1. Rariso Abraham fyasnaḇair ikyar faro Yahwe nanapes Ḇyedi? (Mam sonin ro randak artikel ine.)

”NARI Mankara ro supswan ḇesiper ifrur roi ḇenapes ḇa ke?” (Kejadian 18:25) Abraham ḇyuk fakfuken ine snar ḇyeḇirḇar ḇa. Ḇape, fakfuken ḇyedi kyurfasna ikyar Yahwe nari ḇyemankara mnu ḇeḇa Sodom ma Gomora kuker nanapes ḇekaku ya. Ikyar snar Yahwe nari ”myun snonkaku ḇenapes fnoḇek snonkaku ḇeḇarḇorsya” ḇa. Abraham ikyar Yahwe nari ifrur rariryaḇa. Ḇarpurya, Yahwe fyasna mankundi kuker wos nane, ”Bon Karui, fararur ḇyena namnis, snar nyan ḇyena kam inapes. Allah ḇesouser, roi ḇenapesḇa nasya ro i ḇa; ima inapes ma sne ḇyeja inapes.”—Ulangan 31:19; 32:4.

2. Sai ḇefnai roi ḇenapesḇa nasya ro Yahwe I ḇa?

² Sai ḇefnai Abraham ikyar Yahwe nari ifrur roi ḇenapes ḇesya kwar? Snaro Yahwe iso farari ḇepyum ro nanapes ma kakaku. Snar Yahwe standar ḇyenakam nkaku,  inja nari ḇyemankara kuker nanapes. Refo ikofen, ”Ima iswar kaku ḇaḇeaski ma nanapes.”—Mazmur 33:5.

3. Contoh rosai ḇefasnaḇair ḇaḇenanapesḇa ro dunya baboine?

³ Nari komarisen kaku snar kofawi Yahwe ima inapes besya kwar. Ḇape, kosya kokenem ro dunya ḇefo kuker ḇaḇenanapesḇa. Imnis raris, snonkaku oso sikofen syasar inja sisun i ḇe bui, ḇape kakuya ifrur roi ḇeḇarḇor ḇa. Ramnai, Ro tes DNA sifrurna, insape sifawi snar snonkaku ani syasarḇa. Ḇape, ryo bui kawan kaku kwar. Snar ḇaḇenanapesḇa ḇeradine na nafrur snonkaku ani imsor kaku ma ḇyestres. Ḇape ḇaḇenanapesḇa ḇese isya samswen kaku fa kokamarna. Rosai rirya?

4. Rariso kakyar ro snonkaku Kristen bisa neḇefrowes?

⁴ Snar koine snonkaku Kristen, kofawi nari kosmai roi ḇemnisḇa ro dunya ine. Ḇape kakyar koḇena bisa neḇefrowes fyor komam roi ḇemnisḇa ḇaido kemir sifrurmnis koḇa ro sidang yadori. Rofyor wasmai roi ḇeradirya, rosai nari wafrurya? Nari roi nane nafrur fa wakarkar ke?

5. Sai ḇefnai na kokandorḇa rofyor komam ḇaido kosma roi ḇemnisḇa ro sidang?

⁵ Kokam snonkaku ḇenapesḇa ma kakfrur sasar kako. Inja nari sino sisya sifrur roi ḇemnisḇa faro ko ḇaido ko kako nari kofrurmnis snonkaku sya ḇa ro sidang ya. (1 Yohanes 1:8) Kofawi roi nane nḇejadi ro ras ḇe ras ḇa, ḇape snonkaku Kristen ḇemas kwar sya sikandorḇa ḇaido skarkarḇa rofyor sismai roi ḇemnisḇa. Yahwe ḇyuk anun ḇemnis kaku ro Refo ḇefnoḇek ko fa kosouser pdef rofyor naek ḇaido srar koḇesi sifrumnis ko ḇa.—Mazmur 55:12-14.

6, 7. Roi ḇemnisḇa rosai naek oso ismana ro sidang ma rari rosai ḇefnoḇek i?

⁶ Kokarapan fawar ro Willi Diehl. Ro 1931, Naek Diehl fyarmyan randak ro Betel Swiss ḇero mnu ḇeba Bern. Ro 1946, dakso farkarkor Sekolah Gilead kelas ḇeḇewar ro New York, AS. Rofyor fyarkor ramnai ismai fararur keliling ro Swiss. Ro farfyar ro kankenem ḇyeja, Naek Diehl ikofen snar ro Mei 1949, ikofenḇair ḇe kantor cabang Swiss snar imḇe fyarḇuk. Ramnai, naek bena fakamamar rodiwa sikofen ḇe i snar nari ismai hak istimewa ḇyeja werḇa. Nari ḇyeperintis monda. Naek Diehl ikofen, ”Yaḇuk faya werba.” Ma ”Naek srar siḇor sawos kuker nuḇa, sifrurnu raris snonkaku sepecat kwar sya.”

⁷ Rosai Naek Diehl ifrurya? Ikofen, ”Nufawi snar farḇakḇuk ima neknam ro Refo, inja nuyor samambraḇ ro nadi ma nukyar kaku faro Yahwe I.” Kakuḇae, naek ḇeḇeso ro fafisu ani sifawimnis ḇaim mamam Yahwe kuker farḇakḇuk. Ḇape ḇarpurya, fawawi sena neḇefadwer kaḇer, ma Naek Diehl ismai kaḇer hak istimewa ḇyeja. Yahwe ḇyebarakas i snar isoasuser. * (Mam fas-fas kasun ro sop.) Inja,  kofuken mankunko: ’Fyor yasmai roi ḇemnis rarirya ido, nari yaḇe kaḇaḇab ma yawaf Yahwe ifrurmnis fafisu ya ke? Ḇaido yakyar faro mankundaya ma yafrurmnis kaḇer roi ḇemnisḇa ani ke?’—Amsal 11:2; wasya Mikha 7:7.

8. Sai ḇefnai fa kokara awer ko ḇaido snonkaku ḇesesya sifrumnis ko ba?

⁸ Rofyor komam ḇaḇenanapesḇa nasya ro sidang ido, koswarepen imbude rosai kokarana nsasar. Sai ḇefnai ya? Snar koine snonkaku ḇenapesḇa ma imbude kofawimnis ḇaim roi ḇeḇejadi na. Ko kako imbude kofawimnis ḇaim kakakuya. Ḇape kofawimnis ḇaim ke roba, fandun fa koḇenadi ḇe Yahwe I kuker roi ani, kokyar faro I ma kosouser pdef. Kuker rarirya, na ”komsor Yahwe I ro sne koḇedi” ḇa.—Wasya Amsal 19:3.

9. Contoh mansei monda nari komam ro artikel ine ma ḇeuserya?

⁹ Mkorama kofarkor ro contoh rikyor rariso Allah kawasa ḇyesi ro awar Refoya sakfrurmnis si ḇa. Ro artikel ine, nari komam Abraham kpu ḇyedi Yusuf i ma rosai ḇedar byesya sifrur faro i na. Ro artikel ḇeuser ya, nari komam rosai Yahwe ifrur faro Raja Ahab ma rosai Petrus ismaina ro Antiokhia Siria. Rofyor kowawos contoh-contoh nane, kwarapan nyan rosai ḇefnoḇek Au fa mam monda faro Yahwe I ma faduru ḇaḇebati Bedi kuker I, iḇa syadiwer fyor kwara sifrurmnis Au ḇa.

10, 11. (a) Roi ḇemnisḇa rosai Yusuf ismaina? (b) Swaf rosai Yusuf ismaina rofyor syun ro bui?

¹⁰ Yusuf ima Allah manfamyan ḇesouser ḇyedi ḇesmai roi ḇemnisḇa nabor kaku. Roi ḇemnisḇa ismana ndramuma ro snonkaku ifawimnis ḇaim sya. Ḇape, roi ḇefrur fa sne ḇyedi iduf kaku iso snar eba ḇyesya sifrumnis i ḇa. Rofyor ḇyeumur 17, eba byesya sun fasis i ma sḇoḇ i ḇe women. Ramnai, sun i ḇe Masir. (Kejadian 37:23-28; 42:21) Ḇarpurya, ro sup bondi, skursof imbe denfus bin oso. Inja sisun i ḇe bui fyor sisewar kakakuya ḇaim. (Kejadian 39:17-20) Isma kandera taun ri 13 ḇe women ma snonkaku ḇebarek ro bui. Rofyor naek srar koḇesya sifrurmnis koḇa ido, farkarkor rosai bisa kun ro Yusuf fawar ḇyedi?

¹¹ Rofyor Yusuf ryo bui, isrow kuker ḇeḇukor ro fasasos aninem ḇe raja ḇeyaksun ro bui kako. Ro roḇ oso, ḇeḇukor ani myafu ma Yahwe ifnoḇek Yusuf i fa fyasnaḇair mafafu ḇyena. Yusuf ikofen snar ḇeḇukor ro aninem ani nari sisae i ro bui ma fyararur kaḇer ḇe Firaun. Ramnai Yusuf ḇyuk swaf ani fa fyawar rosai ismaina faro snon ani. Bisa kofarkor nabor ro rosai Yusuf ikofen monda ḇa, ḇape ro rosai ikofen ḇana kako.—Kejadian 40:5-13.

12, 13. (a) Rosai ḇefasnabair Yusuf myam monda ḇa roi ḇemnisḇa ismai na? (b) Rosai Yusuf ikofenḇa faro snon ḇeḇukor ro aninem ani?

 ¹² Wasya Kejadian 40:14, 15. Ro mnuk ine, Yusuf ikofen ”sun fasis i” kwar. Wos Refo ikofen rodine knam ḇyeja kako kyurfasna ḇe ”skarawi”. Inja, ine kyurfasna sifrurmnis i ḇa kaku. Yusuf i kako ikofenbos roi skursof ḇe i na nkakuḇa ma syasarḇa. Iso ḇefnai fa ikofen ḇe ḇeḇukor ro aninem ani fa ikofenbair i ḇe Firaun i. Rosai maksud ḇyedi? Ikofen, ”Wafnoḇek aya insama yasaebur moḇ ine.”

¹³ Yusuf myam monda roi ḇemnisḇa ismai na ke? Oroba! Yusuf ifawi ḇyekandera kaku snar sifrurmnis i ḇa. Iso ḇefnai fa ikofenḇair rosai ismaina ḇe snon ḇeḇukor ro aninem ani, insama snon ani bisa ifnoḇek i. Ḇape Refoya ikofenḇair ḇa Yusuf dawos ḇe snonkaku oso ḇaido Firaun i, snar eba ḇyesya siso ḇeyun fasis i. Ine nefasnaḇair rofyor ḇedar ḇyesi srama imbe sor maf ḇe Yusuf i, Firaun isaser si ma iwan si fa sḇarek ro Masir ma sismai marisen faro ”roi ḇepyum ḇero sup Masir”.—Kejadian 45:16-20.

14. Rosai nari ḇedwarek ko insama kawos wos ḇeḇyeḇa rofyor sifrurmnis koḇa ro sidang?

¹⁴ Fyor kokara sifrurmnis koḇa ro  sidang ido, kosasor ko insama kofawar famfnom awer roi ḇemnisḇa sifrur ḇeko na. Kakuḇae, fandun fa kofuken ḇe penatua sya ma kokofenbair ḇesi rofyor naek oso ifrur sasar ḇeba. (Imamat 5:1) Ḇape, roi ḇemnisḇa ḇeḇeso ḇero sidang ya nama sasar ḇeba risyaḇa. Ma imbude bisa kofrurmnis kaḇer roi ani kuker naek koḇedi ma kokofenbair ḇe snonkaku ḇesesya ḇa, ḇaido penatua sya. (Wasya Matius 5:23, 24; 18:15.) Inja ro fafisu ḇeradine, fandun fa kosouser pdef ma kofrur ro kankenem koḇena wos ḇefarkin ro Refo. Fyorno ido, insape kofawi snar koiso ḇefawimnis ḇaim roi ḇeḇejadiya, ma kosma kanderaḇa ro roi ḇemnisḇa sifrurna. Komewer kofrur fafisuya naḇyeḇa syadi kuker kokofen roi ḇeḇyeḇa faro snonkaku ḇesesya kuker naek ani! Ḇape, koswarepen kosasar ke roḇa, kokofen roi ḇekakuḇa nari nafrur fafisu ya ipyum syadi werḇa. Kosouser faro Yahwe ma naek srar kobansi ido, nari nadwarek ko fa kawos famfnom ḇa kuker naek srar kobansi. Ḇefas mazmur ikofen ”ḇembran kuker soasuser”, ima ”danonef kuker ramar ḇyediḇa ma faro bati ḇyeja ifrur roi ḇeḇarḇor ḇa”.—Mazmur 15:2, 3; Yakobus 3:5.

15. Rariso ḇaḇebati Yusuf ḇyedi kuker Yahwe nun barakas?

¹⁵ Bisa kosmai farkarkor ḇefandun ḇesewer ro Yusuf i. Ḇye kandera kaku snar sifrurmnis i ḇa taun ri 13, ḇape Yusuf myam roi isma nane imnis raris Yahwe mamam ḇyeja. (Kejadian 45:5-8) Ḇyuk sasar ḇe Yahwe I ḇa faro roi ḇekuri na. Kakuḇae, byefnder kandera ismana snar sifrurmnis i ḇa, ḇape roi anna ifrur fa ḇyesnesoḇa. Ḇefandun syadi ya, ipok fa myam ḇaḇemnisḇa ma sasar snonkaku ḇese ḇefrur fa ḇyinkwanbur Yahwe I. Soasuser Yusuf ḇyedi nḇuk swaf ḇe i fa myam Yahwe ifrurmnis kaḇer roi ḇemnisḇa ismana ma ḇyebarakas i ma kina ḇyesya.

16. Sai ḇefnai fa kofanam syadi ḇe Yahwe rofyor sifrurmnis koḇa ro sidang?

¹⁶ Kuker soasuser, fandun fa koḇesyowi ma kofaduru ḇaḇebati koḇena kuker Yahwe I. Kopok komam sasar ro naek srar kobansi ḇefrur fa koḇinkwanbur Allah koswar ma kosyom ani. (Roma 8:38, 39) Ḇape, rofyor sifrurmnis koḇa ro sidang, komarisen kosofarari Yusuf i ma kofanam syadi ḇe Yahwe I. Koḇensewar fa komam roi nakam imnis Yahwe mamam ḇyeja. Rofyor kofrurmnis samswen kosmana imnis kuker wos ḇefarkin ro Refo, fandun fa korirna ro Yahwe bramin  ḇyena. Kokyar nari ifrurmnis nakam ro fafisu ma kuker nyan ḇemnis kaku faro I.

17. Rariso kofasnabair kokyar faro ”Mankara ro supswan ḇesiper”?

¹⁷ Snar kokenem ro dunya ḇeḇarḇor kaker, inja nari fafisu oso sifrurmnis koḇa. Fyorno ido, ko ḇaido snonkaku kofawi sya imbude kosma ḇaido komam roi ḇemnisḇa ro sidang ya. Rofyor roi ine nḇejadi ido, koswarepen insama kokarkar awer kuker roi anna. (Mazmur 119:165) Ḇape, wasouser faro Yahwe, ḇenadi fa wor farfnoḇek ro I ma wakyar kaku I. Waswarepen, snar Auma snonkaku ḇenapesḇa, imbude nari kwara sasar fafisu wasmana. Ma imbude wafawi mnis kakuḇa roi ḇeḇejadi ya. Inja, wafarari Yusuf i ma wakofen roi ḇemnisḇa awer, ḇefrur fa fafisu ani naḇyeḇa syadiwer. Ḇardibur wakyar faro mankundaw, wun snemuk fa wasouser pdef ma wawaf kuker kaḇaḇaḇ Yahwe nari ifrurmnis roi nakam. Kuker rarirya, nari Yahwe imarisen ma ḇyuk barakas ḇe Au raris Yusuf i. Bisa wakyar snar Yahwe ima ”Mankara ro supswan ḇesiper,” ḇefrur roi ḇenapes besya kwar, ”snar nyan ḇyenakam inapes”.—Kejadian 18:25; Ulangan 32:4.

18. Rosai nari kofarkor ro artikel ḇeuser ya?

¹⁸ Ro artikel ḇeuser ya, nari kofarkor contoh risuru wer ro Yahwe kawasa ḇyesya ro awar Refo ḇesmai ḇaḇenanapesḇa. Ro contoh-contoh nane nari nafnoḇek ko fa komam rariso sne ḇerun ma ḇaḇeampun nari nafnoḇek ko fa kofarari mamam Yahwe ḇyedi kuker nanapes.