Snonggaku Kristen ro abad randak iwara na sidisen, senadi, siwasya ma sawos Refo ya ro fananjur ari sena; sifrur munara oso ḇa. (1 Korintus 14:26) Fananjur ari nggoḇena namnis radirya.

Farkarkor ḇyena neknam ro Refo ma bisa sifrur na ro kenem sena. Ro pupes minggu na, nggoḇeari fa nggorower faya ḇero Refo menit ri 30 kuker rariso Refo ya ifnoḇek nggo ro kankenem nggoḇena ma fafisu ine. Ḇerama sya sanun besi fa sbas mnuk sap na. Faya na namnai kwar ido, Farkarkor ”Baryas” naisya, iso awawos kuker farkarkor ro Baryas edisi farkarkor, ma ḇerama sya kam bisa siso warpu fa sḇuk kankarem na. Awawos nane nafnoḇek inggo fa nggofrur farkankin ḇero Refo ya ro kenem nggoḇena. Farkarkor ḇemnis radine nasyadi ro sidang ri 120.000 ro supswan ḇesiper.

Sifarkor inggo fa nggoḇekir syadi ro nyan nggoḇuk farkarkor na. Ro minggu fadu na, nggoso fananjur ari Kankenem ma Fararmyan Kristen Koḇena, sfasos na ro ḇar rikior. Farkarkor ḇyena naisya ro Syapram Farkarkor Kankenem ma Fararmyan Kristen Koḇena. Ro ḇar ḇerandak ya, Arasai Ḇero Refo, awawos ono naisya ḇefnoḇek inggo fa nggomambir pyum ḇar oso ro Refo naek srar siwasya ma sfasos ḇepon na. Ḇar ḇeuser ya, Koryaḇ ro Ḇaḇeḇaryas, naser akurfasnai kuker nyan rariso sawos Refo ya kuker eḇesesya. Ḇeḇuk wos anun ya nari ḇyuk nyan ḇepyum insama bisa nggowasya ma nggoḇekir syadi ro awawos nggoḇena. (1 Timotius 4:13) Ḇar ḇepupes ya, Kankenem Koḇena ḇe Snonggaku Kristen, nggawos nyan rariso bisa nggoso mnis Allah wos ḇyena ro kenem nggoḇena ro ras-ras na. Nggawos fakfuken ma kankarem ḇyena insama nggofawi pyum Refo ya.

Rofyor rwama ro fananjur ari nggoḇena, na wamarisen faro farkarkor Refo Wasmai na.​—Yesaya 54:13.

• Farkarkor risai monda Wasmai ro fananjur ari Saksi-Saksi Yahwe sya?

• Fananjur ari nggoḇena minsai wamarisen fa Wakso ya?