekur sasar ya.
Refo kyarem fakfuken ḇesamswen oso.
”Rosai Ḇefnai fa Allah Myam Monda Pamarenta Nazi Myun Snonggaku Sibore?” (Fasfas ro situs jw.org)
Mam fawar ro snon oso insape ifawi roi ḇefnai fa kandera na naisya nabore.
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
