Rosai ḇefnai fa manseirya wer ipok fa ryir awer publikasi ro Saksi Yahwe ro situs web ḇaido media sosial ḇesena?

Sino sisya skara snar koḇuk publikasi koḇena kuker ḇaḇyak ḇa inja bisa se-copy ḇaido srir na ro situs web ḇaido media sosial ḇesena. Mboi ine nafnai samswen ḇeba ma namnis ḇa kuker Fasnai Babe Fararur * (mam fasfas kasun ro sop) faro situs web koḇedi. Ro Fasnai Babe Fararur sikofenḇairbos kwar snonkaku osoḇaḇeri na ryir ”sonin, publikasi ḇeḇe elektronik, merek dagang [trademark], musik, foto, vidio, ḇaido artikel ḇero situs web ine ro Internet (situs web, situs file-sharing, situs video-sharing, ḇaido jejaring sosial rosairirya kam).” Rosai ḇefnai ya?

Roi nakam ḇero situs web koḇedine sna hak cipta, hukum nekadaunwarek na.Ine fyandun kaku insama snonkaku sya sḇuk sasar awer na. Snonkaku ḇebur kakaku ma snonkaku ḇembroḇ konsya na srir publikasi koḇena ro situs web sena insama sawninyan Saksi Yahwe ma snonkaku ḇesesya. Ḇape roi srir ro situs ḇeradirya sifrur na fa nekorwanan kakara snonkaku sya. (Mazmur 26:4; Amsal 22:5) Ḇesesya wer sḇuk roi ḇero jw.org faro iklan na, aplikasi elektronik, ma roi sḇoḇ na. Mboi snar logo jw.org koḇedi ma roi ḇero dona kam sna hak cipta, inja na bisa kun ḇeḇuk sasar na ḇe kankain karkara. (Amsal 27:12) Mboi komam monda snonkaku sya, iba syadi naek srar koḇesi fa srir publikasi ro situs web ḇesena ḇaido sḇuk logo jw.org fa sḇoḇ roiebor koḇena ido na ḇero kankain karkara sya sifnoḇek ko ḇa.

Koḇe-download publikasi koḇena ro situs web ḇesena mboi ro jw.org ḇa ido na nun samswen ḇe ko. Yahwe ḇyuk monda roḇean rur ḇe ko roro ’manfamyan ḇeḇesyowi ma ḇefawi nananem’. (Matius 24:45) ’Manfamyan’ ani ḇyuk monda situs web ḇekaku fa fyasos roḇean rur isoine www.pr418.com, tv.pr418.com, ma wol.pr418.com. Ma kona monda aplikasi rikyor ḇekaku faro hp ḇaido tablet koḇena isoine JW Language^®, JW Library^®, ma JW Library Sign Language^®. Ro situs ma aplikasi nane iklan noḇa ḇaido roi ḇeḇyeḇa ro Setan dunya ḇyedi naisya ḇa. Mboi rofyor kosmai publikasi na ro situs ma aplikasi ḇesena, imbude sfadwer roi ḇero dori kwar.​—Mazmur 18:26; 19:8.

Oso wer ido, korir publikasi koḇena ro situs na snonkaku sya sḇuk komentar sena ido, nari snonkaku ḇebur kakaku ma ḇembroḇ sya bisa sawos nabor Yahwe organisasi Ḇyedi. Naek srar ono sisya sawos famfamḇri kuker si, ma nane nun sanandik kaku ḇe Yahwe I ḇa. Awawos ḇero Internet ḇeradirya ima nyan ḇemnis ḇa fa kosonek snonkaku oso ma kofnoḇek i fa ifawi kakaku ya. (1 Timotius 6:3-5; 2 Timotius 2:23-25) Ma sino sisya sifrur akun ḇekaku ḇa ro situs web ma media sosial ḇeḇuk snonsnon organisasi ḇaido anggota ro Badan Pimpinan. Ḇape sankarkar. Anggota Badan Pimpinan oso ḇa ḇena situs web ro mankunsi ḇaido akun ro media sosial rosairirya monda.

Kosaramper fararur ḇaḇeḇaryas ”ankankinem ḇeḇye” rofyor kofarkin si ḇe jw.org. (Matius 24:14) Situs web ma aplikasi koḇena sifrur pdef na fa napyum syadi wer. Komarisen manseisirya kam na sismai fainda ro na. Inja bisa kofarem publikasi koḇena roro e-mail, ḇaido kofarem link ḇe situs web koḇena. Rarirya ido kofarkin snonkaku sya ḇe nyan oser fa Yahwe ḇyukifyan ko roḇean rur iso roro ’manfamyan ḇeḇesyowi ma ḇefawi nananem’.