1. Ro nyan risai monda na kofararur kayam fnoḇek Yahwe I?

FAFISU Yahwe ifrur snonkaku sya, imarisen insama sfararur kayam fnoḇek I. Snonkaku ḇero baboine sinapes ḇa, mboi faro ḇesouser sya na bisa sifararur kayam fnoḇek Yahwe I ras nakam. Imnis raris, rofyor koḇaryas ankankinem ḇeḇye Karajan ma koḇuk farkor, koma ”min ḇefararur kayam fnoḇek Allah” siko. (1 Korintus 3:5-9) Ine iso syowi ḇeba kaku snar Manḇedaw ḇepoik syadi kyinfir ko kwar fa kofrur fararur ḇefandun kaku ine! Ḇape, kofararur kayam fnoḇek Yahwe I ro fararur ḇaḇeḇaryas monda ḇa. Ro artikel ine, nari kawos nyan ḇesena wer isoine: kofnoḇek kina koḇesi ma naek srar ḇero sidang, kofrur pyum snonkaku ḇesesya, kofnoḇek fararur Organisasi ro supswan ḇesiper, ma kofrur nabor syadi wer ro fararmyan koḇena ḇe Yahwe I.​—Kolose 3:23.

2. Rosai ḇefnai fa kopok komam awer rosai kofrur na kuker rosai snonkaku ḇese sifrur faro Yahwe I?

² Rofyor kawos artikel ine, fandun fa koswarepen koinema komnis kam ḇa. Umur koḇena, pararei, kenem koḇena,  ma samambraḇ koḇena neḇesisye. Inja, kopok komam awer rosai kofrur na kuker rosai snonkaku ḇese sifrur faro Yahwe I. Manwawan Paulus doḇe, ”Iḇye syadi snonkaku oser-oser imnasen mankundi resari ro kankenem ḇyedi; insape imsik mankundi, mboi myam awer faro kankenem snonkaku ḇese.”​—Galatia 6:4.

3. Rosai ḇefnai fa komamfaduru kina koḇesi ima kofararur kayam fnoḇek Allah I?

³ Yahwe dor ko fa komamfaduru kina koḇesya. Raris, fandun fa kosewar pipi fa kafamfon fandun ro kina koḇesi. Ḇar bin ḇebor sya skain ro rum fa sfaduru roma mkun sesya. Ma rofyor sinan koḇesya sisambraḇ werḇa kwar, na komamfaduru si. Naiso roi ḇefandun kaku nairi. Refoya doḇe, ”Ḇape rofyor snon oso fyaduru kawasa ro keret ḇyedi ḇa, isyadi wer kina mankundi ḇyesi, snon ani [ryirbur kakyar ya ma] iḇyeḇa syadi ro snonkaku ḇekyar ḇasya.” (1 Timotius 5:8) Nwa fakamamar ro kina Bedi ido, imbude na jadi fa wafrur nabor faro Yahwe I imnis marisen Bena ḇa. Mboi, wafafko awer! Yahwe na imarisen kaku rofyor mamfaduru kina Bedi.​—1 Korintus 10:31.

4. Rariso sinan sya sfakapon fandandun Karajan rai, ma rosai bon ya?

⁴ Sinan Kristen sya na sifararur kayam fnoḇek Yahwe I kuker sifnoḇek romawa sesya fa sakfarmyan ḇe Yahwe I. Sinan ḇeḇor sya sifrur roi ine kwar. Bon ya, roma inai sesya sun snemuk fa sakfarmyan ḇe Yahwe I ro oras nakam, iba syadi sifarmyan ro moḇ ḇeḇinkwan. Ono sisya sḇe misionaris, ḇesesya sakḇe perintis ro moḇ ḇefandun syadi manḇaryas, ma ḇesesya wer sifarmyan ro Betel. Kakuḇae, rofyor romawa sesya sraḇe moḇ ḇeḇinkwan kaku, na sinan sya sna swaf nabor fa skainus si ḇa. Sifandun mankunsi ḇa ḇoi sisambraḇser romawa sesya fa sakfarmyan pdef ḇe Yahwe I ro moḇ sisya roro ya. Rosai ḇefnai ya? Snar simarisen kaku smam romawa sesya sfakapon Yahwe ro kankenem sena. (3 Yohanes 4) Sinan ḇebor sya sḇaḇir raris Hana i, doḇe ’ḇyuk’ roma ḇyedi Samuel i ḇe Yahwe I. Skara ima syowi ḇeba kaku fa sifararur kayam fnoḇek Yahwe I roro nyan ine.​—1 Samuel 1:28.

5. Rariso na wafnoḇek naek srar ḇero sidang Bedi rai? (Mam sonin ro randak artikel ine.)

⁵ Nwa fakamamar ro kina Bedi ḇa ido, bisa wafnoḇek pyan naek srar ḇeduf, ḇesinan kwar ḇaido ḇena fandun ḇese ke? Oroḇa ido buk fafnoḇek faro ḇemamfaduru si ke? Mam ro sidang Bedi kada, mansei ḇefandun fafnoḇek ḇeradineni. Imnis raris, imbude imbesrar oso isya myamfaduru sinan ḇyesu ḇesinan kwar. Bisa swewar swaf fa kwainus sinan ḇyesuya insama myam fandun ḇesena ke? Ḇaido imbude bisa wun pyan snonkaku oso fa dakso fananjur ke, kwoḇes pyan roi fyandun na ke, ḇaido mamfar snonkaku oso ro rumḇeduf. Wafrur rarirya ido, imbude na wafararur kayam fnoḇek Yahwe I fa kyarem nadi ro snonkaku oso.​—Wasya 1 Korintus 10:24.

6. Rariso kofrur pyum snonkaku ḇesesya rai?

⁶ Min ḇefararur kayam fnoḇek Allah, nari sifrur pyum snonkaku sya. Ro Refo,  wos Yunani faro ”mkoḇuk moḇ ḇeḇeryar faro snonkaku” kyur ḇe ”frur pyum faro mandaman sya”. (Ibrani 13:2) Bisa kowasya farfyar ḇero Refo ḇeḇuk farkarkor ḇe ko rariso kofrur pyum snonkaku ḇesesya rai. (Kejadian 18:1-5) Sima ’min koḇesi ḇena kakyar oser’ ke roḇa, fandun fa kofnoḇek ḇesesya rofyor kona swaf fa kofrur na.​—Galatia 6:10.

7. Fainda risai monda na kosmai snar kofrur pyum naek srar ḇefarmyan ro oras nakam sya?

⁷ Bisa kofararur kayam fnoḇek Yahwe I kuker kofrur pyum naek srar ḇefarmyan ro oras nakam ḇefandun moḇ fa sḇarek ro na ke? (Wasya 3 Yohanes 5, 8.) Kofrur pyum si ido, nari sismai fainda ma ko kako. Refo doḇe na ”kosonemyaeko”. (Roma 1:11, 12) Kwarapan Olaf farfyar ḇyedi. Rofyor ḇyabo kaker, pengawas wilayah ḇefarḇuk ḇaim oso ryama ḇe sidang ḇyedi ma fyandun moḇ fa ḇyarek ro na. Mboi naek srar oso jadi fa sifnoḇek i ḇa. Inja, Olaf dor sinan ḇyansu ḇeḇe Saksi ḇa insama pengawas wilayah ani ḇyarek ro rum skoḇeja. Sumarisen mboi suyoḇe nari Olaf denef ro sofa monda. Olaf ifrur radiri, ma fyafko ḇaḇeri. Snar ro swaf minggu oser ismai fafisu ḇepyum kuker pengawas wilayah ani! Arwo nakam suyawos roi ḇepyum fyor sunan kayame. Pengawas wilayah ani syambraḇser kaku Olaf i, inja dun snemuk fa dakfarmyan ḇe Yahwe I ro oras nakam. Ro swaf taun ri 40, Olaf fyarmyan ḇe misionaris ro sup ḇeba ḇeḇeso.

8. Rosai ḇefnai fandun fa kofrur pyum pdef, iba syadi wer fyor snonkaku ḇesesya sesyowi na ḇa ro randak ya? Fawar farfyar oso.

⁸ Bisa kofasnai saswar faro mandaman sya roro nyan ḇebor, iba syadi fyor snonkaku ḇesesya sesyowi na ḇa ro randak ya. Imnis raris, imbesrar oso ro Spanyol fyarkor Refo kuker Yesica, bin ḇeramaker Ekuador. Ras oso fyor sufarkor, Yesica kyanes saneso. Inja imbesrar ani ifuken i. Yesica doḇe fyor ryama ḇe Spanyol ḇaim, nya roi oḇaḇeri. Ras oso ismai roḇean fa ḇyuk ḇe inai ḇyedi ḇa, mboi war monda. Yesica ḇyenadi dor fafnoḇek rofyor isrer kapira ḇyedi fa denef. Fyoro ḇa mura, imbesrar Saksi risuru surama ḇe Yesica ma suḇuk majalah ḇe i. Mboi pyampum na ma byuk kaḇer majalah ani ḇo doḇe, ”Ine iso roḇean mumarisen fa yaḇuk ḇe inai yedine ke?” Imbesrar ansuya susewar fa suḇuk wos sneprei ḇe i, mboi Yesica imewer ryowernandi. Ḇarpur mura, imbesrar ansuya surir inawen ḇeser roḇean ro kedwa ḇarpon ya. Fafisu ine, rofyor fyarkor ya, kyanes kaku snar ifawi pyampum Yahwe kankarem ḇyena faro nadi ḇyena kwar. Mboi Yesica dun snemuk kwar fa ifarmyan ḇe Yahwe I. Nasnai kaku,  snemura ro imbesrar ansuya nun bon ḇepyum.​—Pengkhotbah 11:1, 6.

9, 10. (a) Ro swaf risai monda snonkaku Israel ḇero fafisu naiwara sḇuk fafnoḇek? (b) Ro nyan risai monda bar naek ḇero baboine sifnoḇek sidang ya?

⁹ Snonkaku Israel ro fafisu naiwara, sna swaf nabor fa sḇuk fafnoḇek. (Keluaran 36:2; 1 Tawarikh 29:5; Nehemia 11:2) Koro baboine kako, kona swaf fa koḇuk oras, nana arasai, ma ḇaḇekir koḇena fa kofnoḇek naek srar sya. Kofrur na ido, na komarisen kaku ma Yahwe nari ḇyebarakas ko.

¹⁰ Refo danun ḇe bar snon ḇero sidang sya insama sifararur kayam fnoḇek Yahwe kuker suffarmyan ḇe hamba pelayanan ma penatua. (1 Timotius 3:1, 8, 9; 1 Petrus 5:2, 3) Ḇeyuffarmyan ansine simarisen sḇuk fafnoḇek ḇepyan ḇe ḇesesya, ma ro ḇaḇesamsyom sena kako. (Farfyar 6:1-4) Fafisu ono penatua sya sor Au fa wafararur ḇe tata tertib ro fananjur ya, fasos publikasi na, fasos moḇ fa sḇaryas ro na, mamfaduru Balai, ḇaido roi ḇesena ke? Naek ḇefnoḇek ro fararur nane soḇe sismai raryaḇ ḇeba kaku.

11. Fainda risai monda imbesrar oso ismai ro fararur ḇaḇawes ya?

¹¹ Ḇemarisen ḇefnoḇek ro fararur ḇaḇawes sya fyorno ido sismai bati ḇebabo. Imbesrar ḇenir ḇe Margie fyararur ro ḇaḇawes Balai Karajan ro swaf taun ri 18 kwar. Ro fararur anya, myam faro imbesrar ḇebabo sya ma fyarkor si. Doḇe inema nyan ḇepyum kaku faro ḇefararur sya fa sisambraḇseryae si. (Roma 1:12) Rofyor ismai fafisu ḇesamswen, bati isrow ro fararur  anane sisambraḇser i. Fafisu oso wakfnoḇek ro fararur ḇaḇawes ya kwar ke? Wasmai ḇaḇekir oso ḇa kako bisa wakofenḇair fa wakso ro fararur ḇaḇawes kako.

12. Moḇsariso na buk fafnoḇek faro naek srar ḇesmai susa snar rim ḇeba?

¹² Ko kako bisa kofararur kayam fnoḇek Yahwe kuker kofnoḇek naek srar ḇesmai susa snar rim ḇeba. Imnis raris, na koḇuk kumpan koḇena. (Yohanes 13:34, 35; Farfyar 11:27-30) Nyan ḇese fa kofnoḇek si iso kuker kofrur sren ḇaido kofrur rum sena fa namnis kaḇer. Gabriela, imbesrar oso ro Polandia, fabruḇ ya ifnak kaku rum ḇyeja. Imarisen kaku fyor myam naek srar ḇero sidang ḇefanam sya srama sifnoḇek i. Rofyor iswarepen muraḇe fafisu anya, doḇe kyara ḇaḇeri ḇe roiebor ḇyena ḇepromes kwar anna, mboi kyara monda faro rosai ismai na. Doḇe, ”Roi yasmai nane nbuk kakakyar ḇe aya, koro sidang Kristen ima syowi ḇeba kaku, ma ḇyuk kako raryaḇ ma aski.” Snonkaku ḇebor ḇeyaksmai fafnoḇek fyor rim ḇeba nkur si, sakkofen roi ḇemnis kako. Ma ḇeḇuk fafnoḇek sya kako sismai aski ma doryaḇ.​—Wasya Farfyar 20:35; 2 Korintus 9:6, 7.

13. Rariso kosambraḇser saswar koḇena faro Yahwe I rofyor kofnoḇek naek srar ḇemandaman sya? Fasnaiḇairpan.

¹³ Imbesrar oso ḇenir ḇe Stephanie ma manḇaryas ḇese ḇero moḇ ḇyedi, sifararur kayam fnoḇek Yahwe I fa sifnoḇek Saksi ḇefrarbur sup sena ḇe Amerika Serikat snar mamamun. Sifnoḇek mandaman ansine fa sismai rum ma roieḇor sifandun na. Doḇe, ”Nkosnesna naprei kaku snar nkomam raryaḇ ma syowi sfasnai faro saswar mambekanaek ro supswan ḇesiper. Skara nkoiso ḇefnoḇek si, mboi ḇekaku ya siso ḇefnoḇek nko kaku. Saswar, ḇaḇeoser, ma kakyar faro Yahwe nsambraḇser saswar nkoḇena faro Yahwe I, ma nafrur fa nkoḇesyowi kaku roi nkosmai nakam ro Organisasi Ḇyedi.”

14, 15. (a) Nyan kakara ḇemnis rariso Nabi Yesaya nyana? (b) Rariso snonkaku Kristen sna kakara raris Yesaya i?

¹⁴ Wamarisen wafrur nabor syadi fa wafararur kayam fnoḇek Yahwe I ke? Wamarisen wafarmyan ro moḇ ḇefandun syadi manḇaryas ke? Kakuḇae, kofarmyan ḇe Yahwe ima fandun fa koraḇe moḇ ḇeḇinkwan monda ḇa. Mboi naek srar sino sisya sna swaf fa sifrur na. Sna  kakara raris nabi Yesaya i. Rofyor Yahwe ifuken i, ”Manseiso nari yawan i, ma mansei nari ḇeramura faro nko?” kyarem ḇo doḇe, ”Aya isoine! Wawan aya!” (Yesaya 6:8) Wamarisen ma nwa swaf fa wafnoḇek Yahwe organisasi Ḇyedi ke? Na wafnoḇek kuker nyan risai monda?

¹⁵ Yesus dawosḇair fararur ḇaḇeḇaryas ma ḇyuk farkarkor fyor ikofen, ”Fafisu afufya imnis kwar, ḇoi yaf ya ibabo ḇeyinek sya sibor ḇa. Inja mkor faro tuan ḇena afuf ya, insa fyarem ḇeyinek sya sibor faro afuf ani.” (Matius 9:37, 38) Bisa wakfarmyan ḇe perintis ro moḇ ḇefandun syadi manḇaryas ke? Ḇaido bisa wafnoḇek snonkaku ḇese fa ifrur na ke? Naek ma srar ḇebor sya sḇaḇir nyan ḇepyum kaku fa sifasnai saswar faro Allah ma min sesya iso sakḇe perintis ro moḇ ḇefandun syadi manḇaryas sya. Kwara nyan ḇesena wer fa wafrur nabor syadi ro fararmyan Bena ke? Wafrur rarirya ido, na ḇeaski syadi.

16, 17. Kuker nyan risai monda bisa wafrur nabor syadi ro fararmyan Bena ḇe Yahwe I?

¹⁶ Wamarisen fa wafarmyan ro Betel ḇaido wafnoḇek ro fararur ḇaḇawes ro swaf oso, ras oser ḇaido syadi ro swaf minggu oser ke? Yahwe Organisasi Ḇyedi fyandun ker snonkaku ḇemarisen ḇefarmyan ro moḇ sairirya kam. Imbude sḇekir syadi kwar ro fararur oso ḇese mboi simarisen sifrur rosai monda sor ḇe si. Yahwe ḇyesyowi kaku snonkaku ḇemarisen ḇeḇuk kankenem sena ma sfarmyan ro moḇ sairirya kam ḇefandun ya.​—Mazmur 110:3.

¹⁷ Wamarisen wasmai farkarkor nabor wer insama wafrur nabor syadi ro fararmyan ḇe Yahwe I ke? Imbude waser formulir fa wakso Sekolah bagi Penginjil Kerajaan. Farkarkor ine fyarkor naek srar ḇemas kwar ḇefarmyan ro oras nakam insama sifrur nabor syadi faro Yahwe organisasi Ḇyedi. Ḇeyakso ro farkarkor ine sya, fandun fa simarisen sifarmyan ro moḇ risai monda siwan si fa sra yoḇ na. Wakmarisen wafrur nabor syadi wer ro fararmyan Bena ḇe Yahwe I roro nyan ine ke?​—1 Korintus 9:23.

18. Fainda rosai na kosmai snar kofararur kayam fnoḇek Yahwe I ro ras nakam?

¹⁸ Snar koinema Yahwe kawasa Ḇyesiko, na kofasnai snemura, frur pyum, ḇaḇenaḇye, ma saswar. Koswar snonkaku ḇese ro ras nakam. Ine nun raryaḇ, aski, ma marisen ḇe ko. (Galatia 5:22, 23) Fafisu rosai monda wasmai na, na ḇeaski ḇesya kwar rofyor wakfrur raris Yahwe moḇ fyasnai snemura ma wafararur kayam fnoḇek I!​—Amsal 3:9, 10.