1, 2. Fafisu ḇesamswen rosai Yefta ma inaikir ḇyedi susmana?

INAIKIR oso ifrar fa isrow kuker kmari. Imarisen kaku snar myam kmari kyaḇer kuker payamyum ro mamamun ya. Snar ḇaḇepayamyum ḇeba kmari ismana, nafrur fa idisen ma ifyer kuker raryaḇ. Rosai kmari ifrur ma ikofenna nafrur i fa ikandor. Pyansawʼk sansun ḇyedi ma kyanes, ”Sye, inaikir yedi! Wafrur fa sne yedi ibor yaye.” Ramnai ikofen ḇe inaikir ḇyedi asas ifrur kwar ḇe Yahwe I nari nun fararwe ro kankenem ḇyedi isof fyoro. Asas ḇyena nfasnaḇair nari pok fa fyarbuk ma nya romawa ḇa. Ḇape fyorya ḇeri ḇyuk kankarem ḇepyum, ḇesambraḇser kmari fa ifrur mnis asas ḇyena ḇe Yahwe I. Kankarem ḇyedi nefasnai ikyar kaku rosai Yahwe dor faro i ima roi ḇepyum rirya. (Hak. 11:34-37) Rofyor kmari myam kakyar ḇyena, imarisen kaku snaro inaikir ḇyedi kuker sne ḇesiper imarisen ifrur roi ḇeyun marisen ḇe Yahwe I.

 ² Yefta ma inaikir ḇyedi sukyar kaku faro Yahwe ma nyan ḇyedi fa ifrur roi nakam. Susouser pdef ibasyadi rofyor susma samswen. Sumarisen fa susma kyaremso Yahwe ḇyena, ma nane nefandun syadibur farsarser sairirya kam.

3. Rosai ḇefnai fa farari ḇepyum ro Yefta ma inaikir ḇyedi na nafnoḇek ko ro fafisu ine?

³ Inema napyan ḇa fa kosoasuser pdef ḇe Yahwe I. Fandun fa ’kofaḇri kaku faro kakyar ya.’ (Yud. 3) Infa nafnoḇek ko fa kofrur rarirya, mkorama kofarkor rariso Yefta ma inaikir ḇyedi sufarmku pdef rofyor susma fafisu ḇesamswen ro kankenem suḇena. Rariso susoasuser pdef ḇe Yahwe I?

4, 5. (a) Parenta rosai Yahwe ḇyuk ḇe snonkaku Israel sya rofyor sisun ro Sup Ḇaḇeasas ya? (b) Imnis sfasna ro Mazmur 106, rosai ḇeḇekur snonkaku Israel sya snar sisouser ḇa?

⁴ Ro ras ḇe ras, Yefta ma inaikir ḇyedi nari suswarepen rosai er Israel sismana snar sisoasuser faro Yahwe I ḇa. Fafisu fanam ḇe 300 taun ḇepon ya, Yahwe iwan er Israel sya fa smun snonkaku ḇesyom ḇe allah ḇekakuḇa sya ro Sup Ḇaḇeasas, ḇape sisouser I ḇa. (Ul. 7:1-4) Snonkaku ḇebor ro er Israel sya sfarari snonkaku Kanaan sya fa sisyom ḇe allah ḇekakuḇa ma sikenem mnisḇa.​—Wasya Mazmur 106:34-39.

⁵ Snaro snonkaku Israel sisouser I ḇa, Yahwe ikadaun si ḇa ro snonkaku ḇeḇemḇroḇ si sya. (Hak. 2:1-3, 11-15; Mz. 106:40-43) Inja samswen kaku fa kina ḇeswar Yahwe I sya sisoasuser pdef ro fafisu ḇesamswen nane. Ḇape, Refo fyas snonsnon ro snonkaku ḇesouser sya, imnis raris Yefta ma inaikir ḇyedi, Elkana, Hana, ma Samuel i. Sikame sna snemuk fa sifrur Yahwe imarisen.​—1 Sam. 1:20-28; 2:26.

6. Roi ḇeḇyeḇa rosai komamna ro dunya ro fafisu ine, ma rosai fandun fa kofrur ya?

⁶ Ro fafisu koḇedine, snonkaku sya skara ma sifrur raris snonkaku Kanaan sya. Kankenem sena neknam monda ro seks, ḇaḇerarmomen, ma pipi. Ḇape Yahwe ḇyuk swarapepen ḇefasnabos ḇeko. Imarisen kyadaun warek ko imnis ikadaun warek snonkaku Israel sya ro roi ḇeḇyeḇa na. Na kofarkor ro sasar sifrurna ke? (1 Kor. 10:6-11) Fandun fa kofrur sairiryakam fa kopampum karkara dunya na. (Rm. 12:2) Na koḇensewar kaku fa kofrur rarirya ke?

7. (a) Rosai Yefta kawasa ḇyesi sifrur ḇe i? (b) Rosai Yefta ifrur ya?

⁷ Ro fafisu Yefta, snonkaku Israel sya sisma samswen ro er Filistin ma Amon sya snaro sisouser faro Yahwe I ḇa. (Hak. 10:7, 8) Yefta nya mḇroḇ ro er ḇese sya monda ḇa, ḇape ro naek srar ḇyesi ma manfarkin ḇero Israel sya kako. Snaro smamḇaḇir ma sfafayaf i, siyawi bur saprop nyana kaku ya. (Hak. 11:1-3) Yefta imewer iso kenem ḇeḇyeba sena snar nari nawyaye kankenem ḇyedi. Rariso kofawina rai? Snaro rofyor manfarkin ro er sya sor i fa ifnoḇek si, ifrurna ḇeri. (Hak. 11:4-11) Rosai ḇefnai fa ifrur rarirya?

8, 9. (a) Rosai wos ḇefarkin ro Sasoser Moses ḇefarkin swaruser Yefta ḇyedi? (b) Rosai roi ḇefandun kaku faro Yefta i?

 ⁸ Yefta iso mambri oso. Ifawi pyum kaku sarisa ro er Israel sya ma Sasoser Moses ḇyena. Nyan rariso Allah Yahwe ifrur pyum kawasa ḇyesi rai nḇuk farkarkor ḇe i faro farkankin Yahwe ḇyedi kuker roi ḇeḇye ma ḇeḇyeḇa. (Hak. 11:12-27) Yefta ḇyuk fawawi ḇyedi fa ifrur snemuk ro kankenem ḇyedi. Ifawi pyum kaku sneḇaḇir Yahwe ḇyedi faro rarmomen ma ḇekram masasor ma rariso Allah imarisen fa kawasa ḇyesi siswaryae si. Osower ido, Sasoser ḇyuk farkarkor ḇe i rariso ifrur pyum snonkaku ḇese sya, syadiwer faro snonkaku ḇeyayin i sya.​—Wasya Keluaran 23:5; Imamat 19:17, 18.

⁹ Imbude farari ro Yusuf i nafnoḇek i. Kaku ya Yefta fyarkor rariso Yusuf fyasna sawarwar faro srar ḇyesi ḇeyayin i. (Kej. 37:4; 45:4, 5) Snaro Yefta iwasen farari ine, nane nafnoḇek i fa ifrur Yahwe imarisen. Rosai srar ḇyesi sifrurna nafrur fa Yefta sne ḇyedi iduf kaku. Bape faro Yefta i snonsnon Yahwe ḇyedi ma kawasa ḇyesi iso roi ḇefandun syadi ro sneḇaḇir mankun ḇyedi. (Hak. 11:9) Nya snemuk fa isoasuser pdef ḇe Yahwe I. Bonya iso Yahwe ḇyeḇarakas Yefta ma snonkaku Israel sya.​—Ibr. 11:32, 33.

10. Rariso na koḇuk wos farkankin ḇero Refo nafnoḇek ko fa kofasna koine snonkaku Kristen ro baboine?

¹⁰ Komarisen fa kofarkor ro Yefta farari ḇyedi ke? Rosai ḇefnoḇek ko rofyor naek srar Kristen koḇesi sifrur fa kofafko ḇaido koḇaḇir sifrur pyum koḇa? Pok fa kokram masasor ro sne awer snar nadwarek ko fa kofarmyan ḇe Yahwe I. Pok fa komnai awer fa koso fananjur Kristen ḇaido koḇuk oras koḇena faro naek srar ḇero sidang sya. Mkorama kofarari Yefta i ma kosouser Yahwe I. Ine na nafnoḇek ko fa kofrur mnis fafisu ḇesamswen insama na koḇuk farari ḇepyum imnis raris Yefta i.​—Rm. 12:20, 21; Kol. 3:13.

11, 12. Asas rosai Yefta ikofenna, ma rosai knam ya?

¹¹ Yefta ifawi fyandun farfnoḇek Yahwe ḇyedi fa fyaspar er Israel sya ro er Amon sya. Ḇyeasas faro Yahwe I fyor ifnoḇek i fa kyafyo ḇembroḇ sya ro mamamun ya, nari ḇyuk ḇe Yahwe I snonkaku ḇesae randak ro rum ḇyedi ḇe ”farsarser ḇeḇerap” rofyor kyaḇer ro mamamun ya. (Hak. 11:30, 31) Rosai knam ya?

¹² Yahwe imewer snonkaku srap si ro for ḇe farsarser, inja kofawi pok fa Yefta ifrur farsarser ḇeradine ḇa. (Ul. 18:9, 10) Ro Sasoser Moses, farsarser  ḇeḇerap iso roi ḇepyum kaku snonkaku oso ḇyukna ḇesiper ḇe Yahwe I. Inja Yefta fyasnaiḇair snonkaku na ḇyuk ḇe farsarser ḇe Yahwe I nari ifarmyan ro tabernakel isof ro imar. Yahwe ryower Yefta fararyor ḇyena ma ifnoḇek i fa ismai payamyum ḇeba kaku ro mamamun ya. (Hak. 11:32, 33) Ḇape manseiso nari Yefta ḇyuk ḇe Yahwe I?

13, 14. Rariso wos Yefta ḇyena ro Hakim-Hakim 11:35 fyasnaiḇair kakakyar ḇyedi?

¹³ Kwarapan sarisa ḇeḇeyap ro randak artikel ine. Rofyor Yefta kyaḇer ro mamamun ya, snonkaku ḇesae randak fa ḇesrow kuker i iso inaikir iswar kaku, inaimos ḇyedi! Nari Yefta ifrur imnis rosai ḇyeasas kwar na ke? Nari ḇyuk inaikir ḇyedi faro Yahwe I fa fyarmyan ro tabernakel isof ro imar ke?

¹⁴ Osower ido, wos farkankin ro Sasoser Allah ḇyena nafnoḇek Yefta i fa ifrur roi ḇenapes. Imbude iswarepen wos ḇero Keluaran 23:19, ḇekofen snar Allah kawasa ḇyesi sḇuk roi ḇepyum syadi kuker sne ḇesiper ḇe Yahwe I. Sasoser ya kako ikofen snar snonkaku oso ifrur asas ḇe Yahwe I ido, ”Pok fa ḇyefarander awer wos ḇyena. Fandun fa ifrur kaku imnis kuker roi nakam ḇeḇesae kwar ro swadon ḇyedi”. (Bil. 30:2) Imnis raris Hana ḇesouser ya, imbude ḇekenem kayam ro fafisu Yefta ya, fandun fa Yefta ifrur kaku asas ḇyena, ḇape ifawi rosai knam ya faro inaikir ḇyedi ma mankundi. Snar inaikir ḇyedi nari fyarmyan ro tabernakel, nari pok fa fyarḇuk ma nya romawa ḇa. Inja nari oso ḇaḇeri ḇewaris snonsnon ma saprop Yefta ḇyedi. (Hak. 11:34) Ḇape  rariryano, Yefta kuker souser ikofen, ”Yaḇas swadon yedi ḇe Yahwe I kwar, ma na pok fa yayer kaḇer na ḇa.” (Hak. 11:35) Yahwe imarisen faro farsarser ḇeba kaku Yefta ḇyedi ma ḇyeḇarakas i. Nari au kako wasoasuser imnis raris Yefta i ke?

15. Kokame asas rosai kofrurya, ma rariso kofasna snar kosoasuser?

¹⁵ Rofyor koḇuk kankenem koḇena fa kofarmyan ḇe Yahwe I, koḇeasas nari kofrur rosai monda imarisenna. Kofawi snar kofrur kaku asas koḇena inema roi ḇepyanḇa. Ḇape rosai na kofrur ya rofyor sor ko fa kofrur roi komarisenḇa na? Kosawen makakak koḇena ma kosouser ḇe Yahwe kuker sne ḇesiper ido, ine nefasna kosouser faro asas kofrur kwar na. Farsarser koḇena imbude nafrur fa sne koḇena naduf, ḇape ḇarakas Yahwe ḇyedi na ibasyadi ro rosai koḇukna ḇesya kwar. (Mal. 3:10) Rariso kuker Yefta inaikir ḇyedi? Rosai kankarem ḇyedi faro asas kmari ikofen kwar na?

16. Rosai Yefta inaikir ḇyedi myam kmari asas ḇyena? (Mam sonin ḇerandak.)

¹⁶ Asas Yefta ḇyedi iḇesebur ro asas Hana ḇyena. Hana ḇyeasas nari ḇyuk romawa ḇyedi Samuel i fa ḇyefarmyan ḇe snonkaku Nazir ro tabernakel. (1 Sam. 1:11) Snonkaku Nazir oso na bisa fa fyarḇuk ma nya kina. Ḇape Yefta inaikir ḇyedi ḇyuk kankenem ḇesiper ḇyedi ḇe ”farsarser ḇerap”, inja nari pok fa ismai marasrisen ḇe bin ḇefakawin ma ḇe sna oso. (Hak. 11:37-40) Kwarapan roi nane! Bisa fa fyarḇuk kuker snon ḇepyum kaku ro moḇ ḇyedi snaro kmari iso manfarkin ro Israel. Ḇape kir ine ḇye manfamyan oso monda ro tabernakel. Rariso inaikir ine kankarem ḇyedi? Fyasnai snar fyakapon fararur faro Yahwe bo ikofen ḇe kmari, ”Wafrur maḇeaya mura imnis ḇeasas kwar na.” (Hak. 11:36) Ryir marisen ḇyena fa nya swa ma romawa fa ḇyefarmyan ḇe Yahwe I. Rariso na kofarari i rai?

17. (a) Rariso na kofarari kakyar ro Yefta ma inaikir ḇyedi rai? (b) Rariso wos ḇero Ibrani 6:10-12 nadif au fa buk kankenem ḇesiper bedi fa ḇye farsarser?

 ¹⁷ Syaran ro naek-srar Kristen ḇe romawa babo sya simarisen skinfir fa sfarḇukḇa ḇaido sna romawaḇa, ro fafisu ine. Rosai ḇefnai ya? Snaro simarisen sḇuk kankenem sena monda fa sfarmyan ḇe Yahwe I kuker sne ḇesiper. Ḇebor ro sinan sya kako, sḇuk oras ma samamḇraḇ sena fa sefarmyan ḇe Yahwe I syadiḇuro sḇuk oras faro romawa ḇaido kpu sesya. Ḇeḇeso ro si sfararur ro proyek ḇaḇawes ya ḇaido siso ro Farkarkor faro Manḇaryas Karajan (Sekolah bagi Penginjil Kerajaan) ma sraḇe moḇ ḇefandun syadi manḇaryas ya. Eḇese sya sna aw fa sifrur naḇor ro fararmyan ḇe Yahwe ro fafisu munara Swarapepen. Yahwe pok fa ḇyefnderḇa rosai snonkaku ḇesoasuser sya sifrur kwarna. (Wasya Ibrani 6:10-12.) Rariso kuker au? Au kako nari wamarisen fa buk kankenem bedi ḇesiper fa ḇefarmyan ḇe Yahwe I ke?

18, 19. Rosai kofarkor kwar ro Yefta ma inaikir ḇyedi, ma rariso kofarari su rai?

¹⁸ Rosai ḇefnoḇek Yefta fa ifrur mnis roi ḇebor ḇedwarek ismana? Ḇyuk swaf ḇe Yahwe I fyarkin i fa ifrur snemuk ro kankenem ḇyedi. Imewer snonkaku ḇero ris ḇyedi sawyaye i. Yefta isoasuser pdef rofyor snonkaku sifrur fa fyafko. Yahwe ḇyeḇarakas Yefta ma inaikir ḇyedi faro farsarser suḇukna, ma Yahwe ḇyuk su fa sufnoḇek snonkaku ḇese sya fa sakfarmyan ḇe Yahwe I. Syadiwer rofyor snonkaku ḇese sya simnai sifrur roi ḇenapes ya, Yefta ma inaikir ḇyedi susoasuser pdef ḇe Yahwe I. 

¹⁹ Refoya ikofen, ’Mkofarari snonkaku snar kakyar ma kaḇaḇaḇ sisma rarwas ro Allah ḇaḇeasas ḇyedi mkowaf ani.’ (Ibr. 6:12) Mkorama kofarari Yefta ma inaikir ḇyedi, snaro rofyor kosouser pdef ido, nari Yahwe ḇyeḇarakas ko.