Ro fararur ḇaḇeḇaryas ’anggangginem ḇeḇye’ faro ”wos, keret, er ma kawasa”, nggofrur syap na nasyadi ro wos ri 900. (Fasasna 14:6) Moḇsa nggofrur fararur ḇesamswen ine rai? Kuker fafnoḇek ro snonggaku riḇeḇeso ro sup ḇese na ma ḇesmai fakamaman fa ḇeterjemahkan sya. Sikam Saksi-Saksi Yahwe sirya.

Awawos ḇekaku ḇyena sifrur na ro wos Inggris. Raryur Naek Ḇefarkin sya smam pyum fararur ro kantor pusat Departemen Penulisan ro supswan ḇesiper. Departemen ine fyasos pyum fararur faro ḇefas sya ḇefarmfyan ro kantor pusat ma kantor cabang oso. Ḇefas sine srama ro moḇ oser ḇa inja ipyan ḇe nggo fa bisa nggawos roi sismai ro moḇ srama roro ya, inja ro er sairirya monda simarisen syap nane.

Awawos anna sfarem na ḇe si na ḇefadwer sya. Fyor sifrur na ma sikam smarisen kwar ido, wos anna sfarem elektronik ḇyena ḇe tim-tim penerjermah sya ro supswan ḇesiper, penerjemah sine na smam mnis wos ḇyena wer. Sḇensewar fa sifawi ”wos ḇekaku na” bisa napyan fa sifrur knam na ro ram ḇyena ḇesiper ro wos Inggris ḇe wos sena.​—Pengkhotbah 12:10.

Komputer na nafnoḇek fararur ine inja isamberen. Komputer na jadi fa nfadwer ḇefas ma penerjemah sya ḇa. Mboi fararur ine bisa insamberen snaro sepake fasfas ḇebor (kamus), syap ma roi eḇesena ḇero Komputer ine. Saksi-Saksi Yahwe sifrur Sistem Penerbitan Elektronik Multibasaha (MEPS), fasasos ine bisa ḇyefasfas na fa neoser ro wos riutin kuker gambar na ma sfasos pyum na inja bisa secetak na ḇeri.

Rosai ḇefnai fa nggofararur marḇak fa nggofrur wos ḇeḇeso snonggaku risyaran sepake na? Snaro Yahwe imarisen insa ’snonggaku syakam sismai fasaspar ya ma sifawi kakaku ya’.​—1 Timotius 2:3, 4.

• Moḇsa syap nggoḇena sifrur na rai?

• Rosai ḇefnai fa nggoḇe terjemakan syap ro wos ḇebor na?