Mambir Saksi Yahwe oso kwar ke? Imbude ono siso ḇebarek fanam kuker mgo, ḇefararur kayam kuker Au, ḇaido bati ḇero rumfarkor Bedi. Ḇaido, farkor kwar Refo ya kuker inggo. Mansei inggo, ma rosai ḇefnai fa nggokofenḇair kakyar nggoḇena ḇe snonggaku ḇese sya?

Nggoma snonggaku biasa monda. Nggorama ro moḇ oser ḇa ma kankenem ḇeḇeseyae. Randak ya ono ro nggo siso agama eḇese na, ma sia kako sikyar ḇe Allah I ḇa. Ḇape, fyor nggoḇe Saksi Yahwe ḇaim, nggokam nggomam mnis rosai Refo fyarkor na. (Farfyar 17:11) Nggomarisen kuker rosai nggofarkor na, ma manggun nggo oser-oser nggun snemuk fa nggosyom ḇe Allah Yahwe I.

Nggona fainda ḇebor ro farkarkor Refo ya. Imnis ra snonggaku ḇese sya, nggo kako nggosmai samswen ma raryarḇa na. Ḇape, nggoso farkankin ḇero Refo, inja nggoḇaḇir nggona kankenem ḇepyum syadi. (Mazmur 128:1, 2) Iso ḇefnai fa nggomarisen nggokofenḇadir roi ḇepyum nggofarkor kwar na ro Refo ya.

Nggokenem imnis farkankin ḇero Refo ya. Farkankin nane, nafnoḇek nggo fa nggoḇeaski syadi ma nggoḇesyowi snonggaku ḇese sya, ma nggofasnai kenem ḇemnis raris nggawos kakaku, ma nggofasnai ḇaḇenaḇye. Farkankin nane nafnoḇek kawasa sya fa sikenem pyum, ma nafrur kina sya fa seaski ma sikenem famfnom ḇa. Snar sikyar ”Allah myam rarwas snonkaku ḇa”, nggona kakyar oser inja ro supswan ḇesiper nggomarisen nggoḇeoser, nggomam farfir snonggaku ḇa ma nggoso polotik ḇa. Nggoma snonggaku monda, ḇape nggoḇe kawasa oser, nggoḇese ro eḇese sya.​—Farfyar 4:13; 10:34, 35.

• Rosai ḇemnis ro Saksi-Saksi Yahwe kuker snonggaku ḇese sya?

• Farkankin rosai Saksi Yahwe sya sfarkor ro Refo ya?