FARARMYAN koḇena iso roi ḇefandun kaku ma nun fainda. Ḇape, snonkaku koḇaryas ḇesi sḇaḇirna ḇa. Snonkaku ḇemarisen ḇewasya Refo sya, sikako sḇaḇir sfandun ḇa fa sfarkor Allah Wos ḇyena kuker ko.

Komam contoh ro Gavin i. Ryama ker ḇe fananjur ro Balai Karajan, ḇape imewer fa fyarkor Refoya. Gavin fyasnaḇair snar fyawi naborḇa roi ḇero Refoya, ma imarisenḇa fa snonkaku ḇese sya sfawi na. Imkak nari sor i fa syun ro agama oso, ma imewer sankar i. Karkara bedi rariso, na bisa fa sifnoḇek i ke? Wawasen kada fainda ro Refoya faro snonkaku oso. Yahwe ikofen ḇe snonkaku Israel sya, ”Wos Ayena nari imis raris wawur, imnis mekem ḇemismis faro aḇris yabori.” (Ul. 31:19, 30; 32:2) Mkorama kowawos rariso fararmyan koḇena namnis kuker wawur. Rarirya na kofnoḇek ”snonkakusya kam” kuker samambraḇ koḇena.​—1 Tim. 2:3, 4.

Wawur ya ḇyemayar. Wawur iso ḇeḇefrur kermkun-kermkun ro sup ḇepnunek ya ma nḇe war ḇemismis. Rosai ḇefnai fa Yahwe Wos ḇyena sapna ḇe ”imis raris wawur” ya? Snaro dawos faro kawasa ḇyesi kuker payamyum, myaren, ma kuker sne ḇefafir. Kofarari Yahwe I rofyor koḇesyowi kakakyar ro snonkaku ḇese sya. Kofnoḇek si insama bisa fa sun snemuk ro mankun si. Koswar si ido, nari simarisen fa srower anun koḇena, ma fararmyan koḇena na nun bon ḇepyum.

Wawur iso roi ḇeyun sneprei. Fararmyan koḇena nari nun sneprei ḇe snonkaku ḇese sya rofyor kokara rariso nyan kofnoḇek si fa smamḇir kaku napnapes ya. Naek oso ḇenir ḇe Kris kali ḇerandak ḇyuk farkarkor Refo ḇe Gavin, ḇape idif i ḇa. Ḇape ḇyensewar nyan ḇese insama Gavin imai ḇa fa sufarkor Refo ya. Kris ikofenḇair ḇe Gavin i snar Refoya naser anun ḇefandun kaku ma kuker ifarkor Refoya, Gavin nari ifawi syadi kaku rosai siwawos ro fananjur ya. Ramnai, Kris fasnaḇair ḇardadi ḇebor ḇebuk kakakyar ḇe i snar Refo ima roi ḇekaku. Ḇarpur ya suwawosker kuker ḇardadi ḇero Refo ḇeḇejadi kwar. Wawawos suḇenakam nun sneprei ḇe Gavin i, ma ḇarpur ya imarisen fyarkor Refoya.

Wawur iso roi ḇefandun kaku ro kankenem. Ro fafisu sup ya isyor snaro dares ya iba ro Israel, nari mekem ya dado ḇa ro paik ḇeḇeso. Kuker wawur ya ḇa nari rokakerna nasyor ma namar. Yahwe ḇyardi ḇasḇiser rur ya nari ḇeḇekur ro fafisu koḇedine. Ine kyurfasna snar nari snonkaku sya simbrow kaku ”fa srower Yahwe wos ḇyena”. (Ams. 8:11) Allah ḇyeasas snar snonkaku ḇesma ramrem sya nari ’simnis wawur ḇerama ro Yahwe’ snaro sḇaryas ankankinem ḇeḇye Karajan. ’Domba-domba ḇese sya’ siso ḇefnoḇek si. (Mi. 5:7; Yoh. 10:16) Ankankinem ḇeḇye ine iso roi oser Yahwe fyasos kwar fa ḇyuk kankenem ḇe snonkaku ḇemḇrow faro napnapes ya. Kosyowi ankankinem ḇepyum ine ke?

Wawur iso ḇarakas ḇerama ro Yahwe I. (Ul. 33:13) Fararmyan koḇena na nun ḇarakas faro snonkaku ḇemarisen ḇerower sya. Farkarkor Refo nḇuk ḇarakas ḇe Gavin i snar fakfuken ḇyenakam neḇekarem kwar. Isur ro ḇaḇerur ya, ḇyebaptis ma ro kirine kuker binswa ḇyedi Joyce i suḇaryas ankankinem ḇeḇye Karajan ya.

Rofyor mam fararmyan ḇena namnis kuker wawur ya ido, nari waḇaḇir rosai wafrur kakuna ro fararmyan ima roi ḇefandun kaku. Rosai ḇefnai ya? Mis oso ro wawur nun royoḇa, ḇape wawur ḇebor ḇemismis kada na nafrur saprop ya idok. Rarirya kako, rosai wafrurna ro fararmyan bedi nari wakara nun royoḇa. Ḇape, snaro yuta ma yuta ro manfamyan Yahwe ḇyesi sfararur kayam, napnapes ya neḇeḇaryas kwar ”faro er sya kam”. (Mat. 24:14) Fararmyan koḇena nari nḇuk ḇarakas ḇerama ro Yahwe faro snonkaku sya ke? Imbo, anun koḇena namnis wawur ḇemayar, ḇeyun sneprei, ma roi ḇefandun kaku ro kankenem!