FAFISUYA papupes ro paik November 1932 ro mnu ḇeba oso Mexico City, snonkaku ḇero diansya barbor sena yuta ri oser syadi. Minggu oser aniwara, insape srir lampu lalu lintas na. Ḇape iso roi ḇefrur simarisen yaḇa, snaro roi oso isya ḇefrur simarisen syadi. Wartawan kuker kamera sena sra siwaf ro stasiun kereta api, siwaf mandakam ḇeba oso. Manseiso ya? Isoine Joseph F. Rutherford, presiden Lembaga Menara Pengawal. Saksi ḇero diansya kako srama fa siwaf rarama ro Naek Rutherford nari ḇeyakso ro munara ras rikyor ani.

The Golden Age fyas, ”Ineiso munara nari ḇeḇefas ḇe sarisa ḇefandun kaku oso” sifrur na fa sirwas napnapes ro Meksiko. Ḇape ine munara kasun monda snaro ḇerama sya barbor sena 150 monda. Inja, rosai ḇefnai fa ine ḇyefandun kaku?

Rofyor munara ya ḇaim, napnapes ine sifawi mankun na ḇa ro Meksiko. Kakuḇae, ro fafisu 1919, munara kasun ḇeḇeso nasya kwar, ḇape taun ḇeuserya barbor ro sidangna nado kaku. Rofyor kantor cabang nasya ro Mexico City 1929 rya fafisuya ipyum syadiwer, ḇape kakuya samswen ya nasya kaker. Organisasi ḇyuk akurfasna ḇe kolportir, apap faro perintis ro fafisu iwara, insama sisun warpu awer bisnis sena kuker fararur ḇaḇeḇaryas ya. Kolportir oso imsor kaku isof syae ro napnapes ya ma ifrur raryur farkarkor Refo ro mankundi. Rofafisu yakako pengawas cabang sifadwer i snaro ifrur sasar ḇeba. Inja, Saksi-Saksi ḇesouser ḇero Meksiko sfandun wos sneprei.

Ro rarama ḇyeja, Naek Rutherford syambraḇser snonkaku ḇesouser sya ro faya risuru ḇeyun samambraḇ ro munara ani ma faya ririm sawos naro radio. Iso fafisu ḇerandak kaku naek srar sya sḇuk radio fa sirwas ankankinem ḇeḇye ro Meksiko ḇesiper. Munara ya imnai, pengawas cabang ḇebabo sinankow i fa fyasos fararur ro moḇ ani. Saksi-Saksi Yahwe kirine siryaḇ kaku ma kuker Yahwe fafnoḇek Ḇyeja sḇaryas pdef.

Ro taun ḇeuserya, 1933, munara risuru sifrurna ro sup ani, oserya ro Veracruz ma oserya ro Mexico City. Naek srar sya sifararur marḇak kaku ro moḇ ani, ma nun bon ḇepyum. Imnis raris, ro 1931, manḇaryas sya 82 monda. Ḇape, ro 1941, barbor sena nek isof kali risamfur syadi! Snonkaku ri 1000 syadi srama ḇe Mexico City fa siso Munara Teokratis ro 1941.

Ro 1943, Saksi-Saksi sḇerak kampanye Munara Teokratis ”Free Nation’s”, nari ḇeḇefrur ro moḇ ri 12 ro Meksiko. * (Mam fas-fas kasun ro sop.) Sekampanye kuker sḇuk kakop raris sandwich. Papan ine ḇyesuru, ma naba kaku. Skafna ro erdai sena, oserya ro ḇarpon, suminya ro ḇarpur. Saksi-Saksi sḇuk papan ine kwar fa sekampanye munara ro moḇ sena ro 1936.

Kampanye kuker papan sandwich ine nun bon ḇepyum kaku ro Mexico City isof majalah La Nación fyas kuker Saksi-Saksi Yahwe ḇeyakso munara kebaktian ani, ”Ro ras randakya, siwan si fa sor snonkaku naborwer. Meserya, moḇ munara ya ifyos kuker snonkaku sya.” Gereja Katolik simarisenḇa kuker roi ḇepyum Saksi-Saksi sifrurna, inja imbe sidwarek si. Ḇape, naek srar sya simkak ḇa. Sekampanye pdef munara ani. La Nación ikofenḇair, ”Ro mnu anikam smam si.” Artikel ḇesena sfas naek srar sya, ”sifadwer si ḇe papan ’sandwich’ ” Artikel ani kako fyasnaḇair sonin ro naek srar sya ḇero sampak ro Mexico City. Ro baḇ sonin ani sfas: ”Sibor kaku ro sampak ya.”

Fafisuya, Saksi-Saksi sya fandun fa sḇensewar kaku insama sakso munara kebaktian ro Meksiko. Naek srar ḇebor sya srama ro moḇ ḇeḇinkwan kaku kuker stasiun kereta ḇaido ro sampakna. Sidang oso fyas, ”Ro mnu nkoḇedi telegram iso monda ḇesya rodia.” Inja delegasi sya fandun fa sek keledai ḇaido simbran ras ḇe ras insama sisrow stasiun kereta api na ḇeyun si ḇe moḇ ḇefrur munara kebaktian ani.

Saksi ḇebor sya sna kumpan nabor ḇa, inja samswen ḇe si fa srama ḇe munara kebaktian. Fyor siso kebaktian Saksi-Saksi ḇero diansya kuker saswar ma marisen sor si fa sḇarek ro rum sena. Ḇesesya senef ro Balai Kerajaan. Ras oso, naek ri 90 ḇeḇarek ro kantor cabang, senef ro bo karton-karton ḇeser syap. Syap Yearbook ikofen naek sya simarisen kaku snar karton-karton anna ”namyaren ma napnunek raris lantai semen ḇa.”

Faro Saksi-Saksi ansya bisa siryur kuker naek srar sesya, ima nefandun sasewar kaku. Kirine, Saksi-Saksi syadi ri 850.000 sisya ro Meksiko, ma sakfasna rari ḇeradirya.  * (Mam fasfas kasun ro sop.) Laporan oso ro Yearbook 1949 ikofenḇair, naek srar sya sifrur roi nabor kwar raryano siryaḇ pdef fa sifarmyan ḇe Yahwe ma sisyom pdef ḇe I. Kebaktian ya ramnai, ”naek srar sya sawos ker roi srower ro munara kebaktian ya.”Naek srar sya sifuken ker, ”Fafisu risai koso munara beradine wer?”​— Ro arsip kobedi ro Amerika Tengah.