1, 2. (a) Rosai ḇefnai fa kofuken: ”Fafisu rosai?” (b) Rosai ḇefnai fa contoh ro manfamyan ḇesouser rofafisu iwara nsambraḇser ko ro kirine?

”FAFISU rosai?” Ineiso roi nabi ḇesouser Yesaya ma Habakuk sufuken na. (Yesaya 6:11; Habakuk 1:2) Rofyor Raja Daud fyas Mazmur ḇeḇe 13, dakfuken kako fakfuken ine kali rifyak. (Mazmur 13:1, 2) Ma rofyor snonkaku ḇekyarḇa sya sores ro Yesus Kristus ris ḇyedi, ifuken si, ”Fafisu rosai?” (Matius 17:17) Rofafisu ine, ko kako imbude nari koḇuk fakfuken ḇemnis radirya.

² Rosai ḇefnai fa kofuken: ”Fafisu rosai?” Imbude fafisu oso kosasarḇa mboi sifrur mnis ko ḇa. Osower ido, snar koduf ḇaido koḇe mansar insar kwar. Imbude koḇekandera snar ’ras ḇepupesna ndama kuker kandera nabor’. (2 Timotius 3:1) Ḇaido rari ḇeḇyeḇa ro snonkaku ḇeḇarek ro ris koḇedi ḇefrur fa kofafayaf ma  koḇesanekar. Rosai monda ḇekur ko, nari kosma samambraḇ rofyor kofawi snar Yahwe imsor manfamyan ḇesouser Ḇyesi ḇa rofafisu iwara snar sifuken radirya.

3. Rosai ḇefnoḇek ko rofyor kosya rofafisu ḇesamswen?

³ Rosai na ḇefnoḇek ko rofyor kosya rofafisu ḇefrur samswen fa kofarmku? Yakobus, Yesus ḇedar pari ḇyedi, ikofenḇair ḇeko, ”Rarirya, naek srar, mkokḇaḇ isof Manseren ryama.” (Yakobus 5:7) Inja, kokame fandun fa koḇe kaḇaḇaḇ. Ḇape, ḇaḇekaḇaḇaḇ ido rosai rirya, ma rariso kofasnaḇair rari ḇepyum ine?

4, 5. (a) Ḇaḇekaḇaḇaḇ ido rosai rirya, ma rariso kofasna koḇekaḇaḇaḇ?(b) Rariso Yakobus fyasnaḇair ḇaḇekaḇaḇaḇ ine? (Mam sonin ro randak artikel ine.)

⁴ Refoya ikofen ḇaḇekaḇaḇaḇ ine ndamuma ro Allah rur ḇesren Ḇyedi. Allah ifnoḇek ko ḇa ido, nari samswen ḇe snonkaku ḇenapesḇa koine fa koḇekaḇaḇaḇ rofafisu ḇesamswen. Ḇaḇekaḇaḇaḇ ima sasuref ḇerama ro Allah I, ma kofasna saswar koḇena faro Yahwe ma snonkaku ḇesesya rofyor kofasnaḇair rari ine. Rofyor koḇekaḇaḇaḇ ḇa, nari saswar ro fandu ko ma snonkaku ḇesesya nasambraḇ werḇa. (1 Korintus 13:4; Galatia 5:22) Rosai ḇefesepen kuker ḇaḇekaḇaḇaḇ? Ine kyurfasna kofarmku pdef rofafisu ḇesamswen ma kona rari ḇenaḇye pdef. (Kolose 1:11; Yakobus 1:3, 4) Ḇaḇekaḇaḇaḇ kako nafnoḇek ko fa kamk nako pdef soasuser koḇena faro Yahwe syadiwer rofyor kosma samswen. Ine nafnoḇek ko fa komunsu ḇa rofyor kosma kandera. Refoya ikofen fandun kaku kowaf kuker marisen. Ineiso farkarkor ḇefandun kosma ro Yakobus 5:7, 8. (Wasya.)

⁵ Rosai ḇefnai fa komarisen kowaf Yahwe ifrurmnis asas ḇyenakam? Manwawan Yakobus ikofen fafisu koḇena namnis manfrudo oso. Imbude ifararur marḇak kwar fa kyaker rokaker ḇyena, ḇape jadi fa fyara cuacana ḇaido sarsur ro rokaker ḇyenaḇa. Fandun fa iwaf kuker kaḇaḇaḇ ’bon ḇeḇemaeja ro yaf ḇyena’. Rarirya kako, roi nabor nasya jadi fa kofara na ḇa, ḇape kowaf monda Yahwe ifrurmnis asas Ḇyena. (Markus 13:32, 33; Farfyar ro Manwawansya [Kisah] 1:7) Imnis raris manfrudo ani, fandun fa kowaf kuker kaḇaḇaḇ.

6. Rosai na kofarkor ro contoh nabi Mikha i?

⁶ Nabi Mikha fyarmku pdef rofafisu ḇesamswen, rarirya kako kuker ko ro baboine. Ikenem rofafisu Raja Ahaz ḇyepoik ya. Ahaz ima raja ḇeḇarḇor kaku. Inja, ro moḇ ani korupsi nabor fafayaḇa. Roi annakam naḇyeḇa syadiwer, inja Refoya ikofen snonkaku sya ”bramin sena nasya ro roi ḇeḇarḇor na.” (Wasya Mikha 7:1-3.) Mikha ifawi jadi fa fyadwer fafisuya ḇa. Inja, rosai nari ifrur ya? Ikofenḇair ḇeko, ”Ḇape aya, nari yamam ker mura ḇe Yahwe I. Nari yafasnai yawaf kuker marisen ḇe Allah manfaspar ayedi. Allah yedi nari ryower aya.” (Mikha 7:7) Imnis raris Mikha i, ko kako fandun fa ”kowaf kuker marisen”.

7. Rosai ḇefnai fa kowaf monda ḇa, ḇape komarisen kowaf Yahwe ifrurmnis asas Ḇyena?

 ⁷ Rofyor kona kakyar raris Mikha ido, nari komarisen fa kowaf Yahwe I. Fafisu koḇena imnis snonkaku oso ḇesun ro bui ḇa, ḇewaf ras samamyai ḇyedi. Kakuya imewer iwaf ras anya ḇa, snaro ifawi ras anya ḇa. Roi ine ḇeḇesebur kaku kuker ko! Komarisen kowaf Yahwe I snar kofawi fafisu ḇepyum, nari ifrurmnis asas Ḇyena fa ḇyuk kankenem fyoro ya! Inja komarisen kowaf ”kuker farmku ma kbaḇ”. (Kolose 1:11, 12) Rofyor kowaf ya, kosasor ko insama kosurem awer faro Yahwe I, snar kokara ifrur roi nakam fasaw ḇa ma kuker payamyum ḇa. Rofyor kofrur rarirya ido, na imarisenḇa.​—Kolose 3:12.

8. Rosai kofarkor ro bin ma snon ḇesouser ḇekenem ro fafisu iwara sya?

⁸ Rosai ḇefnoḇek kofa komarisen syadi fa kowaf ya? Kokarapan kuker bin ma snon ḇesouser ḇekenem ro fafisu iwara sya ḇewaf kuker kaḇaḇaḇ Yahwe ifrurmnis asas Ḇyenakam. (Roma 15:4) Fyor kokara farari ḇepyum sena, ipyum syadiya koswarepen isof fafisu rosai siwaf ya, rosai ḇefnai fa simarisen siwaf, ma rariso Yahwe ḇyebarakas ḇaḇekaḇaḇaḇ sena.

9, 10. Isof fafisu rosai Abraham ma Sara suwaf Yahwe I?

⁹ Kokarapan contoh ro Abraham ma Sara su. Snar sufasnaḇair ”kakyar ma  kaḇaḇaḇ,” inja susma ’rosai sḇeasas farosu.’ Refo ikofenḇair ḇeko rofyor ”Abraham iwaf kuker kaḇaḇaḇ”, Yahwe ḇyeasas nari ḇyebarakas i ma ḇyekma faro er nakam. (Ibrani 6:12, 15) Rosai ḇefnai fandun fa Abraham fyasna kaḇaḇaḇ? Snaro nefandun kaku oras insama asas ani ḇyendarirya. Ro 14 Nisan taun 1943 Masehi baim, Abraham ma Sara fnoḇek kina suḇesyakam simbran ro Warbeki Efrat ma sisun ḇe Sup Ḇaḇeasas. Ḇape, Abraham iwaf taun ri 25 kaker isof romawa ḇyedi Ishak ḇyeḇeaḇen ma taun ri 60 wer isof kpu ḇyesu, Esau ma Yakub suḇeḇeaben.​—Ibrani 11:9.

¹⁰ Abraham daksma warisan ro Sup Ḇaḇeasas ke? Refoya ikofen snar Yahwe ”ḇyuk pusaka faroi ḇa, ma saprop mnuk ono roḇa, ḇape Allah ḇyeasas nari ḇyuk sup ani faroi ma kpu ma up ḇyesi, ḇape ro fafisu ani isma romawa ḇaim.” (Kisah 7:5) Inja, iwaf isof taun ri 430 rofyor imbranuk ro Warbeki Efrat kwar insape up ḇyesya sḇekawasa ḇebarek ro moḇ ani.​—Keluaran 12:40-42; Galatia 3:17.

11. Rosai ḇefnai fa Abraham imarisen iwaf, ma barakas rosai nari ismana snar ḇaḇekaḇaḇaḇ ḇyedi?

¹¹ Abraham imarisen fa iwaf snaro ikyar kaku Yahwe nari ifrur asas Ḇyena. Nya kakakyar faro Yahwe I. (Wasya Ibrani 11:8-12.) Rofafisu Abraham ikenem kaker, myam Allah ifrur asas ḇyenakamḇa raryano, imarisen iwafe. Mboi kwarapan kada, Abraham nari iryaḇ kaku rofyor Allah ḇyawes kaḇeri fa ikenem ro firdaus. Nari imarisen fafayaḇa rofyor iwasya farfyar ro kankenem ḇyeja ma kina ḇyesya ḇeḇefas ro bar bebor ḇero Refoya. * (Mam fas-fas kasun ro sop.) I kako imarisen snar ifawi dakḇe bar ḇefandun kaku ro Yahwe marisen Ḇyedi kuker Mesias ḇeḇeasas kwar ani! Na kokyar kaku ḇyaḇir radirya snar barakas nari ismana.

12, 13. Rosai ḇefnai fandun kaku Yusuf ḇyekaḇaḇaḇ, ma rari ḇepyum rosai fyasnai na?

¹² Abraham up ḇyedi, Yusuf i, imarisen kako fa ḇyekaḇaḇ. Ima sifrur mnis i ḇa kaku. Randakya, ḇedar ḇyesya sḇoḇ i ḇe women rofyor ḇyeumur taun ri 17. Ḇarpurya, siksof imbe denfus tuan ḇyedi swari, inja nafnai fa sisun i ḇe bui. (Kejadian 39:11-20; Mazmur 105:17, 18) Yusuf ima Allah manfamyan ḇesouser Ḇyedi rariryano, isma kandera nabor syadi ro isma barakas. Ḇape taun ri 13 ramnai, nakame nefararwe. Skosae Yusuf i ro bui ma ḇyemanḇepoik ḇesuru ro Masir.​—Kejadian 41:14, 37-43; Kisah 7:9, 10.

¹³ Roi ḇemnisḇa sifrur ḇe Yusuf i nafrur fa sneri iduf ke? Kyara Yahwe iburi kwar ke? Aroḇa. Yusuf iwaf kuker kaḇaḇaḇ. Rosai ḇefnoḇek i ya? Ikyar faro Yahwe I. Ifawi Yahwe iso bena papoik syadi. Bisa kofawina ro rosai ikofen ḇe ḇedar byesya, ”Mkomkak awer, snar ayaiso ḇefadwer Allah I ke? Mkofrur aw ḇeḇyeḇa kwar faro aya. Ḇape, Allah ifrur aw mkoḇena faro ḇaḇenaḇye imnis ifrur ro rasine  insama snonkaku ḇeborsya sisma kankenem.” (Kejadian 50:19, 20) Yusuf ifawi barakas ḇerama ro Yahwe ḇenaḇye fa iwafna.

14, 15. (a) Rosai ḇefnai fa Daud ḇaḇekaḇaḇaḇ ḇyeja nḇuk sneprei ḇeko? (b) Rosai ḇefnoḇek Daud i fa iwaf kuker kaḇaḇaḇ?

¹⁴ Raja Daud i kako isma ḇaḇekandera nabore snar roi ḇemnisḇa sifrur faroi na. Yahwe ryem Daud i fa ḇye raja faro er Israel sya rofyor ḇyeromawa babo kaker. Ḇape Daud iwaf kaker isof taun ri 15 insape ḇyeraja faro er ḇyesya. (2 Samuel 2:3, 4) Rofafisu ḇeḇeso, Daud ifrar ma iyokefbur Raja Saul i, snar imbe myuni. * (Mam fas-fas kasun ro sop.) Ine ḇefnai fa, Daud nya rum noḇa. I kako ḇyarek ro sup ḇese ma ḇyarek kako ro aḇyaḇ ḇero sup ḇeḇeursḇa. Ḇarpurya, Saul imar ro mamamun ya. Ḇape, Daud fandun fa iwaf kaker taun rifik syadiwer insape ḇyepoik ḇe raja faro er Israel sya.​—2 Samuel 5:4, 5.

¹⁵ Rosai ḇefnai fa Daud imarisen iwaf kuker kaḇaḇaḇ? Ḇyuk kankarem ḇeko ro mazmur ḇemnis rofyor ifuken kali rifyak, ”Fafisu rosai?” Doḇe, ”Faro aya, yakyar faro saswar soasuser bedi; iḇye kada sne yedi iryaḇ snar fasaspar ḇerama ro au. Nari yadisen faro Yahwe, snar ḇyuk ḇaḇyak faro aya kwar.” (Mazmur 13:5, 6) Daud ifawi Yahwe iswari ma nari Yahwe isouser rosai ikofen kwar ḇe i na. Kyara rofyor Yahwe ifnoḇek i rofafisu iwara ma myam ḇe ḇarpon fafisu Yahwe nari ipyos kandera ismana. Daud ifawi snar Yahwe nari ḇyuk barakas faro mansei ḇenaḇye fa ḇewaf sya.

16, 17. Rariso Yahwe ma Yesus Kristus suḇuk farari ḇepyum kaku ro ḇaḇewafwaf kuker marisen?

¹⁶ Yahwe dor koḇa fa kofrur roi komarisen kofrur ḇa na. Ima farari beba kaku kuker imarisen fa iwaf. (Wasya 2 Petrus 3:9.) Imnis raris, taun syaran ma syaran naiwara ro yaf Eden, Setan iksof Yahwe ifrur roi ḇeḇyeḇa. Ḇape, Yahwe ”iwaf kuker kaḇaḇaḇ” isof fafisu snonsnon Ḇyeja neḇefasren kwar. Ine nari nun barakas ḇepyum kaku faro mansei ”ḇewaf I ḇesya kwar.”​—Yesaya 30:18; fas-fas kasun ro sop.

¹⁷ Yesus i kako imarisen fa iwafe. Rofyor ikenem ro supswan inebori, fyasna pdef soasuser isof imar. Ro fafisu taun ri 33 ya, ḇyuk farsarser ḇemaeja kaku faro Yahwe I ro nanki. Ḇape, fandun fa iwaf kaker isof 1914 insape ḇyepoik ḇe Raja. (Kisah 2:33-35; Ibrani 10:12, 13) Fafisu ani kawan kaku rariryano, Yesus iwaf kaker isof pupes ro Ḇaḇepapoik Taun Syaran  Oser rofyor Allah ifrur fa darefepen mbroḇ ḇyesikam. (1 Korintus 15:25) Ine iso fafisu ḇekwan kaku fa iwafe. Imbape, barakas nasya faro ḇenaḇye fa ḇewaf sya.

18, 19. Rosai ḇefnoḇek ko fa komarisen kowaf kuker kaḇaḇaḇ?

¹⁸ Kakuḇae, Yahwe imarisen koḇekaḇaḇaḇ, isoine komarisen fa kowaf. Rosai nari ḇefnoḇek ko fa kofrur roi nane? Fandun fa koḇenadi kor Allah rur ḇesren Ḇyedi. Koswarepen, ḇaḇekaḇaḇaḇ ine ndamuma ro Allah rur ḇesren Ḇyedi. (Efesus 3:16; 6:18; 1 Tesalonika 5:17-19) Inja, kor ḇe Yahwe insama ifnoḇek ko fa koḇekaḇaḇaḇ kuker farmku!

¹⁹ Koswarepen kako, rosai ḇefnoḇek Abraham, Yusuf, ma Daud fa skowaf kuker kaḇaḇaḇ isof Yahwe ifrurmnis asas Ḇyena. Skokyar kaku faro Yahwe I. Skara faro mankunsi monda ḇa ma rosai simarisen na. Rofyor kokara kuker roi ḇepyum ḇesnaibos kaku ḇe sko, nari koraryaḇ kaku fa kofasnaḇair komarisen kowaf Yahwe I.

20. Rosai snemuk kunna?

²⁰ Imbude koḇensewar kaku fa kopampum roi ḇedwarek kosmana, ḇape komarisen kun snemuk fa kofasnaḇair ”kowaf Yahwe I.” Fyorno ido, imbude kofuken: ”Fafisu rosai, Sye Yahwe?” (Yesaya 6:11) Ḇape, kuker fafnoḇek ro Allah rur ḇesren Ḇyedi, bisa kofarari nabi Yeremia ma kokofen, ”Yahwe isya ro bar ayedi,” ma ”Iso ḇefnai fa yafasnaḇair nari yawaf I.”​—Ratapan 3:21, 24.