FARKARKOR 41
Rosai Refo Ikofen ḇekur Fararur Farḇuk ya?
Snonggaku ḇebor sya simai fa sawosḇair fararur farḇuk ya. Imbape kowasya ro Refo kada, dawosḇair pyum fararur farḇuk ya fa nasnai. Rosai Refo ikofen nane nbuk payamyum ḇe ko. Refo ya ryamuma ro Manseren Ḇefrur ko, Yahwe I, inja na rarirya ḇae. Ifawi rosai nari ḇebuk payamyum faro ko. Inja, ikofenḇair ḇe ko rosai na kofrur fa imarisen ma rosai na ḇefnoḇek ko insama kosmai payamyum ḇekain fyoro.
1. Rosai Refo ikofen ḇekur fararur farḇuk ya?
Fararur farḇuk ima roi ḇepyum Yahwe byuk faro snonggaku koine. Imarisen insama fararur farḇuk ine dun marisen faro snon ma bin ḇe mambeswa imbeswa kwar sya. Roi ḇepyum nane nafrur fa suyakna romawa ma ine iso nyan fa sufasnai sawarwar kuker nyan ḇeyun marisen. Iso ḇefnai fa Refo ya doḇe, ”Iḇye kada wasmai marasrisen kuker bin buk kwar fyor wababo ya.” (Amsal 5:18, 19) Yahwe dor faro snonggaku Kristen ḇefakawin kwar sya fa sisoasuser faro siswasi. Inja, na sipok fa sfarḇuk kuker oso ḇese wer ḇa.—Kowasya Ibrani 13:4.
2. Fararur farḇuk ḇemnis ḇa ima rosairi?
Refo ya doḇe snonggaku ḇefrur fararur farḇuk ḇemnis ḇa nari sakna waris ro Allah Karajan Ḇyedi ḇa. (1 Korintus 6:9, 10) Manfasfas Refo ḇefas Syap-Syap Yunani sbuk wos porneia fa sbukiḇair ḇe fararur farḇuk ḇemnis ḇa na. Ine kyur ḇe (1) fararur farḇuk a ro snon ma bin ḇe imbeswa ḇaim, (2) fararur farḇuk ro snon kuker snon ma bin kuker bin, ma (3) fararur farḇuk kuker aiwan. Koḇinggwanbur fararur farḇuk ḇemnis ḇa na kada, nari kofrur fa Yahwe imarisen ma dun payamyum ḇe ko.—1 Tesalonika 4:3.
SWEWAR KAKU WER
Nari kawos nyan insama ḇinggwan ro fararur farḇuk ḇemnis ḇa ma kawos nyan fa wasmai payamyum snar mamwarek kenem Bena fa nasren pdef.
3. Pampum fararur farḇuk ḇemnis ḇa na
Allah manfamyan Ḇyedi ḇenir ḇe Yusuf, syewar kaku fa pyampum bin oso ḇedafdif i fa denfus i. Kowasya Kejadian 39:1-12, raimnai kawos fakfuken suine:
-
Rosai ḇefnai fa Yusuf pyampum bin ani?—Mam mnuk ḇe 9.
-
Kwara ido roi Yusuf ifrur nane napyum ke? Kwarem rarirya kukro?
Rariso roma inai babo ḇero baboine sakfrur raris Yusuf i fa spampum fararur farḇuk ḇemnis ḇa na rai? Komam VIDIO.
Yahwe dor kokam fa kopampum fararur farḇuk ḇemnis ḇa na. Kowasya 1 Korintus 6:18, raimnai kawos fakfuken suine:
-
Fafisu ḇerariso na ḇefrowes snonggaku oso fa ifrur fararur farḇuk ḇemnis ḇa na?
-
Rosai na wafrur kaku insama wafrarbur fararur farḇuk ḇemnis ḇa na?
4. Swambraḇ fa pampum farawrowes na
Rosai na ḇefrur samswen ko fa kopampum farawrowes ḇeyun ko ḇe fararur farḇuk ḇemnis ḇa na? Komam VIDIO, raimnai kawos fakfuken na.
-
Ro vidio insanja, mambesrar ani rosai ifrur ya fafisu ifawi roi kyara ma ifrur na nari nafnai fa kyain pyum kuker swari wer ḇa?
Snonggaku Kristen ḇesoasuser sya kako nari sisewar fa smamwarek kakara sena fa nasren pdef. Rosai na wafrur kaku insama kwara awer roi ḇeḇye ḇa na ḇesya kwar? Kowasya Filipi 4:8, raimnai kawos fakfuken suine:
-
Rosai monda fandun fa kokara kaku na?
-
Rosai ḇefnai fa kowasya Refo ma komyaren ro fararur ḇesren ido, nari kosambraḇ fa kopampum roi ḇefrowes ko fa kofrur sasar?
5. Yahwe farkankin Ḇyena nbuk payamyum ḇe ko
Yahwe ifawi roi ḇepyum syadi faro ko. Inja ikofen ḇe ko nyan fa komamwarek kenem koḇena insama kosren pdef. Kofrur roi ine ido, na kosmai payamyum ya. Kowasya Amsal 7:7-27 ḇaido komam VIDIO, raimnai kawos fakfuken na.
-
Rariso snonkbor ani imbran ro nyan ḇeyun ḇe farawrowes na rai?—Mam Amsal 7:8, 9.
-
Amsal 7:23, 26 doḇe fararur farḇuk ḇemnis ḇa dun ḇe roi ḇeḇye ḇa kaku. Komamwarek kenem koḇena fa nasren pdef ido na koḇinggwan ro samswen rosairi?
-
Rariso kenem ḇesren koḇena nafnoḇek ko fa kosmai payamyum ḇekain fyoro ya?
Refo ya doḇe Yahwe imewer kaku myam fararur farḇuk ro snon kuker snon ma bin kuker bin. Sia soḇe roi Refo ikofen nane nfasnaiḇair saswar oḇa. Ḇape Allah Knam saswar, Yahwe I, imarisen fa snonggaku koine kokenem ro payamyum isof fyoro-fyoro. Imboi insama kaksmai na, fandun fa kokenem raris marisen Ḇyena. Kowasya 1 Korintus 6:9-11, raimnai kawos fakfuken ine:
-
Yahwe myam fararur farḇuk ro snon kuker snon ma bin kuker bin, ine derer iso roi ḇesasar ke?
Imbe kofrur fa Yahwe imarisen ido, fandun fa kofadwer kenem koḇena. Inema roi kosambraḇ fa kofrur na ke? Kowasya Mazmur 19:8, 11, raimnai kawos fakfuken ine:
-
Kosambraḇ fa kosouser roi Yahwe imarisen na ke? Kwarem rarirya kukro?
Yahwe ifnoḇek snonggaku ḇebor sya kwar fa sisouser farkankin Ḇyena. Na ifnoḇek Au kako ḇae
SIA SOḆE: ”Snon ma bin sufrur fararur farḇuk kukro suswar su ido, sasar oḇa.”
-
Rosai nari wakofen ya?
FARKARKOR ḆYENA
Fararur farḇuk ima roi ḇepyum Yahwe byuk faro snon ma bin ḇe mambeswa imbeswa kwar sya insama sismai marasrisen.
Waswarepen Kaḇer
-
Fararur farḇuk ḇemnis ḇa ima rosairi?
-
Rosai na ḇefnoḇek ko fa kopampum fararur farḇuk ḇemnis ḇa na?
-
Payamyum rosai nari kosmai kukro kofrur roi Yahwe imarisen na?
SWEWAR NABOR WER
Yahwe imarisen myam snon ma bin ḇefarḇuk ḇaim suḇarek kayam ke?
Refo doḇe fararur farḇuk ro snon kuker snon ma bin kuker bin nama nsasar. Imboi snonggaku ḇefrur roi ḇeradine, na kayin si ḇa.
”Fararur Farḇuk ro Snon kuker Snon ma Bin kuker Bin Ima Syasar Ke?” (Fasfas ro situs jw.org)
Allah sasoser Ḇyena ḇekur fararur farḇuk nakadaunwarek ko.
”Fararur Farḇuk ro Swadon Ima Fararur Farḇuk Dirya Kako Ke?” (Fasfas ro situs jw.org)
Snon oso randak iwara ifrur fararur farḇuk ḇemnis ḇa, mboi ḇarpur ya fyadwer kenem ḇyeja bo ifrur fa Manseren Allah imarisen. Wawasya fawar ḇyena ro ”Sifrur Pyum Kaku Aya”.
a Ine kyur kako ḇe anenef fasfus, fararur farḇuk ro swadon, fararur farḇuk ro kodon, ḇaido suf snonggaku ḇese rofmar sena insama nafsu sena neke.
Wamarisen Ido Mam Ine Kako
FAKFUKEN RO KAWASA KAM
Moḇsa Saksi-Saksi Yahwe Sya Farkarkor Refo Sena Isnai Rai?
Bisa bepake Refo rosai monda fa wafarkor Refo ḇeyor ḇaḇyak ḇa kuker Saksi-Saksi Yahwe sya. Wamgak awer fa wor kina karyer Bansya kam ḇaido bati Besya fa sakso.
