IMBE wakna fakamamar oso ro sidang ke ḇape kirinema waksmai na ḇaime? Imbude, snonkaku ḇese siso bena fakamamar ani. Ḇaido imbude ḇepon iwara waksmai fakamamar ani. Ḇape, rosai wafrur ro kirine nasyadi ro ḇepondi wer ḇa imbude snar ḇe sinan kwar, wadafduf, samswen ro sasewar pipi, roḇaido fandandun ro kina ḇesya. Ḇaido, fararwe nasya ro organisasi, nafrur fa fakamamar wasmai na wafrur na wer ḇa. Roi ḇeḇe sya nane, imbude waḇaḇir wafrur nabor syadi ro fararmyan bena wer ḇa imbude fyornoido wafafko. Rarirya ido, Rariso insama ḇe sanekar ḇa, ḇesaneso ḇa, ma fafko ḇa? Rariso insama waryaḇ ḇesya kwar?

Na kofarkor nyan risaiso koryaḇ pdef roro Yohanes Ḇemasi nyan ḇyena ine. Yohanes ismai fakamamar ḇebor ḇepyum kaku na, ḇape, kyaraḇaḇeri ro fararmyan ḇyena ine nari ismai samswen. Kyaraḇaḇeri, nari oras ḇyena nabro monda ro bui bardibur fararur ro fararmyan ḇyena. Ḇesyabo, Yohanes iryaḇ pdef, ma fyasnai rari ḇerarirya anna ro kenem ḇyena ḇesiper. Rosai ḇefnoḇek i? Rariso na kakraryaḇ pdef syadiwer fyor roi ono nasya nafrur kofafko?

Ro swaf paik April taun 29 M, Yohanes imbran randak fararur Yahwe ḇyuk ḇe i anna, isoine fyasos nyan faro snonkaku sya faro Mesias rarama ḇyedi. Ikofen ḇe si ḇo doḇe, ”Mkombror, snar Ḇaḇesasoser [karajan] Boiyas fyanam kwar!” (Mat. 3:2; Luk. 1:12-17) Snonkaku ḇebor sya simnafi. Komam ido, snonkaku ḇeḇarek binkwan sya srama fa sakrower Yohanes anun ḇyena, ma ḇebor sya simbror ma sakḇe baptis. Kuker makakak ḇa Yohanes danunepen manfarkin agama ḇefrur ra ḇenapes sya, doḇe simbror ḇa ido na sismai samamyai. (Mat. 3:5-12) Swaf paik Oktober taun 29 M, Yohanes ifrur roi ḇefandun kaku roro fararmyan ḇyena isoine fafisu ḇyebaptis Yesus i. Ro fafisu ani beri, Yohanes iwan snonkaku sya fa siso Yesus i, isoine Mesias ḇeḇeasas kwar ani.​—Yoh. 1:32-37.

Yesus ikofenbadir roi ḇefandun kaku Yohanes ifrur na, doḇe, ”Kaku ḇeri rofandu snonkaku bin sya saḇen si oso ḇanim ikḇawes fa iba syadi Yohanes Ḇemasi.” (Mat. 11:11) Yohanes na iryaḇ kaku faro barakas ismai na. Raris Yohanes i, naek  srar ḇebor sya saksmai barakas nabore. Oser ya isoine Naek Terry. Swari Sandra i, sufarmyan ro oras ḇesiper nasyadi ro taun swaf ri 50 kwar. Terry doḇe, ”Ro ḇepondi, yana fakamamar ḇepyum nabore. Yuffarmyan ḇe perintis, anggota Betel, perintis istimewa, pengawas wilayah, pengawas distrik, ma fafisu ine yakḇe perintis istimewa wer.” Kona fakamamar ro organisasi ido, na koryaḇ kaku. Ḇape, raris rosai nari kofarkor ro Yohanes fawar ḇyena, koḇesewar kaku fa koryaḇ pdef rofyor kosmai fararwe ro kenem koḇena.

Yohanes Ḇemasi iryaḇ pdef snar ḇyesyowi fakamamar ismai na. Mamuser conto ine. Rofyor Yesus ḇyebaptis kwar, ḇeso Yohanes sya sibor wer ḇa ma ḇeso Yesus sya sibor syadi. Yohanes manfamyan ḇyesi simkakwarek ma sikofen faro i ḇo soḇe, ”Rabi, snon ḇefnoḇek kuker aw ro war Yordan ḇariwara ma faroi buk ḇaḇesaksi kwar, dakḇuk masi sren [baptis] kako ma kawasa syakam sra faroi.” (Yoh. 3:26) Yohanes doḇe, ”Ḇena ḇinfakawinya, isoine manfakawinya; ḇape manfakawinya bati ḇyesi ḇeyores fanami ma ḇemnafi, siryaḇ fafayaḇa, snar simnaf mkaren ro manfakawin ani. Irya raryaḇ ayedi iba.” (Yoh. 3:29) Yohanes kyara fa isyadi ro Yesus i ḇa, ma Yohanes dakkara ro fakamamar ismai nane ḇa nari nabor wer ḇa snar fyawi fakamamar Yesus ḇyena naba syadi. Imbape, Yohanes iryaḇ pdef snar ḇyesyowi fararur ḇyena faro ”manfakawinya bati ḇyesi”.

Fararmyan ḇyena napyan ḇa raryano Yohanes rari ḇepyum ḇyena nafnoḇek i fa iryaḇ pdef. Imnis raris, rofyor ḇyeḇeaben ya Yohanes ḇye snonkaku Nazir inja dakim anggur ḇa. (Luk. 1:15) Yesus doḇe, ”Yohanes ryama, ima danan ḇa, madinemba.” Inja, ro rasras na Yohanes ikenem syadadi ḇa, naḇese ro Yesus ma manwawan ḇyesi sima sakḇe snonkaku Nazir ḇa mboi sikenem raris moḇ snonkaku ḇebor sya sikenem raya. (Mat. 11:18, 19) Ḇesewer ido, Yohanes dakfrur mujisat ḇa. Ḇape, fyawi Yesus manfamyan ḇyansi, warpu ḇepondi ḇeḇe manfamyan ḇyedi, sikako sismai papoik fa sifrur mujisat. (Mat. 10:1; Yoh. 10:41) Ḇape, Yohanes fyandun roi ḇeḇesya anya ḇa.​—Imboi, iryaḇ pdef fa ifrur fararur Yahwe iwan ḇe i na.

Koḇesyowi fararur kosmai ro fafisu ine ro fararmyan koḇena ḇe Yahwe ido, na koryaḇ pdef. Terry, ḇeḇeyap ro ḇepon anya, doḇe, ”Yamam monda faro fararur oser-oser sḇuk ḇe aya anna.” Iswar mura ro fafisu ifarmyan ro oras ḇesiper ya, doḇe, ”Yakfafko ḇaḇeri, mboi fawar ḇepyum ya demyer yakara na.”

Fakamamar ḇaido fararur oser-oser kosmai ro organisasi, nama roi ḇekakur nairi. Sai ḇewar? Snaro kosmai syowi fa koḇe ”snonkaku ḇefararur kam faro Allah”. (1 Kor. 3:9) Kuker kowasenkara roi ine, na koryaḇ syadi roro fararmyan koḇena ḇe Yahwe I. Raryaḇ koḇena bisa koḇukimnis na kuker roebor ḇekakur oso. Roebor ani komamwarwark ker na ido, na ipyum rarya kwar. Inja, rupa radirya, kowasenkara ḇaḇesyowi fa kuffarmyan Allah ido, raryaḇ koḇena nari nasya pdef. Komewer komam syadadi rosai kofrur kwar na kuker rosai snonkaku ḇesesya sifrur na. Kokara awer ḇo koḇofararur Yahwe ḇyuk ḇe ko ine nekakur mankun ḇa ḇardibur fararur ḇyuk ḇe snonkaku ḇesesya.​—Gal. 6:4.

Yahanes imbude fyawi kwar fararmyan ḇyena nari nambran kawan ḇa, mboi na kyara ḇaḇeri roi anya nambran fasau kaku. (Yoh. 3:30) Ro taun 30 M, indokada swaf paik ri wonem rofyor ḇyebaptis Yesus i, Raja Herodes syun Yohanes i ḇe bui. Ḇape, Yohanes ḇyesewar kwar fa ḇyaryas. (Mrk. 6:17-20) Rosai ḇefnai fa iryaḇ pdef indiri roi ḇekur i anya? Snar myam faro roi ḇeḇe rur ya monda.

Fafisu Yohanes ismai ro bui, imnaf Yesus fararur ḇyena nasya nasur pdef. (Mat. 11:2; Luk. 7:18) Yohanes ikyar Yesus ima Mesias dirya. Ḇape, imbude na ifuken rariso Yesus ifrur bardadi ḇero Refo kam ndarirya faro Mesias. Imnis raris, Yohanes fyawi Mesias nari ḇye raja. Inja, na ifuken kero wer Yesus nari ḇyeparenta ke? Imbude ifuken kako Yesus ḇye raja kwar ido na Yesus isasyar i ro bui ke? Snar ibe fyawi rosai nari Yesus ifrur snar ḇye Mesias ya, inja Yohanes iwan manfamyan  ḇyansuya fa sura sufuken Yesus i ḇo suyoḇe, ”Auso nari ḇeramayake, roḇa nari nkowaf snono ḇese?” (Mat. 11:3; Luk. 7:19) Fyor manfamyan ḇyansuine sukaḇer kwar, Yohanes na ryowerepen kaku fafisu sufawar Yesus ifrur mujisat pararei nabore ma iwan sufa sukofenbadir kako ḇe Yohanes i roi ine: ”Snonkaku ḇepraf smam, snonkaku ḇepapipen simbran, snon ḇeduf pado seḇefasren, snon ḇepro simnaf, snon ḇemar sḇeḇeḇawes, ma snon ḇesaḇarar sisma Ankankinem Ḇeḇye.”​—Luk. 7:20-22.

Yohanes iryaḇ kaku fafisu imnaf rosai manfamyan ḇyansuine sukofenbadir na. Rosai sukofenbadir nane nbuk kakyar snar Yesus isya fyasnai bardadi-bardadi ḇekur Mesias ine ndarirya ḇeri. Komam kada rya Yesus isasyarbur Yohanes iro bui ḇa raryano, Yohanes fyawi snar fararmyan ḇyena nefromo ḇa. Ismai ro bui raryano, iryaḇ ḇesya kwar.

Raris Yohanes i, komam faro roi ḇeḇe rur ya monda ido, na kofarmyan Yahwe I pdef kuker raryaḇ ma kaḇaḇaḇ. (Kol. 1:9-11) Bisa kofrur na kuker kowasya Refo ma korauser na. Kofrur rarya ido, nari kofawi roi nakam kofrur ḇe Allah I nari nefromo ḇa. (1 Kor. 15:58) Sandra ikofen radine, ”Yawasya fasal oser ro Refo ras ḇe ras, ine nafnoḇek aya fa yafanam syadi Yahwe I. Nafnoḇek aya fa yamam monda faro I ma faro mankundaya ḇardi ḇa.” Kokako na komam monda faro laporan ro fararmyan naek srar koḇansi faro Yahwe I anna. Kofrur rarya ido, nari kokarauser roi Yahwe ifrur kwar na, mboi kokara ker mankun koḇardi ḇa. Sandra ikofen radine wer, ”Munara JW Broadcasting^® paik ḇe paik na, nafnoḇek nkofa nkofanam kuker organisasi ma nkoryaḇ pdef fa nkonbran fararur inkoḇena.”

Yohanes Ḇemasi imbran fararur ḇyena ro swaf ḇekawan ḇa kuker fyasnai ”raryaḇ ma papoik imnis raris Elia i”. Ma imnis ra Elia i, Yohanes ”ḇyaḇir raris ko”. (Luk. 1:17, Terjemahan Dunia Baru [NW]; Yak. 5:17, NW) Koso nyan ḇepyum ro syowi ma Yohanes fararmyan ḇyena ḇe Yahwe ido, rosai ḇejadi ro kenem koḇena rayano na koryaḇ pdef ro fararmyan koḇena.