1, 2. (a) Farkarkor rosai kun ro ḇaḇemkuepen ro Gideon ma sordade ri 300 ansi? (Mam sonin ro ram ḇerandak.) (b) Ḇeḇeknam ro syap Lukas 21:19, rosai ḇefnai fa ḇaḇemkuepen ine iso roi ḇefandun kaku?

WAWASEN kada mamamun ḇesamswen ma ḇemarḇak kaku ro fandu sordade Israel sya ro baḇ farkankin Hakim Gideon i, ma ḇemun embroḇ ḇyesi. Gideon ma ḇeso i sya siyaw user snonkaku Midian sya ma ḇewarpu si sya ro roḇ ya ḇesiper isof ro moḇ ḇebinkwan ri 32 km (20 mil)! Refoya ikofen rosai na ḇeḇejadi ya, ”Gideon ryama ḇe war ḇeki Yordan ma imbranuk ro dia. I ma snon ri 300 ḇefnoḇek i sya simor kwar.” Ḇape sismai bon ḇaim ro mamamun ya snaro fandun fa sekafyo kaker sordade ri 15.000. Eḇembroḇ sine seembroḇ kaker er Israel ro taun ḇe taun, inja pok fa sisusuḇa. Rarirya, Gideon ma ḇeso i sya siyaw pdef eḇembroḇ si sya ma ḇarpur ya sikafyo si!​—Hak. 7:22; 8:4, 10, 28.

² Ko kako koso ro mamamun ḇesamswen ma ḇemarḇak kaku. Ḇembroḇ ko sya isoine Setan, dunya ḇyedi, ma ḇaḇemnisḇa koḇena. Ḇeḇeso ro ko imbude sḇensewar  kaku fyoro kwar fa sisampum ḇeḇebroḇ sya. Kuker farfnoḇek ro Yahwe I, na kokafyo ḇembroḇ ko sya. Ḇape kosmai bon ya ḇaim. Fafisu oso koḇaḇir koryar werḇa. Ḇaido, komor kwar fa kowaf papupes dunya ine. Yesus ikofen ḇeko snar nari kosmai fafrowes ḇemarḇak kaku ma ḇaḇewayam ro ras-ras ḇepupes ya. Ḇape ikofen kako snar kofarmku ido nari kosmai bon ya. (Wasya Lukas 21:19.) Rosai ḇaḇemkuepen ya? Rosai nari ḇefnoḇek ko fa koḇemkuepen ya? Rosai na kofarkor ro snonkaku ḇeḇemkuepen sya? Ma rariso na ’kofrur ḇaḇemkuepen fyararur isof ro imnai’?​—Yak. 1:4.

3. Rosai ḇaḇemkuepen ya?

³ Ro Refoya, ḇaḇemkuepen kyurfasna monda ḇa snar kores nako ḇaido kokaḇaḇaḇ ro fafisu ḇesamswen. Ine kako kyurfasna ḇe nyan karkara ma sneḇaḇir koḇena rofyor kosmai farawrowes. Ḇaḇemkuepen nafnoḇek ko fa koḇebri, kosoasuser, ma kokaḇaḇaḇ. Referensi oser ikofen snar ḇaḇemkuepen iso rari na ḇefnoḇek ko fa kona saneraro ḇesambraḇ kaku ma insama kosusuḇa rofyor kosmai farawrowes. Ine na nafnoḇek ko fa kores nako pdef ma kosambraḇ fa kopampum farawrowes ḇemarḇak kaku. Ma ine nafrur ko fa kokafyo farawrowes ya ma komam monda faro fainda ya, faro roi ḇesamswen kosmana ḇa.

4. Rosai ḇefnai na kokofen snar ḇaḇemkuepen Kristen koḇena neknam ro saswar ya?

⁴ Saswar ya idif ko fa koḇemkuepen. (Wasya 1 Korintus 13:4, 7.) Ro ḇar risai monda? Saswar faro Yahwe nadif ko fa koḇemkuepen ro fafisu ḇesamswen nakam Yahwe ryirna fa ndarirya. (Luk. 22:41, 42) Saswar faro naek srar koḇesi nafnoḇek ko fa koḇemkuepen faro ḇaḇemnisḇa sena. (1 Ptr. 4:8) Saswar faro swa koḇedi na nafnoḇek ko fa kosambraḇser farḇakḇuk koḇena ma koḇemku ro ”kandera nabor”, inḇeswa ḇesma aski sya kako sismana.​—1 Kor. 7:28.

5. Rosai ḇefnai fa Yahwe I monda ḇesyus fa ḇefnoḇek ko fa koḇemkuepen?

⁵ Kor samambraḇ ro Yahwe I. Yahwe iso ’Allah ḇeḇuk ḇaḇekaḇaḇ ma sneprei’. (Rm. 15:5) I monda ḇefawi pyum kaku fafisu ḇesamswen koḇena, sneḇaḇir, ma moḇ risai korama ya. Inja Iso ḇefawi pyum kaku rosai na ḇefnoḇek ko fa koḇemkuepen ya. Refoya ikofen, ”Marasrisen ro snonkaku ḇemkak faro I sya nari ḇyukna ḇesi, ma fararyor sena nari ryowerna, ma nari fyaspar si.” (Mz. 145:19) Rariso nari Allah kyarem nadi koḇena fa kor samambraḇ fa koḇemkuepen?

6. Imnis raris Refo ḇyesasas kwar, rariso Yahwe na ’ḇyuk nyan faro ko insa kofarmku’ ro farawrowes kosmaina?

⁶ Rofyor kor ḇe Yahwe fa ifnoḇek ko fa koḇemkuepen, ḇyeasas fa ’ḇyuk nyan faro ko insa kofarmku’. (Wasya 1 Korintus 10:13.) Rariso Allah ifrurna  rai? Fafisu oso, imbude ipyosbur fafrowes ya. Bape ro fafisu ḇese, ḇyuk samambraḇ ḇeko ’insa koḇar roi ḇebor kam kuker farmku ma kḇaḇʼ. (Kol. 1:11) Snaro ifawi pyum kaku ḇaḇeraryarḇa koḇena ro fisik, mental ma emosi, Yahwe pok fa myam monda ḇa fafisu ya ḇyesamswen syadiwer na ḇefrur fa kosoasuser pdef ḇa.

7. Buk sararḇer oso ḇefasnaḇair rosai ḇefnai fa kofandun anan rur ya infa koḇemkuepen.

⁷ Anan rur ya nasambraḇser kakyar koḇena. Rosai ḇefnai fa anan rur ya iso roi ḇefandun kaku? Kowasen sararḇer ine: Infa kek ḇe bon ḇekaki oso, snonkaku oso fyandun dan roḇean nabor syadibur snonkaku ḇese sya. Roḇaido na syambraḇ ḇa fa dek isof ro bon pum ya. Rarirya kako, kofandun anan rur ḇebor ya insama koḇemku fa kosmai rosai kosewar na. Fandun fa kona snemuk fa koḇuk oras koḇena fa kofarkor ro mankun ko ma koso ro fananjur ya. Roi nanekam na nasambraḇser kakyar koḇena.​—Yoh. 6:27.

8, 9. (a) Raris komam ro Ayub 2:4, 5, rosai safsof Setan ḇyena rofyor kosmai roi ḇesamswen ḇefrowes ko? (b) Rofyor ḇekandera snar wasmai farawrowes, sarisa komamḇa rosai wawasen na?

⁸ Koswarepen ḇaḇeasuser koḇena ḇe Allah. Rofyor kosmai fafrowes ya, koḇekandera monda ḇa snar roi naḇor nasya nefesepen kako. Ḇaḇeasuser koḇena ḇe Allah neḇemam kako. Rosai na kofrur ya rofyor kosmai fafrowes ya nfasnaḇair komam Yahwe iso ḇe Manḇepoik ro supswan ḇesiper ine ke roḇa. Rosai knam ya? Setan, iso mbroḇ Allah ḇesampampum, danonef Allah I kuker kyursof snonkaku sya sifarmyan ḇe Yahwe snaro fandandun mankun sena monda. Setan ikofen, ”Snonkaku oso nari ḇyuk roi ismana kam faro kankenem ḇyedi.” Setan ikofen wer kuker Ayub i, ”Kirine, buk bramin bedi ma mun kor ma baken ḇyedi, ma nari ifras au ḇeri ro ḇarpon mka bedi.” (Ayb. 2:4, 5) Setan fyadwer mankundi kwar ke? Aroḇa ḇeri! Taun-taun ḇyenande ramnai, rofyor Setan ḇyeḇesawen buro nanki, kyursof kaker manfamyan ḇesoasuer Yahwe ḇyesi. (Why. 12:10) Fafisu ine, Setan kyursof kaker snar snonkaku sya sisyom ḇe Allah snaro fandandun mankun sena. Imarisen kaku fa kopampum ḇaḇepapoik Allah ḇyedi ma komnai fa kofarmyan ḇe I.

⁹ Rofyor koḇekandera snar kosmai fafrowes, kowasen kada faro sarisa komamḇa ine. Setan ma hantu-hantu ḇyesi sisya ro ḇar oser ya. Sikame smam rosai wafrur na ma sikofen nari wasusu. Ro ḇar ḇesewer, na mam Yahwe I, Yesus Kristus, snonkaku ḇesma ramrem ḇeḇeḇawes kwar, ma malaikat syaran ma syaran. Si kako smam rosai ḇensewar kaku ya, ḇape sedif ma sisambraḇser au. Simarisen smam ḇemkuepen ma wasouser pdef ḇe Yahwe I. Ma ramnai rwower Yahwe dawos ḇe au, ”Ḇefawawi nanem kada, romawa yedi, ma wafrur fa sne yedi imarisen kada, insama yaḇuk kankarem ḇe mansei ḇeanonef aya.”​—Ams. 27:11.

10. Rariso na kofarari Yesus i ḇemam monda faro ḇaḇyak ro ḇaḇemkuepen rofyor kosmai farawrowes ya?

 ¹⁰ Wawasen muraḇe ḇaḇyak ḇarakas na. Wawasen kada wafrur marandan oso. Ro marandan ya fandun fa wambran ro aḇyaḇ ḇekwan kaku. Ro moḇ risai mam ya, moḇ ya pyampan kaku. Ḇape ḇaḇir na wambran pdef ido na wafyafer ro aḇyaḇ pember ya, nari mam sananai ya wer. Kankenem koḇena ine imnis raris marandan ani. Imbude nari wasrow fafisu ḇesamswen, ma ḇaḇir wasambraḇ werḇa snaro roi ḇesamswen wasmaina. Yesus i kako ismai roi ḇeradine. Rofyor spai i ro ai kandera ya, ḇyaḇir smamkyof i ma ḇyekandera kaku. Inema fafisu ḇesamswen kaku ismaina ro kankenem ḇyedi! Rosai ḇefnoḇek i fa ḇyemkuepen ya? Refo ikofen snaro myam ḇe ”marisen nari ḇyaḇir ro ḇarpur ya”. (Ibr. 12:2, 3) Yesus iwasen monda faro ḇarakas nari ismana snaro ḇyemkuepen, ma ḇefandun kaku ya iso ifrur sren Allah snonsnon ḇyedi ma isonem ḇaḇepapoik Yahwe ḇyedi. Ifawi fafrowes ismaina nakain fyoro ḇa. Ma ḇarakas isma ro nanki iso na ḇekain fyoro na. Baboine, farawrowes wasmaina na nafrur fa ḇekandera, ḇape waswarepen snar nanekam na nakain fyoro ḇa.

11. Rosai ḇefnai fandun fa kofakor ro ”si ḇefarmku kwar” sya?

¹¹ Kemir monda ḇa ro ḇaḇefarmku ya. Infa danun ḇe snonkaku Kristen fa sfarmkuepen rofyor sismai fafrowes ḇerama ro Setan, manwawan Petrus fyas ”Kosampum i kuker kakyar ḇedworen, snar mkofawi, naek srar Kristen kam ro supswan ine ḇesiper sḇar kandera ḇemnis kam.” (1 Ptr. 5:9) Farfyar ro ”si ḇefarmku kwar” nafarkor ko fa kosoasuser pdef, nḇuk kakakyar ḇeko na kosma bon ḇepyum ya, ma nḇuk swarapepen ḇeko rofyor kosoasuser pdef ido na kosma ḇarakas. (Yak. 5:11) Mkorama komam contoh ḇeḇeso. ^[1]—Mam fasfas ḇepupes.

12. Rosai na kofarkor ro kerub ḇero yaf Eden sya?

¹² Kerub sya siso malaikat ḇena nasan ḇekaki. Rofyor Adam ma Eva susasar, Yahwe ḇyuk fararur ḇebabo faro kerub ḇeḇeso ro supswan ine. Fararur ine iḇesebur fararur ḇero nanki ya. Farari sena nḇuk farkarkor ḇeko rariso koḇefarmkuepen rofyor kona fararur ḇesamswen. Refoya ikofen Yahwe ”iwan kerub-kerub kuker spada ḇesak ma ḇeyaryar fa ḇedwarek nyan ḇeyun ḇe aiknam kankenem ya.” ^[2] (Mam fasfas ḇepupes.) (Kej. 3:24) Refoya ikofenḇadir ḇa snar kerub sine sisnurem ḇaido sḇabir sefandun syadiḇur fararur ḇebabo sismana. Sfafayaf ḇa ḇaido sisusu ḇa. Imbape, sifrur pdef  fararur sena isof ro imnai, imbude rofyor faḇruḇ ḇeba ḇeḇejadi ya, syadi rofafisu 1.600 taun ḇyenande!

13. Rariso Ayub i fyarmku ro fafrowes ismaina?

¹³ Ayub snon ḇesoasuser. Fafisu oso imbude bati ḇaido kina bedi sikofen wos ḇefrur fa sne bedi ḇyefafardun. Imbude wasmai dafduf ḇemarḇak ḇaido ḇesneso snaro snonkaku waswar kaku imar. Ḇape rosai monda ḇeḇekur au, wasma sneprei ro farari Ayub ḇyena. (Ayb. 1:18, 19; 2:7, 9; 19:1-3) Ayub ifawiḇa rosai ḇefnai fa ismai kandera, ḇape isusu ḇa. Rosai ḇefnoḇek i fa fyarmku pdef? Oser ya, snaro iswar Yahwe I ma imkak fa ifrur Yahwe imarisen ḇa. (Ayb. 1:1) Ayub nya snemuk fa ifrur Yahwe imarisen ro fafisu ḇesamswen ma ḇeyun marisen na. Osower ido, Yahwe ifnoḇek Ayub i fa myam papoik ḇyedi kuker fyawar ḇe Ayub i roi ḇeba kaku ifrur kwar na. Ine nafrur fa Ayub ikyar kaku snar Yahwe nari ifrur mnai fafrowes ismai na ro fafisu ḇemnis. (Ayb. 42:1, 2) Ma ine iso ḇeḇejadi kaku ya. ”Ma Yahwe ipyosbur ḇaḇekandera Ayub ismana ma ḇyuk kaḇer arasai ḇyena. Yahwe ḇyuk kaḇer ḇe i nabor syadi ro ḇepon ya”. Ayub ikenem ”kawan ma isma sneprei ro kankenem ḇyedi.”​—Ayb. 42:10, 17.

14. Ro 2 Korintus 1:6, rariso farmkuepen ro Paulus nafnoḇek naek srar ḇese sya?

¹⁴ Manwawan Paulus. Wasmai kandera ḇaido roi ḇesamswen ke? Wasma fakaman ḇe penatua ḇaido pengawas wilayah ḇeḇaḇir ḇesambraḇ wer ḇa snaro fararur nabor ro sidang ke? Rarirya kaku ido, farari ro manwawan Paulus nari nafnoḇek au. Paulus ḇyekandera snaro ismai ḇaḇewayam ḇemarḇak kaku, ma i kako kyara ker fandandun naek srar ḇero sidang sya. (2 Kor. 11:23-29) Ḇape Paulus isusuḇa, ma ḇyuk farari ḇesambraḇser naek srar ḇese sya. (Wasya 2 Korintus 1:6.) Ḇaḇemkuepen bedi  na nasambraḇser naek srar ḇese sya fa sakfrur rarirya kako.

15, 16. (a) ’Fararur’ rosai fandun fa ḇaḇemkuepen ifrur fa imnai? (b) Buk contoh ḇefasnaḇair rariso ’ḇaḇemkuepen bedi fyararur isof ro imnai’.

¹⁵ Yakobus isma farkankin fa fyas, ”Iḇye kada ḇaḇemkuepen mkobedi fyararur isof ro imnai, insama mkomnis ma mkoprei ro roi nakam, mkananjar awer roi ono kada.” (Yak. 1:4, NW) Rariso ḇaḇemkuepen ”fyararur” mnis ro mankun ko rai? Rofyor kosmai farawrowes, nari komam snaro fandun fa koḇekaḇaḇaḇ, koḇesyowi, ḇaido kosaswar syadi wer. Rofyor kofarmkuepen pdef ro fafrowes ya nari kofarkor fandun fa kofasna rari-rari nane, ma roi nane nafrur fa kenem Kristen koḇena ipyum syadi wer.

¹⁶ Snaro farmkuepen ine na nafrur fa koḇe snonkaku Kristen ḇepyum kaku, na komewer fa kosouser ḇa faro parenta Yahwe ḇyena fa kosae buro farawrowes ya. Imnis raris, rofyor ḇensewar kaku fa wapampum karkara ḇeḇyeḇa ido, pok fa wasusu awer faro fararwrowes ya! Wor farfnoḇek ro Yahwe I fa wasawen karkara ḇesasar. Ono sisya ro kina bedi ḇedwarek au ke? Pok fa wasusu awer! Nwa snemuk fa wafarmyan pdef ḇe Yahwe I. Bon ya iso, nari kakyar bedi ḇe Yahwe I nasambraḇ kaku. Koswarepen kaku: Infa kosma marisen Allah ḇyedi, fandun fa koḇefarmkuepen.​—Rm. 5:3-5; Yak. 1:12.

17, 18. (a) Buk sararḇer oso ḇefasnaḇair farmkuepen isof ro pupes. (b) Snar kofanam kwar ḇe papupes dunya ine, na kakakyar rosai kosmana?

¹⁷ Fandun fa koḇemkuepen pdef isof ro pupes ya, faro fafisu oso monda ḇa. Wawasen kada wai oso ḇembrure. Insama snonkaku ḇero wai ya sikenem pdef ido, fandun fa sas ḇe ḇande. Snonkaku ḇesusu fasaw nari imbrure. Rarirya kako, snonkaku ḇemewer fa ḇeyas ḇe ḇande nari simar. Komarisen kokenem ro dunya babo ido, fandun fa kofarmku pdef. Mkorama kona kenem ḇemnis Paulus, ḇekofen, ”Rarirya mkosusu awer.”​—2 Kor. 4:1, 16.

¹⁸ Imnis raris Paulus, kokyar kaku snar Yahwe nari ifnoḇek ko fa koḇemkuepen isof ro pupes ya. Paulus fyas, ”Roba! Mboi ro roi ḇeḇor anna nekam, kosma fainda ḇemnis snar Yesus Kristus ḇeswar koya. Snar yakyar kaku ro sup-swan ine ḇesiper, iḇye marmari ma kankenemya kako; iḇye malaikat ma iḇye ḇesma papoiksya kako; iḇye ro baboine, iḇye ro fafisu nari ḇeramumaya kako, oroḇaido samambraḇ ḇesena; iḇye roi ḇero nanki, roi ḇero sup ine dori nakako, oroḇaido roi ḇese wer, nakam nadwarek Allah saswar ḇyuk mabekonyaḇa, imnis fyasna kwar ro Yesus Kristus Manseren koḇedi.” (Rm. 8:37-39) Imbude nari koḇaḇir kombrus kwar. Ḇape iḇye kada kofarari Gideon i ma snon ḇeso i sya. Simbrus kaku kwar ḇape sisusuḇa, ”siyomuser pdef”!​—Hak. 8:4.