Refo ya ḇyardi rofyor Kristus ryo kwar ido, guru-guru ḇekaku ḇa sya nari sro fandu Snonggaku Kristen abad randak ma sawninyan kakaku ro Refo ya. (Farfyar 20:29, 30) Ḇarpur ya, roi ine ḇyejadi kaku. Sisun Yesus farkarkor ḇyena kuker farkarkor ḇekaku ḇa na, ma ḇaḇekristen ḇekaku ḇa iryewen. (2 Timotius 4:3, 4) Rariso na kokyar snar kirine kona fawawi ḇemnis kaku kuker rosai Refo fyarkor kaku ya?

Fafisu ya ryama faro Yahwe fa fyasnaiḇair kakaku ya. Ḇyardi kwar snar ro ’ras ḇepupes ine, fawawi ḇekaku nari nabor kaku’. (Daniel 12:4) Ro taun 1870 raryur kasun oso ḇesewar kakaku ya sifawi snar doktrin nabor ro gereja na namnis kuker Refo ya ḇa. Iso ḇewar fa, sisewar fa sifawi farkarkor ḇero Refo ḇekaku ya, ma Yahwe ḇyebarakas si kuker fawawi ḇekaku.

Snonggaku ḇena sne ḇenapes sya sifarkor kaku Refo ya. Siswa-Siswa Alkitab ḇemyaren ansya, siso pyum akurfasnai ro Refo, inja isof ro kirine nggakso nyan sifasnai ine. Sawos Refo ya ram ḇe ram. Sisrow mnuk ḇesamswen fa sifawi na ḇa ido, sisewar mnuk ḇese na ḇekofenḇair na. Rofyor sisrow fawawi ḇemnis kwar kuker Refo ya ḇesiper ido, sifas na ḇeri. Inja, srir fa Refo ya iso ḇekofenḇair mnuk ḇese ḇero dori na. Kuker nyan ine, sisrow kaḇer kakaku kuker snonsnon ma Karajan Allah, marisen Ḇyena faro snonggaku sya, ma saneraro kaḇakḇok ya. Simgei ḇeri ro kakyar ma farkarkor ḇekaku ḇa na.​—Yohanes 8:31, 32.

Ro taun 1879, Siswa-Siswa Alkitab sya sifawi snar fafisu ya ryama kwar fa sikofenḇair kakaku ya ḇe moḇ nakam. Inja ro taun anya, sifrur majalah na ma koḇepake isof kirine, Menara Pengawal Memberitakan Kerajaan Yehuwa. Kirine, nggoḇaryas kakaku Refo ya ro sup ri 240 ma nasyadi ro wos ri 900. Fawawi ḇekaku nabor syadi wer!

• Fyor Yesus imar kwar, rosai ḇeḇejadi faro kakaku ro Refo ya?

• Rariso bisa nggosrow kaḇer kakaku ro Allah Wos Ḇyenane?