1. Rosai wafarkor kwar ro Yahwe?

WABA ro kina Saksi ido, imbude farkor fa wafawi Yahwe I kwar ro wabaḇa ya. Sfarkor Au snar Yahwe iso ḇefrur roi nakam, Nya rari-rari ḇepyum, ma Imarisen fyadwer supswan ine ḇe firdaus.​—Kej. 1:1; Kis. 17:24-27.

2. Rosai snonggaku riḇeso sikofen faro snonggaku ḇekyar Allah ima isya?

² Ḇape, snonggaku ḇebor sikyar ḇa Allah ima isya ḇaido snar iso ḇefrur roi nakam. Soḇe kankenem isya ro manggundi, ryama ro roi ḇekasun rawo fyadwer ḇe roi ḇeba syadi. Ḇeḇeso ḇekofen roi ine sima snonggaku ḇefarkor ro farkarkor ḇekaki sirya. Imbude soḇe snar fawawi dunya fyasnai kaku kwar Refo ima syasar, ma snonggaku ḇefarkor ḇa ḇaido ḇefawi royoḇa siso ḇekyar Allah ḇefrur roi nakam ima isya.

3. Rosai ḇefnai fa kosambraḇser kaku kakyar koḇena?

³ Na kakara ro snonggaku ḇepande ansi nari nafrur koḇeḇirḇar snar Yahwe iso ḇefrur ko ke? Ima ndrama ro rosai ḇefnai fa kokyar Yahwe iso ḇefrur roi nakam. Inema snar sikofenḇair ḇe ko fa kokyar monda ḇaido snar kaku kofarkor kwar ma komam ro manggun ko roi ḇefnai kaku na? (1 Kor. 3:12-15) Koisya fyoro kwar ḇe Saksi Yahwe, fandun fa kokam kosambraḇser kakyar koḇena. Rarirya, nari sawyae koḇa kuker ’farkarkor ma sfarkin ko ro nyan ḇesasar’ ro snonggaku ḇepampum Allah Wos Ḇyena sya. (Kol. 2:8; Ibr. 11:6) Ro farkarkor ine nari kawos (1) rosai ḇefnai fa snonggaku  ḇebor sikyar ḇa Allah ḇefrur roi nakam ima isya?; (2) rariso wasambraḇser kakyar Bena faro Yahwe, Manḇefrur Bedi; ma (3) rariso wafaduru kakyar Bedi syambraḇ pdef raya.

4. Imnis Ibrani 11:1 ma fasfas kasun ya, imnis rariso kakyar ani?

⁴ Snonggaku ḇebor soḇe kokyar imnis ra kokyar fafyai monda. Ḇape Refo doḇe, kakyar fandun fa ḇyeknam ro roi oso. (Wasya Ibrani 11:1 ma fasfas kasun.) Kokyar snar Yahwe, Yesus, ma Karajan Allah ro nanggi kaku isya rariryano komam i ḇa, snar kona roi ḇebor ḇefasnai kaku kakakyar ya. (Ibr. 11:3) Saksi oso ḇeyakḇe Ahli biokimia doḇe snar kona fawawi inja kokyar famfnom ḇa, ḇaido kokyar fafyai monda.

5. Rosai ḇefnai fa snonggaku sikyar ḇa snar Allah ḇefrur roi nakam?

⁵ Kirine imbude kokara, ’Kaku roi ḇebor ḇefasnai kaku snar Allah ifrur roi nakam ido, rosai ḇefnai fa snonggaku ḇebor sikyar ḇa kaker?’ Imbo ḇeḇeso ro si bisa simnis rarirya kukro smamuser ro manggun si ḇa roi ḇebor ḇefasnai kaku na. Robert, ḇe Saksi Yahwe ro kirine, doḇe, ”Randak yakara roi ḇefrur nane kam nama anggarkar snar sifarkor na ro rumfarkor ḇa. Ḇape fyor yaḇe umur 20, yasrow kuker Saksi Yahwe sya. Roi sifasnaiḇair na nsun ro swaruser ma yakyar kaku snar sfasnai ro Refo, Allah iso ḇefrur roi nakam.” *—Mam kotak ”Anun faro Sinan Sya”.

6. Rosai ḇefnai fa snonggaku ḇeḇeso sikyar ḇa Allah ima isya?

 ⁶ Snonggaku ḇeḇeso sikyar ḇa Allah ḇefrur roi nakam ima isya snar soḇe sikyar monda rosai smam na. Rariryano, sikyar pdef roi riḇeso smam ḇa na, rupa ra wam, snar sfawi na kwar. Inja, kokyar Refo ikofen na imnis rarirya kako. Ko kako kona roi ḇefasnai kaku snar ”rosai ḇeḇemam ḇa na kaku naisya”. (Ibr. 11:1) Ḇape, sifandun swaf ma sḇesewar fa sfarkor roi ḇefasnai kaku roi anna, ma snonggaku ḇebor simewer sifrur nandi. Inja, skara Allah ima isne ḇa.

7. Ḇefawinananem syakam sikyar ḇa snar Allah ḇefrur supswan farsyos ḇeba ine ke? Fasnaiḇair pan.

⁷ Raris Robert ḇeḇeyap ḇepon ya, ḇefawinananem ḇeḇeso sikyar ḇa kuker Allah snar ro rumfarkor sfarkor si ḇa. Ḇape, ḇebor ro si sfarkor roi ḇefasnai kaku ma sikyar Allah iso ḇefrur supswan farsyos  ḇeba ine. Bisa smambir kaku ma siswar Yahwe. * Koido rarso? Kofarkor ro rumfarkor ḇekaki ke roḇa, fandun fa kokam kosambraḇser kakyar koḇena faro Allah. Snar snonggaku ḇesesya na sifrur ḇe ko ḇa.

8-9. (a) Fakfuken risai nari kawos ro kirine? (b) Fyor farkor Yahwe ḇraur Ḇyena ido, payamyum risai wasmai na?

⁸ Rariso wasambraḇser kakyar Bena faro Yahwe rai? Mgorama kawos nyan rifyak.

⁹ Farkor ro Yahwe ḇraur Ḇyena. Na wasambraḇser kakyar Bena faro Yahwe I kuker mam aiwan sairirya, rokaker, ma mak sya. (Mz. 19:1; Yes. 40:26) Rofyor farkor nabor ido, nari wakyar kaku snar Yahwe iso ḇefrur roi nakam. Ro syap koḇena awawos ḇaido farkarkor nabor naisya nekofenḇair roi ḇepyum sairirya kuker Yahwe ḇraur Ḇyena. Inja, fyorno ido, awawos ḇaido farkarkor ḇerarirya samswen fa sifawi pyum na, ḇoi ḇesewar fa farkor na. Farkor roi swambraḇ fa farkor na. Ro situs web koḇedi, jw.org, vidio ḇepyum naisya kako sifasnai na ro munara sarawrow regional ro taun ḇarpur ine, ḇefasnai Yahwe ḇraur Ḇyena. Bisa mam kako na wer.

10. Buk contoh ḇefasnai kaku snar Allah ḇefrur roi nakam ima isya. (Roma 1:20)

¹⁰ Rofyor farkor ro ḇraur na, kwara pyum rosai na kofarkor ro Allah koḇedi ḇefrur roi nakam. (Wasya Roma 1:20.) Imnis ra, ori isasyar samsam ya ma sananai na ḇebuk kankenem ḇe ko. Ḇape, oriya kako sananai ro sinar ultraviolet bisa myun snonggaku. Rariso kokadaunwarek ko rai? Ro ris supswan koḇedine, lapisan ozon ḇyedi kako ikpor kaku. Inja, na kokyar snar Manḇefrur ḇepande kaku ḇefrur roi nane kam ima isya ma iswar ko.

11. Rodiso wasrow awawos ma vidio kuker Yahwe ḇraur Ḇyena, na ḇesambraḇser kakyar ya? (Mam kotak ” Syap Ḇesambraḇser Kakyar Ya”.)

¹¹ Ro Indeks Publikasi Menara Pengawal ma ro jw.org, na wasrow awawos ḇaido farkarkor nabor ma vidio kuker ḇraur, ḇesambraḇser kakyar ya. Mam ḇepon ro ḇar ”Apakah Ini Dirancang?” Awawos ma vidio ro ḇar ani naknampu monda, ma bisa wafarkor nabor ro roi ḇepyum kaku ro aiwan ma ḇraur ḇesena. Contoh naisya kako kuker rariso ḇefawinananem sya sḇesewar fa sisofarari roi smam ro supswan farsyos ine.

12. Rofyor kofarkor Refo, rosai monda na kokarauser na?

¹² Farkor Refo. Ahli biokimia ḇeḇeyap ḇepon ani randak ya dakyar ḇa snar Allah isya. Ḇape, ḇarpur ya ikyar. Doḇe, ”Roi ḇefrur yakyar iso snar fawawi yasmai ro farkarkor yena monda ḇa. Ḇape yafarkor pyum Refo ya kako.” Imbude wafawi pyum kwar farkarkor ro Refo na. Ḇape insa wasambraḇser kakyar Bena faro Yahwe, fandun fa wafarkor Refo ya pdef. (Yos. 1:8; Mz. 119:97) Kwarauser kakaku oser-oser ḇeḇefas ro Refo ḇekur sarisa ḇeḇejadi kwar na. Mam kako rariso ḇardadi anna ndarirya, ma ḇefas Refo sya simnis kam ḇa ḇoi roi sfas na namnis yae. Ine na nafrur wakyar kaku snar Allah ḇesaswar ma ḇefawinanem iso  ḇefrur koni, ma Iso ḇebuk Refo ya ḇe ko. *—2 Tim. 3:14; 2 Ptr. 1:21.

13. Anun ḇepyum oso risai wasrow ro Allah Wos Ḇyena?

¹³ Rofyor kofarkor Allah Wos Ḇyena, mampan snar anun Ḇyena nbuk payamyum. Imnis ra, rofyor iwara Refo byuk swarapepen snar saswar faro pipi ima nun roi ḇemun ma kandera nabor. (1 Tim. 6:9, 10; Ams. 28:20; Mat. 6:24) Swarapepen ani isrow kaker faro fafisu koḇedine ke? Syap oso ikofenḇair kenem ro snonggaku ḇero baboine doḇe, ”Snonggaku mgaba pipi sya komam kada sismai aski yoḇa ma siḇor famfnom kaku. Skara sna pipi nabor monda nafrur snonggaku rya siḇe sisarbir kwar; snonggaku ḇeraryansya kako inoido sidafduf ker.” Inja, swarapepen ḇero Refo kuker saswar faro pipi ima roi ḇekaku dirya. Kwara pan wos farkin ro Refo ḇesena ḇepyum ḇefnoḇek Au kwar na? Kokarauser anun ḇepyum nakam ro Refo ido, nari kofawi Allah ḇefrur ko iswar ma ifawi roi ḇepyum faro ko na, ma nari kokyar anun Ḇyena ḇesya kwar. (Yak. 1:5) Barakas ya, kenem koḇena nari neaski syadi.​—Yes. 48:17, 18.

14. Rosai na wafawi ya rofyor wafarkor Refo?

¹⁴ Wafarkor kaku Refo ya insama mambir pyum Yahwe I. (Yoh. 17:3) Rofyor wafarkor Refo, na wafawi Yahwe rari-rari ma kenem Ḇyena, ma rari Ḇyena na wasrow kako fyor wafarkor ro ḇraur Ḇyena. Ine nari nbuk kakakyar ḇe Au snar Yahwe ima isya kaku, ma fawar ḇeanggarkar risya ḇa. (Kel. 34:6, 7; Mz. 145:8, 9) Mambir kaku Yahwe ido, nari kakyar Bena nasur, waswar I kuker sne ḇesiper, ma wis Bena kuker I nari syambraḇ kaku.

15. Payamyum rosai wasmai na fyor fawar rosai wakyar ḇe snonggaku ḇesesya?

¹⁵ Fawar ḇe snonggaku ḇesesya rosai ḇefnai fa wakyar faro Allah. Ine nari nasambraḇser kakyar Bena. Ḇape, rariso fyor wabaryas ḇe snonggaku sya ḇoi sikyar ḇa Allah ima isya, ma wakmom moḇsa wafasnaiḇair na rai? Swewar kankarem ḇero Refo na ro syap koḇena. (1 Ptr. 3:15) Ḇaido, wor Saksi ḇekir sya fa sifnoḇek pyan Au. Kaku, snonggaku wabaryas yoḇ si na simarisen ke roḇa faro roi wakofenḇair ro Refo na. Ḇape, nari wasmai payamyum fyor swewar ma farkor ro syap-syap na, snar nari kakyar Bena nasambraḇ. Inja, snonggaku smam ḇe ḇepande ḇaido ḇefarkor ro rumfarkor ḇekaki ma ḇekofen Allah ima isya ḇa, nari sawyae Au ḇa.

16. Kofaduru kakyar koḇena syambraḇ pdef ḇa ido rosai na kosmai ya?

¹⁶ Koisya kofarmyan ḇe Yahwe fyoro kwar ke roḇa, fandun fa kofaduru kakyar koḇena faro I syambraḇ pdef. Rosai ḇefnai i? Snar kakyar koḇena bisa syambraḇ ḇa. Imnis kawos kwar, kokyar faro roi komam ḇa na snar nefasnai kaku. Ḇape roi nane neḇemam ḇa, napyan ḇe ko fa koḇefnder na, ma nafrur kokyar ḇa. Iso ḇewar fa, Paulus ikofen ḇo doḇe snar kakyar noḇa napyan fa kofrur sasar ma nḇedenem ḇe ko. (Ibr. 12:1) Inja, rariso kobinggwanbur denem ani?​—2 Tes. 1:3.

17. Rosai kofandun ya insa kofaduru kakyar koḇena syambraḇ pdef?

¹⁷ Koḇenadi ker fa kor Yahwe rur ḇesren Ḇyedi. Rosai ḇefnai ya? Snar kakyar ima syun ro bon rurya. (Gal. 5:22, 23) Kuker  fafnoḇek ro rur ḇesren ḇa, na jadi ḇa fa kofaduru kakyar koḇena syambraḇ pdef faro Yahwe I. Fyor kor ker Yahwe rur ḇesren Ḇyedi, nari byuk ḇe ko. (Luk. 11:13) Oso wer ido, na kokofen ro nadi koḇena, ”Buk sambraḇ maḇe nko ro kakyarya.”​—Luk. 17:5.

18. Imnis Mazmur 1:2, 3 ya, hadiah ḇepyum kaku risai kosmai ro Yahwe?

¹⁸ Kofarkor myaren Allah Wos Ḇyena. (Wasya Mazmur 1:2, 3.) Rofyor Mazmur oser ḇyeḇefas, raja, imam sya, ma snonggaku Israel kermgun monda bena fasfas ḇesiper ro Allah Sasoser Ḇyena. Ro taun ḇefik ya, snon, bin, romawa sya, ma snonggaku mandaman syakam ro Israel siryur fa srower Allah Sasoser Ḇyena siwasya na. (Ul. 31:10-12) Ro Yesus fafisu ḇyedi, snonggaku kermgun monda ḇesmai Allah syap ḇeniw Ḇesren Ḇyedi, ma ḇebor ro fasfas nane sikram ro rum ari na. Ḇape kirine, Refo ḇaido ḇar ono ro Refo na, snonggaku syakam bisa siwasya na. Inema hadiah ḇepyum kaku. Rariso kofasnaiḇair snar koḇesyowi Refo ya?

19. Rosai na kofrur kaku insama kakyar koḇena nasambraḇ pdef?

¹⁹ Infa kofasnaiḇair snar kosyowi Allah Wos Ḇyedi, fandun fa kowasya na ro ras ḇe ras. Fandun fa kofrur jadwal kako insama kofrur farkor manggun koḇena ḇesya kwar, inema fyor kona swaf monda ḇa. Kofrur rarirya, kakyar koḇena na nasambraḇ pdef.

20. Snemuk rosai imbe kuni?

²⁰ Imnis ra snonggaku ḇekara ”ḇefawinananem” ro dunya ine sya ḇa, koma kona kakyar ḇesambraḇ ma ḇeknam ro Allah Wos Ḇyena. (Mat. 11:25, 26) Snar kofarkor Refo, inja kofawi rosai ḇefnai fa dunya ine iḇyeḇa syadi, ma rosai nari Yahwe ifrur ya. Inja, mgorama kun snemuk fa kosambraḇser kakyar ma kofnoḇek snonggaku ḇebor fa sikyar faro Allah koḇedi ḇefrur roi nakam. (1 Tim. 2:3, 4) Iḇye kada kowaf ras fafisu snonggaku syakam ro supswan nari sisandik Yahwe imnis raris wos ḇero Wahyu 4:11: ’Yahwe, Allah nggoḇedi, wasyus fa wasmai sanandik snar Au ḇefrur roi ḇeḇor kam.’