1, 2. (a) Rariso kokyar snar bisa kona kenem ḇebabo? (b) Rari rosai monda kofarkor ro Kolose 3:10-14?

RO REFO Kitab Suci Terjemahan Dunia Baru, kosrow wos ”kenem ḇebabo” kali risuru. (Efesus 4:24; Kolose 3:10) Ine kyurfasna ḇe kenem snonkaku ’imnis raris Allah ifrur kwarna.’ Mboi bisa kona kenem ḇebaboya ke? Imbo. Yahwe ifrur snonkaku koine imnis kuker fanir Ḇyeja, inja bisa kofarari rari-rari ḇepyum Ḇyena.​—Kejadian 1:26, 27; Efesus 5:1.

² Snar koinema snonkaku ḇenapesḇa siko, inja fafisu oso kokame kona marasrisen ḇesasar. Moḇ koḇarek rona bisa nawyae ko kako. Ḇape, snar Yahwe ḇaḇenaḇye Ḇyeja, inja bisa koḇesnonkaku ḇemnis kuker marisen Ḇyeja. Insama kofrurna, mkorama kofarkor rari ḇeḇeso ro kenem ḇebabo ya. (Wasya Kolose 3:10-14.) Ramnai na komam rariso kofasna rari-rari nane ro fararmyan koḇena.

3. Rari oser rosai ḇero kenem ḇebabo ya?

³ Paulus fyasnaḇair rari ḇemam rarwasḇa ḇyefandun kaku ro kenem ḇebabo. Ikofen ḇo doḇe, ”Roi ḇeradine isya wer ḇa snonkaku Yunani, roḇa snonkaku Yahudi, snonkaku ḇesofakfuk ma snonkaku ḇesofakfuk ḇa, snonkaku Barbar roḇa snonkaku Skit, women roḇa ḇemkei.” * (Mam fasfas kasun ro sop.) Ro sidang, snonkaku osoḇaḇeri kyara isyadibur ḇesesya ro keret, er, ḇaido nasan ḇyeja ro kawasa sya. Rosai ḇefnai ya? Snar koso Kristus, inja ’ko kam ko ḇeoser.’​—Kolose 3:11; Galatia 3:28.

4. (a) Rariso Yahwe manfamyan Ḇesya sifrurpyum snonkaku ḇesesya? (b) Fafisu rosai ḇefrur samswen ḇaḇeoser ro snonkaku Kristen?

⁴ Rofyor kona kenem ḇebabo ido, na bisa kofrurpyum ma koḇesyowi snonkaku ḇesesya, ḇerama ro keret ma er sairiryakam. (Roma 2:11) Ro sup ḇeḇeso, ine samswen kaku ḇesi. Imnis raris, fafisu iwara ro Afrika Selatan, pamarenta ifrur sasoser insama snonkaku ḇerama ro keret ḇeḇese sḇarek ro moḇ ḇesena. Snokaku ḇebor ḇero sup ani, sino sisya sḇe Saksi-Saksi Yahwe kako, sisya sḇarek rodia kako. Badan Pimpinan sanun ḇe naek srar sya fa ’siḇas sisnesna.’ Inja ro Oktober 2013, sifrur fasasos oso fa sifnoḇek naek srar ḇerama ro keret ḇeḇese fa smambir pyum oso ma ḇesesya.​—2 Korintus 6:13.

5, 6. (a) Fasasos rosai sifrur ro negara oso ḇefnoḇek Allah kawasa ḇyesi fa sḇeoser? (Mam sonin ro randak artikel ine.) (b) Payamyum rosai sismana?

⁵ Naek sya sifrur fasasos inja ro minggu ḇeḇeso, Saksi-Saksi ḇerama ro sidang risuru ḇeyawos wos ḇese bisa sna oras fa sḇebati kayam. Naek srar ḇerama ro sidang suru suine siḇaryas kayame, sifanjur kayam, ma sedakam ḇe naek srar ḇesesya rum sena. Sidang ri utin syadi sakso ro fasasos ine, ma kantor cabang sisma laporan ḇepyum faro fasasos ani. Iba syadiwer snonkaku ḇeḇe Saksi Yahwe ḇa sya simarisen kaku smam roi ine. Imnis raris, mentri agama oso doḇe, ”Ayama Saksi Yahwe risayaḇa, ḇape yamanen mko snar mkofasos pyum kaku fararur ḇaḇeḇaryas, ma mkona keret ḇeḇeoser.” Rariso kakara naek srar sya kuker fasasos ine?

⁶ Randakya, imbesrar oso ḇeyawos wos Xhosa ḇenirḇe Noma imkak fa dor naek srar ḇerama ro sidang ḇeyawos wos Inggris fa srama ḇe rum ḇyeja. Ḇape, rofyor ḇyaryas kuker Saksi-Saksi ḇepyoper sya ma sor i fa ryama ḇe rum sena, ḇyaḇir iknon kaku. Ikofen, ”Sima snonkaku ḇemnis raris ko kako!” Inja rofyor naek srar ḇerama ro sidang  Inggris srama fa sḇaryas kayam kuker sidang ḇeyawos wos Xhosa, Noma dor ḇeḇeso ro si fa sanan kayam ro rum ḇyeja. Ikandor kaku fyor myam penatua ḇepyoper oso kyon ro burua plastik. Snar fasasos ine nambran pdef, inja naek srar riḇeso sya sisma bati ḇebabo ma sifawi naek srar ḇerama ro er ḇesesya.

7. Rosai ḇefnai fa kofasna pdef sawarwar ya?

⁷ Rofyor dunya Setan ḇeḇemkok ḇaim, Yahwe kawasa Ḇyesya nari sḇekandera kako. Imnis raris, sisae koro fararur, kona dafduf ḇemarbak, roi ḇedwarek, rim ḇeba, skaraw arasai koḇena, ḇaido samswen ḇesena. Insama kosambraḇ rofyor kosma kandera fandun fa kona rari ḇesawarwar. Sne ḇesawarwar nadif ko fa kofasna ḇaḇenaḇye ḇe snonkaku ḇesesya (Efesus 4:32) Ine iso contoh risuru ro kenem ḇebabo. Rari risuru suine nafnoḇek ko fa kofarari Allah ma kosambraḇser ḇesesya.​—2 Korintus 1:3, 4.

8. Fainda rosai kosmana rofyor kofasna sne ḇenaḇye faro snonkaku syakam ro sidang? Buk contoh oso.

⁸ Rariso kofasna sne ḇenaḇye ḇe naek srar ḇero sidang koḇedi ḇerama ro moḇ ḇese ḇaido ḇesabarar sya? Komarisen kosaser si, koḇebati kuker si, ma kofnoḇek si fa smam snar kofandun si ro sidang. (1 Korintus 12:22, 25) Imnis raris, Dannykarl ḇeraker Filipina ḇe Jepang. Snar ima mandaman dirya, inja sifrurmnis i ḇa ro moḇ fyararur ya. Ramnai dakso ro fananjur Saksi-Saksi Yahwe sya. Dannykarl fyawar, ”Indokada ḇeyakso ro diansyakam snonkaku Jepang sirya. Ḇape sisaser aya kuker marisen, imnis raris aya ine bati sifawi fyoro kwar.” Snar naek srar sifasna sne ḇenaḇye faro i, inja fyanam syadi ḇe Yahwe I. Fyoro mura Dannykarl ḇyebaptis, ma kirine ifarmyan ḇe penatua. Penatua ḇero diansya simarisen snar Dannykarl ma swari, Jennifer i, sufanjur ro sidang ani. Sikofen, ”Snar suḇe merintis inja sukenem syadadiḇa ma suḇuk farari ḇepyum fa susewar ḇepon Karajan Allah.”​—Lukas 12:31.

9, 10. Fawar bon ḇepyum snar fasna sawarwar ro fararmyan bena.

⁹ Kona swaf fa kofrur ”roi ḇeḇye faro snonkakusya kam” rofyor koḇaryas ankankinem ḇeḇye Karajaan. (Galatia 6:10) Saksi Yahwe ḇeborsya sna sawarwar faro imigran sya, inja sfarkor wos sena. (1 Korintus 9:23) Sisma bon ḇepyum fyor sḇensewarna. Imnis raris, perintis oso ro Australia ḇenirḇe Tiffany fyarkor wos Swahili insa ifnoḇek sidang Swahili ro Brisbane. Samswen fa fyarkor wos ḇebabo ine raryano, kankenem ḇyena naser marasrisen. Tiffany ikofen, ”Insama fararmyan bena napyum ido, farmyan ro sidang ḇeyawos wos ḇese. Ine imniso wambran farma mboi wabur mnu beja ḇa. Nari waḇaḇir ḇebati kuker naek ma srar ro supswan ḇesiper ma mam ro mankundaw aski ro ḇaḇeoser ya.”

¹⁰ Kina oso ḇero Jepang si kako sakfrur roi ḇeradirya. Sakiko, inai ro kina ani, doḇe, ”Ras ras ido nkosrow  imigran Brazil sya fyor nkoḇaryas. Rofyor nkofasna mnuk ḇero Fasasna [Wahyu] 21:3, 4 ma Mazmur 37:10, 11, 29, ro Refo wos Portugis, smampyum kaku rosai nkofasna na ma sino sisya skanes.” Kina ine sna sawarwar faro imigran ansya, inja simarisen sifnoḇek si fa sfarkor napnapes. Kina ansi sfarkor wos Portugis ma ḇarpur mura sifrur randak sidang ḇeyawos wos Portugis. Ro taun ḇe taun, sifnoḇek imigran sya fa sḇe Yahwe manfamyan Ḇyesi. Sakiko doḇe, ”Nkoḇesewar marḇak kaku fa nkofarkor wos Portugis ine, mboi barakas nkosmana nasyadi ro sasewar marḇak nkoḇena. Nkokofen kasumasa nabor naba faro Yahwe I.”​—Wasya Farfyar ro Manwawansya [Kisah] 10:34, 35.

11, 12. (a) Rosai ḇefnai fandun fa kona motif ḇekakuna rofyor kofasna kenem ḇebabo koḇena? (b) Rosai ḇefnoḇek ko fa kofasna sne ḇerun pdef?

¹¹ Kofasna sne ḇerun ro kenem ḇebabo koḇena insamaido koḇukisyom Yahwe I, mboi kosewar sanandik ro snonkaku sya ḇa. Koswarepen malaikat ḇenapes monda bisa darareri ma ifrur sasar. (Mam kako Yehezkiel 28:17.) Koine snonkaku ḇenapesḇa, inja ararer ine samswen fa koḇinkwanburna. Ḇape, bisa kofasna sne ḇerun. Rariso kofrurna rai?

¹² Roi oser ḇefnoḇek ko fa kona sne ḇerun isoine kowasya Allah Wos Ḇyena ras ḇe ras ma kokarauser rosai kowasyana. (Ulangan 17:18-20) Ḇesyadi yaiso kowasenkara farkarkor Yesus ḇyena ma farari ḇepyum ro sne ḇerun ya. (Matius 20:28) Yesus ima irun sne kaku, inja ḇyan manfamyan ḇyesya wemin sena. (Yohanes 13:12-17) Roi ḇese kofrur iso koḇenadi ḇe Yahwe fa kor rur ḇesren ya. Rur ḇesren Ḇyeja na nafnoḇek ko fa kopampum marisen ḇesasarna isoine koḇaḇir kosyadi ro snonkaku ḇesesya.​—Galatia 6:3, 4; Filipi 2:3.

13. Barakas rosai nari kosmana rofyor kofasna sne ḇerun?

¹³ Wasya Amsal 22:4. Yahwe dor ko fa kona sne ḇerun. Sne ḇerun nun barakas nabore. Kofasna sne ḇerun ido, sidang nari ifo kuker aski  ma ḇaḇeoserya isya. Yahwe nari iswar kaku ko. Manwawan Petrus ikofen ḇo doḇe, ”Mkorunyae mko, snar sfas ro Refo radine: Allah isampum ḇemararessya, ḇape iswar ḇerun snesya.”​—1 Petrus 5:5.

14. Mansei farari ḇepyum kaku ro ḇaḇefafir ma ḇaḇekaḇaḇaḇ ya?

¹⁴ Ro dunya ine, fyor snonkaku oso ifafir ma ikaḇaḇaḇ ido, na soḇe iryar ḇa. Ḇape, roi sikofen nane nkaku ḇa, snaro rari ḇepyum nane ndrama ro Yahwe I, Manpapoik ḇeba syadi ro supswan ma farsyos ine. Yahwe iso farari ḇepyum kaku ro ḇaḇefafir ma kaḇaḇaḇ. (2 Petrus 3:9) Kwarapan contoh ine, Yahwe ikaḇaḇaḇ kaku rofyor ḇyuk kankarem faro Abraham ma Lot su roro malaikat Ḇyesya. (Kejadian 18:22-33; 19:18-21) Ma kwara kako, Yahwe ikaḇaḇaḇ kaku faro er Israel ḇesoasuser ḇa sya ro swaf taun ri 1.500.​—Yehezkiel 33:11.

15. Farari ḇepyum rosai Yesus fyasna ro ḇaḇefafir ma ḇaḇekaḇaḇaḇ ya?

¹⁵ Yesus ima ’imyaren asuser.’ (Matius 11:29) Ḇyekaḇaḇaḇ kaku faro manfamyan ḇyesya roi sifrurna. Rofyor fyarmyan ro supswan kaker, snonkaku sya sanonef ma sifyaki. Mboi ifafir ma ikaḇaḇaḇ isof ro imar. Ḇyekandera ro adir marindi ḇesyabo ḇyenadi ḇe Kmari insama Kmari ḇyuk ampun faro ḇefrur susa i sya. Doḇe, ”Sifawi rosai sifrur ineḇa.” (Lukas 23:34) Iba syadiwer rofyor ḇyekandera kaku, fyasna pdef ḇaḇefafir ma ḇaḇekaḇaḇaḇ.​—Wasya 1 Petrus 2:21-23.

16. Rariso kofasna ḇaḇefafir ma ḇaḇekaḇaḇaḇ ya rai?

¹⁶ Paulus ikofenḇair nyan oso faroko fa kofasna ḇaḇefafir ma ḇaḇekaḇaḇaḇ. Ikofen bo doḇe, ”Mkokḇaḇyae mko ma mkoḇuk ampunyae rofyor snon oso ikram masasor faro min ḇyedi; imnis raris Manseren ipyos sasar mkoḇena kwar mko kako mkakfrur rarirya kada.” (Kolose 3:13) Insama bisa koḇuk ampun faro snonkaku ḇesesya, fandun fa kofafir ma kokaḇaḇaḇ. Inja, ro sidang koḇedi na ḇaḇeoserya isya.

17. Rosai ḇefnai fa ḇaḇefafir ma ḇaḇekaḇaḇaḇ ine nefandun kaku?

¹⁷ Yahwe dor ko fa kofasna ḇaḇefafir ma ḇaḇekaḇaḇaḇ ḇe snonkaku ḇesesya. Insama kokenem ro dunya babo ido, fandun fa kona rari ḇeradine na. (Matius 5:5; Yakobus 1:21) Kofafir ma koḇekaḇaḇaḇ ido, nari nun sanandik faro Yahwe ma kofnoḇek snonkaku ḇesesya sakfasna rari beradirya.​—Galatia 6:1; 2 Timotius 2:24, 25.

18. Rosai ḇefesen kuker saswar ma rari ḇemam rarwas ḇa?

¹⁸ Rari-rari kofarkor kwarna neḇefesepen kuker saswar. Imnis raris, manwawan Yakobus fandun fa ḇyuk ananun  ḇe naek srar sya snar sifrurpyum syadi snonkaku ḇenana sya ro snonkaku ḇesabarar sya. Fyasnaḇair snaro roi ani neḇese kuker Allah parenta Ḇyena fa ’koswar snonkaku min kobesi imnis koswar mankunko.’ Ramnai ikofenwer, ”Mkomam karyer ido, mkofrur sasar.” (Yakobus 2:8, 9) Rofyor koswar min kobesi ido, nari komam rarwas snonkaku syaḇa snar farkarkor, keret, ḇaido nasan sena ro kawasa. Snonkaku bisa smam Auma rya mam rarwas snonkaku syaḇa mboi kakuya rariryaḇa. Rari mam rarwasḇa ine fandun fa kona na ro kankenem koḇena.

19. Rosai ḇefnai fa fandun kaku kofasna saswar ya?

¹⁹ Saswar yakako ”kaḇaḇaḇ ma ḇaḇenaḇye” ma ” mararesḇa.” (1 Korintus 13:4) Fandun fa kofasna kaḇaḇaḇ, sne ḇenaḇye, ma sne ḇerun insama bisa koḇaryas ankankinem ḇeḇye faro snonkaku syakam. (Matius 28:19) Rari-rari nane bisa nafnoḇek pyan ko fa koḇebati fanam kuker naek srar syakam ro sidang. Rofyor kofasnaḇair saswar ḇeradirya, ḇaḇeoser nari nasya ro sidang ma nun sanandik faro Yahwe I. Snonkaku ḇesesya nari smam kako snar koḇeoser ma nari si kako simarisen sfarkor napnapes. Ine imnis rosai Refo fyasnaḇairna kuker kenem ḇebabo, isoine: ”Ro roi ḇeḇor nane kam: mkona saswari, ḇekaḇrai ḇefesepen ḇaḇeoser ma ḇaḇemanasnisya.”​—Kolose 3:14.

20. (a) Fakfuken rosai fandun fa kofuken faro mankunko? Rosai ḇefnai ya? (b) Fafisu ḇepyum rosai bisa kowaf ya?

²⁰ Fandun fa kofuken mankunko, ’Fararwe rosai yafrurna insama yasawen ma yaḇinkwanbur rari ma kenem ḇekwar ayena?’ Fandun fa koḇenadi ḇe Yahwe I ma kor insama ifnoḇek ko. Fandun fa koḇensewar kaku kofadwer kakara ḇesasar ḇaido roi kofrurna insama bisa ’kosma rarwas ro Allah Ḇaḇesasoser ḇyedi.’ (Galatia 5:19-21) Fandun fa kofuken mankunko, ’Yafrurmnis kakara yedi ras ḇe ras insama yafrur Yahwe imarisen ke?’ (Efesus 4:23, 24) Koine snonkaku ḇenapesḇa, inja fandun fa koḇensewar insama kona ma kofaduru kenem ḇebabo koḇena. Ine sasewar ḇemnaiḇa. Nari ipyum kaku rofyor sonkaku syakam sna kenem ḇebabo ma nari sifarari Yahwe rari-rari ḇepyum Ḇyena kuker mananis!