Farkarkor Refo isya fyoro kwar ro Saksi-Saksi Yahwe sya. Farkarkor riḇeḇeso isya sfasos faro ḇemarisen ḇeḇuk oras sne kam fa sḇaryas Karajan ya. Ro farkarkor annane, bisa ’sifrur posa afuffarmyan sena’.​—2 Timotius 4:5.

Farkarkor faro Perintis sya. Ḇefarmyan ḇe perintis biasa taun oser ramnai, insape ḇyedaftar ḇe siswa na ḇeso farkarkor ro ras ri women ine. Farkarkor ine sifrur na ro Balai Karajan ḇefanam oso. Ḇefandun ro farkarkor ine iso insama perintis sya sfanam syadi ḇe Yahwe I, sismai bon ḇepyum ro fararmyan sena ma siso asuser pdef ro fararur ḇesren ine.

Farkarkor faro Penginjil Karajan. Farkarkor ine sifruri ro paik ri suru ine na ifnoḇek perintis ḇemyaren ro ḇaḇeḇaryas ma ḇemarisen ḇebur mnu sena fa sfarmyan ro moḇ risai monda ḇefandun manḇaryas. Rya sikofen ”Aya isone! Wawan aya mura”, imnis raris nyan ḇepyum Yesus Fyasnai fyor fyarmyan ro supswan ine. (Yesaya 6:8; Yohanes 7:29) Snar sḇinggwan ro mnu sena inja fandun fa sikenem imnis raris snonggaku ḇeḇarek ro moḇ sfarmyan roya. Roi sifrur ker ro moḇ ani, cuaca ḇyena, ma roḇean sena namnis ḇa kuker moḇ srama roro ya. Ibasyadi wer, fyarkor wos ḇebabo. Farkarkor ine, ifnoḇek naek srar ḇeumur 23 isof ro 65 taun, insama sfasnai kenem ḇepyum ro moḇ sfarmyan rona. Oso wer ido, sifnoḇek si fa sekir syadi insama Yahwe bisa ḇyepake si ro organisasi Ḇyedi.

Farkarkor Refo Gilead Menara Pengawal. Ro wos Ibrani, wos ”Gilead” iso ”Kamas Ḇeḇe Saksi”. Fyor farkarkor ine dores ro taun 1943, isyadi ro 8.000 ḇemnai kwar sya sfarem si ḇe misionaris fa sḇaryas anggangginem ḇeḇye ine ro supswan ḇesiper. Ma sismai bon ḇepyum. (Farfyar 13:47) Rofyor ḇemnai kwar ro Gilead ine srama randak ḇe peru, sidang oso ḇa ro moḇ ine. Kirine rodiwa sidang ya sisyadi ro 1.000. Fafisu misionaris sfarmyan ro jepang saksi ḇero diwa sya sisyadi ḇa ro snonggaku ri samfur. Kirine saksi ḇero moḇ ani sisyadi ro 200.000. Insama sifawi mnis Refo fandun fa sfarkori swaf ya paik ririm ro Gilead. Ḇefarkor ro farkarkor ine siso ḇefarmyan ḇe perintis istimewa ḇaido misionaris, ḇefararur ro kantor cabang, ḇaido ḇefarmyan ḇe pengawas wilayah. Farkarkor ine bisa ifnoḇek si fa sekir syadi.

• Rosai fandun ro Farkarkor faro Perintis Sya?

• Farkarkor faro Penginjil Karajan ine sfasos i faro mansei?