Snonggaku sya simewer fa siso ro fananjur ari na snaro sismai farkankin rohani ḇaido wos ḇeyun sneprei ḇa. Inja, sai ḇefnai fa waso ro fananjur ari Saksi-Saksi Yahwe, nggap na ḇe ”fananjur”? Rosai nari Wasmai ro diwa na?

Raryaḇ snaro ausya rofandu snonggaku ḇefasnai syowi ma saswar. Ro abad randak, snonggaku Kristen siryur si ro sidang-sidang jemaat na, ma sifanjur fa seari ḇe Allah, sfarkor Refo, ma sanun yae si. (Ibrani 10:24, 25) Rofyor siryur sfasnai saswar ya, sḇaḇir sisya rofandu bati sesya, isoine naek srar rohani sesya. (2 Tesalonika 1:3; 3 Yohanes 14) Nggoso nyan ro snonggaku Kristen abad randak sya. Inja nggoḇaḇir nggosmai raryaḇ ḇemnis kako.

Nggosmai fainda snar nggofarkor Refo ma nggofrur na ro kenem nggoḇena. Ro randak iwara, snon, bin ma romawa sya siryur kayam. Ḇefawi pyum Refo sya sfarkor nggo fa nggoso Allah wos Ḇyena ro kankenem nggoḇena. (Ulangan 31:12; Nehemia 8:8) Nggokam nggodisen ma nggoḇuk kankarem faro farkarkor na. Inja nggosmai fainda faro saneraro nggoḇena.​—Ibrani 10:23.

Nggosmai barakas ma samambraḇ snaro kakyar ya. Manwawan Paulus ikofenḇair sidang oso ro fafisu ḇyedi, ”Yamarisen yasrow naek ma srar mko, insama yarwas fakamaman yasma ro Allah Rur ḇyeja fa syambraḇ ser mko. Kakara yedi isoine, snar kokam kokyar faro Yesus Kristus, inja iḇye kosonemyaeko.” (Roma 1:11, 12) Nggofanjur kayam kuker naek srar ine ifrur fa kakyar nggoḇena syambraḇ kaku ma nggomarisen fa nggokenem imnis raris roi Refo fyarkor na.

Nggor mgo fa mgakso fananjur ro sidang nggoḇena ma manggun mgomam fainda ḇyena. Nari simarisen kaku sisrow kuker Au. Nari sor ḇaḇyak ḇa.​—sor derma ḇa.

• Ro fananjur ya nyan risai nggoso na?

• Fainda rosai Wasmai snaro waso ro fananjur Kristen na?