1. Kokame rosai komarisen insama kina koḇesya sakfrur ya?

IMBESRAR oso snori Paulina * doḇe, ”Fafisu yafarkor randak Refo ya, yamarisen insama ḇero kina yesi nkosun kam ro Firdaus. Yamarisen syadi swa yedi, Welmus, ma roma nuḇedi nkakfarmyan ḇe Yahwe.” Kina bansi ono sisya sakmambir ma sakswar Yahwe I ḇaim ke? Rarirya ido, na ḇaḇir raris Paulina moḇ ḇyaḇir raya.

2. Fakfuken rosai na kawos ro farkarkor inena?

² Kopok kodif kina koḇansi ḇa fa srower ankankinem ḇeḇye. Ḇape, na kofnoḇek si fa sakkara ma simarisen faro anun ro Refo na. (2 Tim. 3:14, 15) Rosai ḇefnai fandun fa koḇaryas ḇe kina koḇansi? Rosai ḇefnai fandun fa kokara asuser moḇ sḇaḇir raya? Rosai na kofrur fa kofnoḇek kina koḇesya insama siswar kako Yahwe I? Ma moḇsa naek srar ro sidang sifnoḇek ko rai?

3. Imnis ḇekofen ro 2 Petrus 3:9, rosai ḇefnai fandun fa koḇaryas ḇe kina koḇesya?

³ Kerower, Yahwe nari myun pres dunya ḇeḇarḇor ine. Snonkaku ḇena kakara ḇemnis faro ”kankenem ḇemnaiḇa” siso nari ḇesmai ḇaḇye. (Farfyar 13:48) Koḇuk oras nabor ma samambraḇ koḇena kwar fa koḇaryas ḇe snonkaku kofawi ḇaim sya ḇero moḇ koḇedi. Inja, na komarisen ḇae kakḇaryas faro kina koḇesya insama sakfarmyan  faro Yahwe fnoḇek ko. Kma ḇesaswar koḇedi, Yahwe, ”imewer oso ryo, mboi insa snonkaku kam simbror ma skaḇer”.​—Wasya 2 Petrus 3:9.

4. Rosai nyan ḇesasar koḇukiḇaryas ḇe kina koḇansi?

⁴ Fandun fa koswarepen nyan ḇepyum ma nyan ḇesasar naisya fa koḇukiḇaryas ankankinem ḇeḇye. Imbude na kawos myaren ma kofrur pyum rofyor koḇaryas ḇe snonkaku kofawi ḇaim sya. Ḇape, fyor koḇaryas ḇe kina koḇansi, na kawos bos ḇeri yoḇ si.

5. Rosai fandun fa koswarepen rofyor koḇaryas kakaku ro Refo ḇe kina koḇesya ḇaim?

⁵ Fafisu koswarepen nyan koḇukiḇaryas ḇe kina koḇansi ro randak iwara imbude na kofafko snar koso nyan ḇesasar na. Manwawan Paulus danun ḇe snonkaku Kristen, ”Iḇye mkawawos [ḇesya kwar] kuker saswar, ma wos anna mbuar awer, isof mkofawi, rariso nari mkokarem faro snonkaku oser-oser.” (Kol. 4:5, 6) Koswarepen kaku anun ine rofyor koḇaryas ḇe kina koḇesya. Oroḇaido, na kofrur fa sfafayaf ma simewer srower kondi.

6-7. Far fawar oso ḇefasnaiḇair snonkaku Kristen ḇeḇeswa ḇeyakfarmyan Yahwe I ḇa fandun fa kyara asuser moḇsa swari ḇyaḇir rai.

⁶ Kokara asuser moḇ sḇaḇir raya. Paulina, ḇeyap ḇepon anya doḇe, ”Randak ya, yamarisen yawos ḇe swa yedi ḇekur Allah ma Refo monda. Nufarfyar roi ḇero ’rasrasna’ ḇa.” Ḇape, Paulina swari, Welmus, ifawi nabor Refo ya ḇa ma ifawi mnis rosai Paulina ikofen na ḇa. Inja, kyara Paulina ima fyandun agama ḇyedi monda.  Welmus imkakwarek na sifrowes swari fa iso agama ḇesasar.

⁷ Paulina ikofen kaku ḇepon iwara ḇyuk oras nabor ro mandira ma minggu pupes ya kuker naek srar ro fananjur, ḇaḇeḇaryas, ma sinan kayame. Paulina doḇe, ”Fyorno ido Welmus ibur ḇe rum mboi myam nu ḇa, inja ḇyaḇir ḇyero mankundi.” Kakuḇae, Welmus imarisen swari ma romawa ḇyedi suḇe kayamyam kuker i. Welmus ifawi mnis naek srar sya ḇa, inja kyara Paulina fyandun syadi bati ḇyeskoine ro i. Welmus ikofen bos ḇe Paulina na ibur i. Kwara ido, rosai fandun fa Paulina ifrur fa fyasnai kyara asuser swari moḇ ḇyaḇir rai?

8. Ro 1 Petrus 3:1, 2, rosai kina koḇesi smamepen ro ko?

⁸ Kofasnai kenem ḇepyum. Fyorno ido, kina koḇesi smamepen rosai kofrur na syadibur roi kawos na. (Wasya 1 Petrus 3:1, 2.) Ḇarpur ya Paulina ifawi kaku roi ine. Ikofen, ”Yafawi Welmus iswar nu ma kyara kaku fa ibur nu ḇa. Ḇape, roi imbe ifrur yoḇ aya nafrur fa yafawi fandun fa yakenem imnis Yahwe marisen Ḇyena ḇekur farḇakḇuk ya. Yawos nabor awer mboi ḇefandun syadi yaiso yafasnai kenem ḇepyum.” Paulina syewar fa idif swari fa suwawos Refo ya wer ḇa, ḇape dawos ḇe i roi ḇekur kankenem ro rasras na. Welmus myam mboi swari fyasnai sawarwar syadi, ma roma suḇedi ḇyesyowi ma isouser faro i. (Ams. 31:18, 27, 28) Fafisu Welmus myam rariso wos farkin ro Refo nun fainda ḇe kina ḇyesi, kyara ma imarisen syadi fa ryower ankinem ro Refo.​—1 Kor. 7:12-14, 16.

9. Rosai ḇefnai fandun fa kofnoḇek kina koḇansi pdef?

 ⁹ Kosewar fa kofnoḇek kina koḇansi pdef. Yahwe fyasnai nyan ḇepyum ḇe ko kwar. Ḇyuk swaf faro kawasa ḇyesi ’rarirya pdef’ fa srower abar ḇepyum ma sakna kankenem. (Yer. 44:4) Ma Manwawan Paulus ikofen ḇe Timotius fa ifnoḇek pdef snonkaku ḇesesya. Rosai ḇefnai ya? Snar ifrur rarirya ido, nari mankundi ma snonkaku ḇerower i sya sismai ḇaḇye. (1 Tim. 4:16) Koswar kina koḇesya, inja komarisen sakfawi kakaku ro Refo ya. Rosai Paulina ikofen ma ifrur na nun bon ḇepyum ḇe kina ḇyesi. Kirine, swari dakfarmyan ḇe Yahwe. Suyakfarmyan ḇe perintis, ma Welmus duffarmyan ḇe penatua.

10. Rosai ḇefnai fandun fa kokaḇaḇaḇ?

¹⁰ Koḇe kaḇaḇaḇ. Fafisu kun snemuk fa kosouser Yahwe I, na kofadwer kenem ma kakyar koḇena. Mboi kina koḇesya sna kakara oser ḇekur roi ine ḇa. Fyorno ido, roi ḇepon kaku smam ya iso kakfrur kayam ras ḇeba kuker si wer ḇa ma kosowarpu pololtik wer ḇa. Randak ya, kina koḇesi ono sisya simsor ko. (Mat. 10:35, 36) Ḇape, kopok kosusu awer fa kofnoḇek si. Komnai kofnoḇek si fa sifawi roi kokyar na ido, kaku ya komankara si kwar sima sisyus ḇa fa sismai kankenem fyoro. Yahwe ḇye ko ḇa fa kakḇe mankara snonkaku sya, Yesus i mande. (Yoh. 5:22) Kokaḇaḇaḇ ido, kina koḇesya nari simarisen sakrower anun koḇaryas na.​—Mam kotak ”Koḇuk Situs Web Koḇedi fa Koḇukifarkor”.

11-13. Rosai kofarkor ro nyan Alisya ifrur pyum sinan ḇyesuya?

¹¹ Kofasnai ḇaḇenaḇye ḇape kufepen nako kakyar ya. (Ams. 15:2) Kokarapan Alisya fawar ḇyeja. Sinan ḇyesuya sukyar faro Allah I ḇa ma suso ker fararur polotik. Alisya ḇyarek binkwan ro sinan ḇyesuya, mura fyarkor Refo. Ifawi kaku nari fandun fa ikofenḇair roi fyarkor kwar anna ḇe su. Alisya doḇe, ”Kokofenḇair fasaw ḇa ḇe kina koḇesi ḇekur roi ḇebabo kokyar na ido, nari sikandor fafayaḇa.” Alisya syewar fa ikofenḇair roi oso nari sinan ḇyesu sumarisen na isoine ḇekur saswar ya. Mura, fyas syapram ḇe su ma dap rosai Refo ikofen ḇekur saswar i. Ma ifuken moḇsa sukara rai. (1 Kor. 13:1-13) Ikofen kasumasa ḇe sinan ḇyesuya snar sufaduru pyum i kwar isof ro iba, ma ḇyuk hadiah ḇe su. Fafisu ibur ḇe rum, syewar kaku fa ifnoḇek snari fa ifrurpyan fararur ro rum na. Rofyor Alisya ikofenḇair kakyar ḇyena ḇe su, randak ya sinan ḇyesuya sumarisen ḇa kero.

¹² Rofyor Alisya ryo sinan ḇyesuya rum suḇedi, iwasya pdef Refo ro ras ḇe ras. Doḇo, ”Ine nafrur fa awin ifawi Refo ima fyandun kaku ḇe aya.” Alisya kmari dun snemuk fa fyarkor Refo insama ifawi rosai ḇefrur inai ḇyedi nya kakara ḇeḇese, ma imbe syewar sasar ro Refo. Alisya doḇe, ”Yaḇuk Refo oso ḇe Kamami ma yafas wos ker ḇeyun sneri.” Rosai bon ya? Alisya kmari ismai sasar osoḇa, ḇesyaḇo roi iwasya ro Refo nsun kaku ro sneri.

¹³ Fafisu sidwarek ko, fandun fa kofasnai ḇaḇenaḇye ḇape kufepen nako kakyar koḇena. (1 Kor. 4:12b) Alisya fyarmku pdef rofyor snari idwarek i. Alisya fyar ḇo doḇe, ”Fafisu yaḇebaptis, Awini dor aya ḇe ’inai ḇerawrower ḇa’.” Rosai Alisya ifrur ya? Doḇe, ”Yabinkwanbur awawos ḇekur agama yedi ḇa. Kuker myaren yakofenḇair ḇe su yun snemuk  kwar fa yaḇe Saksi Yahwe ma yapok yafadwer snemuk yedine ḇa. Yakofen ḇe Awini ayama yaswar i kaku. Nukanes kame. Mura, yakun roḇean ḇeyankir ḇe Awin i. Ro ras ani, Awini insape ifawi Refo ifnoḇek aya fa yakenem pyum syadi wer.”

14. Rosai ḇefnai fa kosusu awer fafisu kina koḇesya sidif ko insama kofarmyan ḇe Yahwe I wer ḇa?

¹⁴ Imbude nefandun oras isof kina koḇesya sifawi mnis fararmyan ḇe Yahwe ima fyandun kaku ḇe ko. Imnis raris, fafisu Alisya kyinfir fa dakḇe perintis syadibur syewar fararur sinan ḇyansu sumarisen na, snari kyanes wer. Ḇape Alisya imewer isusu. Doḇe, ”Kosusu snar roi oso ido, na sisewar roi oso ḇese wer fa sifrur kosusu. Kufepen nako kakyar ya ḇape kofasnai ḇaḇenaḇye. Kofrur na ido, na kina koḇesi ono sisya simarisen srower ko.” Ineiso roi Alisya ismai na. Kirine sinan ḇyansuya suyakḇe perintis, ma kmari dakḇe penatua.

15. Imnis ḇefas ro Matius 5:14-16 ma 1 Petrus 2:12, moḇsa ”fararur ḇepyum” ro naek srar ḇesesya nafnoḇek kina koḇesya rai?

¹⁵ Yahwe iyer snonkaku sya fa sfanam ḇe I roro ”fararur ḇepyum” manfamyan ḇyesi sifrur na. (Wasya Matius 5:14-16; 1 Petrus 2:12.) Swambri ḇe Saksi Yahwe ḇa ido, ras oso daksrow kuker naek srar ono ro sidang Bedi kwar ke? Paulina, ḇeyap ḇepon anya, dor naek srar fa srama ḇe rum ḇyedi insama swari, Welmus, dakmamḇir pyum si. Manbesrar oso ifnoḇek Welmus i infa kyara sasar Saksi  Yahwe si ḇa. Welmus fyawar, ”Manbesrar ani dun ras oser fa imnaisu ro fararur ḇyeja fa numam kayam farfnak olahraga. Fyor ani yakara, ’Dakmnis ra aya ḇae!’”

16. Rosai ḇefnai fandun fa kor kina koḇesi fa srama ro fananjur ya?

¹⁶ Nyan ḇepyum kaku fa kofnoḇek kina koḇesya iso kor si fa srama ro fananjur koḇedi. (1 Kor. 14:24, 25) Welmus iso randak ro munara Swarapepen, snar sifrur na kawan ḇa ma ro oras ibur kwar ro fararur ya. Doḇe, ”Yarower monda faya mboi yafawi mnis ḇa. Ḇape, roi yaswarepen na iso snonkaku ḇero diansya. Srama siser aya kuker payamyum. Sima sifrur pyum kaku.” Imbeswa ḇefrur pyum, Roni ma Sara, sufnoḇek Paulina ma roma ḇyedi kwar fa suso fananjur ma ḇaḇeḇaryas. Inja, rofyor Welmus imarisen ifawi nabor syadi Paulina kakyar ḇyedi, dor Roni ifnoḇek i fa fyarkor Refo.

17. (a) Koḇuk sasar ḇe mankunko awer faro roi risai? (b) Rosai ḇefnai fa kopok komnai awer fa kofnoḇek kina koḇesi?

¹⁷ Komarisen kaku kina koḇesya kam sakwarpu ko fa kofarmyan ḇe Yahwe. Imbape, imbude kosewar kwar fa kofnoḇek si mboi simewer saksun ro napnapes ya ḇa. Rarirya ido, koḇuk sasar ḇe mankunko awer snar kankinfir sena. Ḇesyadiya, kopok kodif snonkaku oso fa imarisen faro kakyar koḇena ḇa. Ḇape waswarepen, fyor kina ḇesi smam waryaḇ syadi snar wafarmyan ḇe Yahwe I, na nun fainda kaku ḇe si. Ḇenadiwarek si, wawos myaren asuser ḇe si. Wamnai awer fa wafnoḇek si! (Farfyar 20:20) Wakyar kaku Yahwe nari ḇyebarakas sasewar Bena. Ma kina bansi simarisen srower Au ido, nari sismai ḇaḇye!