1. Komam Yahwe ḇyuk kuker snemura ro?

RO RANDAK kaku, Yahwe ḇyarek ro mankundi. Ḇarpur mura, ḇyuk kankenem ḇe malaikat ro nanki ma snonkaku ro supswan. Yahwe iso ”Allah ḇeaski”, ma imarisen ḇyuk roi ḇepyum. (1 Timotius 1:11, NWT; Yakobus 1:17) Snar Yahwe imarisen insama kakḇeaski kako, inja fyarkor ko fa kofasnai snemura.​—Roma 1:20.

2, 3. (a) Rosai ḇefnai fa na koḇeaski rofyor kofasnai snemura? (b) Rosai nari kofarkor ro artikel ine?

² Allah ifrur snonkaku koine imnis fanin Ḇyedi. (Kejadian 1:27) Ine kyurfasnai Yahwe ifrur ko fa kakna rari-rari ḇepyum Ḇyena. Insama kosmai aski ḇekaku ma barakas ro Yahwe I, fandun fa koso nyan Ḇyena. Fandun fa koswar snonkaku ḇesesya ma koḇuk kuker snemura. (Filipi 2:3, 4; Yakobus 1:5) Rosai ḇefnai ya? Snar moḇ Yahwe ifrur ko ryairi. Koma konapes ḇa, mboi bisa kakfrur raris moḇ  Yahwe ifrur ndraya kuker kakfasnai snemura kako.

³ Kero na kawos farkarkor ḇeḇeso ro Refo ḇekofenḇair rari snemura ine. Nari kofarkor rosai ḇefnai fa Yahwe imarisen rofyor kofasnai snemura. Kofarkor kako rariso snemura nane nafnoḇek ko fa kofrur fararur Yahwe ḇyuk kwar ḇe ko na. Ma rosai ḇefnai fa na koḇeaski rofyor kofasnai snemura. Nari kawos kako rosai ḇefnai fandun fa kofasnai snemura ine ḇesya kwar.

4, 5. Rariso Yahwe ma Yesus sufasnai snemura kwar, ma rosai ḇefnai fandun fa kakfrur rarirya?

⁴ Yahwe dor ko fa koso nyan Ḇyena. Inja, nari imarisen rofyor kofasnai snemura. (Efesus 5:1) Yahwe imarisen kako insama snonkaku sya sḇeaski. Ine kofawi na ro moḇ ifrur ko kuker nyan ḇepyum kaku. Ifrur supswan ine ipduk kaku ma roi ḇebor kam ḇero dori na faro ko. (Mazmur 104:24; 139:13-16) Inja, kosewar fa kofrur snonkaku ḇesesya simarisen ido, ima koḇesyowi Yahwe I.

⁵ Kakso Yesus nyan ḇyena kako, ima fyasnai nyan ḇepyum kuker rariso snonkaku sya sfasnai snemura rai. Doḇe, ”Rumkon Snonkaku ryama insa suf farmyan i ḇa, mḇoi insa duf farmyan ma insa ḇyuk kankenem ḇyedi fa ḇyukḇak namuk kawasa ḇeḇor.” (Matius 20:28) Manwawan Paulus danun ḇe snonkaku Kristen sya fa sakna ’swaruser ma sḇaḇir raris Yesus Kristus kako . . . Ryir nakam kwar ma ḇyeimnis mankundi raris manfyan oso’. (Filipi 2:5, 7) Inja, iḇye fa kofuken mankunko, ’Bisa yaso pyum syadi Yesus nyan ḇyena wer ke?’​—Wasya 1 Petrus 2:21.

6. Farkarkor risai Yesus ḇyuk ḇe ko ro farfyar ḇekur ḇe snon Samaria anya? (Mam sonin ro randak artikel ine.)

⁶ Yahwe imarisen rofyor koso pyum nyan Ḇyena ma Yesus i. Kofrur na kuker kofasnai saswar ḇe snonkaku sya ma kosewar nyan fa kofnoḇek si. Yesus doḇe roi inema ḇyefandun kaku kuker fyawar farfyar ḇekur ḇe snon Samaria ḇefrur pyum. (Wasya Lukas 10:29-37.) Fyarkor manfamyan ḇyansi fa sifnoḇek snonkaku ḇesesya, smamfarfir awer mansei monda ḇaido moḇ srama ya. Waswarepen rosai ḇefnai fa Yesus fyar farfyar anna ke? Iso snar snon Yahudi oso ifuken i ḇo doḇe, ”Rarirya ido min ayesya siso?” Yesus kankarem ḇyena nfarkor ko fa komarisen kofrur Yahwe imarisen ido, fandun fa kofasnai snemura raris snon Samaria ani.

7. Rariso kokyar Yahwe nyan Ḇyena naiso nyan ḇepyum syadi ya?

⁷ Roi ḇese wer fandun fa kofasnai snemura iso snar rosai ḇeḇejadi ro yaf Eden. Setan doḇe nari Adam ma Eva susmai aski syadi rofyor susouser Yahwe I ḇa kada, ma sukara fandun mankun suḇena monda. Eva fyandun mankundi ma imarisen dakmnis Allah. Adam fyandun mankundi ma ifrur marisen syadi Eva i mboi Allah I ḇa. (Kejadian 3:4-6) Roi nane nafnai roi ḇemun. Nasnai kaku kwar, osoḇaḇeri na ḇyeaski rofyor fyandun mankundi. Mboi kofandun mankunko ḇa ma kofasnai snemura ido, ima kokyar Yahwe nyan Ḇyena naiso nyan ḇepyum syadi.

8. Rosai ḇefnai fandun fa Adam ma Eva sukara snonkaku ḇesesya?

⁸ Adam ma Eva suyemir ḇeḇarek ro yaf Eden, mboi fandun fa sukara snonkaku ḇesesya. Rosai ḇefnai ya? Yahwe ḇyuk fararur ḇe su kwar fa sukapar romawa insama sibor ro supswan ma sufrur na ḇe firdaus. (Kejadian 1:28) Ipyum ya iso Adam ma Eva sumarisen romawa suḇesya sismai aski ro fafisu iyama, imnis Yahwe imarisen snonkaku syakam sismai aski ndraya. Sikam na sifararur kayam fa sifrur supswan ine ḇesiper ḇe firdaus. Inema fararur ḇefarfnak risyaḇa!

9. Rosai ḇefnai fa snonkaku sya nari simarisen kaku fyor sifrur supswan ine ḇe firdaus?

⁹ Snonkaku ḇemnis kaku sya kako fandun fa sifararur kayam kuker Yahwe I fa sifrur supswan ine ḇe firdaus ma marisen Ḇyena fa ndarirya. Rarirya kada, nari sisun ro Allah ras mananai Ḇyedi. (Ibrani 4:11) Kokarapan kada, fararur ine nari nun marasrisen ma raryaḇ ḇeba kaku! Yahwe nari ḇyuk barakas nabor ḇe si snar sifandun mankunsi ḇa ma siswar snonkaku ḇesesya.

10, 11. Rosai na ḇefnoḇek ko fa koḇaryas ma kofarkor snonkaku sya?

¹⁰ Baboine, Yahwe ḇyuk fararur ḇepyum kaku fa kofrur na. Isoine koḇaryas ma kofarkor snonkaku sya. Koswar  kaku snonkaku sya kada, bisa kofrur fararur ine. Ḇekaku ya, na kofrur fararur ine pdef fyor roi ḇekaku nadif kosnesna isoine koswar Yahwe I ma snonkaku sya.

¹¹ Paulus doḇe mankundi ma snonkaku Kristen ḇesesya ḇero abad randak sima ’snonkaku ḇefararur kayam fnoḇek Allah’ snaro sḇaryas ma sfakor kakaku ḇe snonkaku sya. (1 Korintus 3:6, 9) Baboine, na kakfararur kayam fnoḇek Allah kuker koḇuk oras, samambraḇ, ma nana koḇena faro fararur ḇaḇeḇaryas. Inema syowi ḇeba kaku nairi!

12, 13. Barakas risai monda na kosmai snar kofarkor snonkaku sya?

¹² Kofasnai snemura kuker koḇuk oras ma samambraḇ koḇena fa koḇaryas ma kofarkor snonkaku sya, nari nun raryaḇ ḇeba kaku ḇe ko. Naek srar ḇebor sakḇaḇir roi ine kwar fyor sḇuk farkarkor Refo. Komarisen kaku rofyor komam ḇefakor Refo kuker konsya siryaḇ fyor sifawi pyum rosai Refo ikofen na, sna kakyar ḇekaku, sifadwer kenem sena, ma sfawar ḇe ḇesesya roi sfarkor kwar na. Yesus i kako imarisen kaku fyor manḇaryas ri 70 iwan kwar ansi ”skaḇer kuker raryaḇ” snar sismai bon ḇepyum.​—Lukas 10:17-21.

¹³ Naek srar koḇesi ro supswan ḇesiper ine siryaḇ kaku fyor smam rariso anun ro Refo nafnoḇek snonkaku sya fa sfadwer kenem sena. Raris imbesrar ḇeḇabo oso ḇenir ḇe Anna, imarisen ifrur nabor syadi wer faro Yahwe I. * (Mam fasfas kasun ro sop.) Inja, ryaḇe moḇ oso ḇefandun syadi manḇaryas ḇero sup Eropa Timur. Fyas ḇo doḇe, ”Snonkaku sibor simarisen sfarkor Refo. Yamarisen kaku yafarmyan rodine. Rofyor yabur, yana swaf fa yakara fandun mankun yena ḇaḇeri. Yakaraker samswen ma makakwarek ro ḇefarkor Refo kuker ayansya. Yasewar nyan fa yasambraḇser si ma yafnoḇek si. Nane nafrur fa yakyar snar ’koḇuk ido na koḇeaski syadi ḇardibur ro kosmai ya.’”​—Farfyar 20:35, NWT.

14. Rariso na wasmai aski pdef fafisu snonkaku sya simewer srower?

¹⁴ Snonkaku sya simewer srower ko rofyor koḇaryas ido, na kosmai aski pdef ro ḇaḇeḇaryas snar koḇuk swaf ḇe si fa srower ankankinem ḇeḇye ya. Yahwe imarisen kakfrur raris rosai dor ḇe Yehezkiel i. Doḇe, ”Srower ke roḇa ke, fandun fa wakofenbadir wos Yenane faro si.” (Yehezkiel 2:7; Yesaya 43:10) Inja, snonkaku sya srower ke roḇa, Yahwe ḇyesyowi sasewar koḇena. (Wasya Ibrani 6:10.) Naek oso fyar fararmyan ḇyena ḇo doḇe, ”Koker ma koruḇ kwar, ma koḇenadi insama na Yahwe ifrur marisen sena faro wos ḇyena nasure.”​—1 Korintus 3:6.

15. Rofyor snonkaku sya sfasnai syowi ḇa kako, fandun fa kofasnai snemura ke? Fasnaiḇairpan.

¹⁵ Yesus imarisen insama kakfasnai snemura snar ine nari nun aski ḇe ko. Kofasnai snemura ido, nari snonkaku ḇebor sakfasnai snemura kako. Iso ḇefnai fa Yesus danun ḇe ko, ”Mkoḇuk kada nari smunsu faro mko: warnkyara ḇeḇye oso, skukira ifyos, ma sisas i isof isbawer ma ḇesbawer anna nari sisbawer na ro farandan bedi. Snar warnkyara mkoḇuki kyaraya, nari ssḇuki kyara mko kako.” (Lukas 6:38) Kakuḇae, fyor kofasnai snemura, na snonkaku syakam ḇa ḇesyowi na. Rarirya ido, kofrur na ḇesya kwar. Kokyar kaku fyor kofasnai snemura, nari nun roi ḇepyum nabore.

16. Faro mansei fandun fa kofasnai snemura, ma rosai ḇefnai ya?

¹⁶ Snonkaku ḇefasnai snemura kuker sisnesna ḇesiper, nari sḇuk ḇo sor ḇakḇuk kaḇer ḇa. Yesus doḇe, ”Rofyor wafrur munara ido, pos snonkaku ḇesaḇarar, ma ḇeḇeroro, ḇepapipen ma snonkaku ḇeprafsya. Nari wasma aski, snar snonkaku ansya sisma roi ono fa sḇukḇak frurpyum benaḇa.” (Lukas 14:13, 14) Refo ikofen kako, ”Snonkaku ḇena snemura nari ismai barakas”, ma ”Aski faro mansei ḇemamfaduru snonkaku ḇena royoḇa.” (Amsal 22:9; Mazmur 41:1) Fandun fa kofasnai snemura snar komarisen kaku fa kofnoḇek snonkaku ḇesesya.

17. Roi risai monda koḇuk insama nun aski ḇe ko?

¹⁷ Rofyor Paulus dap kaḇer Yesus wos ḇyena ”koḇuk ido na koḇeaski syadi ḇardibur ro kosmai ya”, ine kyurfasnai koḇuk nana koḇena monda ḇa. Bisa  koḇuk kako wos samarawraw, ananun ro Refo, ma fafnoḇek ḇepyan. (Farfyar 20:31-35) Ro rosai Paulus ikofen ma ifrur na, fyarkor ko fandun kaku fa kofasnai snemura kuker koḇuk oras, samambraḇ, kakara, ma saswar koḇena.

18. Snonkaku ḇemamkarkir sya rosai sikofen ḇekur ḇe snonkaku ḇefasnai snemura sya?

¹⁸ Snonkaku ḇemamkarkir ḇefarkor pyum kenem ro snonkaku sya kako, soḇe snonkaku sya nari sḇeaski fyor sḇuk ḇe ḇesesya. Artikel oso ikofen ḇo doḇe snonkaku sya soḇe sna aski kaku rofyor sifrur roi ḇepyum faro ḇesesya. Ḇemamkarkir ansya soḇe kofnoḇek ḇesesya ido, nari koḇaḇir kankenem koḇenane nefainda syadi wer. Inja, sanun ḇo soḇe snonkaku sya sifnoḇek ḇesesya kuker sne ḇemarisen ido, na ḇaken sena naprei ma seaski syadi. Kakuḇae, na kokandor faro rosai sikofen na ḇa, snar Manḇedaw ḇesaswar koḇedi, Yahwe I, ikofen kwar snar koḇuk ido nari komarisen.​—2 Timotius 3:16, 17.

19, 20. Rosai ḇefnai fa wamarisen wafasnai snemura?

¹⁹ Snar snonkaku ḇero ris koḇedi siswar mankunsi ḇardi, ine nafrur samswen ko fa kofasnai snemura ya ḇesya kwar. Mboi, Yesus ḇyuk swarapepen ḇe ko sasoser risuru ḇepon syadi isoine koswar Yahwe I kuker sne, kankenem, kakara, ma samambraḇ koḇena ḇesiper, ma koswar min koḇesi raris koswar mankunko. (Markus 12:28-31) Kofarkor ro artikel ine kwar, snonkaku ḇeswar Yahwe I nari siso nyan Ḇyena. Yahwe ma Yesus sufasnai snemura. Sukofenḇair ḇe ko fa kakfrur raris su snar sufawi nane nun aski kaku ḇe ko. Koisya kofasnai snemura ro rosai kofrur faro Allah ma min koḇansi ido, na koḇesyowi Yahwe I ma nari nun fainda faro ko ma ḇesesya.

²⁰ Kakuḇae, Ausya swewar fa wafasnai snemura ma wafnoḇek snonkaku ḇesesya kwar, iḇye syadi ḇe naek srar Besi. (Galatia 6:10) Mboi wafrur na ḇesya kwar ido, nari snonkaku sya sesyowi ma siswar Au, ma nari ḇeaski syadi. Refo doḇe, ”Snonkaku ḇena snemura nari ḇyesaḇarar ḇa, ma manseirya wer ḇeḇuk sneprei snonkaku ḇesesya nari mankundi ismai sneprei.” (Amsal 11:25) Ro kankenem ma ḇaḇeḇaryas koḇena, na kofasnai ro nyan ḇebor kofandun mankunko ḇa, kofrur pyum ma kofasnai snemura. Rwama kawos nyan ḇeḇeso nane ro artikel ḇerama ya.