Fasfas Matius ḇyeja kuker ḇaḇeaben Yesus i ma awar kankenem ḇyeja neḇesebur kuker fasfas Lukas ḇyeja snaro sufas monda faro nyan kakara ma pengalaman ro snonkaku risuru ḇeḇeseyae.

Matius fyas monda rosai Yusuf ismana. Fyasnaḇair rariso Yusuf sneḇaḇir ḇyeja rofyor ifawi Maria fyadores kwar, ma kuker Yusuf mafafu ḇyeja fyor isrow kuker malaikat oso ḇekofenḇair rosai ḇefnai fa Maria fyadores ya, ma rariso isouser malaikat prenta ḇyena. (Matius 1:19-25) Syap Matius kako fyasnaḇair rariso malaikat oso ḇyuk swarapepen ḇe Yusuf i ro mafafu ḇyeja insama ifrar ḇe Masir fnoḇek kina ḇyesya, ma rariso Yusuf isouser parenta ani. Matius i kako fyasnaḇair ḇeko kuker Yusuf mafafu ḇesuru ḇyeja. Yusuf myam Malaikat oso iwan sko fa skobur ḇe Israel, inja skobur ma skoḇarek ro Nazaret. (Matius 2:13, 14, 19-23) Ro fasal risuru ḇerandak ro Injil Matius, dap Yusuf snonsnon ḇyeja kali riwar, ma maria kali rifyak monda.

Ḇape Lukas fasfas ḇyeja fyas nabor syadi kuker Maria i. Fasfas ani fyasnaḇair rarama ro malaikat Gabriel ḇe Maria i, rarama Maria ḇe napirman ḇyeja Elisabet i ma sanandik ḇyuk ḇe Yahwe I. (Lukas 1:26-56) Fasfas ani kako naser Simeon wos ḇyena faro Maria i, ḇekofen snar Yesus nari ḇyekandera kaku rofafisu iyama. Ramnai Lukas fyasnaḇair kuker farfyar Yesus rya ḇe bait fnoḇek kina ḇyesya rofyor ḇyeumur taun ri 12. Ro fasfas ani, Lukas dap kaḇer Maria wos ḇyena mboi Yusuf wos ḇyena ḇa, ma ikofenḇair snar Maria ḇyesneso kaku snaro rosai ḇeḇejadiya. (Lukas 2:19, 34, 35, 48, 51) Ro fasal risuru ḇerandak ro Injil ani, Lukas dap Maria snonsnon ḇyeja kali ri 12, ḇape Yusuf kali rikyor monda. Inja fasfas Matius naser rosai Yusuf kyara ma ifrurna nabor syadi. Ḇape Lukas fasfas ḇyeja, fyas nabor syadi kuker Maria kakara ḇyedi ma rosai ismana.

Nyan fa sufas syos ro Yesus kina ḇyesya kako neḇeseyae. Matius fyas syos ro Yusuf kina ḇyesya. Snar Yesus ima Yusuf romawa ḇefan ḇyeja, inja Yesus nya hak ro hukum fa isma karapesa nasan Daud. Rosai ḇefnai ya? Snaro Yusuf ima up ro Raja Daud roro Salomo i, Daud romawa ḇyeja. (Matius 1:6, 16) Ḇape, Lukas fyas warpu syos ro Maria kina ḇyesya. Kyurfasna snar rofyor Yesus ḇyeḇeaben, nya hak kwar fa isma karapesa nasan Daud snaro ”roḇaḇe snonkaku ḇyedi” ḇerama ro Daud i. (Roma 1:3) Rosai ḇefnai ya? Snaro Maria ima up ro Raja Daud romawa ḇyedi Natan i. (Lukas 3:31) Ḇape, rosai ḇefnai fa Lukas dap Maria i ḇe Eli (ḇaido Heli) romawa ḇyedi ḇa? Ine snaro fasfas sasyos ro kina fafisuya srir monda snon sya snonsnon sena ro sasyos kina ya. Inja rofyor Lukas fyas snar Yusuf ima Eli romawa ḇyeja, snonkaku sya sifawi snar ima Eli manbikin ḇyediri.​—Lukas 3:23

Sasyos up Yesus kina ḇyeja ro Injil Matius ma Lukas fasnaḇair snar Yesus iso Mesias, Allah ḇyeasas kwar ani. Snonkaku syakam sifawi Yesus ima up ro Raja Daud, inja snonkaku Farisi ma Saduki jadi fa sisampun roi ine ḇa. Roi Matius ma Lukas sukofenḇair kuker sasyos ro Yesus i, nasambraḇser kakyar koḇena ma nafrur fa kokyar snar Allah asas ḇese Ḇyena nari ifrur fa ndarirya.