Snonggaku ḇebor sya soḇerada Saksi-Saksi Yahwe sima agama ḇebabo. Ḇape isyadi ro 2.700 taun aniwara, Allah kyinfir snonggaku ono sap siḇe ”Saksi-Saksi Ḇyesya”. (Yesaya 43:10-12) Isof ro taun 1931, sifawi nggo ḇe Siswa-Siswa Alkitab. Rosai ḇefnai fa nggoḇepake snonsnon Saksi-Saksi Yahwe ine?

Snonsnon ani fyasnai Allah nggoḇedi. Ro manuskrip ḇepon iwara, Allah snonsnon Ḇyedi, yaiso Yahwe, nasya nabor kaku sfas na kali ri syaran ro Refo ya. Ro Refo terjemahan ḇebor na, snonsnon ine sfadweri kuker nasan, imnis raris Tuhan ḇaido Allah. Ḇape, fyor Allah dawos ḇe Moses i, fyasnai snonsnon Ḇyedi, Yahwe, ikofen, ”Isoine snonsnon Yedi isof fyoro-fyoro.” (Keluaran 3:15) Snonsnon ine fyasnai kaku iḇese ro Allah ḇekaku ḇa sya kam. Nggomarisen nggosron Allah snonsnon ḇesren Ḇyedine.

Snonsnon ani fyasnai fararur nggoḇedi. Snonggaku ḇebor ḇenapes ro Habel fafisu ḇyedi sinapes ma sifasnai sikyar ḇe Yahwe I. Abad ḇe abad nande ramnai, Nuh, Abraham, Sara, Moses, Daud, ma ḇese sya seoser kuker ”saksisya sibor ḇesiryaryar ko raris mandepna”. (Ibrani 11:4–12:1) Imnis ra snonggaku ḇeḇuk kesaksian ro ḇaḇemanggara fa dawoswarek snonggaku ḇesasar ḇa, nggun snemuk kwar fa nggokofenḇair kakaku kuker Allah nggoḇedi.

Nggoso Yesus nyan ḇyena. Ro Refo ya, nyir si ḇe ”saksi ḇeḇeuser ma ḇenapes”. (Fasasna faro Yohanes [Wahyu] 3:14) Yesus manggundi ikofen snar ’ikofenḇadir Allah snonsnon Ḇyedi faro si kwar’ ma insa ’ḇyuk ḇaḇesaksi ro ḇaḇenapnapesya’ kuker Allah. (Yohanes 17:26; 18:37) Inja manfamyan Kristus ḇekaku sya fandun fa sisron ma sikofenḇadir Yahwe snonsnon Ḇyedi. Iso Saksi Yahwe sya simarisen sifrurna.

• Rosai ḇefnai fa Siswa-Siswa Alkitab sya ḇarpur mura sepake snonsnon Saksi-Saksi Yahwe?

• Fafisu risai Yahwe nya saksi-saksi ro supswan?

• Mansei ḇefasnai Yahwe snonsnon Ḇyedi?