1. Rosai Yahwe ḇyuk faro manfamyan Ḇyesi oser-oser?

ALLAH Yahwe iswar manfamyan Ḇyesi, inja ḇyuk fararur faro si oser-oser ro sidang Ḇyedi. Roi kofrur ro sidang naḇesisye, mboi kofandun ko ma Yahwe myam kokam koḇesyowi. Komam rariso Manwawan Paulus ifnoḇek ko fa kosmai farkarkor ḇefandun kaku rai.

2. Imnis wos ro Efesus 4:16, rosai ḇefnai fa koḇesyowi ko ma kofararur kayamyam?

² Imnis mnuk ḇero Refo ḇeknam ro farkarkor ine, Paulus fyasnai kaku kopok komam ḇo kokofen awer ḇe min koḇesi, ”Yafandun awḇa!” (1 Kor. 12:21) Komarisen sidang koḇedi kyain ro ḇaḇeoser ido, fandun fa koḇesyowi ko ma kofararur kayamyam. (Wasya Efesus 4:16.) Fafisu kofararur kayam ro ḇaḇeoser, nari kokam koswar ko ma sidang koḇedi syambraḇ syadi.

3. Rosai nari kawos ro farkarkor ine?

³ Rariso kofasnai koḇesyowi naek srar ḇesesya ro sidang ya? Ro farkarkor ine, nari kawos moḇsa penatua sya sesyowi penatua ḇese rai. Ramnai, nari kawos nyan fa kokam koḇesyowi naek srar ḇefarḇuk ḇaim sya. Ḇepur ya, na kofarkor nyan kofasnai syowi faro naek srar ḇesewar fa sawos wos koḇeja.

4. Paulus wos anun ḇyena ḇero Roma 12:10 minsai fandun fa penatua sya siso na?

⁴ Yahwe iso ḇekanow penatua ro sidang syakam kuker rur ḇesren Ḇyedi. Imbape, penatua oser-oser samambraḇ sena namnis kam ḇa. (1 Kor. 12:17, 18) Naek ono sisya insape  sakḇe penatua, inja sifawi nabor ḇaim raris penatua ḇesesya. Sia wer sesinan kwar ḇaido sidafdufe, inja jadi fa sifrur nabor wer ḇa. Mboi, penatua oso ipok kyara awer penatua ḇese ima ifrur roi oḇa. Fandun fa penatua siso Paulus wos anun ḇyena ro Roma 12:10.​—Wasya.

5. Moḇsa penatua sya sfasnai syowi faro penatua ḇesesya rai, ma rosai ḇefnai kaku fa sifrur rarirya?

⁵ Penatua sfasnai syowi faro penatua ḇesesya kuker srower pyum si. Ḇesyadi wer, fafisu penatua sya sfanjur fa sawos fandun oso ro sidang. Kukro? Komam roi sfas ro syap Baryas wos Inggris tanggal 1 Oktober 1988. Ikofen radine, ”Penatua sya sifawi roro rur ḇesren ya, Kristus na fyarkin badan penatua oser-oser kakara sena fa skara wos anun ro Refo minsai na ḇefnoḇek si fa sifawi rosai na sifrur ḇaido sun snemuk ḇefandun. (Kis. 15:6-15) Rur ḇesren ifnoḇek penatua oser monda ḇa mboi penatua ro sidang syakam.”

6. Rosai na ḇefnoḇek penatua sya fa sḇeoser ḇo sfararur, ma payamyum rosai na sidang ismai ya?

⁶ Penatua ḇefasnai syowi faro penatua ḇese na imewer fa dawos ḇepon ker rofyor sifrur rapat. Ipok dawos nabor ḇa, ma kyara ḇa kakara ḇyena naiso ḇepyum syadi. Imbape, fyasnai sne ḇerun fyor ikofenḇair kakara ḇyena ma ryower pyum fafisu ḇesesya sawose. Iḇye syadi, imarisen irwas wos farkin ro Refo ma iso akurfasnai ḇerama ro ”women ḇesouser ma ḇefawinanem” sya. (Mat. 24:45-47, NW) Penatua sfasnai saswar ma syowi rofyor skain sawawos ido, Allah rur ḇesren Ḇyedi na ryous si, ma fyarkin si fa sna wos oser insama sidang syambraḇ.​—Yak. 3:17, 18.

7. Moḇsa Yesus myam snonggaku ḇefarḇuk ḇa sya rai?

⁷ Ro baboine, ḇeyaksun ro sidang siso naek srar ḇefarḇuk kwar ma ḇena  romawa sya monda ḇa. Naek srar ḇefarḇuk ḇaim sya kako sisya. Moḇsa komam ḇefarḇuk ḇaim ansine rai? Kokarapan moḇsa Yesus myam si rai. Rofyor Yesus ifarmyan ro supswan ine, dakfarḇuk ḇa ma ḇyuk oras ma swaruser ḇyena faro fararur ḇesren ya. Yesus iwan ḇa faro snonggaku Kristen fa sfarḇuk ḇaido sfarḇuk awer. Imbape doḇe snonggaku Kristen ono sisya skinfir fa sfarḇuk ḇa. (Mat. 19:11, 12) Yesus ḇyesyowi snonggaku ḇefarḇuk ḇa sya. Myam ḇefarḇuk ḇa ansine sipyum syadi ro ḇefarḇuk kwar sya ḇa ḇaido myamkyof si ḇa.

8. Imnis wos ro 1 Korintus 7:7-9 ya, rosai Paulus danun ḇe snonggaku Kristen sya?

⁸ Raris Yesus i, Manwawan Paulus dakfarḇuk ḇa insama ifararur pyum ro fararur ḇesren. Imboi, Paulus fyarkor ḇa snar snonggaku Kristen oso fyarḇuk ido na syasar. Ifawi kaku roi ḇeradinema oser-oser manggundi kyinfir. Imbape, Paulus danunepen monda fa snonggaku Kristen ḇekara fa sfarḇuk ḇa, sifrur na insama suffarmyan ḇe Yahwe I. (Wasya 1 Korintus 7:7-9.) Inja, Paulus nya mamam ḇepyum faro snonggaku Kristen ḇefarḇuk ḇa sya. Komam ine ro moḇ kyur Timotius, mambesrar ḇefarḇuk ḇaim ani, fa ifrur roi ḇefandun ro fararur ḇesren ḇe Yahwe I. * (Flp. 2:19-22) Inja, kokara mambesrar oso ima isyus ḇa fa duffarmyan snar fyarḇuk kwar ḇaido fyarḇuk ḇaim ido, nama kakara ḇesasar nairi.​—1 Kor. 7:32-35, 38.

9. Moḇsa komam snonggaku ḇefarḇuk kwar ma ḇefarḇuk ḇa sya rai?

⁹ Yesus ma Paulus suwan snonggaku Kristen sya ḇa insama sfarḇuk ḇaido sfarḇuk awer. Inja, moḇsa komam snonggaku ḇefarḇuk kwar ma ḇefarḇuk ḇa sya rai? Syap Menara Pengawal 1 Oktober 2012 ikofen radine, ”Sfarḇuk ḇaido sfarḇuk ḇa ke, komam roi ine ḇe syowi ḇeba, ḇaido roi ḇepyum Allah ḇyuk nairi. . . . Snonggaku ḇefarḇuk ḇa ansya Yahwe myam si ḇe snonggaku ḇefrur mamyai ḇa ḇaido sifrur saswar ḇa.” Inja, fandun fa koḇesyowi naek srar ḇefarḇuk ḇa ro sidang koḇedi.

10. Koḇesyowi naek srar ḇefarḇuk ḇa sya ido, rosai kopok kofrur awer na?

 ¹⁰ Moḇsa koḇesyowi naek srar ḇefarḇuk ḇa sya roi skara na? Koswarepen pyum snar roi ono naisya nafrur fa naek srar ansi skinfir fa sfarḇuk ḇa. Imnis raris, ono sisya sifrur aw sena kwar fa skain ro manggunsi. Ḇesesya sisrow snon ḇaido bin ḇesrow fa sna si ḇe swa ḇaim. Sia wer sḇero manggunsi kukro siswasi simarbur si kwar. Rosai monda ḇekur si, kopok kofakfuken awer ḇo koḇe rosai ḇefrur fa sfarḇuk ḇa ḇaido imbe kofnoḇek si fa kosewar pyan bin ḇaido snon faro si. Kakuḇae, naek srar ḇefarḇuk ḇaim sia na sor fa kosewar pyan yoḇ si. Imbape, sor ko ḇa mboi ko iso ḇeyoḇe imbe kofnoḇek si fa kosewar pyan snon ḇaido bin faro si ido, moḇsa na sḇaḇir rai? (1 Tes. 4:11; 1 Tim. 5:13) Rwama komam naek srar riḇeso ḇefarḇuk ḇa sya rosai sikofen ya.

11-12. Kosasor ko ḇa ido, moḇsa kofrur naek srar ḇefarḇuk ḇa sya sesanekar?

¹¹ Pengawas wilayah oso ḇefarḇuk ḇaim ima imbran pyum fararur ḇyena. Fyar ḇo doḇe fyarḇuk ḇa ndari ismai payamyum nabore. Imboi doḇe ḇyesanekar kukro naek srar sia sifuken i radine, ”Rosai ḇefnai fa wakfarḇuk ḇaime?” Mambesrar ḇefarḇuk ḇaim ḇefarmyan ro kantor cabang doḇe, ”Yamam mboi naek srar sia skara snonggaku ḇefarḇuk ḇaim sya sifrur saneso kaku. Nane nafnai fa rya smam naek srar ḇefarḇuk ḇa sya sima na sismai roi oḇa.”

¹² Imbesrar oso isya dakfarḇuk ḇa ḇo ifarmyan ro Betel. Fyar ḇo doḇe, ”Naek srar sia soḇe ḇefarḇuk ḇa syakam sisewar mansei na sna ḇe swa ḇaido fafisu sekayamyam kuker ḇesesya, smam na ḇe swaf fa sisewar. Ras oso yara ḇe moḇ ḇese faro fararur Betel, mura yaso fananjur sifrur ro roḇ anya. Imbesrar yaḇarekus i ikofen ḇe aya ḇo doḇe ro sidang ḇyedi, mambesrar risuru ḇena umur ḇemnis aya suisya. Dawos kaku ḇo doḇe imbe ifnoḇek aya fa yana snon oso. Nusun ḇe Balai Karajan anya mura, dun aya fa yasrow mambesrar ansuya. Yakofen ḇaboi nggomai kaku.”

13. Rosaiso ḇesambraḇser imbesrar oso ḇefarḇuk ḇa ani?

¹³ Imbesrar ḇese ḇefarḇuk ḇaim ma ḇefarmyan ro Betel doḇe, ”Yafawi naek srar perintis ḇefarḇuk ḇa ḇefarmyan fyoro kwar sya sna kakara ḇepyum, sifrur aw ḇepyum sena, simarisen sifnoḇek ḇesesya, ma siryaḇ kaku. Sḇuk fafnoḇek nabor ḇe sidang. Smam nyan kenem sena kuker mamam ḇemnis. Skara ḇa sima sipyum syadi ro ḇesesya kukro sfarḇuk ḇa ḇaido skara ḇa sakna raryaḇ oḇa snar sakfarḇuk ma sna romawa ḇa.” Naek srar syakam sesyowiyae si ido, ine na dun marisen kaku. Kofawi naek srar koḇesi skara ḇa koma kofrur saneso ḇaido smam ḇayayir ko, smamkyof ko, ma sipok skara kopyum syadi ro si. Kofawi sima siswar kaku ko.

14. Moḇsa na koḇesyowi naek srar ḇefarḇuk ḇa sya rai?

¹⁴ Naek srar koḇesi ḇefarḇuk ḇaim sya na simarisen kaku kukro komam si ḇa ro sfarḇuk ke roḇa, mboi komam si ro rari ḇepyum sena. Inja, na kofrur fa sfafko awer mboi koḇesyowi kaku soasuser sena. Rarirya, naek srar ḇefarḇuk ḇa ansine na skara ḇa rya kokofen yoḇ si, ’Yafandun au ḇa.’ (1 Kor. 12:21) Imbape, nari sifawi koma koḇesyowi si ma rosai sifrur faro sidang na.

15. Fararwei rosai naek srar ḇeḇeso sifrur insama sḇuk nabor syadi ro ḇaḇeḇaryas Karajan?

¹⁵ Taun ḇarpur ine, naek srar sibor sfasos ḇepon fa sifrur nabor syadi wer ro fararur ḇesren kuker sfarkor wos ḇese. Roi nane nafnai fa sifrur fararwei ono ro kenem sena. Naek srar ansine sibur sidang ḇeyawos wos manggun sena kwar fa sifarmyan ro sidang moḇ sawos wos ḇese ḇefandun manḇaryas Karajan sibor syadi. (Kis. 16:9) Naek srar ansi skinfir fa sifrur roi ine insama sḇuk nabor syadi ro ḇaḇeḇaryas Karajan. Kakuḇae, roi ine fyandun swaf kawan isof swadon sena nasrawen fa sawos ro wos ḇese, mboi sifrur roi ḇepyum kwar ro sidang. Koḇesyowi kaku naek srar ansine snar rosai sifrur kwar na!

16. Rosai na penatua sya smam ro naek oso insama sifawi isyus kwar fa dakḇe penatua ḇaido hamba pelayanan?

¹⁶ Badan penatua sipok sidwarek awer naek oso fa duffarmyan ḇe penatua ḇaido hamba pelayanan snar syewar kaker fa ifawi dawos wos sḇukidawos ro sidang. Penatua sya na smam naek oso isyus kwar snar iso akurfasnai ro Refo faro penatua ḇaido hamba pelayanan sya. Penatua sya smam awer ro moḇ ifawi dawos pyum kwar wos sḇukidawos ro sidang ya ke roḇa.​—1 Tim. 3:1-10, 12, 13; Tit. 1:5-9.

17. Fafisu kina ḇeḇeso sra ḇe sup ḇese, fakfuken risai fandun fa skarem na?

¹⁷ Kina ḇeḇeso sra ḇe sup ḇese kukro samswen ro sup marin sedi ḇaido imbe sisewar fararur. Rarirya ido, romawa sesi ro rumfarkor na sfarkor wos ḇebabo ḇero sup ani. Sinan sya kako fandun fa sifawi sawos ro wos ani insama napyan fa sismai fararur. Sidang ḇaido raryur ḇeyawos wos manggun sedi naisya ro diwa ido na rariso? Sidang ḇeyawos wos risai fandun fa kina ani siso na? Siso sidang ḇeyawos wos ḇero sup ani ke sidang ḇeyawos wos manggun sedi?

18. Imnis wos ḇero Galatia 6:5 ya, rariso koḇesyowi ḇebukor ro kina oso snemuk ifrur na?

¹⁸ Ḇebukor ro kina iso na ḇekinfir sidang risai na sfanjur ro na. Inja, na kyara pyum kaku fandun ro kina ḇyesi. (Wasya Galatia 6:5.) Koḇesyowi ḇebukor ro kina ani rosai ifrur kwar kukro inema oser-oser na kyamar na. Kofrur na kuker koser pyum kina ani ro sidang koḇedi ma kofasnai koswar si.​—Rm. 15:7.

19. Rosai fandun fa ḇebukor ro kina dor ro nadi ma kyara pyum na?

¹⁹ Kina ḇeḇeso wer imbude siryur ro sidang ḇeyawos wos sinan sesya monda ḇefawi na, mboi romawa sesi sakfawi mnis sawos wos ani ḇa. Sidang ani isya ro sup ḇeyawos wos ani ido, nari samswen  ḇe romawa sya fa sifawi roi sawos ro fananjur na, ma wis sena kuker Yahwe I na syambraḇ ḇa. Kukro? Romawa sya sfarkor ro rumfarkor wos ḇesisye ro wos sinan sesi sḇukidawos ya. Ro fafisu ḇeradine, ḇebukor ro kina ipyum fa kyara mnis kaku ma ḇyenadi dor fawawinanem. Rarirya, ifawi rosai nari ifrur kaku fa ifnoḇek romawa ḇyesi insama sfanam ḇe Yahwe I ma kawasa Ḇyesi. Sinan sya fandun fa sfarkor romawa sesi insama sifawi sawos ro wos manggun sena ke, skara fa siryur kuker sidang ḇeyawos wos romawa sesi sifawi pyum na. Wos snemuk rosai ḇebukor ro kina dun ya, sidang risai kyinfir ya, ipyum ya nafrur fa manggundi ma kina ḇyesi smam sismai syowi ma saswar.

20. Rariso kofasnai syowi faro naek srar ḇefarkor wos ḇebabo sya?

²⁰ Roi kofawi ya iso ro sidang ḇebor, naek srar sisya sisewar fa sfarkor wos ḇebabo. Imbude samswen fa sikofenḇair pyum roi skara na. Kokara moḇ sawos wos ḇebabo monda ḇa, mboi komam saswar ma raryaḇ sena fa sfarmyan ḇe Yahwe I. Komam rari-rari ḇepyum sena ido, nari koswar ma koḇesyowi kaku naek srar koḇesine. Na kopok kokofen ḇa, ’Yafandun au ḇa’, kukro sima sifawi pyum sawos ro wos koḇeja ḇaim.

21-22. Syowi ḇeba rosai kosmai ya?

²¹ Kokofen kasumasa kaku faro Yahwe I kukro ḇyuk syowi ḇeba ḇe ko fa kakfararur ro sidang. Snon ke bin siko ke, kofarḇuk ḇaim ke kofarḇuk kwar ke, roma inai babo ke sinan siko ke, kofawi kawos pyum wos oso ke kofawi kermgun monda ke, Yahwe ma naek srar ḇesesya sesyowi kaku ko.​—Rm. 12:4, 5; Kol. 3:10, 11.

²² Kosmai farkarkor ḇefandun ro Paulus wos sarḇer ḇyena ḇekur baken snonggaku. Iḇye kada roi kofarkor nane kofrur na pdef. Rarirya, nari kofawi nyan fa kosambraḇser naek srar koḇesi. Nafnoḇek ko kako fa koswar ma koḇesyowi si ḇesya kwar.