SNAR kokenem ro ’ras ḇepupes’, inja nari kankenem koḇena nsamswen fafayaḇa, rarirya fandun fa kokaḇaḇaḇ syadi wer. (2 Timotius 3:1-5) Snonkaku ḇebor ro ris koḇedi sikḇaḇ ḇa. Sifandun mankunsi, simarisen sfamfaḇri, ma sfarmkuwarek mankunsi ḇa. Inja fandun fa kofuken mankunko, ’Yakḇaḇ ḇa raris snonkaku ḇero ris yedi ke? Koḇekaḇaḇaḇ ima rosairirya kaku? Rosai na yafrur insama yafasnai ḇaḇekaḇaḇaḇ ro moḇ yakenem rai?’

Ro Refo wos ”ḇaḇekaḇaḇaḇ” kyur ḇe rosairiri? Ine kyurfasnai ḇe kobar samswen oso monda ḇa. Snonkaku ḇekaḇaḇaḇ na fyarmkuepen snar nya saneraro, ikyar roi nakam nari napyum syadi wer. Kyara faro fandun mankundi monda ḇa, mboi kyarauser snonkaku ḇesesya sneḇaḇir sena, iba syadi faro snonkaku ḇefrur fa fyafayaf ḇaido ḇefrur pyum i ḇa kako. Ikyar kaku ḇaḇebati ḇyedi kuker si na napyum syadi wer. Iso ḇefnai fa Refo doḇe ḇaḇekaḇaḇaḇ ndramuma ro saswarya. * (Mam fasfas kasun ro sop.) (1 Korintus 13:4) Ḇaḇekaḇaḇaḇ kako ima rurya ’bon ḇyediri’. (Galatia 5:22, 23) Inja, rosai fandun fa kofrur insama koḇekaḇaḇaḇ?

Insama koḇekaḇaḇaḇ, fandun fa koḇenadi kor fafnoḇek ro Yahwe rur ḇesren Ḇyedi, nari ḇyuk faro snonkaku ḇekyar faro I sya. (Lukas 11:13) Rur ima syambraḇ syadi, mboi fandun fa kofrur imnis rosai kor ro nadi koḇena. (Mazmur 86:10, 11) Ine kyurfasnai fandun fa kosewar kaku kofasnai kaḇaḇaḇ ro ras nakam ma ro moḇ kokenem raya. Mboi fyorno ido jadi fa kokaḇaḇaḇ ḇa. Rosai na ḇefnoḇek ko?

Fandun fa kofarkor ma koso nyan ḇepyum kaku ro Yesus i. Rofyor Manwawan Paulus dawos kuker snonkaku ”ḇeḇefrur babo”, kyur kako ḇe ḇaḇekaḇaḇaḇ ya. Danun ḇe ko, ”Saswar-ḇaḇye Kristus ḇyedi ḇyepoik mkosnemna.” (Kolose 3:10, 12, 15) Insama kofrur roi ine ido, fandun fa koso pyum Yesus nyan ḇyena ma kokyar kaku Allah nari ifrur roi nakam ro fafisuya fa namnis. Kona kakakyar ido, rosai monda ḇekur ko ro ris koḇedi, na kokaḇaḇaḇ pdef.​—Yohanes 14:27; 16:33.

Kokame komarisen dunya babo ryama fasaw. Mboi, kofarkor fa kokḇaḇ syadi rofyor kokarauser moḇsa Yahwe ḇyekaḇaḇaḇ faro ko kwar ndraya. Refoya ḇyuk kakakyar ḇe ko, ”[Yahwe] nari isusu asas ḇyedi ḇa, mboi snonkaku ono sisya skara rarirya, ḇape ikḇaḇ faro mko, snar imewer oso ryo, mboi insa snonkaku kam simbror ma skaḇer.” (2 Petrus 3:9) Inja, koswarepen Yahwe ikḇaḇ faro ko kwar kada, nari kakḇaḇ faro snonkaku ḇesesya kako. (Roma 2:4) Ro fafisu sairirya fandun fa koḇekaḇaḇaḇ?

Ro ras ḇe ras, fandun fa kofasnai ḇaḇekaḇaḇaḇ. Imnis raris, fafisu kokara imbe kokofenḇair roi ḇefandun kaku oso ido na kokḇaḇ fa kosunuk famfnom awer fyor snonkaku ḇesesya sawos kaker. (Yakobus 1:19) Na kokḇaḇ kako rofyor oso ifrur fa kofafayaf. Komsor awer, mboi ipyum ya koswarepen moḇsa Yahwe ma Yesus sukḇaḇ faro sasar koḇena rai. Sumam monda faro sasar kasun ḇebor kofrur kwar na ḇa. Mboi, sumam faro rari ḇepyum koḇena ma sukaḇaḇaḇ suḇuk swaf fa kofadwer kenem ḇeḇyeḇa koḇena.​—1 Timotius 1:16; 1 Petrus 3:12.

Fandun fa kokaḇaḇaḇ kako rofyor snonkaku oso doḇe kawos ḇaido kofrur roi ḇesasar kwar. Imbude randak ya kofafayaf ma kawoswarek mankunko. Mboi Wos Refoya ikofenḇair ḇe ko fa kofrur roi ḇesnai ḇese. Doḇe, ”Ipyum syadi ḇekaḇaḇaḇ ḇardibur ro ḇeararer. Fafayaf fasaw awer snar sne ḇefafayaf nḇeḇair ḇe snonkaku ḇenawnower.” (Pengkhotbah 7:8, 9) Inja wos ḇyena namnis kaku ḇa mboi, fandun fa kokaḇaḇaḇ ma kokara resari fyor kofrur roi oso ḇaim. Iso roi Yesus ifrur ya fyor snonkaku ḇese skursof famfnom i.​—Matius 11:19.

Ḇepon syadi sinan sya fandun fa sekaḇaḇaḇ rofyor sifnoḇek romawa sesya fa sfadwer nyan kakara sena ḇaido sḇinkwanbur marisen ḇesasar na. Imnis raris farfyar ro Mattias i, ifarmyan ro Betel ro sup Eropa. Fafisu Mattias ḇyabo kaker, bati ro rumfarkor ḇyesya skoryae i snar kakyar ḇyedi. Randak ya, sinan ḇyesuya sufawi rosai ḇeḇesyana ḇa. Mboi, ḇarpur mura sumam mboi kyorwanan faro rosai ikyar ya. Mattias kmari, Gillis ikofen swarsu fandun fa sukaḇaḇaḇ syadi ro fafisu ine. Mattias ifuken ḇe su fakfuken raris, ”Manseiso Allah I? Rariso kofawi Refo ima Allah Wos Ḇyenairi? Rariso kofawi ine iso roi Allah imarisen insama kofrur na?” Ifuken kmari radine wer, ”Rosai ḇefnai fa kwara sasar aya snar yana kakyar imnis au ḇa?”

Gillis doḇe, ”Fyorno ido romawa nuḇedi fakfuken ḇyena nfasnai masasor. Imsor snari nu ḇa, mboi imsor faro kakaku fyarkor  kwar na. Kyara naiso nafnai samswen faro kenem ḇyedi.” Moḇsa Gillis ifnoḇek romawa ḇyedi rai? ”Yakainus i ḇo nufarfyar kawan kaku.” Fafisu ono, Gillis na ryower monda Mattias i ma ifuken fa ifawi mnis sneḇaḇir ma kakara ḇyedi. Fyorno ido, Gillis ikofenḇair roi oso ḇe romawa ḇyedine ma dor i fa kyara ro ras oso ḇaido syadi ke, insape suyawos roi anya wer. Fafisu ḇesena wer, Gillis dor swaf ras riḇeso fa kyara rosai romawa ḇyedi ikofen na. Snar rasras sufarfyar ker, insape Mattias ifawi mnis fainda ro Yesus marmar ḇyedi ma ifawi Yahwe iswar ko ma nya hak fa ḇyepoik ko. Kmari doḇe, ”Ine nefandun oras, ma fyorno ido nsamswene, mboi fawawas saswar faro Yahwe nasur ro sneri. Swa yedi numarisen snar nukḇaḇ fa nufnoḇek i insama kakaku ya syun ro sneri ma ismai payamyum ro fafisu ḇyabo ya.”

Fafisu Gillis ma swari sufnoḇek romawa suḇedi, sukyar kaku Yahwe nari ifnoḇek su. Gillis doḇe, ”Yakofen ker ḇe Mattias i snar nuswar kaku i, iso ḇefnai fa snari nuḇenadi ḇesya kwar insama Yahwe ifnoḇek i.” Sinan ine sumarisen kaku snar sukaḇaḇaḇ kwar ma sususu ḇa!

Ko kako fandun fa kokaḇaḇaḇ rofyor komamfaduru kina koḇesya ḇaido bati koḇedi ḇeduf ro fafisu swaf kawan kaku. Komam Ellen farfyar ḇyedi * (mam fasfas kasun ro sop), ḇeḇarek ro Eropa kako.

Indokada taun riwar naiwara, Ellen swari iduf rawo ḇye-stroke rarwan risuru eḇedari awuk ḇyena nambran pyum ḇa. Iso ḇefnai fa jadi fa ḇyaḇir marasrisen, saneso, ḇaido saswar ḇa. Ine fafisu ḇesamswen kaku ḇekur Ellen i. Doḇe, ”Fandun fa yakḇaḇ syadi wer ma yaḇenadi sambraḇ. Mnuk yamarisen kaku iso Filipi 4:13, doḇe, ’Ro roi ḇeḇor nakam yaḇarna snar Kristus ḇeḇuk samambraḇ maḇe aya.’” Snar Yahwe samambraḇ ma fafnoḇek ḇyedi, Ellen ipok ḇyar samswen ḇekur i kuker kaḇaḇaḇ.​—Mazmur 62:5, 6.

Kakuḇae, Yahwe mankundi iso ḇefasnai nyan ḇepyum ro ḇaḇekaḇaḇaḇ ya. (2 Petrus 3:15) Kowasya ro Refo kada, Yahwe fyasnai ker ḇyekaḇaḇaḇ kaku. (Nehemia 9:30; Yesaya 30:18) Waswarepen kaker moḇsa Yahwe kyarem Abraham i rai fafisu ifuken ker I ḇekur aw ḇyedi fa myunpres mnu Sodom ani ke? Yahwe isunuk Abraham wos ḇyena ḇa. Ryower kuker kaḇaḇaḇ Abraham fakfuken ma makakwarek ḇyena kam. Ramnai, Yahwe ryower Abraham makakwarek ḇyena ma ḇyuk kakakyar ḇe i, snonkaku ḇenapes risamfur sisya rodiwa ido nari ipok myunpres mnu Sodom ḇa. (Kejadian 18:22-33) Yahwe ryower kuker kaḇaḇaḇ ḇesya kwar, ma imsor fasaw ḇa!

Ḇaḇekaḇaḇaḇ ima rari ḇefandun kaku oso ro kenem ḇebabo fandun fa snonkaku Kristen snana. Kosewar fa koḇekaḇaḇaḇ ido, na kosyowi Yahwe, Kma ḇesaswar koḇedi ma ḇekaḇaḇaḇ. Ma koisya rofandu snonkaku ”snar kakyar ma kaḇaḇaḇ sisma rarwas ro Allah ḇaḇeasas ḇyedi”.​—Ibrani 6:10-12.