Marmar ya ifnai fa kofafardun ma kokanes. Iso ḇefnai fa Refo dap marmar ya ḇe mbroḇ. (1 Korintus 15:26) Ro Farkarkor 27 aniwara, kofawi kwar Yahwe nari myun mbroḇ ine fa ipromes. Ḇape isof ro baboine, snonggaku ḇebor sya simar kwar. Inja moḇsa na serai? Ro farkarkor ine, nari wafawi syadi roi ḇepyum Yahwe ikofen ḇepon kwar nari ifrur na. Yahwe doḇe nari ḇyawes kaḇer snonggaku milyar ḇemar kwar sya fa sikenem isof fyoro-fyoro. Nari ḇyawes si fa sikḇok kaḇer. Roi ine nari ryarirya kaku ke? Snonggaku ḇemar kwar ansi nari sikḇok fa sikenem ro nanggi ke ro supswan ine?

1. Rosai Yahwe imarisen fa ifrur faro snonggaku ḇemar kwar sya?

Yahwe imarisen kaku fa ḇyawes snonggaku ḇemar kwar sya fa sikenem kaḇer. Snon ḇekyar faro Manseren Allah snori Ayub, ikyar kaku Allah na ipok ḇyefnder i ḇa fafisu imar kwar. Ikofen ḇe Manseren Allah radine, ”Nari wor, ma nari yakarem [ro kubir ya dori].”​—Kowasya Ayub 14:13-15.

2. Rosai ḇefnai fa kokyar snonggaku ḇemar kwar sya nari sikḇok kaḇer?

Fafisu Yesus ikenem kaker ro supswan ine, Manseren Allah byuk papoik ḇe i fa ḇyawes snonggaku ḇemar kwar sya. Yesus ḇyawes inai mgun ḇeumur taun ri 12 ma kabom oso romawa ḇyedi fa sukenem kaḇer. (Markus 5:41-42; Lukas 7:12-15) Rofyor Yesus bati ḇyedi Lazarus imar ma sikram i ro ras ri fyak kwar, Yesus rya ḇyawes i fa ikenem kaḇer. Yesus ḇyenadi ḇe Manseren Allah raposa, myam ḇe kubir ya bo dor naba radine, ”Lazarus, wasasyar!” Mura ’Snonggaku ḇemar ani isasyar ro rus ani’ kukro isya ikenem kwar! (Yohanes 11:43, 44) Kowasen kada, na Lazarus kina ḇyesi ma bati ḇyesi simarisen fafaya ḇa!

3. Payamyum rosai snonggaku ḇemar kwar sya nari sismai ya?

Refo ya doḇe, ”Nari [kaḇakḇok] ya isya.” (Farfyar 24:15) Snonggaku Yesus ḇyawes kwar ro fafisu naiwara nari sikḇok fa sikenem ro nanggi ḇa. (Yohanes 3:13) Simarisen kaku fa sikenem kaḇer ro supswan ine. Rarirya kako, nari Yesus ḇyawes snonggaku milyar ḇesesya fa sismai kankenem fyoro ro firdaus ro supswan ine. Snonggaku ḇemar kwar sya sia sefarander si kwar, ḇape Yesus doḇe snonggaku ḇemar kwar syakam ḇero Allah swarapepen Ḇyena nari ḇyawes si fa sikenem kaḇer.​—Yohanes 5:28, 29.

 SWEWAR KAKU WER

4. Yesus fyasnai nya papoik fa ḇyawes kaḇer snonggaku ḇemar kwar sya

Na kofarkor fa kofawi rosai Yesus ifrur faro bati ḇyedi Lazarus i. Kowasya Yohanes 11:14, 38-44, raimnai kawos fakfuken suine:

• Rosai ḇefnai fa kokyar Lazarus ima imar kaku kwar?​—Mam mnuk ḇe 39.

• Lazarus dek ḇe nanggi kwar ido, na Yesus ḇyawes i fa ikenem kaḇer ro supswan ine ke?

Komam VIDIO.

5. Snonggaku ḇebor nari sikḇok fa sikenem kaḇer!

Kowasya Mazmur 37:29, raimnai kawos fakfuken ine:

• Snonggaku yuta ḇekḇok kaḇer ansi nari sikenem ro?

Yesus nari ḇyawes Yahwe manfamyan Ḇyesi monda ḇa, mboi nari ḇyawes snonggaku ḇebor ḇemar kwar sya kako. Kowasya Farfyar 24:15, raimnai kawos fakfuken ine:

• Mansei wamarisen syadi fa wasrow i rofyor ikenem kaḇer?

• Rariso saneraro kaḇakḇok ya nbuk sneprei ma nsambraḇser Felisity sinan ḇyesu rai?

 FARKARKOR ḆYENA

Refo doḇe snonggaku ḇebor ḇemar kwar sya nari sikḇok kaḇer. Yahwe imarisen insama sikenem kaḇer ma byuk papoik ḇe Yesus i kwar fa ḇyawes kaḇer si.

Waswarepen Kaḇer

• Rosai ḇefnai fa kokyar Allah Yahwe ma Yesus sumarisen fa suḇawes snonggaku ḇemar sya fa sikenem kaḇer?

• Snonggaku milyar ḇekḇok kaḇer sya nari sikenem ro nanggi ke ro supswan ine? Kwarem rarirya kukro?

• Rosai ḇefrur fa wakyar snonggaku waswar sya simar kwar, mboi nari sikenem kaḇer?