FARKARKOR 40
Rosai Na Kofrur Kaku Insama Manseren Allah Myam Kosren?
Romawa oso iḇe rya ḇe rumfarkor ido, nari snari fyasos pyum i. Myam pyum fa romawa ḇyedi imasi kwar, syansun sansun ḇesren, ma isnai pyum. Snari ifrur roi ine fa romawa ḇyedine idafduf ḇa, ma nari snonggaku ḇesesya sfawi sinan ḇyesu sufaduru pyum i. Imnis rarirya, Kma ḇesaswar koḇedi Yahwe I, imarisen insama kosren ro kenem koḇena ro ras ḇe ras, kakara koḇena nasren, wos koḇena, ma rosai kofrur na. Kosren ido, nari manggunko kosmai payamyum ma nane nbuk sanandik faro Yahwe I.
1. Rariso kosren ro kenem koḇena ro ras ḇe ras rai?
Yahwe dor ko fa kosren. (1 Petrus 1:16) Ine kyur ḇe kosren ro kenem koḇena ro ras ḇe ras ma roi kokara na, roi kawos na, ma roi kofrur na. Imbe kosren ker ido, na komasi ma komamwarek sansun koḇena, rum ma motor koḇena fa nasren ma napyum. Na kofnoḇek kako fa kofrur sren Balai Kerajaan koḇedi. Ras ḇe ras kosren ido, nari kun sanandik faro Yahwe I.—2 Korintus 6:3, 4.
2. Rosai na kofrur awer insama kosren?
Refo danun kaku ḇe ko fa ’kofasren manggunko ro roi ḇebor kam ḇefrur mamas baken ma rur koḇesi’. (2 Korintus 7:1) Inja, nari kosewar fa kopampum rosai monda ḇefrur mamas baken ma kakara koḇena. Fandun fa roi kokara na nafrur fa Yahwe imarisen. Naiso ḇefnai fa kopampum kakara ḇemnis ḇa na. (Mazmur 104:34) Na kosewar kako fa kawos roi ḇesren na.—Kowasya Kolose 3:8.
Roi ono naisya nafrur mamas baken koḇena. Rupa ra, kosyor tabaku, kan ropum, ma koḇepake famfnom roi sor ḇe narkoba na. Inja, kosewar fa kobinggwanbur roi ḇeradine na. Rarirya kada, nari koprei syadi ma ine ḇyeḇair kofasnai syowi faro kankenem Manseren Allah byuk ḇe ko na. Rarirya, na kosewar kaku fa komamwarek kenem koḇena fa nasren pdef kuker kofrur awer roi ḇeḇye ḇa raris masturbasi a ma komam awer sonin ḇeḇye ḇa na. (Mazmur 119:37; Efesus 5:5) Imbude samswen ḇe ko fa komnai kofrur roi ḇeḇye ḇa nane. Ḇape, Yahwe na ifnoḇek ko fa kofrur na.—Kowasya Yesaya 41:13.
SWEWAR KAKU WER
Nari kofarkor fa kofawi komamwarek ko fa kosren ido, na kun sanandik faro Yahwe I. Ma nari kawos rariso komnai kofrur mamas baken koḇena.
3. Kosren ido nari kun sanandik faro Yahwe I
Kowasya Yahwe parenta Ḇyena faro er Israel sya kada, nari kofawi Yahwe ima imarisen kaku fa kawasa Ḇyesi sisren. Kowasya Keluaran 19:10 ma 30:17-19, raimnai kawos fakfuken nane:
-
Ro mnuk-mnuk insanja, moḇsa Yahwe myam saranden ya rai?
-
Rosai na wafrur kaku insama mamwarek saranden ya? Rosai nari wafrur ker ya?
Kofandun swaf nabore ma kosewar kaku mande, na kosren. Ro moḇ risai koḇarek ro ya ḇaido kona nabor ke nabor ḇa yo, kokame bisa komamwarek manggunko fa kosren. Komam VIDIO, raimnai kawos fakfuken na.
-
Ro ḇaḇebaryas ya, rosai ḇefnai fa komamwarek roiebor koḇena fa nasren ma napyum?
4. Wamnai fa wafrur mamas baken Bena
Yahwe na isaramper ko fa komnai ro kofrur roi ḇeḇye ḇa na
Ausya wakun tabaku ḇaido bepake ker narkoba ido, na samswen kaku fa wamnai. Inja rosai na ḇefnoḇek Au ya? Kwara roi wafrur anna nari nbuk payamyum ro kenem Bena ro ras-ras ke roḇa. Kowasya Matius 22:37-39, raimnai kawos moḇsa snonggaku oso ikun ker tabaku ḇaido ḇyepake ker narkoba ido nari nakyaren kaku . . .
-
wis ḇyena kuker Yahwe I.
-
kina ma snonggaku ḇese ḇero ris ḇyedi.
Swewar fa wamnai wafrur mamas baken Bena. b Komam VIDIO.
Kowasya Filipi 4:13, raimnai kawos fakfuken ine:
-
Rosai ḇefnai fa snonggaku oso na ismai samambraḇ fa imnai ro roi ḇefrur mamas baken ḇyena kuker ḇyenadi, fyarkor Refo, ma iso ari ya ḇesya kwar?
5. Wasawen kakara ḇemamas ma wafrur awer roi ḇeḇye ḇa na
Kowasya Kolose 3:5, raimnai kawos fakfuken suine:
-
Rosai ḇefnai fa mamam sonin ḇeḇye ḇa, farem anun, sonin, ḇaido vidio ḇeḇye ḇa ro hp ma farfnak rofmar, ima roi ḇesren ḇa ro Yahwe mamam Ḇyena?
-
Kwara ido, bisa komam kenem koḇena fa nasren raris moḇ Yahwe imarisen raya ke? Kwarem rarirya kukro?
Swewar fa wafawi nyan fa wasawen kakara ḇemamas na. Komam VIDIO.
Yesus ikofen wos fa byukifasnai fandun kaku fa kofawi roi ḇepyum na kwar ido, kofrur na ḇeri insama kenem koḇena nasren pdef. Kowasya Matius 5:29, 30, raimnai kawos fakfuken ine:
-
Yesus ikofen fa kofrur susa baken koḇena ḇa, imboi danun kaku fa kofawi roi ḇepyum ido kofrur na ḇeri. Inja, rosai na snonggaku oso ifrur kaku fa isawen kakara ḇemamas na? c
Ausya swewar kaku fa wasawen kakara ḇemamas na ido, Yahwe myanen kaku roi wafrur nane. Kowasya Mazmur 103:13, 14, raimnai kawos fakfuken ine:
-
Swewar kaku fa wamnai wafrur roi ḇeḇye ḇa na ido, rariso mnuk nane nsambraḇser Au fa wasusu ḇa rai?
Wapok wasusu awer!
Na napyan fa kokara bo koḇe koma kofrur roi ḇeḇye ḇa na rawo kowarai kwar, inja iḇye bo kosusu mura. Imbape, kwarapan roi ine: Ḇeyakso ro fanandi farandar ya, ifrar bo kyarkar ma isapi ido, nari isusu ḇaido kyaḇer fa ifrar ro randak wer ke? Na oroḇa. Rupa radiri, fafisu wasapi fa wafrur roi ḇeḇye ḇa na wer, ima fyasnai ḇa Auma wasusu kwar ḇaido roi ḇepyum wafrur ḇepon kwar na, nefromo monda. Inja wasapi wer ido, sasar oḇa. Wapok wasusu awer! Yahwe na isaramper Au fa wamnai ro wafrur roi ḇeḇye ḇa na.
SIA SOḆE: ”Aeh, ayama na jadi fa yamnai ḇa kukro yaḇeradine kawan kwar.”
-
Mnuk ro Refo minsai na fasnai ḇe i ḇeyoḇe Yahwe na isaramper i fa imnai ro ifrur roi ḇeḇye ḇa na?
FARKARKOR ḆYENA
Komamwarek baken, kakara, ma kenem koḇena fa nasren ido nari nbuk sanandik faro Yahwe I.
Waswarepen Kaḇer
-
Rosai ḇefnai fa komamwarek ko fa kosren ima roi ḇefandun kaku?
-
Rariso na wasren ro kenem Bena ro ras ḇe ras rai?
-
Moḇsa na mamwarek kakara ma kenem Bena fa nasren pdef rai?
SWEWAR NABOR WER
Wakna roi nabor ḇa yo, bisa wafrur nyan ḇepyan insama bukimamwarek saranden ya.
Mam nyan risai monda bisa waso na insama wamnai ro anan tabaku ya.
”Nyan fa Wamnai ro Anan Tabaku ya” (Syap Sedarlah! paik Mei 2010)
Wawasya fawar ro snon oso randak ya myam ker sonin ḇeḇye ḇa na, mboi ḇarpur ya imnai.
a Masturbasi ima snonggaku ḇefnak rofmar ḇyedi fa ismai marisen ro fararur farḇuk kuker nyan ḇesasar.
b Wawasya ”Nyan fa Wamnai ro Anan Tabaku ya” ro bar ”Swewar Nabor Wer” ḇero farkarkor ine. Rarirya, na wafawi nyan fa wamnai ro anan tabaku ya.
c Imbe wakfawi moḇsa na wamnai ro farfnak rofmar ya, wawasya ”Moḇsa Na Yamnai Yafnak Ker Rofmar ya?” ro syap Pertanyaan Kaum Muda—Jawaban yang Praktis, Jilid 1, pasal 25.
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
