Felisa: Yaba ro kina ḇena arasai ḇebor ḇa ro Spanyol. Kina yedi ssun ro agama Katolik, ma nkomyaren kaku ro agama nkoḇedi. Samfur ses’r rikyor ro karyer ayesi sifararur ḇe gereja ḇaido sḇepastor. Awin napirem ḇyedi iso ḇeḇe pastor ma guru ro rumfarkor Katolik. Rofyor imar ramnai, Paus Yohanes Paulus II ikofenḇadir iso ḇe snonkaku ḇesren. Kamam ayedi ḇyekamasan, ma awin ayedi fyararur ro yafe. Nkoḇe manḇeka naek riwar, ma aya iso ḇeba epon ro nko.

Rofyor yaḇeumur 12 taun, mamamun oso ikpef ro Spanyol. Mamamun ya imnai ramnai, kma ayedi sisuni ro bui snaro ḇesasoser sya simewer kuker karkara politik ḇyena. Awini syambraḇ ḇa fa fyamfom fandandun nkoḇena. Inja, ryir aya kuker srar kasun rikyor ayesi iso, Araceli, Lauri, ma Ramoni, ro biara ḇero Bilbao. Ro diwa, roḇean nasya faro si.

Araceli: Fafisu ani, yaḇeumur 14 taun, Lauri 12 taun, ma Ramoni ḇyeumur 10 taun. Nkomander kaku kina nkoḇesi. Ro biara, nkona fararur fa nkofrur sren moḇ ya. Taun risuru ramnai, biarawati sya siwan nko fa nkora ḇe biara ḇeba kaku ro Zaragoza, moḇ sifaduru ḇesinan kwar sya. Nkofararur marḇak kaku fa nkofrur sren dapur inja nkomor kaku.

Felisa: Rofyor srar kasun ayesu sura ḇe biara ḇero Zaragoza ya ramnai, Awin ma Me ayedi iso ḇe pastor ro moḇ nkoḇedi, suna wos oser ma suwan fa yaḇarek ro biara ani. Sumarisen insama yaḇesisye kuker kabor oso ḇemarisen aya. Yamarisen kaku rofyor yafawi nari yaḇarek ro biara  snaro yaswar kaku Allah I. Ro ras ḇe ras yaraḇe rum ari, ma syadiwer yamarisen yakḇe misionaris Katolik imnisra napirem ayedi ro Afrika.

Ḇape ro biara ya, yaḇaḇir jadiḇa fa yafrur roi ḇebor yamarisen kaku na. Biarawati sya kako simarisen ḇa fa yafarmyan ḇe Allah ro sup ḇese. Inja taun oser ḇyenande ramnai, yabur ma yafaduru me ayedi. Yafrur fararur ro rum ya ḇe i, ma ro roḇ na, kuḇenadi kuker Rosario. Aya kako yamarisen yafasos pampen ro rum ari ya ma nkofamankor amfyainir Maria ma santo-santo.

Araceli: Ro Zaragoza, yakofen asas ḇerandak ayedi fa yaḇe biarawati. Ramnai biarawati sya sna wos oser fa yaḇesisye buro srar kasun ayesi. Inja, siwan fa yara ḇe biara ro Madrid ma srar ayedi Lauri i rya ḇe biara ro Valensia. Ramoni i ḇyarek pdef ro Zaragoza. Ro Madrid, yakofen asas ḇeḇesuru fa yaḇe biarawati. Snonkaku ḇebor, imnis raris ḇefarkor ma ḇesinan kwar sya, srama fa sḇarek ro biara ani. Inja, yana fararur nabor kaku. Yafararur ro rum ḇeduf ḇero biara.

Yamarisen kaku fa yaḇe biarawati. Yakara nari yawasya ma yafarkor Refo ya pdef. Ḇape yafafko snaro ro biara ya, sḇuk Refoya ḇa ḇaido syadiwer sawos kuker Allah ma Yesus suḇa. Yafarkor wos Latin ma kankenem ro santo-santo Katolik ma yaḇenadi ḇe Maria i. Ḇape, oras nabor nkoḇena nkoḇuk fa nkofararur monda.

Yaḇe stres ma yaḇefisfyas. Yaḇaḇir fandun fa yafararur yasewar pipi fa yafnoḇek kina ayesi, ḇape yafararur monda ḇa fa yafrur snonkaku ḇese sya senana syadi ro biara. Inja, yakofen faro suster ḇebukor ya snar yamarisen fa yasae ro biara ya. Ḇape, sisun aya ro bui. Kyara, nari yafadwer karkara ayena.

Rofyor yasae kwar ro bui, smam ḇoi yamarisen kaker fa yasaebur ro biara ya, inja sisun kaḇer aya ḇe bui. Kali rikyor ramnai, sikofen ḇe aya bisa fa yasaebur rofyor yafas wos nane, ”Yasaebur snaro yamarisen yafarmyan ḇe Setan i ḇape Allah I ḇa.” Yakandor fafayaḇa. Yamarisen yasae, ḇape yamewer yafas wos ani. Ḇarpur ya, yor fa yawos kuker pastor oso. Yafawar ḇe i rosai ḇeḇefnai ya. Pastor ani isma ijin ro uskup fa dun kaḇer ayaḇe biara ḇero Zaragoza. Rofyor yaḇarek ro diwa ro paik ḇeḇeso, yasma ijin fa yasae. Fyoroḇa ramnai, Lauri ma Ramoni su kako susae.

Felisa: Barpur mura, yafarḇuk ma yabarek ro Cantabria, profinsi oso ro Spanyol. Yamyaren yaraḇe rum ari ya. Ras oso, pastor nkoḇedi ifyow kuker masasor ḇe kawasa ḇyesi ro rum ari, ḇo ikofen,  ”Mkomam syap ine!” Fyasna syap Kebenaran yang Membimbibng kepada Hidup yang Kekal. Doḇe, ”Ono sisya sḇuk syap ine ḇe mko ido, mkoḇuk muma ḇe aya ḇaido mkosawen ḇeri syap ani!”

Yana syap anine ḇa, ḇape yamarisen yafawi roi ḇero do na. Ras ḇeḇeso ramnai, bin risuru surama ḇe rum ayedi. Suine Saksi Yahwe surya ma suḇuk syap ani ḇe aya. Yawasya na ro roḇ ya ḇeri. Fafisu surama kaḇer wer, suyor aya fa yafarkor Refo, ma yakofen ḇe su yamarisen.

Ro randak ya, yamarisen yafrur Allah imarisen. Rofyor yafawi napnapes kuker Yahwe, yaswar kaku I syadi wer. Yamarisen yakofenḇadir ḇe snonkaku sya kam napnapes kuker Allah I. Ro taun 1973, yaḇebaptis. Swaf ya naisya ido, yaḇensewar kaku fa yakofenḇadir napnapes ya ḇe kina ayesi. Ḇape, srar kasun ayedi iso Araceli, pyampum ḇeri bo ikofen snar rosai yakyar ya sasar rirya.

Araceli: Snaro ro biara sifrur pyum aya ḇa, inja yamsore ma yamarisenḇa faro agama ayedi. Ḇape, yaramura pdef ḇe rum ari ya ro ras Minggu, ma yaḇenadi kuker Rosario ro ras ḇe ras. Yamarisen kaker fa yafawi Refoya, ma yaḇenadi yor farfnoḇek ro Allah I. Fyoro ḇa, Felisa ikofenḇair ḇe aya rosai fyarkor kwar na. Snaro iryaḇ kaku inja yakara syawo kwar. Yamarisen kuker rosai ikofen na.

Ḇarpur ya, yakaḇer ḇe Madrid fa yafararur, ma ramnai yafarḇuk. Ro fafisu taun ḇe taun, yamam ḇoi snonkaku sya simyaren sraḇe rum ari ḇape sikenem mnis ḇa kuker farkarkor Yesus ḇyena. Inja, yamewer yaraḇe rum ari. Yakyar werḇa faro santo-santo ḇaido for ḇemḇrerḇa, ma yakara snar pastor pok fa ḇyuk ampun faro sasar snonkaku sya ḇa. Syadiwer yasawen amfyainir nakam ma sonin ḇefesepen kuker agama. Yafawiḇa rosai yafrur nane nkaku ke aroḇa. Yafafko, ḇape yaḇenadi pdef ḇe Allah ḇo yakofen, ”Yamarisen kaku fa yamamḇir Au. Wafnoḇek aya kada!” Yawasen snar Saksi Yahwe snuk ker rum ayedi, ḇape yamewer yaseḇen kedwa ya. Yakyar ḇa faro agama sairiryakam.

 Srar kasun ayedi Lauri i ḇyarek ro Prancis, ma Ramoni ḇyarek ro Spanyol. Fafisu taun 1980, sukako sufarkor Refo kuker Saksi Yahwe sya. Yakyar kaku imnis Felisa i, suḇaḇir ḇa snar sankar su. Ramnai, yasrow kuker Angelines, ḇeḇarek ro rum ḇar ya ma kuḇebatiyae. I kako Saksi Yahwe rirya. Angelines ma swa ḇyedi suyor ker aya fa yafarkor Refo kuker su. Sufawi snar yakofen yafandun faro agama ḇa ḇape sufawi kakuya yamarisen yafawi roi ḇero Refo ya. Faḇye mura yakofenḇair ḇesu, ”Imbo. Yamarisen yafarkor kuker mu, ḇape yaḇuk Refo ayedi monda.” Fafisu ani Refo ayedi iso terjemahan Nácar-Colunga.

Felisa: Rofyor yaḇebaptis ro taun 1973, Saksi ro Santander iso mnu ḇeba ro Cantabria barbor seja syadi ro 70. Nkofrur marandan ḇebinkwan kaku fa nkoḇaryas ḇe mnu-mnu ḇebor ro diwa. Inja, fandun fa nkoso bis resari ma ramnai nkoso oto wer.

Taun ḇe taun ḇyenande, yafnoḇek snonkaku ḇebor ḇemarisen ḇefarkor Refo, ma 11 rofandu si sḇebaptis. Snonkaku ḇebor ḇefarkor Refo ro randak sya sḇe Katolik. Inja fandun fa yakaḇaḇaḇ fa yafnoḇek si. Imnis aya ro fafisu iwara, sfandun oras fa sḇaḇir snar rosai sikyar na ima roi ḇesasar. Yafawi snar Refoya monda ma rur ḇesren Allah ḇyedi na ḇefnoḇek snonkaku oso fa fyadwer karkara ḇyena ma ifawi kaku Refoya. (Ibr. 4:12) Snonswa ayedi Bienvenido, randak ya ḇyepolisi, ḇyebaptis ro taun 1979. Ma awin ayedi i kako fyarkor Refo fyoroḇa rofyor imar ḇaim.

Araceli: Rofyor randak yafarkor Refo kuker Saksi Yahwe, yaḇaḇir na bisa fa yakyar siḇa. Ḇape faḇye mura, yaḇaḇir rarirya werḇa. Saksi sya sḇuk farkarkor Refo monda ḇa, ḇape sikako siso mnis farkarkor anna. Kakyar ayena ḇe Yahwe I ma Refoya nasur pdef, ma yasma marasrisen ḇeba kaku. Snonkaku ḇeḇarek fanam kuker rum ayedi smam fararwe yafrurna ma sikofen ḇe aya, ”Araceli, wambran pdef ro nyan kankenem wakinfir kwarna!”

Yaswarepen rofyor ya yaḇenadi, ”Kasumasa ḇe Yahwe Au, snaro ḇekaḇaḇaḇ kwar ḇe aya ma buk swaf nabor ḇe aya fa yasma rosai yasewar fyoro kwar—iso yafawi kaku Refoya.” Aya kako yor maf ḇe Felisa i snaro yawos famfnom kwar ḇe i. Fafisu ani, nuwosyae werḇa ḇape numarisen nufafyar kuker Refoya. Ro taun 1989 yaḇebaptis rofyor yaḇeumur 61 taun.

Felisa: Kirine yaḇeumur 91 taun kwar. Snonswa yedi imar kwar, ma pok fa yafrur nabor werḇa raris fafisu iwara. Ḇape, yawasya kaker Refoya ro ras ḇe ras, ma yaso ro fananjur ya ma yaḇensewar kaku fa yaḇaryas.

Araceli: Yamarisen yafawar napnapes kuker Yahwe I faro pastor ma biarawati syakam rofyor yasrow kuker si, imbude snaro randak ya ayakako yaḇe biarawati. Yana swaf nabor fa yafawar kuker si, ma sibor ro si sisma syap ma majalah. Yaswarepen ro ras oso yafawarus kuker pastor oser. Kali ḇeḇeso yawawos kuker i ramnai, imarisen fa ryower rosai yakofenna. Ikofen, ”Ḇape, ro moḇ risai yaraḇe ro umur ḇeradine ya? Rosai nari kawasa ma kina ayesi sikofenna?” Yakarem, ”Ḇape rosai Allah ikofenna?” Ifawi rosai yakofenna nkaku, yamam ḇoi ḇyesneso kaku. Ḇape rya imkak fa dun snemuk.

Pok fa yaḇefnderḇa rofyor snonswa ayedi ikofen ḇe aya snar imarisen iso kuker aya ro fananjur ya. Ḇyeumur syadi ro 80 taun kwar rofyor iso randak ro fananjur ya, ma ḇarpur ya, iso pdef ro fananjur ya. Fyarkor Refo ma ḇyeḇaryas. Nusma fawar ḇepyum ro ḇaḇeḇaryas ya. Paik risuru rofyor ḇyebaptis ḇaim, ryoe.

Felisa: Rofyor yafarmyan ḇe Yahwe I, srar kasun rikyor ayesi sisampampum aya. Ḇape, si kako simarisen sisma napnapes ya. Iso roi ḇeyun marasrisen ḇeba kaku ḇe aya. Nkokame bisa nkoryur fa nkofawar kuker Allah nkoswar ya iso Yahwe I, ma Wos Ḇyena! Ḇarpur ya, nkokame nkofarmyan ḇe Yahwe I. *