TAUN aniwara, mambesrar sesyaran ro supswan ḇesiper insape suffarmyan ḇe penatua ma hamba pelayanan. Auma oser rofandu si ido, na wamarisen kaku snar wafarmyan ḇe Yahwe I ma naek srar sya ro nyan ine.

Wakḇeḇirḇar kaker ido, syasar risyaḇa. Jason, penatua ḇebabo oso doḇe, ”Fyor yafarmyan babo ḇe penatua, yaḇaḇir yapok yafrur fararur ḇebabo yena ḇa.” Moses ma Yeremia suḇaḇir suḇekir syadi ḇa fafisu susmai fararur ḇebabo ro Yahwe I. (Keluaran 4:10; Yeremia 1:6) Wakḇaḇir ryarirya ido, rosai na wafrur insama nwa kakakyar ma wasur pdef ro rurya? Bisa wakfarkor ro Timotius i.​—Farfyar 16:1-3.

Timotius ḇyeumur indokada taun ri 20 fyor iso randak manwawan Paulus ro marandan ḇyedi. Fafisuya, imbude Timotius ḇyaḇir isyus ḇa fa ḇyuk farkor ma isonek snonkaku ḇesesya snar ḇyesnonkbor kaker. (1 Timotius 4:11, 12; 2 Timotius 1:1, 2, 7) Mboi isur pdef ro rurya, ma ro swaf taun risamfur nawase, Paulus ikofen ḇe naek srar ḇero Filipi sya, ”Ro Manseren Yesus yakyar nari yawan Timotius faro mko”. Rosai ḇefnai fa Paulus ikofen ryadine? Fyasnaiḇair, ”Snar snonkaku oso isya ro dine [raris i] ḇa”.​—Filipi 2:19, 20.

Rosai ḇefnai fa Timotius ima farari ḇepyum kaku ḇe penatua sya? Kwarapan roi riwonem ḇeuser nane.

1. Iswar kaku snonkaku sya. Paulus ikofen ḇe naek srar ḇero Filipi sya snar Timotius nari ’kyara kaku ḇeri’ fandun sena. (Filipi 2:20) Timotius imarisen insama naek sar sya sifanam pdef ḇe Yahwe I. Inja, imarisen ḇyuk oras ma samambraḇ ḇyena fa ifnoḇek si.

William, ḇeyuffarmyan ḇe penatua ro swaf taun ri 20 syadi, ikofen ker ḇe penatua ḇeyuffarmyan babo sya ryadine, ”Waswar naek srar sya. Mamepen fandandun sena ḇardibur administrasi na.” Wamnis awer ḇeyun bis oso, kyara monda bis ya na ryama ro terminal ro oras ḇemnis, mboi kyara ḇa moḇsa penumpang sya sek ḇe bis ya dori raya.

2. Fyakapon fararmyan faro Yahwe I. Paulus doḇe Timotius ima iḇesebur ḇesesya snar siso ”ssewar ḇaḇefandun mankunsi sena, mboi ḇaḇefandun ro Yesus Kristus ḇa”. (Filipi 2:21) Paulus myam mboi naek ḇero ris ḇyedi smam monda faro fandun mankunsi ḇardi. Fyorno ido sfakapon fandun sena ḇardibur fararmyan ḇe Yahwe I. Mboi Timotius dakmnis si ḇa. Fyoro ḇa fafisu nya swaf fa ifrur nabor syadi ro fararmyan ḇe Allah, dakkarem raris Yesaya ḇekofen, ”Aya isoine! Wawan aya!”​—Yesaya 6:8.

Rariso insama mam mnis fandun mankun Bedi ma fandun ro sidang ya rai? Ḇepon ya, waso Paulus anun ḇyena, ”Isof mkokinfir roi ḇeḇye kam”. (Filipi 1:10) Fakapon Yahwe fararur Ḇyena. Ḇesuru ya, ḇinkwanbur fararur na ḇefnak oras ma samambraḇ Bena. Paulus ikofen ḇe Timotius i, ”Fanam awer marasrisen ḇeḇerarmomen baken ro snonkborsya, mboi swewar ḇaḇenapnapesya, ḇaḇefarmkuya, saswar ma aski”.​—2 Timotius 2:22.

3. Fyararur marḇak ro fararmyan ḇe Yahwe I. Paulus ikofen roi ḇekur ḇe  Timotius i, ”Ifnoḇek aya kwar ro afuffarmyan ro Ankankinem Ḇeḇyeya imnis romawa oso ifnoḇek kmari.” (Filipi 2:22) Timotius ima imyaren kaku. Fyararur marḇak fnoḇek Paulus i, ma ine nafrur fa ḇaḇebati suḇena nasambraḇ syadi.

Baboine, fararur nabor naisya ro Yahwe organisasi Ḇyedi. Fararur nane nun marasrisen kaku ma nafnoḇek Au fa wafanam syadi ḇe naek srar sya. Inja, iḇye kada ’wafararur pdef kaku ḇeri faro Manseren’.​—1 Korintus 15:58.

4. Ifrur rosai fyarkor kwar na. Paulus fyas ḇe Timotius i, ”Waser farkarkor yena kwar, rariso kankenem ayedi, marisen ayedi, kakyar ayedi, kaḇaḇaḇ ayedi, saswar ayedi, ma ḇaḇenamu ayedi.” (2 Timotius 3:10) Timotius ifrur rosai fyarkor kwar na, inja ismai fararur nabor syadi wer.​—1 Korintus 4:17.

Au kako na wafarkor ro penatua ḇefarmyan fyoro kwar ḇae. Tom, ḇefarmyan ḇe penatua taun ḇe taun kwar, iwasen mura ḇe fafisu penatua oso ḇefarmyan fyoro kwar fyasnai ḇaḇenaḇye ma fyarkor pyum i. Doḇe, ”Yafuken ker i ma yaso mnis anun ḇyuk na. Nane nafnoḇek kaku aya fa yana kakakyar.”

5. Fyari mankundi pdef. Paulus danun ḇe Timotius i, ”Fari mankundaw faro fainda ḇaḇeari ḇe Allah.” (1 Timotius 4:7, Terjemahan Dunia Baru [NWT]) Atlet oso nya snonkaku ḇefarkor i kako na fandun fa ifari mankundi. Paulus ikofen kaku ḇe Timotius i, ”Wawasya kaku ḇeri Refo faro si wadif si ma buk farkarkor faro si. . . . Waswarepen roi nane kam, wafrurna insa marandan bedi isnai faro kawasa kam.”​—1 Timotius 4:13-15.

Fandun kako swewar fa ḇekir syadi ro fararmyan Bena pdef. Wamyaren wafarkor Refo, ma wafawi pyum akurfasnai ḇebabo ro organisasi. Wakyar syadi mankundaw awer. Fyor kwara Auma wafarmyan fyoro kwar, wafawi nyan fa wafrur mnis samswen nakam kuker wafrur riset ḇa ido, nari wafrur sasar. Raris Timotius i, ”wepen mankundaw ma wepen farkarkor bena.”​—1 Timotius 4:16.

6. Ikyar kaku faro Yahwe rur ḇesren Ḇyedi. Fafisu Paulus dawosḇair Timotius fararmyan ḇyena, ḇyuk swarapepen ḇe i, ”Faduru arasai ḇeḇye, sikyar kwarma ḇeko, ro Rur Ḇesren ḇekain ro kosnesna.” (2 Timotius 1:14) Fandun fa Timotius ikyar kaku faro Allah rur ḇesren Ḇyedi.

Donald, ḇefarmyan ḇe penatua fyoro kwar doḇe, ”Snon ḇeyuffarmyan sya fandun fa sesyowi ḇaḇebati sena kuker Allah. Sifrur na ido na ’sisambraḇ syadi wer’. Rofyor senadi sor Allah rur ḇesren Ḇyedi ma sfasnai bon ḇyena, nari sun barakas ḇe naek srar sya.”​—Mazmur 84:7; 1 Petrus 4:11.

Nkomarisen kaku fa nkomam hamba pelayanan ma penatua ḇeyuffarmyan babo, Au kako, snar mkosur pdef ro fararmyan mkoḇena faro Yahwe I. Jason, ḇeyap ḇepon anya, doḇe, ”Fafisu yafarmyan ḇe penatua, yafarkor nabor syadi ma yana kakakyar syadi wer. Kirine yamarisen kaku faro fararur ayedine, ma yamam na ḇe syowi ḇeba ḇepyum kaku.”

Na wasur pdef ro fararmyan Bena ke? Waso pyum Timotius nyan ḇyena ido, nari wun barakas kako ḇe naek srar sya.