Snonggaku Kristen ḇekaku sya sun wos oser ro kenem sena kwar fa simewer roi oso ḇaido snonggaku oso nafnai si fa simnai sisyom Yahwe I. Au kako na wakkara rarirya ḇae. Yahwe ḇyesyowi kaku soasuser Bena. (Kowasya 1 Tawarikh 28:9.) Fafisu risai na ḇefrur samswen Au fa wasouser faro Yahwe I, ma rosai na ḇefnoḇek Au fa wasouser pdef?

1. Rariso snonggaku ḇese sifrur samswen ko fa kosouser ḇe Yahwe I rai?

Sia sisya sisewar kaku fa komnai kofarmyan ḇe Yahwe I. Mansei ḇefrur roi ḇeradineni? Sia simnai sisyom Yahwe I ma sawos roi ḇekaku ḇa ḇekur Yahwe organisasi Ḇyedi insama kokyar faro I wer ḇa. Snonggaku ḇeradine sya kofawi si ḇe snonggaku ḇerir ḇebur kakaku ya. Oso wer ido, manfarkin agama sia sisya sikofen roi ḇekaku ḇa ḇekur ko insama sifnai fa snonggaku ḇesasor si ḇa simnai sisyom Yahwe I. Inja fandun fa kosasor ko insama kofamfaḇri awer kuker snonggaku ḇembroḇ konsya. Kowasya situs web sena awer ḇaido komam vidio sena awer. Komam rosai Yesus ikofen ḇekur snonggaku ḇeḇeninyan ḇesesya fa simnai sifarmyan ḇe Yahwe I. Doḇe, ”Mkomam monda si. Si snonkaku ḇepraf ḇekfin ḇepraf sya. Rofyor snon ḇepraf oso ikfin min ḇepraf oso, nari susapi ro der.”​—Matius 15:14.

Ḇape snonggaku oso kyinfir fa imewer ḇye Saksi Yahwe wer ido na rariso? Ima bati koḇedirya ido, na koḇesanekar kaku. Snonggaku ani imbude idif ko rawo koḇor imbe koso i ke koso Yahwe I. Kosewar kaku fa kosouser monda ḇe Yahwe I ro snonggaku ḇaido roi ḇesena. (Matius 10:37) Inja komarisen kosouser Yahwe parenta Ḇyena fa koḇebati kuker snonggaku ḇerarirya awer.​—Kowasya 1 Korintus 5:11.

2. Rariso roi kokinfir na nfasnai kosouser ḇe Yahwe I rai?

Snar koswar Yahwe I, inja na komewer kaku kona wis kuker agama ḇekaku ḇa. Yahwe byuk parenta ḇe ko bo doḇe, ”Kawasa yesi, mkosasyar! Mkosasyar bur [Babilon Ḇeba ya].” (Fasasna 18:2, 4) Inja komam pyum kaku insama fararur koḇena ma rosai monda kofrur na nya fasfes awer kuker agama ḇekaku ḇa. Oso wer ido, kopok kosun awer ro organisasi ḇena wis kuker agama ḇekaku ḇa.

 SWEWAR KAKU WER

3. Pampum farkarkor ro snonggaku ḇebur kakaku ya

Rosai na kofrur kaku rofyor korower sawos roi ḇekaku ḇa ḇekur Yahwe organisasi Ḇyedi? Kowasya Amsal 14:15, raimnai kawos fakfuken ine:

• Rosai ḇefnai fa kokyar famfnom awer faro rosai korower nakam?

Kowasya 2 Yohanes 10, raimnai kawos fakfuken nane:

• Rosai na kofrur yoḇ snonggaku ḇebur kakaku sya?

• Imbude na kosrow ḇeri kuker snonggaku ḇebur kakaku ansine ḇa, mboi rariso na sfarkor ninyan kaker ko rai?

• Moḇsa Yahwe ḇyaḇir rai fafisu myam komarisen korower ker snonggaku ḇeyawos roi ḇekaku ḇa ḇekur I ma organisasi Ḇyedi?

4. Kosouser pdef faro Manseren Allah fafisu min Kristen oso ifrur sasar ḇeba

Kofawi snonggaku oso ro sidang ifrur sasar ḇeba kaku ido, rosai na kofrur kaku ya? Kokarapan farkankin ro Allah Sasoser Ḇyena byuk faro kawasa Israel sya. Kowasya Imamat 5:1.

Raris mnuk ine, fafisu kofawi snonggaku oso ifrur sasar ḇeba ido fandun fa kokofenḇair na ḇe penatua sya. Imboi kokofen na ḇaime, ipyum ya kor ḇepon snonggaku ḇefrur sasar ani fa rya isrow penatua sya ma ikofenḇair sasar ḇyena. Ikofenḇair na ḇa ido, soasuser koḇena ḇe Yahwe I nadif ko fa kora kokofenḇair roi ifrur na ḇe penatua sya. Rosai ḇefnai fa roi ine fyasnaiḇair koswar ma kosouser faro . . .

• Manseren Yahwe I?

• snonggaku ḇefrur sasar ani?

• snonggaku ḇesesya ro sidang?

 5. Kosasyarbur Babilon Ḇeba ya

 FARKARKOR ḆYENA

Imbe kosouser pdef ḇe Yahwe ido, koḇebati awer kuker snonggaku ḇesouser faro I ḇa sya. Oso wer ido, fandun fa kosasyarbur agama ḇekaku ba na.

Waswarepen Kaḇer

• Rosai ḇefnai fa kopok komam, kowasya, ḇaido korower awer farkarkor ḇeramuma ro snonggaku ḇebur kakaku sya?

• Rosai na kofrur yoḇ snonggaku ḇe Saksi Yahwe wer ḇa sya?

• Rosai na kofrur kaku fa kosouser Yahwe parenta Ḇyena ḇeyoḇe kosasyarbur agama ḇekaku ḇa na?