Ausya wafarkor Refo kwar kuker Saksi Yahwe oso ido, nari fasos ḇepon farkarkor na fyor mgawos na ḇaime. Ipyum ya waso nyan ḇeradine insama Wasmai fainda nabor ro fananjur ya. Nari Wasmai bon ḇepyum rofyor wafarkor pyum Refo ya ro ras ḇe ras.

Kwinfir oras ma moḇ ḇemnis fa wafarkor. Fafisu risai bisa nwa kakara ḇepyum na? Ro arwo na rofyor fararur ḇaim ḇaido ro roḇ fafisu romawa bansi senef kwar ke? Na jadi fa farkor kawan ḇa ido, kwinfir oras riḇeso bukifarkor na, ma mam pyum insama roi ono nakyaren Au ḇa. Swewar moḇ ḇepyum na, ma binggwanbur roi na ḇedwarek Au, imnis ra radio, telefisi, ma HP ḇaido tablet. Ḇenadi ḇepon insama nafnoḇek Au fa kwara muraro fararur ḇesena awer insama ido bisa kwara pyum Allah Wos Ḇyena monda.​—Filipi 4:6, 7.

Kwakopḇair farkarkor na, ma wafrur fasasos faro kankarem. Ḇepon kaku ya, mam awawos ma fakfuken ḇyena ḇesiper. Raimnai kwara judul ḇaido fasal na, mam kako sub judul na neḇefesepen kuker tema ḇyedi, ma mam gambar na kuker fakfuken kaḇer ḇyena ḇefasnai faro awawos ḇeknam ro fasal ani. Osower ido, wawasya paragraf, ma swewar kankarem faro fakfuken na. Bas ma wawasya mnuk sfas na, ma kwarapan rariso mnuk-mnuk anna nḇefesepen kuker farkarkor ḇyena. (Farfyar 17:11) Wasrow kwar kankarem ḇyena ido, ḇekakop wos riḇeso ḇaido wos ḇeknam ro syos ani na ḇefnoḇek Au fa waswarepen kankarem ḇyena. Ramnai, wamarisen ido, bisa kwanow bramsi ro fananjur ya fa buk kankarem na ḇaido wos ḇeknampu ro wos manggun Bena.

Kuker wafarkor topik ḇebor na ro fananjur minggu ḇe minggu, nari wasmai fawawi ḇeknam ro Refo nabor syadi wer.​—Matius 13:51, 52.

• Rosai na Wafrur insama fasos pyum farkarkor faro fananjur na?

• Rariso Wafasos pyum kankarem fa wawos na ro fananjur ya?