1, 2. Rosai snonkaku sya smam ro Saksi-Saksi Yahwe sya?

SNONKAKU ḇebor sya smam boi Saksi-Saksi Yahwe sima siḇese kuker ḇesesya. Imnis raris, manfasfas oso ḇenirḇe Anton Gill, myanen kaku rari ro Saksi-Saksi ḇero Nazi Jerman sya. Ikofen, ”Saksi-Saksi Yahwe smamḇaḇir si ma iba syadiwer mbroḇ sesya ḇero Nazi. . . . Ro 1939 Saksi-Saksi Yahwe ri 6.000 sisya ro [kamp konsentrasi].” Ikofenwer Saksi-Saksi Yahwe sisma kandera ḇeḇyeḇa raryano, sifawisi ḇe snonkaku ḇeankarkarḇa, sidif si raryano siknon, sisouser faro Allah seja, ma sḇeoser.

² Fyoro ḇaime, snonkaku ḇero Afrika Selatan kako smam roi oso ḇeḇese ro Saksi-Saksi Yahwe sya. Fafisu oso, Saksi-Saksi Yahwe ḇerama ro er ḇeḇese ro sup ani sidwarek si fa siryur kayam si. Ḇape, ro ras Minggu 18 Desember 2011, Saksi syadi ri 78.000 srama ro er ḇeḇese ro Afrika Selatan ma sup ḇese ḇefanam moḇ ya sfanjur ro  munara ḇeba oso ḇero stadion ḇeba kaku ro Johannesburg. Manejer ro stadion ani ikofen, ”Ineiso snonkaku bena rari ḇepyum kaku yamam randak ro stadion ine. Sikame sisansun famfnom si ḇa. Mkofrur sren stadion ine ipyum kaku. Ḇape ḇeba syadi ya, mkorama ro er sariryakam.”

3. Rosai ḇefnai fa ḇaḇemanḇekanaek koḇedi ro supswan ḇesiper iḇesebur kuker ḇesesya?

³ Inja, snonkaku ḇe Saksi Yahwe ḇa sya bisa smam kaku snar manbekanaek ro supswan ḇesiper ine neḇese kuker ḇesesya. (1 Petrus 5:9, fas-fas kasun ro sop.) Rosai ḇefnai fa koḇese kuker organisasi ḇesesya? Snaro fafnoḇek ro Refo ma Allah rur ḇesren Ḇyeja, koḇensewar kaku fa kofadwer rosai monda Yahwe imarisenḇana ro kankenem koḇena. ”Kobur [kenem] ḇekwar,” ma ”ko ḇeḇefrur babo ro ras ḇe ras”.​—Kolose 3:9, 10.

4. Rosai nari kofarkor ro artikel ine? Rosai ḇefnai ya?

⁴ Rofyor kosawen kenem ḇekwar koḇena, fandun insama koḇinkwanbur kaku na. Ro artikel ine, nari kofarkor rariso kosawen kenem ḇekwar koḇena ma rosai ḇefnai fa ine ḇyefandun kaku. Nari komam snonkaku oso bisa fyadwer kenem ḇyeja ro fararur ḇesasar ḇeba ifrur kwarna. Ko kako nari kofarkor rosai bisa snonkaku ḇero napnapes fyoro kwar sifrurna insama seḇinkwanbur kenem ḇekwar sena. Rosai ḇefnai fa kofarkor roi ine? Komam kada, snonkaku ḇeḇeso ḇefarmyan faro Yahwe sisasor si ḇa. Roi skara ma sifrurna imnis raris ro randak smamḇir Yahwe ḇaime. Ko oser-oser fandun fa koswarepen swarapepen ine, ”Snonkaku ḇekara ḇeyoḇo ḇeyores nako, iḇye ḇyesasori; insa isapi awer.”​—1 Korintus 10:12.

5. (a) Fawar sarḇer oso ḇefasnaḇair rosai ḇefnai fa fandun kaku kosawen kenem ḇekwar koḇena. (Mam sonin ro randak artikel ine.) (b) Rosai fararur ḇesasar ro kenem ḇekwar ḇeḇeyap ro Kolose 3:5-9?

⁵ Rosai nari wafrurya rofyor wafawi sansun bedi pyapos ma isnarem? Nari per ḇeri sansun bani. Rarirya kako, rofyor kofawi kosya kofrur roi Yahwe dayin na ido, fandun fa kofadwer na. Kuker fararur ḇesasarna, Paulus ikofen, ”Mkosawen roi ḇerarirya kam.” Mkorama kokara roi risuru suine: ḇaḇefarḇuk famfnom ma roi ḇemamasna.​—Wasya Kolose 3:5-9.

6, 7. (a) Ro Paulus wos ḇyena, rosai ḇefnai samswen kaku fa kosawen kenem ḇekwar koḇena? (b) Rariso Sakura kenem ḇyeja? Rosai ḇefrur fa fyadwer kenem ḇyeja?

⁶ Ḇaḇefarḇuk famfnom. Ro Refoya, ”ḇaḇefarḇuk famfnom” fasnaḇair anenef fasfus rofandu bin ma snon ḇefarḇuk ḇaim ḇe imbeswa. Paulus ikofen snar snonkaku Kristen fandun fa ’smun baken sena’ rofyor skara fa sifrur farḇakḇuk famfnom. Ine  kyurfasna fandun fa koḇensewar kaku kosawen marasrisen ḇesasarna. Kakuḇae roi nane napyan ḇa, ḇape bisa kopampumna!

⁷ Bisa komam roi ine ro imḇesrar oso ḇerama ro Jepang ḇenirḇe Sakura. * (Mam fas-fas kasun ro sop.) Rofyor ḇye inainkbor, ḇyaḇir ḇyarek ro mankundi ma ḇyesneso. Insama ḇyesneso werḇa, ifrur fararur farḇuk famfnom rofyor ḇyeumur taun ri 15. Sakura ifrur farḇuk kuker snonkaku riḇeso ma ḇyeaborsi kali rikyor kwar. Doḇe, ”Randakya, yakara yafrur radirya insama yaknon snar yakara snonkaku sya sifandun ma siswar aya. Ḇape, yafrur farḇuk famfnom ine nabor syadiwer, yaḇaḇir yaknon ḇa.” Ikenem rarirya isof ḇyeumur taun ri 23. Ramnai fyarkor Refo kuker Saksi-Saksi Yahwe sya, ma imarisen faro rosai fyarkorna. Yahwe ifnoḇek i fa imnai ro kenem ḇeamoral ḇyena ma ifnoḇek i kako fa isawen sne ḇesasar ma mamyai ḇyeja. Kirine, fyarmyan ḇe perintis biasa kwar, ma ḇyaḇir kyain ro mankundi werḇa. Ikofen, ”Yamarisen kaku snar Yahwe iswar aya ras ḇe ras.”

8. Fararur rosai monda bisa ḇefrur fa Yahwe myam ko ḇe snonkaku ḇesren ḇa?

⁸ Roi ḇemamasna. Ro Refo, ”roi ḇemamas na” kyurfasna ḇe farḇakḇuk famfnom monda ḇa. Ine kyurfasna kako ḇe anan tabaku ma farfyar ḇeser roi ḇemamas na. (2 Korintus 7:1; Efesus 5:3, 4) Ine kako kyurfasna ḇe roi ḇeḇyeḇa snonkaku sya sifrur fasis na, imnis raris siwasya syap ḇeser farfyar kuker fararur farḇuk ḇaido smam pornografi. Roi nane bisa nun si ḇe fararur ḇaḇearwaren isoine masturbasi. (Kolose 3:5) *—Mam fas-fas kasun ro sop.

9. Rosai na ḇeḇejadi rofyor snonkaku oso nya marisen kuker ”ḇaḇermomen” ya?

⁹ Snonkaku ḇemam ker pornografi nya marisen kuker ”ḇaḇermomen” ma ifrurker farḇakḇuk famfnom. Peneliti sya smam snonkaku ḇemam ker pornografi simnis kuker snonkaku ḇemasarser ḇaido ḇeyanker narkoba sya. Inja, kopok kokandor ḇa snar marisen ḇesasar faro mamam pornografi bisa nun roi ḇeḇyeḇa kaku. Ine bisa nafnai fa komai fafayaḇa, kofararur mnis ḇa, kina koḇedi isma aski ḇa, ḇaḇesisye ro farḇakḇuk ya, ma syadiwer komun mankunko. Snon oso ḇemam pornografi werḇa ro taun oser, ikofen kirine insape yaḇesyowi mankundaya wer.

10. Rariso Ribeiro imnai fa myam pornografi ker?

¹⁰ Snonkaku ḇeborsya, fandun fa sḇensewar kaku fa seḇinkwarbur pornografi ya. Ḇape, sasewar sena bisa nun bon ḇepyum. Komam contoh ro Ribeiro ḇeraker Brasil. Rofyor ḇyesnonkbor, ibur rum ḇyeja ma fyararur ro pabrik daur ulang kertas. Rodiwa myam syap pornografi. Ribeiro doḇe, ”Fyoro mura, yamamker na. Iḇyeḇa syadiya, pacar yedi rya ḇaim mboi  yamam vidio pornografi kwar.” Ramnai ras oso ro moḇ fyararur ya, Ribeiro myam syap-syap imbe sifrur kaḇerna ma myam syap oser Rahasia Kebahagiaan Keluarga. Dun ma iwasyana. Rosai iwasyana nafnoḇek i fa fyarkor Refo kuker Saksi-Saksi Yahwe sya. Ḇape kawan kaku insape imnai fa myam pornografi. Rosai ḇefnoḇek i ya? Ikofenḇair, ”Yaḇenadi ḇesya kwar, yafarkor Refo, ma yawasenkara rosai yafarkorna, ḇaḇesyowi yena faro Allah rari-rari ḇyena nabor syadiwer, inja saswar yena faro Yahwe iba syadi ro marasrisen yena faro pornografi.” Kuker fafnoḇek ro Refo ma Allah rur ḇesren ḇyeja, Ribeiro bisa fyadwer kenem ḇyeja, ḇyebaptis, ma kirine ifarmyan ḇe penatua ro sidang oso.

11. Rosai ḇefnoḇek snonkaku oso insama myam pornografi ker ḇa?

¹¹ Komam kada insama imnai fa myam pornografi, Ribeiro fyarkor Refo monda ḇa. Kyara kaku rosai iwasya ro Refo na, ma wos anna nsun kaku ro sneri. Ḇyenadi faro Yahwe, dor fafnoḇek Ḇyeja. Roi anna nafnoḇek saswar ḇyeja faro Allah syambraḇ syadiwer, inja nafrur fa myam pornografi werḇa. Insama komam pornografi ker ḇa, fandun fa koswar syadi Yahwe I ma kayin rosai ḇeḇyeḇana.​—Wasya Mazmur 97:10.

12. Rosai ḇefnai fa Stephen isawen masasor ma fanfadak ḇyena?

¹² Snonkaku ḇeḇeso simasasor fasawsaw ma sawos roi ḇefrur sneduf ma skoryae snonkaku ḇesesya. Rofyor sifrur radine ido, kina sesya sḇekandera. Kma oso ro Australia ḇenirḇe Stephen dawos fafrasker ma nari imsor kaku faro roi kasun monda ḇefrur fa fyafayaf. Doḇe, ”Aya ma swa yeja nuḇarek ḇesisye kali rikyor kwar ma kirine nufasos fa imbe nufrurmuk farḇakḇuk nuḇena”. Ḇarpurya, sufarkor Refo kuker Saksi Yahwe sya ma Stephen ḇyensewar kaku fa ifrur rosai fyarkor kwarna. Ikofen, rofyor ifawi Yahwe ḇaim imasasor fasawsaw rofyor ono ḇefrur fa fyafayaf. Kyara ima imnis bom ḇekpef rofafisu sai monda. Ḇape rofyor ifrur rosai fyarkorna, roi nakam bisa nambran kuker payamyum. Ikofen, ”Kina nkoḇesyakam nkokain kuker payamyum. Kuker fafnoḇek ro Yahwe I, kankenem nkoḇena nafo kuker aski ma marisen.” Kirine Stephen fyarmyan ḇe hamba pelayanan ma swari fyarmyan ḇe perintis biasa taun ḇeḇeso kwar. Penatua ḇero sidang ḇyedi doḇe, ”Stephen ima naek ḇefrurpyum, ḇefararur marḇak, ma bena sneḇerun.” Sikofen kako, ras osoḇaḇeri smam Stephen imsore. Imewer smaneni snar fyadwer kenem ḇyeja kwar. Ikofen, ”Nari yasma barakas  ḇepyum ineḇa ro kankenem ayedi rofyor yasma fafnoḇek ḇa ro Yahwe fa yafadwer kenem ḇekwar yedi ḇesiper.”

13. Rosai ḇefnai fa masasor ima roi ḇeḇyeḇa kaku? Swarapepen rosai Refo ḇyuk ḇeko na?

¹³ Refoya ḇyuk swarapepen ḇeko insama komasasor fasawsaw awer, kawos awer roi ḇefrurduf snonkaku ḇesesya ma korakrok awer. (Efesus 4:31) Snaro ine bisa nafnai mamamun. Baboine, snonkaku skara simsor ma sfasna masasor ima roi ḇesasar ḇa. Ḇape kenem ḇeradirya nfasnaḇair sḇesyowi manḇedaw koḇedi ḇa. Ḇebor ro naek srar koḇansi sfadwer rari sena kwar ma sifasna kenem ḇebabo.​—Wasya Mazmur 37:8-11.

14. Snonkaku ḇerarmomen bisa sḇesnonkaku ḇemayar ke?

¹⁴ Naek oso ḇenirḇe Hans fyarmyan ḇe penatua ro Austria. Koordinator badan penatua ro Hans sidang ḇyeja doḇe, ”Ima snonkaku ḇemayar kaku.” Ḇape, randakya ifrur radirya ḇa. Rofyor ḇyesnonkbor ya, imasarser ma imasasor fasawsaw. Ras oso rofyor imser, imsor kaku inja myun pacar ḇyedi ra imar. Hans ismai ro bui taun swaf ri 20. Bape ro bui kenem ḇyena namnis ḇa kako. Snari dor penatua oso fa fyakor Refo kuker i. Hans dobe, ”Samswen kaku fa yasawen kenem ḇekwar ayena. Mnuk Refo ḇedif aya iso Yesaya 55:7, ḇekofen, ’Ibyekada snonkaku ḇeḇarḇor sya sibur nyan sena.’ 1 Korintus 6:11, ikofenḇair ”Naek ono rofandu mko ro randakya rari sena namnis rarirya.” Mnuk ani fyasnaḇair sino sisya ḇebur nyan sasar sena kwar. Ro taun  ḇe taun Yahwe kuker kaḇaḇaḇ ifnoḇek aya kuker rur ḇesren Ḇyeja insama yafasna kenem ḇebabo.” Hans ḇyebaptis rofyor isya kaker ro bui, ma sisae i ro fafisu taun ri 17 paik ri wonem. Doḇe, ”Yakofen kasumasa ḇe Yahwe I snar fyasna sawarwar ma ḇyuk ampun ḇe aya.”

15. Rosai bar ro kenem ḇekwar? Rosai Refo ikofen kuker roi ani?

¹⁵ Wos ankarkar iso bar ro kenem ḇekwar. Imnis raris, snonkaku ḇebor sankar insama sḇak som ḇa ḇaido simewer skamar sasar sifrurna. Ḇape Yahwe iso ”Allah ḇaḇenapnapesya.” (Mazmur 31:5) Inja, dor insama ḇesyom I sya ’sikofen roi ḇekaku’ ma ’sankarkar awer.’ (Efesus 4:25; Kolose 3:9) Inja samswen fa kawosna, ḇaido komai raryano, fandun fa kokofen kakaku ya.​—Amsal 6:16-19.

16. Rosai ḇefnoḇek kofa kosawen kenem ḇekwar koḇena?

¹⁶ Kokyar faro samambraḇ kobena monda nari jadi fa kosawen rari ḇekwar koḇena ḇa. Sakura, Ribeiro, Stephen, ma Hans sḇensewar kaku fa sfadwer kenem sena. Roi ḇefnoḇek si yaiso Allah Wos Ḇyena ma rur ḇesren ya. (Lukas 11:13; Ibrani 4:12) Insama ko kako kosmai fainda ro Allah farfnoḇek Ḇyeja, fandun fa kowasya Refo ro ras ḇe ras, kowasen karana, ma koḇenadi ras ḇe ras, kor fawawi nanem ma samambraḇ fa kofrur rosai kofarkor kwarna. (Yosua 1:8; Mazmur 119:97; 1 Tesalonika 5:17) Rofyor kofrur fasasos ro fananjur ḇero sidang, Allah Wos Ḇyena ma rur ḇesren Ḇyeja na ryous ko. (Ibrani 10:24, 25) Ma ko kako komarisen kobuk rosai monda organisasi fyasos kwar ḇe ko na, imnis raris majalah, JW Broadcasting, JW Library, ma jw.org.​—Lukas 12:42.

17. Rosai nari kofarkor ro artikel ḇeuser ya?

¹⁷ Kofarkor kwar fararur ḇesasar ḇeḇeso fandun fa snonkaku Kristen sisawen ma sebinkwanburna, insama sifrur Yahwe imarisen. Ḇape, imnai ro dia monda ḇa. Fandun fa kofasna kenem ḇebabo ma kofrur pdef na ro kankenem koḇena. Ro artikel ḇeuser ya, nari kofarkor rariso na kofrur na rai.