Refo ya fyasnaiḇair, snar ro sidang Raryur risuru suisya ḇeyuf fakamaman na, siso ”pengawas sya ma hamba pelayanan”. (Filipi 1:1, NW) Ro sidang oser-oser, penatua riḇeḇeso sya sisya ma hamba pelayanan. Fararur rosai hamba pelayanan sya sifrur na?

Sifnoḇek penatua sya. Ḇefarmyan ḇe hamba pelayanan sya, sḇe sinan ḇaido sbabo ke, fandun fa sna swaruser ḇepyum, sekir syadi, ma sfararur myaren. Sifrur mnis fararur sena ḇesya kwar ma ḇefandun faro sidang ma Balai Karajan na. Rarirya penatua sya smam monda faro fakamaman sena fa sfarkin sidang ma suf tugas sena.

Sifrur fararur risai monda. Hamba pelayanan riḇeso sna tugas fa sisarser ḇerama ḇe fananjur syakam. Siawer sfasos mnis tata suara, sirwas syap na, smam kumpan ro sidang, ma sfasos moḇ manḇaryas sya sifararur roro na. Sikako smam faduru Balai Karajan. Penatua sya bisa sor si fa sifnoḇek ḇeḇesinan sya. Kokam fandun fa kofasnai syowi faro hamba pelayanan snar simarisen sifrur fararur risai monda kuker sne ḇeuser.​—1 Timotius 3:13.

Sifasnai nyan ḇepyum ḇe snonggaku Kristen ḇefrur pyum. Hamba pelayanan skinfir si snaro sfasnai rari ḇepyum ro kenem sena. Fyor sismai tugas ro fananjur ya, sisambraḇser kakyar nggoḇena. Snar nyan ḇepyum sifasnai ro ḇaḇeḇaryas sena, nggosmai raryaḇ syadi wer. Ma mamam ḇepyum sena fa simarisen sifararur kayam nun marisen ma ḇaḇeoser ro sidang. (Efesus 4:16) Isof ro fafisu, siso pyum ananun ḇero Refo fa sfarmyan ḇe penatua.

• Hamba pelayanan sya sima snonggaku ḇerariso?

• Rariso sakfaduru ḇaḇeoser ro sidang kuker sfararur kayam kuker naek srar sya?