1. Syowi ḇeba rosai kona ya?

KONA syowi ḇeba fa kaksun ro Yahwe sidang Ḇyedi! Kona aski ḇeba ma komarisen kukro kosyom Yahwe I fnoḇek naek ma srar koḇesi ro sidang ya dori. Fararur rosai nwa ro sidang ya?

2. Wos sarḇer rosai Paulus fyas ro syapram ḇyedi?

² Ro wos sarḇer Paulus fyas ro fasfas ḇeḇeso ro syapram ḇyedi, kofarkor roi nabor ḇekur fararur kosmai ro sidang. Ro syapram ḇyedi oser-oser, Paulus ḇyair sidang Kristen raris baken snonggaku. Doḇe snonggaku ḇero sidang oser-oser simnis ra ḇar-ḇar ro baken koḇena.​—Rm. 12:4-8; 1 Kor. 12:12-27; Ef. 4:16.

3. Roi rikyor rosai nari kawos ro farkarkor ine na?

³ Ro farkarkor ine, nari kawos farkarkor ḇefandun kaku kun ro Paulus wos sarḇer ḇyena. Ḇepon ya, nari kofarkor snar ko oser-oser kona fararur * ro Yahwe sidang Ḇyedi. Ḇesuru ya, nari kawos moḇsa na koḇerai rofyor samswen fa kofawi pyum fararur koḇena ro sidang ya. Ma ḇekyor ya, nari kawos rosai ḇefnai fa komyaren pdef kofrur fararur Yahwe ḇyuk ḇe ko ro sidang ya dori.

4. Farkarkor rosai kun ro Roma 12:4, 5 ya?

⁴ Farkarkor ḇerandak kun ro Paulus wos sarḇer ḇyena iso, Yahwe ḇyesyowi ko oser-oser ro kina Ḇyesi. Paulus  irandak wos sarḇer ḇyena ḇo doḇe, ”Baken koḇena [nya ḇar] nabor. [Ḇar] oser-oser fararur ḇyedi isya ḇardi. Rarirya kuker ko kako, kobor rariso wer ḇape koḇe baken oser snar koḇe oser kuker Kristus. Ma koḇe oser kuker ḇesesya, raris [ḇar-ḇar] ro baken oser.” (Rm. 12:4, 5) Rosai knam ro Paulus wos ḇyenane? Kokam ḇero sidang kona fararur ḇesisye, mboi Yahwe ḇyesyowi kokame.

5. Manseiso Yahwe ḇyuk fa sfarkin sidang ya?

⁵ Imbude kwara snonggaku ḇena fararur ro sidang, ima kyur ḇeri faro ḇefarkin ro sidang sya. (1 Tes. 5:12; Ibr. 13:17) Kakuḇae, roro Kristus i Yahwe ḇyuk ’ḇar snon sya’ fa sfarkin sidang Ḇyedi. (Ef. 4:8) Ḇar snon ansine siso Raryur Naek Ḇefarkin warpu ḇefnoḇek si, anggota Panitia Cabang, pengawas wilayah, ḇeḇuk farkarkor ro sekolah Alkitab, penatua ro sidang, ma hamba pelayanan sya. Naek ansine sismai ramrem kuker rur ḇesren insama smamwarek Yahwe domba Ḇyesi ma sisambraḇser sidang.​—1 Ptr. 5:2, 3.

6. Imnis wos ro 1 Tesalonika 2:6-8, rosai naek ḇesmai ramrem kuker rur ḇesren sisewar kaku fa sifrur na?

⁶ Naek ansi sismai ramrem kuker rur ḇesren fa suf fararur ḇeḇeso. Ḇar ḇero baken koḇena, raris ḇramin ma wemin, sufararur kayam fa susyopan baken koḇena ḇesiper. Rarirya kako, naek ḇesmai ramrem ansine sfararur marḇak kaku fa sifnoḇek sidang-sidang na. Sisewar sanandik faro manggunsi ḇa. Imbape, sisewar kaku fa sisambraḇser naek srar sya. (Wasya 1 Tesalonika 2:6-8.) Kokofen kasumasa faro Yahwe I kukro ḇyuk naek ansine fa smam ḇepon fandun ro snonggaku ḇese ro fandun sena ḇa.

7. Barakas rosai naek srar ḇefarmyan ro oras nakam sismai na?

⁷ Ḇeḇeso ro sidang imbude sḇe si fa suffarmyan ḇe misionaris, perintis istimewa, ḇaido perintis biasa. Naek srar ro supswan ine ḇesiper skinfir fa sḇuk oras sena nasiper fa sra sḇaryas ma sḇuk farkarkor faro snonggaku sya. Rarirya, bisa sifnoḇek snonggaku ḇebor syadi fa sakḇe manfamyan faro Yesus Kristus i. Komam ido, ḇefarmyan ro oras nakam ansine sna pipi ma nana nabor ḇa, imbape Yahwe ḇyebarakas si kuker ḇyuk roi ḇepyum nabore. (Mrk. 10:29, 30) Koswar kaku naek srar ansine, ma komarisen sakro sidang koḇedi kako.

8. Rosai ḇefnai fa Yahwe ḇyesyowi kaku manḇaryas binḇaryas syakam?

⁸ Naek ḇesmai ramrem ma ḇefarmyan ro oras nakam sya serer monda ḇesmai fararur ro sidang ke? Oroḇa! Allah Yahwe ma sidang smam manḇaryas binḇaryas abar ḇepyum syakam sesyowi kaku. (Rm. 10:15; 1 Kor. 3:6-9) Ine rarirya kukro roi ḇefandun kaku faro sidang iso, imbe kofnoḇek snonggaku sya fa sakḇe manfamyan faro Yesus Kristus i. (Mat. 28:19, 20; 1 Tim. 2:4) Manḇaryas binḇaryas ḇebaptis kwar ma ḇebaptis ḇaim syakam, sisewar fa smam ḇepon fararur ḇaḇeḇaryas ro kenem sena.​—Mat. 24:14.

9. Rosai ḇefnai fa koḇesyowi kaku imbesrar ḇero sidang sya?

⁹ Yahwe ḇyesyowi kaku imbesrar ḇero sidang sya kuker ḇyuk fararur ḇefandun kaku fa suf. Ḇyesyowi kaku binswa, sna, kabom, ma imbesrar ḇefarḇuk  ḇa sya kukro sfarmyan pdef ḇe I. Refo dapḇair ḇar bin ḇefrur Yahwe marisen Ḇyena. Sima sfasnai nyan ḇepyum ro fawawinanem, kakyar, raryaḇ, ḇaḇebri, frur pyum, ma fararur ḇepyum. (Luk. 8:2, 3; Kis. 16:14, 15; Rm. 16:3, 6; Flp. 4:3; Ibr. 11:11, 31, 35) Kokofen kasumasa kaku faro Yahwe I kukro ro sidang koḇedi, imbesrar ḇefasnai rari-rari ḇepyum sya sibore!

10. Rosai ḇefnai fa koḇesyowi kaku naek srar ḇesinan kwar sya?

¹⁰ Komarisen ro sidang koḇedi kako naek srar ḇesinan kwar sisya sibore. Ro sidang ḇeḇeso, naek srar ḇesinan kwar ansine sifarmyan pdef ḇe Yahwe I ro kenem sena ḇesiper. Ono sisya insape sfarkor randak kakaku ya. Ḇesesya wer, sidafduf kukro sḇe mansar binsar kwar. Samswen nane nadwarek si fa sifrur nabor syadi ro sidang ma fararur ḇaḇeḇaryas. Imbape, naek srar ḇesinan kwar ansine sifararur imnis samambraḇ sena ro ḇaḇeḇaryas, ma sḇuk samambraḇ sena nasiper fa sisambraḇser ma sfarkor ḇesesya! Ma kosmai payamyum ro farkarkor sḇuk na. Yahwe ḇyesyowi kaku si, ma kakḇesyowi si.​—Ams. 16:31.

11-12. Rariso roma inai babo ro sidang sifrur fa kosambraḇ rai?

¹¹ Kokarapan kako roma inai babo sya. Sismai samswen nabor kukro siba muryas ro Ibiris dunya ḇyedine ma nafo awyae ḇebyeḇa na. (1 Yoh. 5:19) Mboi, fyor komam roma inai babo sya sḇuk kankarem ro fananjur, sakso ro ḇaḇeḇaryas, ma siḇriwarek kakyar sena, ine nafrur fa kosambraḇ kaku. Imbo, roma inai babo mgoya, mgona fararur ḇefandun kaku ro Yahwe sidang Ḇyedi ḇae!​—Mz. 8:2.

¹² Naek srar koḇesi ono sisya samswen fa sikyar sima sesyowi si kaku ro sidang ya dori. Rosai na ḇefnoḇek ko oser-oser insama kofawi sfandun ko ro sidang ya? Rwama komame.

13-14. Rosai ḇefnai fa ono sisya skara sima sifrur roi oḇa ro sidang ya?

¹³ Farkarkor ḇesuru ro Paulus wos sarḇer ḇyena nafrur fa kokarauser samswen ḇekur snonggaku ḇebor ro fafisu ine. Isoine samswen fa sikyar sima sesyowi kaku ro sidang ya. Paulus fyas, ”Rofyor weminya ikofen ḇo doḇo, ’Ḇramin risayaḇa inja, yaksun ro baken anyaba,’ inja rarirya ido weminya dakḇe kina ro bakenya ḇake. Ma rofyor knaramya ikofen ḇo doḇo, ’Snar mkamor risayaḇa, inja yakḇe kina ro bakenyaḇa,’ inja rarirya ido knaramya dakḇe kina ro bakenya ḇake.” (1 Kor. 12:15, 16) Rosai kofarkor ro Paulus wos ḇyenane?

¹⁴ Fafisu mamkara manggundaw kuker snonggaku ḇese ro sidang ido, nari kwara Auma wafrur roi oḇa ro sidang. Sia sekir syadi fa sḇuk farkarkor, sfasos pyum roi ḇero sidang na, ḇaido sawoskir fa sḇuk wos sneprei faro ḇesesya. Imbude kwara Auma na wakmnis si ḇa. Ine fyasnaiḇair nwa sne ḇerun ma wafawi samambraḇ Bena. (Flp. 2:3) Imbape, wasasor Au kukro mamkara ker manggundaw kuker snonggaku ḇena samambraḇ syadi ro Au ido, nari ḇesanekar. Raris rosai Paulus dap anya, imbude kwara Auma wafrur roi oḇaḇeri ro sidang. Rosai ḇefnoḇek Au fa wasawen kakara ḇerarirya?

15. Imnis wos ro 1 Korintus 12:4-11, kona fararur ḇesisye yo, rosai kokyar kaku ya?

¹⁵ Kwarapan roi ine: Yahwe ḇyuk rur ḇesren faro snonggaku Kristen ḇeḇeso ḇero abad randak siwara fa sifrur mujisat. Ḇape, snonggaku Kristen syakam ḇa ḇesmai fararur ḇerarirya. (Wasya 1 Korintus 12:4-11.) Yahwe ḇyuk fararur ma samambraḇ ḇesisye faro si, mboi Yahwe ḇyesyowi kaku sikame. Baboine, rur ḇesren ifnoḇek ko fa kofrur mujisat wer ḇa. Kokyar kaku snar ko oser-oser kona  samambraḇ ḇesisye, mboi Yahwe ḇyesyowi kaku ko.

16. Manwawan Paulus ḇyuk wos anun rosai ipyum fa koso na?

¹⁶ Inja komamkara ko kuker snonggaku ḇese awer, mboi ipyum fa koso Manwawan Paulus wos anun ḇyena. Doḇe, ’Iḇye syadi snonggaku oser-oser imnasen manggundi resari ro kankenem ḇyedi; insape imsik manggundi, mboi myam awer faro kankenem snonggaku ḇese.’​—Gal. 6:4.

17. Payamyum rosai na kosmai snar koso Paulus wos anun ḇyena?

¹⁷ Koso Paulus wos anun ḇyena ma komam rosai kofrur na ido, insape na kofawi kona samambraḇ kako ro snonggaku ḇese. Rupa ra, penatua oso rya dawoskir faya ḇyeja ro ḇarpon ḇa, mboi ḇyekir syadi fa ḇyuk farkarkor ro ḇaḇeḇaryas. Ḇaido imbude ifawi mnis fyasos sidang ḇa raris penatua ḇese, mboi ima penatua ḇefrur pyum ma isawarwar kaku. Rarirya, naek srar sya simarisen sfanam yoḇ i fa sor wos anun ro Refo. Oroḇa ido, nya snonsnon ḇepyum kukro ifrur pyum snonggaku ḇesesya. (Ibr. 13:2, 16) Kofawi pyum samambraḇ koḇena ido, na komarisen faro rosai kofrur ro sidang na. Ma nari kofafayaf manggenem ḇa faro naek srar ḇena samambraḇ ḇesisye ro ko.

18. Rosai na kofrur insama kokir syadi ro fararmyan koḇena?

¹⁸ Ko oser-oser kona fararur ro sidang, inja kokam koḇesewar fa kokir syadi ro fararmyan ma fararur koḇena. Roro Yahwe organisasi Ḇyedi, fyasos roi ḇepyum kwar insa ḇyukifarkor ko. Imnis raris, ro fananjur minggu fadu, kosmai akurfasnai insama kokir syadi ro ḇaḇeḇaryas koḇena. Au kako swewar fa waso raris roi wafarkor ro fananjur ine ke?

19. Wamarisen wakso ro Sekolah bagi Penginjil Kerajaan ido, rosai na wafrur ya?

¹⁹ Fasasos ḇepyum ḇese wer iso Sekolah bagi Penginjil Kerajaan. Ḇeyakso ro farkarkor ine iso naek srar ḇefarmyan ro oras nakam ma ḇena umur taun ri 23 isof 65. Imbude kwara Auma na jadi fa wakso ro farkarkor ine ḇa. Ḇape, kwara awer roi na ḇedwarek Au fa wakso ro farkarkor ine. Kwara monda roi ḇefrur fa wamarisen wakso na. Ramnai, wafrur fasasos ḇepon insama wakso na. Yahwe ifnoḇek Au ma sasewar Bena kwar, inja na swambraḇ fa wafrur roi randak ya kwara na jadi wafrur na ḇa.

20. Farkarkor rosai kun ro Roma 12:6-8 ya?

²⁰ Farkarkor ḇekyor kun ro Paulus wos sarḇer ḇyena naisya ro Roma 12:6-8. (Wasya.) Ro mnuk anine, Paulus ikofen wer ḇo doḇe snonggaku ḇero sidang sna fararur ḇesisye. Mboi kirinema fyasnai kaku fandun fa koḇuk samambraḇ koḇena fa koksambraḇser sidang.

21-22. Rosai kofarkor ro Naek Robert ma Felice fawar suḇena?

²¹ Kokarapan fawar ro naek oso ḇenir ḇe Robert. Fyarmyan ro sup bondi mura, sor i fa kyaḇer ḇe sup marin ḇyedi fa fyarmyan ro Betel. Naek ine ifawi kwar roi ḇefnai fa ismai fararur ḇebabo nane snar ifrur roi ḇesasar ḇa. Imbape doḇe, ”Ro swaf paik ḇe paik, yaryaḇ ḇa kaku kukro yakara yafrur pyum fararur yena ḇa. Fafisu ono yoḇo iḇye yamnai yafararur ro Betel mura.” Moḇsa iryaḇ kaḇer rai? Penatua oso ḇyuk swarapepen ḇe i  ḇo doḇe ro fararur ḇepon ismai na, Yahwe fyarkor i kwar, inja na syambraḇ fa ifrur fararur ḇebabo ismai anna. Naek Robert ifawi ipok myam ḇe ḇarpur awer, mboi myam monda faro roi syambraḇ fa ifrur ro fafisu ine.

²² Naek Felice Episcopo daksmai samswen ḇemnis rarirya. Swari sumnai ro farkarkor Gilead taun 1956, mura sufarmyan ḇe pengawas wilayah ro sup Bolivia. Ro taun 1964, suna romawa. Naek Felice doḇe, ”Samswen kaku fa nubur fararur numanmin kaku ine. Yaḇesanekar kaku ro swaf taun oser. Imboi, Yahwe ifnoḇek aya fa yafadwer kakara yena ma yamam monda faro fararur ḇebabo yasmai fa yamamfaduru romawa yedi.” Ausya wakḇaḇir raris Naek Robert ḇaido Felice su ke? Besanekar kukro warir fararur ḇesren wasmai ro fafisu naiwara ke? Rarirya ido, na waryaḇ syadi fafisu mam monda faro rosai swambraḇ fa wafrur ro kirine fa wafarmyan ḇe Yahwe ma naek srar sya. Wamyaren pdef, buk samambraḇ Bena fa ḇukifnoḇek snonggaku ḇesesya, ma nari wasmai raryaḇ snar swambraḇser sidang ya kwar.

23. Rosai fandun fa kofrur na, ma rosai nari kawos ro farkarkor ḇerama ya?

²³ Yahwe myam ko oser-oser koḇesyowi kaku. Imarisen fa kaksun ro kina Ḇyedi. Kokarauser roi na kofrur fa kosambraḇser naek srar sya ma kosewar kaku fa kofrur na ido, nari kopok kokara ḇa koma sfandun ko ro sidang ya ḇa! Moḇsa komam naek srar ro sidang sya rai? Rariso kofasnai koswar ma koḇesyowi si? Nari kawos roi ḇefandun ine ro farkarkor ḇerama ya.