Ro organisasi nggoḇedi, pendeta sya sḇak si ḇa. Imboi, imnis ra sidang Kristen ro abad randak iwara, ḇe pengawas sya siso pyum syarat sap kwar besi fa ”smamepen ma sfakwak Allah jemaat ḇyedi”. (Farfyar 20:28) Penatua sine siso snonggaku ḇefawinanem ma ḇemarisen ḇefur rosai rirya monda ro sidang sna fakamaman fa sfarkin sidang ”ḇape kuker dafdifer awer, imboi kuker sne ḇemarisen imnis Allah marisen Ḇyedi, ma mgosewar awer ḇaḇefainda, ḇape mguffarmyan kaku ḇeri”. (1 Petrus 5:1-3) Rosai sifrur faro nggo?

Sfaduru ma smam warek inggo. Penatua sya sfarkin ma smam warek nggo ro kerohanian nggoḇena. Sifawi Allah ḇyuk fakamaman ḇefandun ine ḇesi inja sisewar fa siba syadi ro Allah kawasa Ḇyesi ḇa; Imboi sḇensewar fa nggosmai raryaḇ ma payamyum ro kerohanian nggoḇena. (2 Korintus 1:24) Imnis manfarandows ḇefaduru pyum domba ḇyesya oser-oser, penatua sya sifrur rarirya kwar. Sisewar fa smambir kaku naek srar ḇero sidang sya oser-oser.​—Amsal 27:23.

Sfarkor nggo fa nggofrur Allah marisen Ḇyena. Ro minggu oser, penatua sine sfarkor inggo ro fananjur ari ro sidang insama kakyar nggoḇena nsambraḇ syadi. (Farfyar 15:32) Sfasnai ḇepon nyan ḇepyum ro ḇaḇeḇaryas ya sifararur kayam kuker nggo ma sfarkor nggo ro ḇaḇeḇaryas nakam.

Sḇuk anun nggofandun na. Insama sifawi roi nggofandun na, fyorno ido penatua sine sraḇe rum nggoḇena ḇaido ro Balai Karajan fa sḇuk fafnoḇek ma wos sneprei ro Refo ya ḇe nggo.​—Yakobus 5:14, 15.

Sismai fakamaman ro sidang monda ḇa, ḇape penatua sine sismai kako fararur ḇesena ma sna fakamaman kako fa smam pyum kina sesya. Naek ḇefararur marḇak sine fandun fa koḇesyowi si.​—1 Tesalonika 5:12, 13.

• Fakamaman rosai penatua sya suf ro sidang ya?

• Kuker nyan risai monda penatua sya smam faduru inggo?